মথি 27
27
পীলাত মুজুঙোত্ প্রভু যীশু
(মার্ক ১৫:১; লূক ২৩:১,২; যোহন ১৮:২৮-৩২)
1বেন্যেমাদান্ আজল্ ধর্মগুরুগুনে আর বুড়ো নেতাগুনে বেক্কুনে যীশুরে মারে ফেলেবার্ কধাগান্ ঠিগ্ গুরিলাক্। 2তারা যীশুরে বানি নেযেইনে রোমীয় আজল্ শাসনগুরিয়্যে পীলাত আঢত্ দিলাক্।
যিহূদার্ মরণ্
(প্রেরিত্ ১:১৮,১৯)
3যীশুরে শত্রুগুনো আঢত্ যে ধুরি দিয়্যে সেই যিহূদা যেক্কে দেগিলো যীশুরে বিচেরত্ দুষি বিলি ঠিগ্ গরা ওইয়্যে সেক্কে তার্ মনত্ দুঘ্ অলঅ। তে আজল্ ধর্মগুরু আর বুড়ো নেতাগুনো ইধু সেই তিরিস্চো রূবোর্ দীনার্ ফিরেই দিইনে কলঅ, 4“মুই নিদ্দুজিবোরে মারে ফেলেবাত্তে ধুরি দিইনে পাপ্ গোজ্যং।”
তারা কলাক্, “সিয়েন্দোই আমার্ কি? তুয়ই সিয়েন্ বুঝিবে।”
5সেক্কে যিহূদা সেই রূবোর্ টেঙাগুন্ নিইনে উবোসনা-ঘর ভিদিরে মেলা মারিনে গেলগোই আর ফাঁস হেইনেই মুরিলো।
6আজল্ ধর্মগুরুগুনে সেই রূবোর্ টেঙাগুন্ লোইনে কলাক্, “এই টেঙাগুন্ উবোসনা-ঘরর্ তহবিলোত্ থনা ঠিগ্ নয়, কিয়া ইগুন্ লো-গানর্ দাম্।” 7পরেদি তারা সল্লা গুরিনে সে টেঙাগুন্দোই বিদেশীগুনোর্ এক্কান্ গোর জাগাত্তে কুমোর ভূইয়ান কিনিলাক্। 8সেনত্তে সেই ভূইয়ানরে এজঅ লো ভূই কুয়ো অয়। 9ইয়েন্দোই ভাববাদী যিরমিয়র মাধ্যমে যে কধাগান্ কুয়ো ওইয়্যে সিয়েন্ পূরোণ্ অলঅ: “তারা তিরিস্চো রূবোর্ দীনার্ ললাক্। এই টেঙাগুন্ তার্ দাম। ইস্রায়েলীয়গুনে তাত্তে এই দামান্ ঠিগ্ গোজ্যন্। 10প্রভু যেবাবোত্যেগুরি মরে উগুম্ গোজ্যে সেবাবোত্যেগুরি তারা কুমরর্ ভূইয়ানত্তে এই টেঙাগুন্ দিলাক্।”
প্রভু যীশুর বিচের্
(মার্ক ১৫:২-১৫; লূক ২৩:৩-৫,১৩-২৫; যোহন ১৮:৩৩-১৯:১৬)
11ইন্দি যীশু সেক্কে আজল্ শাসনগুরিয়্যে পীলাত মুজুঙোত্ থিয়্যেই এলঅ। শাসনগুরিয়্যেবো তারে পুযোর্ গুরিলো, “তুই কি যিহূদীগুনোর্ রাজা?”
যীশু জোব্ দিলো “তুই ঠিগই কর্।”
12আজল্ ধর্মগুরুগুনে আর বুড়ো নেতাগুনে তারে ভালোক্কানি দুষ্ দিলাক্ মাত্তর্ তে কনঅ জোব্ ন-দিলো। 13সেক্কে পীলাতে তারে কলঅ, “ইগুনে তরে কদক্ দুষ্ দেদন্ সিয়েনি কি তুই ন-শুনোর্?” মাত্তর্ যীশু এক্কান্ কধার্অ জোব্ ন-দিলো। 14ইয়েন্দোই সেই শাসনগুরিয়্যেবো অমকদ আমক্ ওই গেলঅ।
15পত্তি উদ্ধোর্-পরবর্ সময় আজল্ শাসনগুরিয়্যেবো মানুচ্চুনোর্ বেঈ লোইয়্যে এক্কো বন্দীরে ইরি দিদো। ইয়েন্ এলদে তার্ সুদোম্। 16সেই সময়োত্ জেল্খানাত্ বারাব্বা নাঙে এক্কো জঘন্য বন্দী এলঅ। 17মানুচ্চুনে এক সমারে এগত্তর্ অনার্ পরেদি পীলাতে তারারে পুযোর্ গুরিলো, “তুমি কি চঅ? তমাত্তুন্ মুই কারে ইরি দিম্, বারাব্বারে, না যিবেরে মশীহ কয় সেই যীশুরে?” 18পীলাতে গমেডালে হবর্ পেদঅ যে ইহূদী নেতাগুনে ইংসে গুরিনে যীশুরে তা আঢত্ তুলি দুয়োন্।
19পীলাতে যেক্কে বিচের আসনত্ বুয়োই এলঅ সেক্কে তা মোক্কো তারে কোই পাধেল, “সেই নিদ্দুজি মানুচ্চোরে তুই কিচ্ছু ন-গুরিচ্, কিয়া এচ্চ্যে স্ববনত্ মুই তাত্তে বোউত্ দুঘ্ পেইয়োং।”
20মাত্তর্ আজল্ ধর্মগুরুগুনে আর বুড়ো নেতাগুনে মানুচ্চুনোরে ভেজেই দিলাক্ যেন তারা বারাব্বারে মাগি লন্ আর যীশুরে মারে ফেলেবাত্তে কধা কন্। 21পরেদি আজল্ শাসনগুরিয়্যেবো মানুচ্চুনোরে পুযোর্ গুরিলো, “এ দ্বিজনত্তুন্ মুই তমা ইধু কারে ইরি দিম?”
তারা কলাক্, “বারাব্বারে।”
22সেক্কে পীলাতে তারারে কলঅ, “সালে যিবেরে মশীহ কন্ সেই যীশুরে নিইনে মুই কি গুরিম্?”
তারা বেক্কুনে কলাক্, “তারে ক্রুশোত্ দিয়্যে ওক্।”
23পীলাতে কলঅ, “কিত্তে, তে কি দুষ্ গোজ্যে?”
সেক্কে তারা আরঅ বেশ্ গুরি রঅ ছাড়িনে কুয়ো ধুরিলাক্, “তারে ক্রুশোত্ দিয়্যে ওক্।”
24পীলাতে যেক্কে দেগিলো তে কিচ্চু গুরি ন-পারের্ বরং আরঅ জোল্ অর্, সেক্কে তে পানিলোই মানুচ্চুনো মুজুঙোত্ আঢ্তানি ধোইনে কলঅ, “এ মানুচ্চোর্ লো-গানত্তে মুই দায়ী নয়; তুমিই সিয়েন্ বুঝিবা।”
25জোবত্ মানুচ্চুনে বেক্কুনে কলাক্, “আমি আর আমা পুয়ো-ছাগুনে তা লো-গানর্ দায়ী অবং।”
26সেক্কে পীলাতে বারাব্বারে মানুচ্চুনো ইধু ইরি দিলো, মাত্তর্ যীশুরে অমকদ চাবুক্ মারিবার্ উগুম্ দিইনে ক্রুশোত্ দিবাত্তে দিলো।
সৈন্যগুনোর্ ঠাট্টা-তামাজা
(মার্ক ১৫:১৬-২০; যোহন ১৯:২,৩)
27সে পরেদি পীলাতর্ সৈন্যগুনে যীশুরে তা রাজঘর জাগান ইধু নেযেলাক্ আর বেক্ সৈন্যগুনোরে যীশুর্ চেরোকিত্তে থুবেলাক্। 28তারা যীশুর কাবড়-চুগোড়ানি খুলিনে তারে রাঙা রঙর্ কাবড় উরেই দিলাক্। 29পরেদি তারা কাদা-লুদিলোই এক্কো মুকুট বানেইনে তা মাঢাবোত্ পিনেই দিলাক্, আর তা ডেন্ আঢত্ এক্কো লুদিক্ দিলাক্। সে পরেদি তা মুজুঙোত্ আঢু পাদিনে তারে তামাজা গুরিনে কলাক্, “যিহূদী-রাজ, জয় ওক্!” 30সেক্কে তা কিয়্যেত্ তারা সেফ্ ফেলেই দিলাক্ আর সে মুগোর্লোই তা মাঢাবোত্ বার্বার্ আঘাত্ গুরিলাক্। 31তারে তামাজা গরানার পরেদি তারা সেই পোজাক্কান্ খুলি নিলাক্ আর তার্ নিজোর্ কাবড়-চুগোড়ানি উরেইনে তারে ক্রুশোত্ দিবাত্তে নেযা ধুরিলাক্।
ক্রুশো উগুরে প্রভু যীশু
(মার্ক ১৫:২১-৩২; লূক ২৩:২৬-৪৩; যোহন ১৯:১৭-২৭)
32সিয়েনত্তুন্ তারা নিগিলি যেবার্ সময়োত্ সৈন্যগুনে কুরীণী শঅরর্ শিমোন নাঙে এক্কো মান্জ্যর্ দেগা পেলাক্ আর সৈন্যগুনে তারে যীশুর ক্রুশ্চান বুয়োই নেযেবাত্তে বাধ্য গুরিলাক্। 33-34সিয়েনত্ তারা যীশুরে তিদে রস্ মিজেয়্যে আংগুর-রস হেবাত্তে দিলাক্। মাত্তর্ যীশু সিয়েন্ মুয়োত্ দিইনে আর হেবাত্তে ন-চেলঅ।
35যীশুরে ক্রুশোত্ দেনার্ পরেদি সৈন্যগুনে চাম্বা চেইনে তা লাম্বা সিলুম্মো তারা ভাগাভাগি গুরি নিলাক্। 36পরেদি তারা সিয়েনত্ বুয়োইনে তারে চুগি দিয়্যে ধুরিলাক্। 37তারা ক্রুশোত্ যীশুর মাঢা উগুরেদি এ দুষ্-নামাগান্ লাগেই দিলাক্, “ইবে যীশু, যিহূদীগুনোর্ রাজা।” 38তারা দ্বিজন ডাগেদরেয়ো যীশু লগে ক্রুশোত্ দিলাক্, একজনরে ডেনেদি আর অন্যজনরে বাঙেদি। 39যিদুক্কুন্ মানুচ্ সেই পথ্তানদি যাদন্ তারা মাঢাগুন্ লাড়েইনে যীশুরে অগমান্ গুরিলাক্, 40“তুই নাহি উবোসনা-ঘরান্ ভাঙিনে আরঅ তিন দিনো ভিদিরে বানেই দি পারচ্! সালে ইক্কিনে নিজোরে রোক্ষ্যে গর্। যুনি তুই গোজেনর্ পুয়ো অচ্ সালে ক্রুশোত্তুন্ লামি আয়।”
41সেই সময়োত্ আজল্ ধর্মগুরুগুনে আর ধর্ম-মাষ্টরুনে আহ্ বুড়ো নেতাগুনেয়ো তারে ঠাট্টা-মশ্কারি গরা ধুরিলাক্, 42“তে অন্যগুনোরে রোক্ষ্যে গুরিদো, মাত্তর্ নিজোরেয়ো রোক্ষ্যে গুরি ন-পারে! তে কি ইস্রায়েলর রাজা নয়? ইক্কিনে ক্রুশোত্তুন্ তে লামি এজোক্। সালে আমি তা উগুরে বিশ্বেজ্ গুরিবোং। 43তে গোজেন উগুরে বিশ্বেজ্ গরে; ইক্কিনে যুনি তা উগুরে হুজি থায় সালে তারে তে উদ্ধোর্ গোরোক্। তে দঅ নিজোরে গোজেনর্ পুয়ো কদঅ।” 44একই সময়োত্ যে ডাগেদ্তুনোরে তা সমারে ক্রুশোত্ দিয়্যে ওইয়্যে তারায়ো যীশুরে অগমান্ গরা ধুরিলাক্।
প্রভু যীশুর মরণ্
(মার্ক ১৫:৩৩-৪১; লূক ২৩:৪৪-৪৯; যোহন ১৯:২৮-৩০)
45সেদিন্ন্যে দিবুজ্যে বারটাত্তুন্ ধুরি বেল্যেমাদান্ তিন ঘন্টা সং গোদা দেজ্চান আন্ধারে ঢাক্যে এলঅ। 46প্রায় তিন্টা সময় যীশু রঅ ছাড়িনে কলঅ, “এলী, এলী, লামা শবক্তানী,” অত্তাৎ “মঅ গোজেন, মঅ গোজেন, কিত্তে তুই মরে ছাড়ি যেইয়োচ্?”
47যিগুনে সিয়েনত্ থিয়্যেই এলাক্ তারাত্তুন্ কয়েকজনে এ কধাগান্ শুনিনে কলাক্, “তে এলিয়রে ডাগের্।”
48তারা ভিদিরেত্তুন্ একজনে সেক্কে ধাবা যেইনে সির্কায় ভোজ্যে এক্কো স্পঞ্জ নেযেল আর এক্কো মুগোর মাঢাত্ সিবে লাগেইনে যীশুরে হেবাত্তে দিলো। 49অন্যগুনে কলাক্, “থাগ্, রিনি চেই এলিয় তারে রোক্ষ্যে গুরিবাত্তে এজে না কি।”
50যীশু আরঅ দাঙর্ গুরি রঅ ছাড়ানার্ পরেদি শেজ্ নিজেচ্চো ফেলেইনে গেলগোই। 51সে পরেদি উবোসনা-ঘরর্ পর্দাগান উগুরেত্তুন্ ধুরি তলেদি সং ফাদিনে দ্বিভাগ্ ওই গেলঅ; ভূজোল্ বেলঅ আর দাঙর্ দাঙর্ পাত্তরুন ফাদি গেলাক্। 52কয়েক্কো গোর্ খুলি গেলঅ আর গোজেনর্ যে মানুচ্চুনে মুরি যেইয়োন্ তারাত্তুন্ ভালোক্কুনোর্ কিয়্যেগানি জেদা ওই উদিলো। 53তারা গোরত্তুন্ নিগিলি এলাক্ আর যীশু মরণত্তুন্ জেদা ওই উদোনার্ পরেদি পবিত্র শঅর ভিদিরে গেলঅ। তারা সিদু ভালোক্ জনরে দেগা দিলাক্।
54যেক্কেনে আর্মি অফিসার আর তা সমারে সৈন্যগুনে যীশুরে চুগি দেদন্ তারা ভূজোল্ আর অন্য বেক্ ঘটনাগানি দেগিনে জদবদে দোরেইনে কলাক্, “ঘেচ্চেকগুরি তে গোজেনর্ পুয়ো এলঅ।”
55বোউত্ মিলেয়ো সিয়েনত্ দূরোত্ থিয়্যেইনে বেক্কানি দেখ্যন্। যীশুরে সেবা গুরিবাত্তে তারা গালীলত্তুন্ ধুরি তা সমারে এচ্চ্যন্। 56তারা ভিদিরে এলাক্ মগ্দলীনী মরিয়ম, যাকোব আর যোষেফ মাবো মরিয়ম আর সিবদিয়র পুয়ো যাকোব আর যোহন মা।
প্রভু যীশুর গোর্
(মার্ক ১৫:৪২-৪৭; লূক ২৩:৫০-৫৬; যোহন ১৯:৩৮-৪২)
57সাজোন্যে অনার্ পরেদি অরিমাথিয়া আদামর্ যোষেফ নাঙে এক্কো থাগোয়্যে মানুচ্ সিধু এলঅ। ইবে যীশুর্ শিচ্চ্য ওইয়্যে। 58পীলাত ইধু যেইনে তে যীশুর কিয়্যেগান্ মাগিলো। সেক্কে পীলাতে তারে সেই কিয়্যেগান্ দিবাত্তে উগুম্ দিলো। 59যোষেফে যীশুর্ কিয়্যেগান্ নেযেইনে পরিষ্কার কাবড়লোই বেড়েল, 60আর যে নুয়ো গোরান্ তে নিজোত্তে মুড়ো ইধু কাবিনে থোইয়্যে সিয়েনত্ সেই মরা কিয়্যেগান্ রাগেল। পরেদি সেই গোর মুয়োনত্ দাঙর্ এক্কো পাত্তর্ গোজ্যেই দিইনে তে গেলগোই। 61মগ্দলীনী মরিয়ম আর সেই অন্য মরিয়মে সিয়েনত্ সেই গোরান মুজুঙোত্ বুয়োই থেলাক্।
62তার্ কেল্যে, অত্তাৎ যুক্কোল-দিনোর্ পরেদি দিনোত্ আজল্ ধর্মগুরুগুনে আর ফরীশীগুনে পীলাত ইধু থুবেইনে কলাক্, 63“বাবু, আমাত্তুন্ ইদোত্ উদের্, সেই ঠোগেয়্যেবো বাঁজি থাগদে কোইয়্যেদে, ‘মুই তিন্ দিন পরেদি জেদা ওই উদিম্।’ 64সেনত্তে উগুম গর্ যেন তিন্ দিন সং গৌর্বো চুগি দিয়্যে অয়। ন অলে তা শিচ্চ্যগুনে অয়ত এইনে তা কিয়্যেগান্ চুর্ গুরি নেযেইনে মানুচ্চুনোরে কবাক্, ‘তে মরণত্তুন্ জেদা ওই উঠ্যে।’ সালে পত্তম্ ছলনাত্তুন্ শেজ্ ছলনাগান্ আরঅ ভান্ন্যেই অবঅ।”
65সেক্কে পীলাতে তারারে কলঅ, “চুগিদারুনোরে নেযেইনে তুমি যেবাবোত্যে গুরি পারঅ সেবাবোত্যে গুরি চুগি দিবার্ বেবস্থা গরঅ।” 66সেক্কে তারা যেইনে পাত্তর্বো উগুরে সীলমহর্ মারিলাক্ আর চুগিদারুনোরে সিয়েনত্ থোইনে কবরান্ দরমরগুরি চুগি দিবার্ বেবস্থা গুরিলাক্।
Currently Selected:
মথি 27: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
