মথি 12
12
মান্জো পুয়োবো জিরেবার্ দিনুনোর গিরোজ্
(মার্ক ২:২৩-২৮; লূক ৬:১-৫)
1একদিন্যে যীশু এক্কান্ শোজ্যখেদ ভিদিরেদি যার্। সে দিন্নো জিরেবার্ দিন্ এলঅ। তা শিচ্চ্যগুনোত্তুন্ পেট্ পুড়ের্ বিলিনে তারা শীজে ছিনিনে হা ধুরিলাক্। 2যেক্কে ফরীশীগুনে সিয়েন দেগিলাক্ তারা যীশুরে কলাক্, “ধর্মর সুদোম্ মজিম্ জিরেবার দিনোত্ যিয়েন্ গরানা উচিত নয়, চাহ্, তঅ শিচ্চ্যগুনে সিয়েনই গত্তন্।”
3যীশু জোব্ দিলো, “দায়ূদ আহ্ তা সমাজ্যেগুনোর্ যেক্কে পেট্ পুরের্ সেক্কে তে কি গোজ্যে সিয়েন্ কি তুমি ন-পড়? তে দঅ গোজেন ঘরত্ সোমেইনে মুজুঙোত্ পেইয়্যে-রুটি হেইয়্যে। 4হালিক্ দায়ূদে আর তার সমাজ্যেগুনোর সিয়েন হানা উজিত্ ন-এলঅ, বানা ধর্মগুরুগুনেই সিয়েন হেই পারিদাক্। 5ইয়েনি বাদেয়ো তুমি কি মোশির আইন-কানুনোত্ ন-পড়, জিরেবার্ দিনোত্ উবোসনা-ঘরর্ ধর্মগুরুগুনে জিরেবার্ দিনোর সুদোম্ ভাঙিলেয়ো তারার্ দুষ্ ন-অয়? 6মুই তমারে কঙর্, উবোসনা-ঘরত্তুন্অ বেশ্ দাঙর্ একজন ইয়োত্ আঘে। 7‘মুই দোয়্যেমেয়্যে দেগিবাত্তে চাং, য়েমান্-উৎসর্ব নয়’-বোইয়োর্ এ কধাগানর্ অত্ত যুনি তুমি জানিদা সালে নিদ্দুজিগুনোরে দুষি ন-গুরিদা। 8ইদোত্ রাগঅ, মান্জ্য পুয়োবো জিরেবার্ দিন্নোর্ গিরোজ্।”
অবস্-আঢ্বলা মানুচ্চো গম্ অলঅ
(মার্ক ৩:১-৬; লূক ৬:৬-১১)
9সে জাগায়ান্ ফেলেইনে যীশু সে ফরীশীগুনোর্ সমাজ-ঘরত্ গেলঅ। 10সিয়েনত্ এক্কো মানুচ্ এলঅ যিবের্ এক্কান আঢ্ অবস্ এলঅ। কয়েক্কো মানুচ্ সিয়েনত্ এলাক্ যিগুনে যীশুরে ভান্ন্যেই কাম গরের্ বিলিনে দুষ্ দেদন, সেনত্যে তারে পুযোর্ গুরিলাক্, “জিরেবার দিনোত্ কাররে গম্ গরানা কি আমার রীতি সুদোম বিরুদ্ধে?”
11যীশু জোব্ দিলো, “ধোজ্য, তমার কারর্ এক্কো ভেড়া আঘে আর সে ভেড়াবো যুনি জিরেবার্ দিনোত্ গাঢত্ পড়ে সালে কি তুমি তারে ধুরিনে ন-তুলিবা? 12আর ভেড়াত্তুন্ মান্জ্যর্ দাম দঅ বোউত্ বেশ্! সালে দেগা যায়, রীতি সুদোমানে আমারে অনুমতি দে জিরেবার দিনোত্ কাররে সাহায্য গরানা উচিত্।”
13সে পরেদি তে অবস্ আঢ্বলা মানুচ্চোরে কলঅ, “তঅ আঢ্তান বাবেই দে।” তে তার্ আঢ্তান্ বাবেই দিলো আর সিয়েন গম্ অলঅ, অন্য আঢ্তান ধোক্ক্যেন্। 14সেক্কে ফরীশীগুনে বারেদি গেলাক্ আর যীশুরে মারে ফেলেবাত্তে তা বিরুদ্ধে তেম্মাং গরা ধুরিলাক্।
গোজেনর বেঈ লোইয়্যে মানুচ্
15সেই সল্লাগান পৌইদ্যেনে হবর্ পেইনে যীশু সিয়েনত্তুন গেলগোই। সেক্কে বোউত্ মানুচ্ তা পিজে পিজে গেলাক্। 16তারা ভিদিরে যিগুনে অসুগ্ এলাক্ তে তারারে বেক্কুনোরে গম্ গুরিলো আর উজিয়ার্ গুরি দিলো যেন তা পৌইদ্যেনে তারা কুয়োকি ন-গরন্। 17ইয়েন্ অলঅ যেন ভাববাদী যিশাইয়র মাধ্যমে এই যে কধাগান্ কুয়ো ওইয়্যে সিয়েন্ পূরোণ অয়:
18চঅ, মঅ চাগর্ যিবেরে মুই বেঈ লোইয়োং।
ইবেয়ই মর্ কোচ্পেইয়্যে মানুচ্ যিবে উগুরে মুই হুজি।
মুই তা উগুরে মঅ আত্মাগান্ দিম,
আর তে অযিহূদীগুনো ইধু ন্যায়বিচের ফগদাং গুরিবো।
19তে কোজ্যে বা রঅ ন-ছাড়িবো;
তে পধে পধে তা মুয়োর্ রবুয়ো ন-শুনেব।
20ন্যায়বিচেরানরে জিদেই ন-দেনা সং
তে বুধি যেইয়্যে নল্লো ন-ভাঙিবো
আর এক্কা এক্কা জুলি থেইয়্যে চেরাগ বুদ্দি ন-মারেবা।
21তা উগুরে অযিহূদীগুনে আজা রাগেবাক্।
প্রভু যীশু আর ভুদ্তুনোর রাজা
(মার্ক ৩:২০-৩০; লূক ১১:১৪-২৩; ১২:১০)
22পরেদি মানুচ্চুনে ভুদে পেইয়্যে এক্কো মান্জ্যরে যীশু ইধু আনিলাক্ যিবে চোগ্ কান্ আর ববা এলঅ কিয়া তারে অসিজি আত্মায় পেইয়্যে। যীশু তারে গম্ গুরিলো। 23সেক্কে মানুচ্চো কধা কুয়ো ধুরিলো আর চোগেদি দেগিলো। সেক্কে বেক্ মানুচ্চুনে আমক্ ওইনে কলাক্, “ইবে কি দায়ূদোর সেই বংশধর?”
24যেক্কে ফরীশীগুনে এ কধাগান শুনিলাক্, তারা জোব্ দিলাক্, “তে দঅ বানা অসিজি আত্মাগুনোর্ রাজা বেল্সবূল বলে অসিজি আত্মাগুনোরে ধাবাই।”
25তারা কি ভাবদন্ সিয়েন যীশু কোই পারিদো আর তারারে কলঅ, যে রেজ্যগান নিজো ভিদিরে ভাগ্ ওই যায় সে রেজ্যগান্ ভস্ত অয়। আর যে শঅরান্ বা পরিবার্বো নিজো ভিদিরে ভাগ্ ওই যায় সে শঅর্ বা পরিবার ন-টিগে। 26সেনত্যে শদান রেজ্য ভিদিরে যুনি এক দল অন্য আর এক দল সমারে যুদ্ধো বাজান, সিয়েনর অত্তগান এনেবাদে দলত্ ভাগ ওই যেয়োন আর যাদিমাদি ফারগ্ অবাক্! 27তুমি কত্তে মুই অসিজি আত্মাগুনোরে ধাবাং কারন বেল্সবূলে মরে খেমতা দিয়্যে সিয়েনি গুরিবাত্যে। ঠিগ আঘে, সালে তমা মানুচ্চুনোরে কন্না খেমতা দিয়্যে কা বল্লোই তারারে ধাবান্? তুমি ঠিগ্ কধা কর্ না কি, তমা মানুচ্চুনে সিয়েন্ বিচের্ গুরিবাক্। 28না, ইবে বেল্সবূলে নয়, মাত্তর্ গোজেনর্ আত্মা, যিবে মরে অসিজি আত্মাগুনোরে ধাবেবার্ খেমতা দিয়্যে, যিয়েন প্রমাণ ওইয়্যে যে গোজেন রেজ্যগান দঅ তমা কায়কুরে লুম্মেগি।
29বোলী মান্জ্যর ঘর কেঅ ভাঙি ন-পারে আর পত্তমে বোলী মানুচ্চোরে বানি ন-রাগেলে কনজনে কি তা ঘরত্ সোমেইনে পযাপিরা লুদেই পারে? বানিলে পরেদি তে সিয়েনি গুরি পারিবো।
30যুনি কনজনে মঅ পক্ষে ন-থায় সালে তে মঅ বিপক্ষে আঘে। যে মঅ সমারে ন-কুড়োই তে ছিদি দে।
31ইয়েনত্তে মুই তমারে কঙর্, মান্জ্যর্ বেক্ পাপ্পানি আর গোজেন বিরুদ্ধে অগমানর্ কধানি খেমা গরা অবঅ, মাত্তর্ পবিত্র আত্মার বিরুদ্ধে অগমানর্ কধানি খেমা গরা ন-অবঅ। 32মান্জ্য পুয়োবোর্ বিরুদ্ধে কনজনে কনঅ কধা কলে তারে খেমা গরা অবঅ, মাত্তর্ পবিত্র আত্মার বিরুদ্ধে কধা কলে তারে খেমা গরা ন-অবঅ-এই যুগত্অ নয়, এযেত্তে যুগত্অ নয়।
গুলো-গুলিলোই গাজ্ চিনে যায়
(লূক ৬:৪৩-৪৫)
33“গম্ গাজত্ গম্ গুলোগুলি অন্, আরঅ বজং গাজত্ বজং গুলোগুলি অন্, কিয়া গুলোগুলিলোই গাজ্চুন চিনে যায়। 34সাপ গুট্টিগুন! নিজে ভান্ন্যেই ওইনে কেধোক্ক্যেন্ গুরি তুমি গম্ কধা কোই পারঅ? মান্জ্যর্ মনানি যিয়েনিলোই ভরা থায় মুয়োনে দঅ সে কধানি কয়। 35গম্ মানুচ্ তা মনত্তুন্ গম্ কধা নিগিলেই, আর বজং মানুচ্ তা মনত্তুন্ ভান্ন্যেই কধা নিগিলেই। 36মাত্তর্ মুই তমারে কঙর্, মান্জ্যে যেদক্কানি বাজে কধা কন্, বিচের দিনোত্ সিয়েনির পত্তি কধার্ ইজেব্ তারার্ দিয়্যে পড়িবো। 37তঅ কধালোই তরে নিদ্দুজি কুয়ো অবঅ আর তঅ কধালোই তরে দুষি কুয়ো অবঅ।”
ফরীশীগুনে চিহ্নো তগান্
(মার্ক ৮:১১,১২; লূক ১১:২৪-২৬,২৯-৩২)
38ইয়েনর পরেদি কয়েক্কো ধর্ম-মাষ্টরে আর ফরীশীয়ে যীশুরে কলাক্, “মাষ্টর্ বাবু, আমি তত্তুন্ এক্কান চিহ্নো দেগিবাত্তে চেই।”
39যীশু তারারে কলঅ, এই কালর্ পাজি আর অবিশ্বেজি মানুচ্চুনে চিহ্নো তগান্, মাত্তর্ ভাববাদী যোনার চিহ্নো বাদে আর কনঅ চিহ্নো তারারে দেগা ন-অবঅ। 40যোনা যেবাবোত্যেগুরি সেই মাছ পেদত্ তিন দিন আর তিন রেত্ এলঅ মান্জ্য পুয়োবোয়ো সেবাবোত্যেগুরি তিন দিন আর তিন রেত্ মাদিত্ তলে থেবঅ। 41বিচের দিনোত্ নীনবী শঅর মানুচ্চুনে উদিনে এ কালর্ মানুচ্চুনোরে দুষ্ দেগেই দিবাক্, কিয়া নীনবীর মানুচ্চুনে যোনার প্রচারর্ কারনে পাপত্তুন্ মনানি ফিরেয়োন্। আর চঅ, ইয়েনত্ যোনাত্তুন্অ আরঅ দাঙর্ এক্কো আঘে। 42বিচের দিনোত্ দোগিণ দেজর্ রাণী উদিনে এ কালর্ মানুচ্চুনোরে দুষ্ দেগেই দিবো, কিয়া শলোমন রাজার জ্ঞানর্ কধাবাত্তা শুনিবাত্তে তে পিত্থিমীর শেজ দুযিত্তুন্ এচ্চ্যে। আর চঅ, ইয়েনত্ শলোমনত্তুন্অ বেশ্ আরঅ দাঙর্ এক্কো আঘে।
43“যেক্কে কনঅ ভান্ন্যেই আত্মা কনঅ মান্জ্য ভিদিরেত্তুন্ নিগিলি যায় সেক্কে তে জিরেবাত্তে শুগুনো জাগার্ ভিদিরেদি ঘুরোঘুরি গুরি থায়। 44মাত্তর্ সিয়েন ন-পেইনে তে কয়, ‘যিয়েনত্তুন্ নিগিলি এচ্চোং মর্ সে ঘরানত্ মুই ফিরি যেম্।’ তে ফিরি এইনে সে ঘরান্ খালি, সাব্ আর সাজেয়্যে দেখ্যে। 45যেরেদি সেই ভুদ্তো যেইনে নিজোত্তুন্ বেশ্ বজং আরঅ সাত্তো ভুত সমারে আনে আর সিয়েনত্ সোমেইনে বজত্তি গরা ধরে। সেক্কে সে মানুচ্চোর্ পত্তম্ দজাত্তুন্ শেজ্ দজাগান্ আরঅ বজং ওই উদে। এ কালর্ পাজি মানুচ্চুনোর অবস্থায়ো সেবাবোত্যে অবঅ।”
প্রভু যীশুর মা আর ভেই কন্না?
(মার্ক ৩:৩১-৩৫; লূক ৮:১৯-২১)
46যীশু যেক্কে মানুচ্চুনো সমারে কধা কর্ সেক্কে তার মাবো আর ভেইয়ুনে তা লগে কধা কবাত্তে বারেদি থিয়্যেই এলাক্। 47কনঅ এক্কো মান্জ্যে তারে কলঅ, “চাহ্, তঅ মাবো আর ভেইয়ুনে বারেদি থিয়্যেই আঘন্, আর তঅ লগে কধা কবাত্তে চান্।”
48যীশু জোব্ দিলো, “কন্না মর্ মা, আর কন্না মর্ ভেই?” 49যেরেদি তে তার্ শিচ্চ্যগুনোরে দেগেইনে কলঅ, “এই চঅ, ইগুনোই মর্ মা আর মর্ ভেই; 50কিয়া যিগুনে মর্ স্বর্গর্ বাবঅ আওজ্ পালান্ তারা-মর্ ভেই, বোন আর মা।”
Currently Selected:
মথি 12: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
