যোহন 8
8
বেভিচারী মিলেবোর্ বিচের্
1ইয়েনর্ পরেদি মানুচ্চুনে পত্তিজনে যে যার্ ঘরত্ গেলাক্, মাত্তর্ যীশু জৈতুন্ মুড়োবোত্ গেলঅ। 2তার্ কেল্যে বেন্ন্যেপোত্যে যীশু আরঅ উবোসনা-ঘরত্ যানার্ পরেদি বেক্ মানুচ্চুনে তা ইধু এলাক্। সেক্কে যীশু বুজিনে তারারে শিক্ষ্যে দিয়্যে ধুরিলো। 3-4এন্ সময়োত্ ধর্ম-মাষ্টরুনে আর ফরীশীগুনে এক্কো মিলেরে যীশু ইধু আনিলাক্। মিলেবো বেশ্যেমিত্ ধরা পোজ্যে। ধর্ম-মাষ্টর্ আর ফরীশীগুনে সে মিলেবোরে সংমধ্যে থিয়্যেই রাগেইনে যীশুরে কলাক্, “মাষ্টরবাবু, এ মিলেবো বেশ্যে কামত্ ধরা পোজ্যে। 5রীতি-সুদোমত্ মোশি এবাবোত্যে মিলেরে পাত্তর্ মেলা দিইনে মারে ফেলেবাত্তে আমারে উগুম্ দিয়্যে। মাত্তর্ তুই কি কচ্?”
6তারা যীশুরে যগা চেবাত্যে এ কধাগান্ কলাক্, যেনে তারে দুচ্ দিবার্ এক্কান্ কারণ তোগেই পান্। সেক্কে যীশু নিগিরিনে আঙুল্লোই মাদিত্ লেগা ধুরিলো। 7মাত্তর্ তারা যেক্কে কধাগান্ বার্বার্ তারে পুযোর্ গরা ধুরিলাক্ সেক্কে তে উদিনে তারারে কলঅ, “তমাত্তুন্ যে পাপ ন-গরে তেয়ই পৌইল্যা তারে পাত্তর্ মারোক্।” 8ইয়েন পরেদি তে আরঅ নিগিরিনে মাদিত্ লেগা ধুরিলো।
9এ কধাগান্ শুনিনে সেই ধর্ম নেতাগুনো ভিদিরে বুড়োগুনোত্তুন্ ধুরি আরাম্ভ গুরিনে একজন একজন গুরি বেক্কুনে গেলাক্। যীশু বানা গায় গায় রলঅ আর সে মিলেবো তা মুজুঙোত্ থিয়্যেই এলঅ। 10যীশু উদিনে সে মিলেবোরে কলঅ, “তারা কুধু? কনজনে কি তরে সাজা দিবাত্যে ন-চান্?”
11মিলেবো জোব্ দিলো, “না বাবু, কনজনে ন-গরন্।”
সেক্কে যীশু কলঅ, “মুইয়ো ন-গরং। থিক্ আঘে যাহ্; পাপঅ জিংকানি আর ন-কাদেচ্।”
প্রভু যীশু পিত্থিমীর্ পহ্র
12পরেদি যীশু আরঅ মানুচ্চুনোরে কলঅ, “মুয়ই পিত্থিমীর্ পহ্রান্। যে মঅ পধেদি আঢে তে কনদিন্অ আন্ধারত্ ঠেং ন-ফেলেব, বরং জিংকানির্ পহ্র পেবঅ।”
13সেক্কে ফরীশীগুনে যীশুরে কলাক্, “তঅ সাক্ষ্যগান্ সত্য নয়, কিয়া তুই নিজোর্ পক্ষে নিজেই সাক্ষ্য দুয়োর্।”
14যীশু তারারে জোব্ দিলো, “যুনিয়ো মুই নিজোর্ পক্ষে নিজে সাক্ষ্য দুয়োং তো মঅ সাক্ষ্যগান্ সত্য, কিয়া মুই কুত্তুন্ এচ্চ্যং আর কুধু যাঙর্ সিয়েন্ মুই কোই পারং। মাত্তর্ মুই কুত্তুন্ এচ্চ্যং আর কুধু যাঙর্ সিয়েন্ তুমি কোই ন-পারঅ। 15মান্জ্যে যেবাবোত্যেগুরি বিচের্ গরন্ তুমি সেবাবোত্যেগুরি বিচের্ গুরি থাগঅ, মাত্তর্ মুই কারঅ বিচের্ ন-গরং। 16মাত্তর্ যুনি মুই কনদিন্অ বিচের্ গরং সালে মর্ সেই বিচেরান্ সত্য, কিয়া মুই গায় গায় নয়। মুই দঅ আঘং আর যে মরে পাধেয়্যে সেই বাবায়ো মঅ সমারে আঘে। 17তমা আইন-কানুনোত্ লেগা আঘে, দ্বিজনে যুনি একই সাক্ষ্য দুয়োন্ সালে সিয়েন্ সত্য। 18মুয়ই মর্ নিজোর্ পক্ষে সাক্ষ্য দুয়োং, আর যে মরে পাধেয়্যে সেই বাবায়ো মঅ পক্ষে সাক্ষী দে।”
19ফরীশীগুনে তারে কলাক্, “তঅ বাবা কুধু?”
যীশু জোব্ দিলো, “তুমি মরেয়ো ন-চিনো আর মঅ বাবারেয়ো ন-চিনো। যুনি মরে চিনিদা সালে মঅ বাবারেয়ো হবর্ পেদা।”
20উবোসনা-ঘরত্ শিক্ষ্যে দিবার্ অক্তত্ দান্ দিবার জাগানত্ যীশু ইয়েনি বেক্কানি কলঅ। মাত্তর্ সেক্কেয়ো তার্ সময় ন-অয় বিলি কনজনে তারে ন-ধুরিলাক্।
নিজো মরণ পৌইদ্যেনে প্রভু যীশু
21যীশু আরঅ ফরীশীগুনোরে কলঅ, “মুই যাঙর্। তুমি মরে তোগেবা, মাত্তর্ তুমি তমা পাপে মুরিবা। মুই যিধু যাঙর্ তুমি সিধু এই ন-পারিবা।”
22সেক্কে যিহূদী নেতাগুনে কলাক্, “তে কি নাৎ দিবো নাহি? কিয়া তে কত্তে, ‘মুই যিধু যাঙর্ তুমি সিধু এই ন-পারিবা।’ ”
23যীশু তারারে কলঅ, “মুই উগুরেত্তুন্ এচ্চ্যং আর তুমি তলেত্তুন্ এচ্চ্য। তুমি এ পিত্থিমীর্, মাত্তর্ মুই এ পিত্থিমীর্ নয়। 24সেনত্তে মুই তমারে কঙর্, তুমি তমার্ পাপে মুরিবা। যুনি তুমি বিশ্বেজ্ ন-গরঅ যে, মুয়ই সিবে, সালে তুমি তমা পাপে মুরিবা।”
25সেক্কে নেতাগুনে যীশুরে পুযোর্ গুরিলাক্, “তুই কন্না?”
যীশু তারারে কলঅ, “পৌইল্যাত্তুন্ ধুরি মুই তমারে যিয়েন্ কঙর্, মুয়ই সিবে। 26তমা পৌইদ্যেনে কবার্ আর বিচের্ গুরি চেবার্ মর্ বোউৎ কিজু আঘে। মাত্তর্ যে মরে পাধেয়্যে তাইধু মিজে কধা নেই; মুই তাইধু যিয়েনি শুন্ন্যং সিয়েনি মান্জ্যরে কং।”
27তারা ন-বুঝিলাক্ যীশু স্বর্গর্ বাবা পৌইদ্যেনে তারা ইধু কর্। 28ইয়েনত্যে যীশু কলঅ, “যেক্কে তুমি মান্জ্যপুয়োবোরে অজলত্ তুলিবা সেক্কে বুঝি পারিবা, মুয়ই সিবে। আর ইয়েন্অ বুঝি পারিবা যে, মুই নিজোত্তুন্ কনকিজু ন-গরং, বরং বাবা মরে যে শিক্ষ্যেগান্ দিয়্যে মুই সে কধানি কং। 29যে মরে পাধেয়্যে তেয়ই মঅ সমারে আঘে। তে মরে গায় গায় গুরি ইরি ন-দে, কিয়া যে কামত্ তে হুজী অয় মুই নিত্য সেই কামান গরং।” 30যীশু যেক্কে এ কধানি কর্ সেক্কে ভালোক্জনে তা উগুরে বিশ্বেজ্ গুরিলাক্।
প্রভু যীশু বিরুদ্ধে যিহূদীগুনে
31যে যিহূদীগুনে তারে বিশ্বেজ্ গোজ্যন্ যীশু তারারে কলঅ, “মঅ কধামজিম্ যুনি তুমি চলঅ সালে ঘেচ্চ্যেক্গুরি তুমি মর্ শিচ্চ্য। 32সিয়েন বাদে তুমি সত্যগানরে কোই পারিবা, আর সে সত্যগানে তমারে উদ্ধোর্ গুরিবো।”
33যিহূদী নেতাগুনে সেক্কে যীশুরে কলাক্, “আমি অব্রাহাম বংশর মানুচ্; আমি কনদিন্অ কারর্ চাগর্ ন-ওই। তুমি কেধোক্ক্যেন্ গুরিনে কত্তে যে, আমারে উদ্ধোর্ গরা অবঅ?”
34যীশু তারারে ইয়েন্ কলঅ, “মুই ঘেচ্চ্যেক্গুরি তমারে কঙর্, যিগুনে পাপত্ পরি থান্ সিগুনে বেক্কুনে পাপর চাগর্। 35চাগরে জনমভরা ঘরত্ ন-থায় মাত্তর্ পুয়োবো জনমান থায়। 36সেনত্তে গোজেনর্ পুয়োবো যুনি তমারে উদ্ধোর্ গরে সালে ঘেচ্চ্যেক্গুরি তুমি উদ্ধোর্ অবা। 37মুই হবর্ পাং তুমি অব্রাহাম বংশর মানুচ্, মাত্তর্ তো তুমি মরে মারে ফেলেবাত্তে চর্, কিয়া মঅ কধানি তমা মনত্ কনঅ জাগা ন-পায়। 38মুই মঅ বাবা ইধু যিয়েনি দেক্ক্যং সে পৌইদ্যেনে কং, আর তুমি তমা বাবত্তুন্ যিয়েনি শুন্ন্য সিয়েনি গুরি থাগঅ।”
39ইয়েন্দোই সেই যিহূদী নেতাগুনে যীশুরে কলাক্, “অব্রাহামে আমা বাপ্।”
যীশু তারারে কলঅ, “যুনি তুমি অব্রাহামর্ পুয়ো অদা সালে অব্রাহাম ধোক্ক্যেন্ কাম্ গুরিদা। 40গোজেনত্তুন্ যে সত্যগান্ মুই হবর্ পেইয়োং সিয়েনই তমারে কঙর্, আর তো তুমি মরে মারে ফেলেবাত্তে চর্; মাত্তর্ অব্রাহামে এবাবোত্যে ন-গরে। 41তমা বাব্পো যিয়েন্ গরে তুমিয়ো সিয়েন্ গরর্।”
তারা যীশুরে কলাক্, “আমি দঅ জার্গো নয়। আমার বানা এক্কো বাব্ আঘে, সে বাব্পো অলঅ গোজেন।”
42যীশু তারারে কলঅ, “ঘেচ্চ্যেক্গুরি যুনি গোজেনে তমার বাব্ অদঅ সালে তুমি মরে কোচ্পেদা, কিয়া মুই গোজেনত্তুন্ এচ্চ্যং আর ইক্কিনে তমা ইধু আঘং। মুই নিজে নিজে ন-এজং, মাত্তর্ তেয়ই মরে পাধেয়্যে। 43কিত্ত্যে তুমি মঅ কধা ন-বুঝো? সিয়েনর্ কারনান্ ইয়েন্, তুমি মঅ কধানি সোজ্য গুরি ন-পারঅ। 44শদানে তমা বাপ্ আর তুমি তার্ পুয়ো-ছা; সেনত্তে তুমি তা আওজ্চান্ পুরেবাত্তে চঅ। শদানে পৌইল্যাত্তুন্ ধুরি খুনী। তে কনদিন্অ সত্যত্ বজত্তি ন-গরে, কিয়া তা ভিদিরে সত্য নেই। তে যেক্কে মিজে কধা কয় সেক্কে তে সিয়েন্ নিজোত্তুন্ কয়, কিয়া তে মিজে কধা মাদিয়্যে আর বেক্ মিজে কধার্ জর্ম তা ভিদিরেত্তুন্ ওইয়্যে। 45মাত্তর্ মুই সত্য কধা কং, আর সেনত্তে তুমি মরে বিশ্বেজ্ ন-গরঅ। 46তমাত্তুন্ কন্না মরে পাপী বিলিনে প্রমাণ গুরি পারঅ? যুনি মুই সত্য কধা কং সালে কিত্ত্যে তুমি মরে বিশ্বেজ্ ন-গরঅ? 47যে মানুচ্চো গোজেনর্, তে গোজেনর্ কধা শুনে। তুমি গোজেনর্ নয় বিলি গোজেন কধা ন-শুনো।”
48সেক্কে যিহূদী নেতাগুনে যীশুরে কলাক্, “আমি কি ঠিগ্ ন-কোই, তুই এক্কো শমরীয় আর তরে ভুদে পেইয়্যে?”
49যীশু জোবত্ কলঅ, “মরে ভুদে ন-পায়। মুই মঅ বাবারে সর্মান গরং, মাত্তর্ তুমি মরে অসর্মান্ গরর্। 50মুই মর্ নিজোর্ নাঙ্ ফুদেবার্ ন-চাং, মাত্তর্ একজন আঘে যিবে মরে সর্মান দান্ গরে, আর তেয়ই বিচের্ গুরিয়ে। 51মুই তমারে ঘেচ্চ্যেক্গুরি কঙর্, কেঅ যুনি মঅ কধা মজিম চলন্ সালে তে কনদিন্অ ন-মুরিবো।”
52যিহূদী নেতাগুনে তারে কলাক্, “এবেরা আমি ঘেচ্চ্যেক্গুরি বুঝিলোং যে, তরে ভূদে পেইয়্যে। অব্রাহাম আর ভাববাদীগুনে মুরি যেয়োন্, আর তুই কত্তে, ‘যুনি কেঅ মঅ কধা মজিম চলে তে কনদিন্অ ন- মুরিবো।’ তুই কি বাবা অব্রাহামত্তুন্অ বেশ্ দাঙর্? 53তে দঅ মুরি যেইয়্যে আর ভাববাদীগুনেয়ো মুরি যেইয়োন্। তুই নিজোরে কি মনে গরচ্?”
54জোবত্ যীশু কলঅ, “মুই যুনি নিজো বাঈনী নিজে গরং সালে সিয়েনর্ কন দাম্ নেই। মঅ বাবা, যিবেরে তুমি তমার্ গোজেন বিলিনে দাবী গরঅ তেয়ই মরে সর্মান দান্ গরে। 55তুমি কনদিন্অ তারে হবর্ ন-পঅ, মাত্তর্ মুই তারে হবর্ পাং। যুনি মুই কং মুই তারে হবর্ ন-পাং সালে তমা ধোক্ক্যেন্ মুই মিজে মাদিয়্যে ওম্। মাত্তর্ মুই তারে চিনোং আর তা কধা বাধ্য ওইনে চলং। 56তমা বাব্পো অব্রাহামে মঅ দিন্নো চেবার্ আজায় হুজী ওইয়্যে। তে সিবে দেক্ক্যে আর হুজীয়ো ওইয়্যে।”
57যিহূদী নেতাগুনে যীশুরে কলাক্, “তর্ বয়চ্ এজঅ পন্জাচ্ বজর ন-অয়, আর তুই কি অব্রাহামরে দেক্ক্যচ্?”
58-59যীশু তারারে কলঅ, “মুই তমারে ঘেচ্চ্যেক্গুরি কঙর্, অব্রাহামে জোর্মেবার্ আগেত্তুন্ ধুরি মুই আঘং।” এ কধাগান্ শুনিনে সেই নেতাগুনে যীশুরে মারিবাত্যে পাত্তর্ কুড়েলাক্। মাত্তর্ যীশু হবর্ ন-পেইয়্যে গুরি উবোসনা-ঘরত্তুন্ নিগিলি গেলঅ।
Currently Selected:
যোহন 8: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
