পত্থম 12
12
গোজেনে অব্রামরে ডাগিলো
1পরেদি লগেপ্রভু অব্রামরে কলঅ, তুই তর্ নিজো দেজচান, তঅ কুদুম্মোগুন্ আর তঅ বাবর্ ঘর-দুয়োর্ ছাড়িনে মুই যে দেজ্চান দেগেই দিম্ সে দেজচানত্ যাহ্। 2তরে দিইনে মুই এক্কো দাঙর্ জাদ্ বানেই দিম্। মুই তরে বর্ দিম্ আর এবাবোত্তে গুরিম্ যেনে তর গম্ হবরান চেরোকিত্তে ছিদি পড়ে আর তঅ মাধ্যমে যেনে মান্জ্যে বর্ পান। 3যিগুনে তরে বর্ দিবাক্ মুই তারারে বর্ দিম, আর যিগুনে তরে অভিশাব দিবাক্ মুই তারারে অভিশাব দিম্। তঅ মাধ্যমে পিত্থিমীর্ বেক্ জাদ্তুনে বর্ পেবাক্ । 4লগেপ্রভুর্ কধা মজিম্ অব্রামে সেক্কে নিগিলি এলঅ আর লোটেয়ো তা লগে গেলঅ। হারণ শঅরান্ ছাড়ি যেবার সলাবোত্ অব্রামর বয়জ অলদে পাচাত্তুর্ বজর। 5তে তার মোক্ সারী আর ভেইপুত্ লোটরে লোইনে নিগিলিলো। নিজোর্ বেক্কানি নেযেইনে আর যিদুক্কুন চাগর-চাগরানীরে তারা হারণত্ পেইয়োন্ তারারে লোইনে তে কনান দেজ মোক্ক্যে যেইনে লুমিলোগোই।
কনান দেশত্ অব্রাম
6কনান দেজ ভিদিরেদি যাদে যাদে অব্রামে শিখিম শঅর ইধু মোরির পবিত্র গাজ্সো সং গেলঅ। সেক্কেয়ো কনানীয়গুনে সে দেজত্ বজত্তি গুরিদাক্। 7পরেদি লগেপ্রভু অব্রামরে দেগা দিইনে কলঅ,“এ দেজ্চান্ মুই তঅ বংশবোরে দিম্।” যিবে তারে দেগা দিয়্যে সে লগেপ্রভুর্ নাঙে অব্রামে সেক্কে সিয়েনত্ এক্কো ডালিপূজো বানেল।
8সে পরেদি সিয়েনত্তুন্ তে বৈথল শঅর পুগেদি মুড়ো-মুড়ি চাগালাত্ উজেই গেলঅ আর পোজিমে বৈথল আর পুগেদি অয় শঅর ভিদিরে এক্কান জাগাত্ তা তাম্বুলান তাঙেল। লগেপ্রভুর্ নাঙে সিয়েনত্অ তে এক্কো ডালিপূজো বানেল আর লগেপ্রভুরে তার পাওনা সর্মান দিলো। 9পরেদি তে সিয়েনত্তুন্ যাদে যাদে নেগেভ নাঙে দোগিণেদি ধূল্যেচর-চাগালাত্ গেলঅ।
অব্রামে মিসরত্ গেলঅ
10কনান দেজত্ ভাদঅ রাত্ দেগা দিলো। সে ভাদঅ রাত্তো এদক্ বেশ্ অলদে, অব্রামে কয়েকদিনোত্তে মিসর দেজত্ বজত্তি গুরিবাত্তে গেলঅ। 11মিসর দেজ কায়-কুরে এইনে অব্রামে তা মোক্কো সারীরে কলঅ, “শুন্, মুই হবর্ পাং তুই অমকদ দোল্। 12তুই যেক্কে মিসরীয়গুনো চোগোত্ পুড়িবে সেক্কে তারা মনে গুরিবাক্ তুই মঅ মোক্। আর ইয়েন মনে গুরিনে তারা তরে থোইনে মরে মারে ফেলেবাক্। 13সেনত্তে তুই তারারে কবেদে, তুই মর্ বোন। সেক্কে তত্তে তারা মঅ লগে গম্ বেবহার গুরিবাক্ আর মরে বাজেই রাগেবাক্।” 14অব্রামে যেক্কে মিসরত্ গেলঅ সেক্কে মিসরীয়গুনে দেগিলাক্ সারী অমকদ দোল্। 15ফরৌনর, অত্তাৎ রাজার দরবার মানুচ্চুনেয়ো তারে দেগিনে ফরৌন ইধু তারে নাঙ্ গিনিনে নানান্ কধা কলাক্। সেনত্তে সারীরে রাজঘরত্ নেযা অলঅ। 16আর সারীত্যে ফরৌণে অব্রাম লগে গম বেবহার গরা ধুরিলো। তে অব্রামরে বোউত্ ভেড়া, গোরু, গাধা, গাধী উট আর চাগর-চাগরানী দিলো। 17মাত্তর্ অব্রাম মোক্কো সারীত্যে লগেপ্রভু ফরৌণ আর তা ঘরত্ বেক্ মানুচ্চুনো ভিদিরে নানান্ বাবোত্যে অমকদ অসুগ্ দিলো। 18-19সেক্কে ফরৌণ অব্রামরে ডাগিনে কলঅ, “তুই মঅ লগে ইয়েন্ কেধোক্ক্যেন বেবহার গুরিলে? কিত্তে তুই তারে তর্ মোক্ ন-কোইনে বোন কোইয়োচ্? সেনত্তে দঅ মুই তারে মোক্ লবাত্তে আন্যং। ইবে যে তঅ মোক্; ইবেরে নিইনে তুই যাহ্।” 20ইয়েন্ কোইনে ফরৌণে তা মানুচ্চুনোরে উগুম্ দিলো আর তারা অব্রামরে বেক্কানি দিইনে তারে আর তা মোক্কোরে বিদেয় দিলাক্।
Currently Selected:
পত্থম 12: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
