Matie 14
14
Zaa Batisɩ 'a 'kwiea a wɛlɩɩ
(Maakö 6.14-16; Lwiikö 9.7-9)
1‑Lɛ a 'tɛnyɩ 'la 'mö, Eloodɩ ‑ɔ 'kämanɩɛ Galilee‑bhölɩɩ ‑gömöö, ɔ 'nʋä Zezwii a nʋnʋli a 'dɩɩ, 2'n ɔ yiɛ 'ɔ nɩkpaa 'dɩ 'nyɛ, ɔ lɛ naa: «Zaa Batisɩ ‑ɔ 'ku a‑a, mɔɔ. Glu ɔ 'wlʋä, nza ɔ kää 'mötɛɛnɔ 'n ɔ bhɛɛ sa'a a zɩzɛli.»
3-4Nyɩasɛ Zaa Batisɩ 'nɩɛ 'la 'ku, maa wɛlɩɩ ‑wʋa a‑a ‑lɛ. 'Ylɩ ‑bhlʋ 'mö, Eloodɩ mɔɔ sɛ a‑a ɔnyɩ a ‑daayu Filiipö 'nglɔ yɔwʋ. 'Nglɔ 'la, 'mö wa laa Elodiadɩ. Wɛlɩ 'la a za, 'n Zaa Batisɩ nyɛ a‑a 'kwädlɩ Eloodɩ 'dɩ nɩɩ: «‑Na ‑daayu 'a nglɔɔ ‑n kwää da'aa, yɩ'ɩɛ nɛnɩ ‑n 'kɔ ‑kälɩ.» ‑Sɩbhä a za, Eloodɩ 'nyɛ a‑a 'ɔ nɩkpaa 'dɩ 'n wa yiɛ Zaa Batisɩ köbhä, 'n wa yoo gwa, 'n wa yoo ‑jie 'mö 'pä. 5Eloodɩ yɩbhä a ɔ 'kä Zaa Batisɩ 'lɩbhä ɔ 'kä 'ku. ‑Maa ɔ gu'ɛ mä'ä ‑bʋbʋʋ zaa, ɔ 'nɔɔ a 'lɩbhä. Ɛ'ɛ ‑bhö nyɩasɛ, ‑maa Zwiiföwaa a dɔ'wʋ, Zaa Batisɩ, Lagɔ 'a 'möbhïlanɩnyɔɔ ɔ glɩnɩ a‑a. 6'Ylɩ ‑bhlʋ 'mö, 'n Eloodɩ 'a gwälɩzlɩ a 'wʋbhlizlɩ yiɛ ghlɛ, 'n ɔ yiɛ nɩkpa wäzɩ wa 'kä 'bhli. Wa ‑wʋ 'bhli dɔ'wʋ, ‑lɛ nɩkpa 'wuë a 'yila 'klʋ, Elodiadɩ ‑yɛnglɛ 'n ɔ yiɛ ‑lɛ yɩnɩ. 'N 'ɔ yɩyɩbhʋʋ yiɛ Eloodɩ dlɩ 'mlɩ ‑sɛ. 7'N ɔ yiɛ nglʋyuu wäzɩ, ɔ lɛ naa: «'Saa ‑n ‑kä ‑waa, 'yɩbhänɩ'mu. ‑Maa n zligo nɩɩ, n ‑yimu 'nyɛ.» 8Ɔ gbää sa'aa, nglʋyuu 'yɩbhää ɔ ‑da nimïï, 'saa ɔ 'kää Eloodɩ 'yɩbhänɩɩ, 'n ‑daa yonyɩɛ sʋlʋnɩ. 'N nglʋyuu yiɛ Eloodɩ 'dɩ 'nyɛ nɩɩ: «Nyɩaa Zaa Batisɩ 'a 'wukpëlea. 'Zʋa ‑sɩkaa ‑sɩkaa 'bëë 'mö, ‑n ‑ka'ma yowʋ 'nyɛ.» 9Ɔ gbää sa'aa, 'n 'bhlɩlowli yiɛ kɔmanɩ, ‑maa sɛ ɔ zligonɩɛ ‑lɛ ɔ 'bhɩa 'yila 'klʋ a za, 'n ɔ yiɛ 'wʋ nglu. 10'N ɔ yiɛ nɩkpɛ ‑mä ‑jiebuduu 'mö tie ɔ 'kä Zaa Batisɩ 'wlu ‑dɩɛ mö. 11Ɔ ‑doo 'wlu 'wëë, 'n ɔ yiɛ 'ɔ 'wukpëlea 'bëë 'mö 'zʋ, 'n ɔ ‑nyaa yiɛ yi. 'N wa yeaa nglʋyu 'la yowʋ 'nyɛ, 'n ɔ yeaa ‑mä ɔ ‑da kwä. 12Zaa Batisɩ 'a ‑gänɩwaa 'nʋä ɔ 'kukutɩtɩɩ, 'n wa yiɛ ɔ ‑gäzɛɛ kie mö 'n wa yee ziza, 'n wa yia'aa Zezwii 'dɩ 'nyɛɛ mö.
Zezwii yɛ nɩkpa a 'dwi 'sɔ nɩkpa a gwlɩ kʋgbä (5.000) lile 'nyɛ
(Maakö 6.30-44; Lwiikö 9.10-17; Zaa 6.1-15)
13Zezwii 'kɩɛ 'nʋʋ, 'n ɔ yiɛ 'wʋ ‑sɔ, 'n ɔ yiɛ 'gɔlʋ 'wʋ 'libhï, dɛ ‑bhlʋ dɛ ɔ 'kää ɔ 'yize ‑wʋ, ɔ 'kä ‑lɛ mö. Nɩkpa 'nwiɛ, wa 'bhöönɩ ‑mä ‑gwlɩ 'wuë ‑gömö, wa ‑wʋ nyuu tɩtlɩnɩ dɔ'wʋ 'n wa yoo 'bɩwʋ mö. 14Gɔlʋʋ köbhää kïkëa, Zezwii kwliɛ, nɩkpa su ‑lɛ 'kïke 'wlu. Ɔ 'yuëë 'ylɩmöö, 'n wa ngäzɩ yoo tenyii 'lɩbhä. Wa gla'mö a guzuwaa, 'n ɔ yuëë yɛmanɩ. 15Sa'a ‑këë, 'n ‑kidosɛ yiɛ ghlɛ. 'N 'ɔ ‑gänɩwaa yoo yɔwʋ 'dio, wa lɛ naa: «Zlɩ yɛ fäla zaa, 'nyɛ nɩkpaa 'dɩ wa 'kä 'wʋ ‑sɔ. Mä'ä a ‑gwlɩɩ 'mö, wa 'käa ‑mä mö, wa 'käa ‑mä wanyɩ a lile pɩa. ‑Maa 'klokwëjijo'wʋ ‑a ‑wʋä dɛ'ɛ.» 16Zezwii lɛ naa: «A'bhï, a nɩ 'nyʋä lile, ‑maa wa nɩ tɩ mö.» 17Wa lɛ naa: «'Fɔlɔbhï ngbï, 'n zibhïya 'sɔ a 'yize mö ‑a ‑suä cuu.» 18Ɔ lɛ naa: «‑Aa, a nɩ ‑la'mi!» 19Wa ‑nyɩɩ yiɛ, 'n ɔ yiɛ nɩkpa 'wuë 'dɩ 'nyɛ, 'n wa yiɛ ‑mä ‑putukwëa ‑gömö sɛ glɩ. 'Fɔlɔbhï ngbï ‑kpɔ ‑nyɛ zibhïya 'sɔ ‑kpɔ 'sɔ, 'n ɔ yiɛ 'wʋ 'libhï. 'N ɔ yiɛ ghäyɩ yɩlɩ, 'n ɔ yiɛ yɩ za Lagɔ bhälɩ. 'N ɔ yiɛ 'mö ‑dɩdɩnɩ, 'n ɔ yiɛ 'ɔ ‑gänɩwaa yowʋ 'nyɛ. 'N wa yiɛ nɩkpa 'wuë dilanɩ. 20Wa 'wuë 'n wa yiɛ li 'n wa yiɛ lʋ, 'n yɩ yiɛ 'wʋ tʋʋ. 'Fɔlɔkïbhï ‑nyɛ zibhï 'sɔ ‑yɩ tʋʋä 'wʋ, wa 'libhiɛ, yɩ yie ‑käkö kʋgbä'sɔ. 21‑Maa ‑wa liɛ ‑lɛ a lile 'la, ‑bhli nɩkpa a 'dwi 'sɔ nɩkpa a gwlɩ kʋgbä (5.000). Ngwlɩɩ ‑nyɛ yuëa 'sɔ, 'mö wa 'nɩɛ zɛlɩmö.
Zezwii yɛ 'nyu 'klʋ nɛmönɩ
(Maakö 6.45-52; Zaa 6.15-21)
22Wa bhɩɛ zɛmö 'wë cuu, 'n Zezwii yiɛ 'ɔ ‑gänɩwaa 'dɩ 'nyɛ nɩɩ, wa nɩ ‑gbälɛ ‑mä 'gɔlʋ 'mö, wa 'kä ‑bhlɛ ‑mä nyuu a kïkë ‑mä'la ‑gömö 'yuku 'plɩ, ɔ 'kä nɩkpaa bhʋ ‑gömö ‑sɛ. 23Ɔ ‑sɛɛ nɩkpaa bhʋ ‑gömö 'wëë, 'n ɔ yiɛ ‑gäga ‑bhlʋ 'klʋ mö ɔ 'kä Lagɔ bhibhe. Ɔ 'yize, ɔ glɩ ‑mä 'n kätɩkpamlɩ yiɛ ylumanɩ. 24Gɔlʋʋ 'ɔ ‑gänɩwaa mönɩɛ 'mö yɛ 'yuku ghlɛ 'wë 'n 'vuu yiɛ mää gɔlʋʋ mönɩ a‑a 'bhöönɩ, zaa 'nyu kɔdʋʋ a ‑gbɔkwälɩɩ a za, wa yia'a 'lu ‑kë, gɔlʋʋ 'nɩɛ ‑mä mö. 25Zlɩzɩdɔ'wʋ ɔ ‑sɔɔ 'wʋ, 'n ɔ yuëë 'bɩwʋ mö. Ɔ ‑wʋä mö dɔ'wʋʋ, ‑lɛ ɔ nɛmönɩɛ 'nyu 'klʋ. 26‑Maa wa 'yɩɛ ɔ 'nyuklʋnɛmönɔɔ 'ylɩmöö, zuzuu 'bhuëëë ‑gömö. Wa ‑tɔnɔ ‑zele, 'n wa yiɛ tenyii 'mö 'kpa nganɔ a za. 27Wa 'kpaa 'möö, 'n Zezwii yiɛ gbʋ ‑dɩ, ɔ lɛ naa: «A 'zʋ ‑mä dlɩ, nganɔ nɩ tanyɩ 'lɩbhä, ‑maa ‑amöä.» 28Ɔ gbää sa'aa 'n Piɛlɩ yiɛ gbʋ ‑dɩ, ɔ lɛ naa: «‑Alowli ‑n ‑kä ‑tiamö nɩɩ ‑nmöä nʋʋ, gbä n 'kä'ɛ na a ‑lɛ 'nyu 'klʋ nɛmönɩmö, n ‑kamö yinɩ.» 29Zezwii lɛ naa: «Yi!» Ɔ gbää sa'a cuu, 'n ɔ yiɛ ‑mä 'gɔlʋʋ 'mö 'wlʋ, ɔ ‑wʋ ‑lɛ 'nyu 'klʋ nɛmönɩ dɔ'wʋ 'n ɔ yiɛ Zezwii mönɩ. 30‑Maa nyuu a ‑gbɔkwälɩɩ 'vuu pää ghäyɩɩ, ɔ 'yiɛ 'ylɩmöö 'n nganɔ yoo 'lɩbhä. Ɔ ‑wʋ 'wlu 'mla dɔ'wʋ, 'n ɔ yiɛ tenyii 'mö 'kpa, ɔ lɛ: «‑Alowli, yii 'wʋ!» 31'N Zezwii yoo sɔ köbhänɩ 'n ɔ yoo ‑mä ‑sɛ, ɔ lɛ naa: «Sɛ yɩ ‑wʋ ɔ 'mö, n‑n gʋgɔ bhä 'nɩ? ‑Nn‑ä sasɛ Lagɔ dlɩ 'tɛɛnɩ.» 32Wa 'sɔ ‑kpɔ, 'n wa yiɛ ‑mä gɔlʋʋ 'mö ‑gbälɛ. 'N 'vuu yiɛ donɩ. 33‑Mä 'gɔlʋ 'mö, 'ɔ ‑gänɩwaa 'wuë 'n wa yiɛ ‑lɛ ɔ dlɩ 'mö ‑kokomïladigbï glu 'pä. Wa lɛ naa: «Lagɔ 'a yuu mö ‑n glɩnɩɛ ‑tiamö.»
Zezwii yɛ guzuwa a ‑bɛ ‑mä Zenezalɛɛtɩ‑bhölɩɩ 'mö yɛmanɩ
(Maakö 6.53-56)
34Wa 'tʋä nyuu 'wëë, 'n wa yɩɛ ‑mä Zenezalɛɛtɩ‑bhölɩɩ 'mö ghlɛ. 35Mä a ‑nʋa, wa yɩbhlɩnɩɛ Zezwii cuu, ‑mä a ‑kʋkʋyɔwʋ a ‑gwlɩɩ 'wuë 'mö, 'n wa yiɛ ‑mä ɔ yiyitɩtɩ bia. 'N ‑mä a ‑nʋa ‑nyɛ 'wa guzuwaa 'wuë yiɛ yi. 36'N wa bhibhee Zezwii yɔwʋ nɩɩ: «‑Yayaya, nglu 'wʋ, ‑na'a ‑bäna a klɩ a 'yizea, wa 'kɛ kɛ zɩ.» Guzuwaa 'wuë ‑wa zee kɛɛ, yɛmanɩ wa yɛmanɩɛ.
Currently Selected:
Matie 14: bet
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
