Matie 12

Zezwii yɛ Zwiiföwaa 'a ‑gwlɛnɩzlɩɩ a dɛ bhïla

(Maakö 2.23-28; Lwiikö 6.1-5)

1‑Lɛ a 'tɛnyɩ 'la a ‑gwlɛnɩzlɩ ‑bhlʋ 'mö, Zezwii ‑nyɛ 'ɔ ‑gänɩwaa 'sɔ, 'n wa yiɛ ‑nyɔɔ a sɛ a 'lagbïle 'mö ghlɛnɩ. Wa ‑wʋä mö dɔ'wʋʋ, ngɔmʋ a za, 'n 'ɔ ‑gänɩwaa ‑dɩnɩɛ lilea ghäyɩ 'n wa leaa. 2Falizɩɛwaa 'yuëë 'ylɩmöö, 'n wa yiɛ Zezwii 'dɩ 'nyɛ, wa lɛ naa: «Yɩɛ ‑mä sɛɛ ‑na'a ‑gänɩwaa zʋä, ‑sɩbhä 'nɩɛ nɛnɩ. Sɛɛ ‑a'a gböö gbä a‑a wa nɩ tɩ ‑gwlɛnɩzlɩ 'zʋʋ, ‑sɩbhä wa zʋä da'a.» 3Zezwii lɛ naa: «Lagɔbɔgʋʋ 'mö 'a wɛlɩɩ ‑yɩ cɛlɩɛ ‑mä, ‑yɩ bhïlaa Daviidɩ ‑nyɛ 'ɔ nɩkpaa 'sɔ a dɛ, ngɔmʋ 'lɩbhʋä 'ylɩ ‑bhlʋ 'mö a sɛ wa 'zʋä, a 'ni ɔ ‑zɩ 'mö zɛlɩ ‑a? 4Lagɔbʋbɔnɩfɔlɔ ‑wʋ ‑wʋ a‑a ‑mä Lagɔbudu 'mö, ‑a'a gböö a dɔ'wʋ, 'fɔlɔ 'la, Lagɔbʋbɔwaa a 'yize mʋa kää wa 'kʋ li. ‑Maa ‑sɩbhä ‑wʋ 'mö, 'n wa yiɛ ‑mä ‑budu 'mö plɛ, 'n wa yiɛ 'fɔlɔ 'la 'wʋ 'libhï, 'n wa yuä li. 5A'bhï a ‑yi sɛ nɩɩ, nɩkpɛ ‑kä ‑gwlɛnɩzlɩ libho nʋʋ, ‑gwlɛnɩzlɩ a Gböö 'mö ɔ sɛɛ da'a 'klʋkpamö. ‑Sɩbhä yɩ ‑wʋ 'mö, ‑maa Lagɔbʋbɔwaa ‑kä ‑mä Lagɔbudu 'Kɔdʋʋ 'mö ‑libho nʋʋ, ‑bɛ 'naa 'kʋä ‑gwlɛnɩzlɩ a Gböö a 'klʋkpamösɛgbʋ 'nyɛ. Wɛlɩ nɩ, ‑mä yɩ cɛlɩɛ Moyizɩ a Gböö a 'bɔgʋʋ 'mö. A 'ni bhä'ɛ ‑bhlɛ 'mö zɛlɩ ‑a? 6N nyanyɩ 'dɩ nɩɩ ‑ɔ kää dɛsɛ ‑ɔ ziɛ Lagɔbudu 'Kɔdʋʋ 'wʋʋ, mɔɔ ‑wʋanyɩɛ dɛ'ɛ jijo'wʋ. 7Wɛlɩɩ ‑yɩ cɛlɩɛ ‑mä Lagɔbɔgʋʋ 'mö, ‑yɩ nʋä nɩɩ: Nɩma a bʋbɔnɩbʋbɔnɛ mɛ, ngäzɩdlɩkäkʋ mu, yɩ 'sɔ ‑kpɔ a dɔ'wʋ, ngäzɩdlɩkäkʋ 'mö n yɩbhää.#12.7 Ozee 6.6. A ‑kä a sɛ yɩ sɛɛ zɛmö 'mö 'nʋʋ, nɩkpa a ‑muë 'nɩɛ ‑lizoku nʋʋ, a 'naa 'kʋä a 'fʋ gbʋ köbha. 8Sɛ'ɛ n gbää nɩɩ, Nɩkpɛ a 'Yu mɔɔ 'kämanɩɛ ‑gwlɛnɩzlɩɩ ‑gömö.»

Zezwii yɛ ‑kwätasɩɛkakänyɔ ‑gwlɛnɩzlɩ yɛmanɩ

(Maakö 3.1-6; Lwiikö 6.6-11)

9Zezwii 'nyʋää sa'a 'dɩ 'wëë, 'n ɔ yiɛ ‑lɛ 'bhöö, 'n ɔ yiɛ ‑mä 'wa Lagɔbuduu 'mö mö. 10Nɩkpɛ ‑bhlʋ ‑wʋmö a ‑mä, ‑kwätasɩɛka ɔ kää. Zezwii plɛɛ ‑mä, 'n Falizɩɛwaa yoo nimï 'yɩbhä nɩɩ: «Wa ‑kä nɩkpɛ ‑gwlɛnɩzlɩ yɛmanɩ, yɩ nɛnɩ bhä ‑a'a gböö a dɔ'wʋ ‑a?» Nyɩasɛ wa 'nɔɔ ‑sɩbhä nimï 'yɩbhä, ‑maa wa yɩbhä wa 'kɔ gbösɛnyɔ 'mö 'yɩ wa 'kɔ ‑zijle 'nyɛ. 11Wa gbää sa'aa, Zezwii lɛ naa: «A gla'mö a nɩkpɛ, 'ɔ wlii ‑bhlʋ ‑kpɔ ‑kä ‑gwlɛnɩzlɩ 'bhʋkwa 'käda 'mö bhlinɩ, ɔ 'naa 'kä bhä ‑mä sɛ 'sibhë ɔ 'kɛ ‑mä ‑sɛ ‑a? 12A ‑yi sɛ nɩɩ, nɩkpɛ kä tenyii dɛsɛ ɔ zi wli 'wʋ, zaa 'n wa ‑kɔɔ ‑gwlɛnɩzlɩ ‑li a ‑li 'wlu nʋʋ, yɩ nɛnɩ ‑a'a gböö a dɔ'wʋ.» 13Zezwii gbää sa'a 'wëë, 'n ɔ yia'aa ‑kwätasɩɛkakänyɔ 'la 'dɩ 'nyɛ, ɔ lɛ naa: «Plu ‑na'a sɔɔ 'mö.» 'N nɩkpɛ yiɛ sɔɔ 'mö plu, 'n ɔ ‑kwätaa yiɛ yɛmanɩ. ‑Mä'la a saa, 'n a yiɛ ‑sɩbhä 'zʋ. 14Zezwii 'zʋä ‑sɩbhä cuu, Falizɩɛwaa ‑wa ‑wʋmö a‑a ‑mä, 'n wa yiɛ ‑mä 'wlʋ, 'n wa yiɛ 'wlu 'yɩbhää mö, sɛ wa 'kää 'mö 'zʋmözʋmö wa 'kä Zezwii 'lɩbhä ɔ 'kä 'kuu, wa 'kä ‑sɩbhä sɛ tɛlɩ.

Libhonʋnyɔɔ Lagɔ ‑sɛɛ ‑lɛ

(Maakö 3.7-12)

15Zezwii 'nʋä wɛlɩ 'la 'n ɔ yiɛ 'wʋ ‑sɔ 'n ɔ yiɛ mö. 'N nɩkpa a ‑bɛ yoo 'bɩwʋ bhlinɩ 'n wa yiɛ 'mämö. Wa gla'mö a guzuwaa 'wuë 'n ɔ yuëë yɛmanɩ. 16‑Maa wa 'wuë, kä'mö ɔ 'titiluëë tenyii wa tɩa ɔ 'nglɩ bia. 17Lagɔ a bhla'mö a 'möbhïlanɩnyɔ Ezayii, wɛlɩɩ ɔ bhïla a‑a, sa'a yɩ 'wlʋnɩɛ 'ylɩ. Sɛ'ɛ ɔ gbä a‑a nɩɩ,

18«Lagɔ lɛ naa:

Yɩɛ, 'na libhonʋnyɔɔ n ‑sɛɛ ‑lɛɛ, mɔɔ dɛ'ɛ.

'Mö n ‑waa tenyii, mɔɔ glɩnɩɛ 'na 'mäna 'wuë.

'Mö n 'kää 'na 'Wugɔmʋʋ ‑gömö 'zʋ.

Mɔɔ 'kää 'bhlɩbhëa 'wuë 'yioo ‑wʋ zlɔnɩɛ 'mö a 'dɩ 'nyɛ.

19 Ɔ'ɔɔ ɔ ‑nyɛ nɩkpa 'kä 'lʋ, ɔ'ɔɔ ɔ 'kä nyla,

‑bɛ 'naa 'kä ɔ ‑gëbë 'du 'mö nʋnɩ.

20 ‑Bʋbʋkwëyii ‑ɛ kää ‑jɔlʋ yɔwʋʋ, ɔ'ɔɔ ɔ 'kɛ 'mö ‑dɩ.

Ɔ'ɔɔ ɔ 'kä 'napɛɛ ‑ɛnyɩɩ lɩlɛɛ 'nɩɛ 'mö 'tɛɛ 'wʋ 'ngïma.

Swɩ 'naa 'kɔ yɔwʋ 'kunɩ,

‑këë 'saa zlɔnɩɛ 'mö Lagɔ a 'yila 'klʋ a dɔ'wʋʋ,

'n ɔ 'kää 'nglɩ ‑kä wʋ 'kä 'wlu 'plɩ.

21 'Mö 'bhlɩbhëa 'wuë 'kää dlɩ 'tɛɛnɩ. # 12.18-21 Ezayii 42.1-4. »

Falizɩɛwaa yɛ Zezwii wɛlɩzoku bhïlanɩ

(Maakö 3.22-30; Lwiikö 11.14-23)

22'Ylɩ ‑bhlʋ 'mö, nɩkpɛ ‑bhlʋ 'mö wa ‑lɛmöä Zezwii, zuzukwëzokwë ɔ kää ‑gömö. A za, ɔ'ɔɔ sɛ yɩlɩ, ɔ'ɔ ‑dɩ gbʋ 'lɩlɩlɩ. 'N Zezwii yoo yɛmanɩ, 'n 'ɔ yilaa yiɛ do, 'n ɔ yiɛ bhïla. 23Nɩkpa 'wuë ‑wa ‑wʋ a‑a ‑lɛ, 'n zuzu yuëë ‑gömö 'bhöö 'n wa 'yɩbhäyɩbhänɩɛ nimï 'n wa nʋä «'Ɔ! 'Bhlɩlowli Daviidɩ a 'yu a 'yu, ɛ'ɛ ‑bhö ɔ ‑kamä dɛ'ɛ mɔ ‑a?» 24Nɩkpaa gbää sa'aa, wa gla'mö a Falizɩɛwaa lɛ naa: «Nɩkpɛ 'la, zuzukuzoku a 'kifi Bɛzebilɩ, mɔɔ ‑wɔɔ ‑gömö, mɔɔ nyɔɔ 'mötɛɛnɔ 'n ɔ kpëtie zuzukuzoku nɩkpa ‑gömö.» 25‑Maa Zezwii ‑yi 'wa dlɩpäsaa zaa, 'n ɔ yuëë 'dɩ 'nyɛ nɩɩ: «'Bhlɩ ‑bhlʋ 'mö a nɩkpa ‑kä 'ylimö ‑känɩ, wa ‑kä wa 'yize tʋ gwɩɩ, 'yli 'wa bhlɩɩ bhɩɛɛ. Glɔ ‑bhlʋ 'mö a ‑nʋä, 'n ɛ ‑kä'ɛ ‑kosu ‑bhlʋ yɔwʋ a ‑nʋä, wa ‑kä'ɛ wa 'yize tʋ gwɩɩ, 'yli wa bhɩɛɛ. 26Zaa, 'n Sataa ‑kä a Sataa kpëtii, 'n ɔ ‑kä a ɔnyɩ tʋ ‑lɛɛ, 'ɔ 'kämanɔɔ 'naa 'kä a bhä ‑pa 'yli bhɩɛ ‑a? 27Zaa, sɛ a nʋä a'bhï da'aa, 'n Bɛzebilɩ mɔɔ ‑kaa 'mötɛɛnɔ 'nyɛ 'n n ‑kä zuzukuzokuu kpëtii, a gla'mö a ‑nʋa ‑wa kpëtiɛ, ‑ɔ nyʋä bhäa'a wabhlɩ 'mötɛɛnɔ 'n wa kpëti bhä ‑sɩbhä 'nɩ? 'Saa a gla'mö a ‑nʋa nʋä da'aa, yɩ kä a yɩ 'kanyɩ 'dɩ 'nyɛ nɩɩ, a'aa zugwë ‑kä. 28‑Maa ‑tiamö a dɔ'wʋ, Lagɔ 'a 'Wugɔmʋʋ mɔɔ ‑wʋʋä ‑gömö, nza n kpëtiɛ zuzukuzokuu. Zaa, n ‑kä ‑sɩbhä 'zʋʋ, yɩ nɩ tulananyɩ 'ylimö nɩɩ, Lagɔ a'bhë, ɔ ‑wʋ mä'ä a jijo'wʋ ɔ 'kanyɩ ‑gömö 'kämanɩ.

29A ‑yi sɛ nɩɩ, nɩkpɛ ‑kä tenyii 'mö 'tɛɛ 'n wa ‑kä wa 'kä 'ɔ ‑buduu 'mö a ‑lii 'wʋ 'libhï nʋʋ, 'n wa 'nɔɔ gwa 'wëë, wa 'naa 'kɩ 'wʋ 'libhï. ‑Maa wa ‑kɔɔ gwa 'wëë, ‑lɛ a dɔ'wʋ, wa yi yɩ 'wuë 'wʋ 'libhï. 30Sɛ'ɛ n gbää nɩɩ, ɔ ‑nɩɩ nimï ‑wʋʋ, 'ylimö ɔ ‑nya'mö ‑känɩɛ. ‑Ɔ ‑nɩɩ kwänɩ ‑a 'kä 'wlu 'yɩbhaa, gbɔlanɩ ɔ gbɔlanɩɛ. 31'Dɩ n nyanyɩɛ dɛ'ɛ nɩɩ, nɩkpɛ yi ‑lizoku a kii 'wuë nʋ oo, ɔ yi wɛlɩzoku a kii 'wuë Lagɔ a dɛ bhïla oo, Lagɔ yi yɩ gbʋ 'yi 'tatinɩ. ‑Maa nɩkpɛ a ‑mɔɔ ‑kä Lagɔ 'a 'Wugɔmʋʋ a dɛ wɛlɩzoku bhïlaa, ‑lɛ a 'nyinyloli 'la a gbʋʋ, Lagɔ 'naa 'kʋ 'yi 'tatinɩ 'lɩlɩlɩ. 32Sɛ'ɛ n gbää nɩɩ, nɩkpɛ a 'Yu, nɩkpɛ ‑kɔɔ wɛlɩzoku bhïlanɩɩ, Lagɔ yi yɩ gbʋ 'yi 'tatinɩ. ‑Maa nɩkpɛ a ‑mɔɔ ‑kä Lagɔ 'a 'Wugɔmʋʋ a dɛ wɛlɩzoku bhïlaa, ‑lɛ a 'nyinyloli 'la a gbʋʋ, Lagɔ 'naa 'kʋ 'yi 'tatinɩ. Ɛ yi zɩkpa ‑ma nɩ 'mö ma oo, ɛ yi zɩkpa ‑ma ‑a 'kää yi 'mö ma oo, Lagɔ 'naa 'kʋ 'yi 'tatinɩ.

Suu ‑nyɛ 'wʋ bhïï 'sɔ

(Lwiikö 6.43-45)

33‑N ‑kä n 'kä subhï a ‑subhï ‑sɛɛ, su a su 'yli ‑n 'kɩɛ ghlɩ. ‑Maa su ‑kä 'zokwë 'wʋ ‑wʋʋ, 'bhïzoku wʋ tlʋä. Swi a kii 'wuë, 'yɩ bhïï 'mö wa yɩbhlɩniɛ 'mö. 34Zaa, abhʋa ‑nyɛ 'bhʋtɩma#12.34 Matie 3.7. 'wlʋnɩɛ abhlɩɩ, abhʋaa glɩnɩɛ 'zoku a 'yizee, sɛɛ wɛlɩ a ‑wɛlɩ 'kanyɩ bhä ngli ghlɛnɩ 'nɩ? Sɛ'ɛ n gbää nɩɩ, nɩkpɛ ‑kä bhïlaa, 'saa suä ‑mä ɔ dlɩ zɛmöö, mɩɩ ghlɛnɔɔ ngli. 35Nɩkpɛ ‑kä dlɩzɛmönanɩnyɔ glɩnɩɩ, 'ɔ dlɩ zɛmö a ‑li a ‑lii ‑yɩ ‑wʋä ‑mää, 'mö ɔ nʋä. Ɔ ‑kä'ɛ 'zokwë glɩnɩɩ, 'ɔ dlɩ zɛmö a ‑lizokuu ‑yɩ ‑wʋä ‑mää, 'mö ɔ nʋä. 36'Dɩ n nyanyɩɛ dɛ'ɛ nɩɩ, Lagɔ 'a ‑zijle 'käda a zlɩɩ ‑kä ghlɛɛ, nyɩasɛwɛlɩ 'wuë ‑yɩɩɛ dɛsɛ ‑kä, nɩkpa bhïlaa mä'ä dʋdʋ 'wʋʋ, Lagɔ yuënyɩ 'wʋ 'yɩbhänɩ. 37Ɛ'ɛ ‑bhö nyɩasɛ, ‑maa ‑nanyɩ a bhïlawɛlɩɩ, Lagɔ a 'yila 'klʋ a dɔ'wʋ, mɩɩ ‑kamöä gbʋ köbha, mɩɩ ‑kamöä gbʋ ‑sɛ.»

Falizɩɛwaa lɛ Zezwii nɩ 'pänɩ ‑lɛ wa 'yila 'klʋ zɩzɛɛ

(Maakö 8.11-12; Lwiikö 11.29-32)

38Zezwii gbää sa'aa, Moyizɩ 'a Gböö a 'cɩawaa ‑nyɛ Falizɩɛwaa 'sɔ, wa gla'mö a ‑nʋä ‑mumuë, 'n wa yoo 'dɩ 'nyɛ, wa lɛ naa: «‑Atʋ, ‑a yɩbhä nɩɩ, 'pänɩ dɛ'ɛ ‑aa 'yila 'klʋ zɩzɛ ‑bhlʋ, nzɩɩ ‑a 'kä sɛ ‑yi nɩɩ, Lagɔ mɔɔ tiamöä.» 39Zezwii lɛ naa: «‑Sɩkaa a nɩkpaa, 'kpʋkpʋwa wa glɩnɩɛ. Wa yɛa Lagɔ ‑gömö panɩ 'wë, 'n wa tɛlɩ'ɛɛ ‑bhlɛ zɩzɛ a ‑mɛɛ 'bhöönɔɔ kä'mö sɛ. Nyɩasɛli wa nʋä! Zɩzɛ ‑mɛmɛɛ 'nɩɛ ‑bhölɩ, 'n ɛ 'nɩ ‑bhö Lagɔ a bhla'mö a 'möbhïlanɩnyɔ Zonasɩ a ‑nɛɛ mɛ. 40Sɛ ɔ ‑sɛɛ zibhiyi 'kädɛ 'mlɩ 'ylɩ ta 'n Lagɔ yoo ‑mä ‑sɛɛ, sɛ ‑bhʋlʋ ‑kpɔ 'la, ‑sɩbhä Nɩkpɛ a 'Yu 'kää 'ylɩ ta ‑mä glu ‑sɛ. Zɩzɛ ‑bhʋlʋ ‑kpɔ a 'kää 'ylɩmöö, mɛɛ da'a. 41Lagɔ 'a ‑zijle 'kädaa a zlɩɩ ‑kä ghlɛɛ, a ‑nyɛ Ninivö a ‑glɔ 'mö a ‑nʋa 'sɔ a dɔ'wʋ, a ‑nɩɩ 'mö yɩ 'kää tenyii 'tɛɛ. Sa'a sɛ Zonasɩ möä ‑mä 'wa ‑glɔɔ 'mö, 'n ɔ yuëë Lagɔwɛlɩɩ 'nyɛ, 'n wa yiɛ ligba 'n wa yiɛ 'wa ‑lizokuu kɛ'mö ‑sɛɛ, n 'nyanyɩɛ Lagɔwɛlɩɩ, a'aa abhlɩ ‑sɩbhä 'zʋ zaa, mɩɩ 'kanyɩɛ gbʋ köbha. Ɛ'ɛ ‑bhö nyɩasɛ, ‑maa nɩkpɛ a ‑mɔɔ 'ghïliɛ ‑ɔ ziɛ Zonasɩ 'wʋʋ, mɔɔ ‑wʋanyɩaa dɛ'ɛ 'dɩ 'nyɛ dɔ'wʋ. 42Sɛ'ɛ n gbää nɩɩ, Sebaa a 'bhlɩlɛnglɛ, sɛ ɔ 'bhöö a‑a ‑mä ɔ 'bhele 'yuku 'yuku, 'n ɔ yiɛ ‑a'a bhla'mö a 'bhlɩlowlii Salomɔɔ Lagɔ 'nyɛɛ tenyii 'nɛɛnɔ ‑mä ghlɩ, ɔ 'kä 'ɔ 'nɛɛnɩwɛlɩɩ 'yukwli ‑pʋnɩ a za‑a, a ‑yi ‑sɩbhä. ‑Maa sɛɛ nglɔ 'la ‑pʋnɩ a‑a Salomɔɔ 'yukwlii, a ‑nɩɩɛ ‑sɩbhä 'yukwli ‑pʋnɩ zaa, Lagɔ 'a ‑zijle 'kädaa a zlɩ 'mö, mɩɩ 'kanyɩɛ gbʋ köbha. Ɛ'ɛ ‑bhö nyɩasɛ, ‑maa nɩkpɛ a ‑mɔɔ 'ghïliɛ ‑ɔ ziɛ Salomɔɔ 'wʋʋ, mɔɔ ‑wʋanyɩaa dɛ'ɛ 'dɩ 'nyɛ dɔ'wʋ.

Zuzukwëzokwë ‑kä nɩkpɛ ‑gömö 'bhöö 'wëë a yi 'bɩwʋ

(Lwiikö 11.24-26)

43N nɛ naa, zuzukwëzokwë ‑kä nɩkpɛ ‑gömö 'bhöö, ‑mä a möä 'muse 'klʋ, 'n a zizinɩɛ ‑mä 'mö, 'n a tɛlɩɛ ‑mä glɩdɛ sɛ. ‑Maa 'n a 'nɩa'a ‑mä glɩdɛ ghlɩɩ, 44sɛ'ɛ a nʋä nɩɩ: N 'kää 'wlu sɩbhä, dɛ n 'bhöönɩ a‑a, n 'kä ‑lɛ mö. 'N a möä, a ‑kä lɛ 'bhöö 'lɛ, nɩkpɛɛ a 'bhöö a‑a ‑gömöö, 'n ɔ ‑kä ‑bhɩɛ ‑budu ‑mu wa yɛ 'mö yɩlɩpö 'wë, wa yɛ 'wlu gïganɩ 'tɩɩ ‑wʋʋ nɩkpɛ 'mö ‑kää, 45'wlu a sɩbhä'ɛɛ, 'n a möä zuzukuzoku ‑mimii ngbi'sɔ ‑yɩ ‑nyuä 'mle 'mö tenyii ‑yɩ zea 'wʋ kie. Yɩ 'wuë, 'n yɩ yiɛ nɩkpɛ 'la ‑gömö. ‑Lɛ a dɔ'wʋ, nɩkpɛ 'la a ‑gömögbʋʋ, 'mö wʋ 'tɛmanɩɛ tenyii, 'n wʋ ziɛ tɛkädɔ'wʋ a saa 'wʋ. ‑Sɩkaa a nɩkpaa ‑wa glɩnɩɛ 'zoku a 'yize, sa'a ‑sɩbhä yɩ 'kää wa dɔ'wʋ 'wʋ 'plɩ.»

‑Muë glɩnɩ bhä Zezwii 'a ‑tiamö a waa?

(Maakö 3.31-35; Lwiikö 8.19-21)

46Zezwii ‑wʋ ‑bhlɛ ‑bʋbʋʋ 'dɩ 'nyɛ dɔ'wʋ, cuu, ɔ ‑daayuë ‑nyɛ ɔ ‑da 'sɔ 'n wa yiɛ ‑lɛ ghlɛ. Wa 'nɩgbö ‑mä 'pɩwʋ, wa 'yɩbhä wa 'kɔ 'dɩ 'nyɛ, nza wa yiɛ. [47'N nɩkpɛ ‑bhlʋ yiɛ Zezwii wäzɩɛ mö. Ɔ lɛ naa: «‑Atʋ, ‑kɔfänɩɛ oo, ‑maa ‑na ‑da ‑nyɛ ‑na nyɩbhɛlʋdaayuë 'sɔ, wa yɩbhä wa ‑kamö 'dɩ 'nyɛ. Wa ‑kʋnɩmö ‑mä 'pɩwʋ.»] 48'N Zezwii yoo nimï 'yɩbhä, ɔ lɛ naa: «‑Mɔ ‑lɛ bhä na ‑da, 'n ‑muë ‑lɛ bhä 'yɛ na ‑daayuë 'nɩ?» 49'N ɔ yiɛ 'ɔ ‑gänɩwaa wïleyi 'wʋ 'pä, ɔ lɛ naa: «‑Muë nɩ 'dɛɛ, mʋa glɩnɩɛ na ‑da ‑nyɛ na ‑daayuë 'sɔ. 50Ɛ'ɛ ‑bhö nyɩasɛ, ‑maa ‑ɔ zʋä na dɩba Lagɔ ‑ɔ ‑wʋ ‑mä ghäyɩ 'wʋ 'klʋkpamö, sɛ ɔ gbää ‑ɔ zʋä ‑sɩbhä, mɔɔ na nyɩbhɛlʋdaayu, mɔɔ na nglʋdaayu, mɔɔ glɩnɩ'ɛɛ na ‑da.»

Currently Selected:

Matie 12: bet

Highlight

Copy