Zaa 15

A‑a nɩ ‑glɛ Zezwii 'wʋ

1‑Tiamö a ghlɛzɛɛsuu#15.1 ghlɛzɛɛsuu: Wʋ 'bhïï, 'mö wa bhɛɛ duvɛɛ 'wʋ., ‑amöä. Na dɩba Lagɔ mɔɔ glɩnɩɛ wʋ ‑lowli. 2Kïlaa ‑yɩɩ tlʋä, 'wʋ ɔ diɛ. ‑Maa kïlaa ‑yɩ tlʋä, glumaa ɔ sɩɛ yɩ 'kä tenyii tlʋ. 3Wɛlɩɩ n 'nyanyɩɛ, yɩ kanyɩ glumaa yɔwʋ ‑sɛ 'wë a yɛ 'wlɩlɩ plɛ Lagɔ a 'yila 'klʋ a dɔ'wʋ. 4Sɩbhä a za, a nɩ ‑glaaa 'wʋ, nzɩɩ n 'kanyɩ'ɛ na a 'wʋ ‑glɛ. Ɛ'ɛ ‑bhö nyɩasɛ, ‑maa suklɩ 'nɩ ‑da 'yli ‑glɛɛ, ɛ'ɛɛ bhɛnɩ ɛ 'kä 'bhë tlʋ. Sɛ ‑bhʋlʋ ‑kpɔ 'la ‑sɩbhä a ‑nɩɩ 'wʋ ‑glɛɛ, 'n a 'nɩɛ bhɛnɩ a 'kä 'bhï tlʋ. 5Sɛ'ɛ n gbää nɩɩ, ‑tiamö a ghlɛzɛɛsuu, ‑amöä, abhʋa glɩnɩɛ 'na kïlaa. ‑Mɔ ‑kaa 'wʋ ‑glɛɛ, 'n ‑mɔ n ‑kä'ɛ na a 'wʋ ‑glɛɛ, mɔɔ 'kää 'bhï a ‑bɛ tlʋ. Ɛ'ɛ ‑bhö nyɩasɛ, ‑maa a ‑nɩɩ 'wʋ ‑glɛɛ, a'aa bhɛnɩ a 'kä ‑lu nʋ. 6‑Ɔ ‑nɩɩ 'wʋ ‑glɛɛ, suklɩ a ‑mɛ wa dɩ'ɛ 'wʋ, wa pä'ɛ 'kwlɛ 'mö 'n ɛ yɛ'ɛɛ, ɛ saa ‑sɩbhä ɔ ‑wʋä. ‑Maa ‑sɩbhä a sukïla 'la, yɩ ‑käa'a yɛɛ, 'wʋ wa libhiɛ 'n wa zwiɛ ‑kosu 'mö, 'n yɩ siɛ. 7A ‑kaa 'wʋ ‑glɛɛ, a ‑kä 'wʋ nglu 'na wɛlɩɩ 'kanyɩ 'tɩɩ ‑suu, 'saa a ‑kä na dɩba Lagɔ 'yɩbhänɩ ‑kë, ɔ yeanyu 'nyɛ. 8A ‑kä 'bhï a ‑bɛ tlʋʋ, mɩɩ 'ghlimanɩɛ na dɩba Lagɔ a 'nglɩ, ‑lɛ a dɔ'wʋ a yɛɛ na ‑gänɩwa 'zʋʋ.

9Sɛɛ na dɩba Lagɔ ‑waaa, sɛ ‑bhʋlʋ ‑kpɔ 'la ‑sɩbhä n ‑waanyɩɛ. Sɛ n ‑waanyɩɛ 'kwädlɩ a da, 'a dilaa nɩ pö ‑lɛ. 10Sɛɛ na dɩba Lagɔ nyɩaaa 'dɩɩ, ‑sɩbhä n zʋä zaa, nza n ‑yiɛ sɛ nɩɩ ɔ ‑waa 'kwädlɩ, a'bhï sɛ n nyanyɩɛ 'dɩ a ‑kä ‑sɩbhä 'zʋʋ, a nɩ ‑yi sɛ nɩɩ, n ‑waanyɩ 'kwädlɩ. 11'Na sɛ n ‑wʋä 'mäna 'möö, a 'käa ‑sɩbhä 'mäna 'mö ‑wʋmö, nza n 'nyanyɩɛ ‑lɛ a wɛlɩ 'la. ‑Lɛ a dɔ'wʋ, 'a 'mäna yi 'klʋ yie. 12Zaa, sɛ'ɛ n gbää nɩɩ, gba n 'panyɩɛ, ma‑a nɩɩ, sɛ n ‑waanyɩɛ, a nɩ ‑wawanɩ ‑sɩbhä. 13‑Ɔ wlʋä ɔnyɩ 'mö ɔ 'kä ɔ bhɛya a 'wlumö 'kuu, 'ɔ ‑wawʋʋ mʋʋ 'ghïliɛ mʋʋ 'nɩɛ ‑sɩbhä a sɛ ‑wʋ. 14Sɛ n nyanyɩɛ 'dɩ, a ‑kä ‑sɩbhä 'zʋʋ, ‑lɛ a dɔ'wʋ, na bhɛya a glɩnɩɛ. 15‑Ɔ glɩnɩɛ libhonʋnyɔɔ, ɔ'ɔɔ ɔ 'bhidɩba 'a ‑lii a zɛmö ‑yi. ‑Maa abhʋa abhlɩ, wɛlɩɩ 'wuë na dɩba Lagɔ nyɩaaa, n kanyi sʋlʋnɩ 'wë. ‑Sɩbhä a za, n 'nanyɩa'a na libhonʋwa la, ‑maa na bhɛya a glɩnɩɛ. 16Abhʋa ‑nɩɩɛ ‑lɛ ‑sɛ, ‑maa ‑amöö ‑saanyɩɛ ‑lɛ, 'n n yeanyɩɛ tie a 'kä 'na libhoo nʋä mö. Libho 'la 'kä 'bhï a ‑mii 'naa 'kää 'kwädlɩ 'yli bhɩɛ gwë glɛ. 'Saa a ‑kä na 'nglɩ 'mö na dɩba Lagɔ 'yɩbhänɩɩ, ɔ yu nʋ. 17‑Maa 'dɩ n nyanyɩɛ dɛ'ɛ nɩɩ, a nɩ ‑wawanɩ.

Mä'ä 'pɩwʋ a 'yize a ‑nʋa yeanyɩ ‑gblɩ

18Nɩkpaa ‑wa glɩnɩɛ mä'ä 'pɩwʋ a 'yize a ‑nʋä, wa ‑kaanyɩ ‑gblɩɩ, a nɩ yɩbhlɩnɩ sɛ nɩɩ, ‑amö wa ‑gblɩɛ a za tɛɛ. 19A ‑kä a mä'ä 'pɩwʋ a 'yize a ‑nʋä glɩnɩmöö, wa 'bhɩa a glɩnɩ a‑a zaa, wa yeanyɩ a ‑wa. ‑Maa ‑amöö ‑saanyɩɛ ‑lɛ mä'ä 'pɩwʋ a ‑nʋa jijo'wʋ nzɩɩ a 'kä na ‑nʋä glɩnɩ, zaa a'a ‑bhöa'a mä'ä 'pɩwʋ a 'yize a ‑nʋä, nza wa ‑gbïlanyɩɛ. 20Wɛlɩɩ n 'nyanyɩ a‑a, a nɩ ligbaniiɛ ‑ka 'wʋ. Sɛ'ɛ n gbä'ɛ nɩɩ, libhonʋnyɔ 'nɩɛ ‑zɩ 'ghïli ɔ 'kä ɔ 'bhidɩba 'wʋ zi. Miɛ nɩɩ, 'n wa ‑kaa 'klɩ 'yɩaa, wa yeanyɩ 'klɩ 'yɩamö. Wa ‑kaa 'yukwli ‑pʋnɩ, wa yeanyɩ 'yukwli ‑pʋnɩmö. 21‑Li 'la 'wuë, sɛ a glɩnɩɛ na ‑nʋä a za, nza wa 'kanyiɛ 'wlu nʋ. Ɛ'ɛ ‑bhö nyɩasɛ, ‑maa ‑ɔ tieaaa, wa 'nɔɔ ‑yi. 22N 'nɩ a mä'ä wa jijo'wʋ yi n 'kʋä 'dɩ 'nyɛɛ, wa'a a a gbʋ ‑gömö ‑kä. ‑Maa sɛ n yiɛ 'n n yuëë 'dɩ 'nyɛ 'wë, 'n wa ‑nɩɩɛ 'yukwli ‑pʋnɩ a za, gbʋʋ ‑wʋ ‑wuëë ‑gömöö, wʋ'ʋa'a ‑yayaya ‑kä. 23Ɔ ‑kaa ‑gblɩɩ, na dɩba Lagɔ 'mö ɔ ‑gblɩmöä. 24‑Wa ‑gblɩɩɛ sa'aa, zɩzɛli a ‑mi käbönɩkpɛ 'nɩɛ bhɛnɩ ɔ 'kä nʋʋ, n 'ni a mä'ä wa jijo'wʋ nʋnɩɩ, 'wa 'nyinylolii a gbʋʋ, wʋ 'naa 'kʋä a ‑gömö tʋʋnɩ. ‑Maa ‑sɩkaa a dɔ'wʋ, 'na nʋnʋlii, wa kɩ 'ylɩmö 'wë, ‑maa ‑sɩbhä yɩ ‑wʋ 'mö, n ‑nyɛ na dɩba Lagɔ 'sɔ 'n wa ‑gblɩnyɩɛ 'yize. 25Lagɔbɔgʋʋ wa ‑sʋä wa'bhïï, wʋ 'mö a wɛlɩkïbhë ‑bhlʋ ‑a cɛlɩɛ ‑mä, a 'kä 'yli 'wlʋnɩ a za, nza ‑li 'la 'wuë 'plɩɛ sa'a 'wʋ. Wɛlɩkïbhë 'la sɛ'ɛ a nʋä nɩɩ: Nɩkpaa, 'fʋ wa ‑gblɩɩɛ.#15.25 Soomö 35.19.

26Miɛ abhlɩ da'a 'wë, ‑maa n ‑kä mö 'wëë, ‑ɔ 'kanyɩɛ swɩ nyɛmʋ 'mö 'pää, ɔ yi yi. Gbëabhïlawugɔmʋʋ, ‑ɔ 'bhöönɩɛ ‑mä na Dɩba dlɩ 'möö, 'mö n gaaa. Mɔɔ 'kää na dɛ bhïla. 27A'bhï, a yi'ɛ na dɛ bhïlamö. Ɛ'ɛ ‑bhö nyɩasɛ, ‑maa 'tɛnyɩ 'wuë n nʋnɩɛ mä'ä dʋdʋ 'wʋ Lagɔ 'a libhoo 'möö, abhʋaa ‑nya'mö ‑bhlinɩ a‑a 'wʋ.

Currently Selected:

Zaa 15: bet

Highlight

Copy