Zaa 12

Malii yɛ Zezwii 'a kplɩɩ ‑gömö palɩfɛɛ pälɩ

(Matie 26.6-13; Maakö 14.3-9)

1'Ylɩ gbʋplʋ tʋʋ ‑mä Galɛ'möwlʋfɛtɩɩ 'kä ghlɛ, Lazaa Zezwii gäla 'n ɔ yoo glu ‑sɛɛ, ‑mä ɔ 'bhele Betanii, 'n Zezwii yiɛ ‑mä mö. 2Ɔ ghlɛɛ ‑mä, 'n wa yoo lile 'käda 'wʋ pi. Lazaa a ‑daayu Maatɩ, mɔɔ ‑wʋä lile 'la 'yli. Nɩkpaa wa wäzɩɛ ‑wa ‑nyɛ Zezwii 'sɔ ‑wa linɩɛ 'wʋʋ, wa jijo'wʋ, Lazaa ‑wʋ ‑mä. 3Wa ‑wʋ li dɔ'wʋ, 'n Malii yiɛ 'kpla ‑bhlʋ 'wʋ 'libhï, palɩfɛɛ a 'ke ‑bhlʋ wa laa naadɩ, ‑ɛ 'tɛɛ 'pɛlʋ tenyii, ‑ɛ pää nglɛ a nglɛ, mɛɛ ‑wʋä ‑mä kpla 'la 'mö. Palɩfɛɛ 'la, 'mö Malii 'libhïä 'wʋ, ɛ 'wuë 'n ɔ yee Zezwii 'a kplɩɩ yɔwʋ 'zʋ, 'n ɔ yiɛ 'ɔ nyukwëa 'mö yɔwʋ sɩɔnɩ. Ɔ 'zʋä sa'aa, 'n palɩfɛɛ a nglɛɛ yiɛ ‑buduu 'wuë 'wʋ yie. 4‑Maa Zezwii 'a ‑gänɩwaa a gla'mö a ‑nɔ ‑bhlʋ, Zwidaa Yisikalio ‑ɔ 'kɔɔ bhäla 'ɔ ‑gblɩwaa kä'mö plɩnɩɩ, 'n ɔ yɩɛ gbʋ ‑dɩ, ɔ lɛ naa: 5«Palɩfɛ nɩ, sɛ yɩ ‑wʋ ɔ 'mö 'n ɛ 'nɩ bhä 'pɛlʋ 'pɔɔ 'nɩ? Ɛ bhɛnɩ a dɛ'ɛ ɛ 'kä fälɛgö a gwlɩ kʋgbä ngbï#12.5 Nɩkpɛ ‑kä 'ylʋba ‑bhlʋ a sɛ libhonʋnɩ a 'pɛnaa ma‑a. (300) li. Moni 'la, ‑a 'kɛ a 'pʋäwaa 'nyɛ.» 6‑Maa Zwidaa, ɔ ‑kä sa'a gbää, ɛ'ɛ ‑bhö nɩɩ sɛɛ 'pʋäwaa a gbʋ plɛnɔ tenyii a za, ‑maa kɛ ɔ fää. Mɔɔ glɩnɩɛ 'wa 'wʋkwïlanɩnyɔɔ. ‑Maa moni ɔ ‑suä, 'wi 'mö ɔ lee, nza ɔ gbää ‑sɩbhä. 7‑Maa ɔ gbää sa'aa, Zezwii lɛ naa: «‑Sɛ Malii kɛ yɔwʋ, ‑maa wa ‑kä 'na ‑gäzɛɛ zizaa yi a sɛ wa 'kää 'zʋʋ, ‑sɩbhä ɔ tɛɛ ‑bhlɛ dɛ'ɛ. 8'Pʋäwaa, a ‑nyʋä 'sɔ ‑glɔ a dɩɩɛ, ‑maa ‑amö na a, 'naa 'kanyɩ 'kwädlɩ gla'mö ‑wʋ.»

Zwiiföwaa a 'kädɩɩ yɩbhä wa 'kä Lazaa 'lɩbhämö

9Zwiiföwaa a ‑bɛ, wa 'nʋä nɩɩ, ‑mä Betanii glɔ 'mö, Zezwii ‑wʋ ‑mä 'n wa yiɛ 'wʋ ‑sɔ 'n wa yɩɛ ‑mä mö. Ɛ'ɛ ‑bhö nɩɩ, wa 'kä Zezwii 'ylɩmö a 'yize a za, ‑maa Lazaa Zezwii gäla a‑a 'n ɔ yo a‑a glu ‑sɛɛ, wa 'kɔ 'ylɩmömö, nza wa möä ‑mä. 10-11‑Maa 'lɩlɩlɩ a dɔ'wʋ, Zwiiföwa 'la, wa gla'mö a ‑mumuë a ‑bɛ, Lazaa a wɛlɩ 'la a za, Zezwii 'mö wa kä'aa dlɩ 'wʋ. ‑Sɩbhä a za, Lagɔbʋbɔwaa a 'kifiea 'n wa yiɛ wɛlɩ yɔwʋ 'zʋnɩ, wa 'kä Lazaa 'lɩbhämö.

Zezwii yɛ ‑mä Zeluzalɛɛmö plɛ

(Matie 21.1-11; Maakö 11.1-11; Lwiikö 19.28-40)

12Zlɩ zɩɛ, nɩkpa a kɔkɔmlɛɛ ‑wa yi a‑a ‑mä Zeluzalɛɛmö Galɛ'möwlʋfɛtɩɩ ‑sɛɛɛ, 'n wa yuëë 'dɩ 'nyɛ nɩɩ, Zezwii ‑wʋ ‑mä Zeluzalɛɛmö yi dɔ'wʋ. 13Wa 'wuë wa ‑su ‑gapatɩ, 'n wa yiɛ ‑mä glɔ 'mö 'wlʋ, wa 'kä Zezwii 'yio 'wʋ mö. Wa ‑wʋ mö dɔ'wʋ, 'n wa kpaa 'mö nɩɩ:

«Ozana, Lagɔ a 'nglɩ nɩ 'ghlimanɩ aa!

‑Ɔ yiɛ dɛ'ɛ ‑Alowli Lagɔ a 'nglɩ 'möö,

Lagɔ nɩ 'pɔ 'nyu aa!

Yizlaɛlɩ a ‑nʋa 'a 'bhlɩlowlii,

Lagɔ nɩ 'pɔ 'nyu aa!»

14‑Maa Zezwii ɔbhlɩ, ‑sʋkʋfanɩ a ‑dɩgba ‑bhlʋ wa 'nyɔɔ yowʋʋ, 'mö ɔ glɩɛ ‑gömö. ‑Sɩbhä yɩ cɛlɩ a‑a ɔ dɛ ‑mä Lagɔbɔgʋʋ 'mö nɩɩ:

15 Siɔɔ # 12.15 Siɔɔ: Wa ‑kä Siɔɔ nʋʋ, Zeluzalɛɛmö a ‑glɔɔ 'mö wa gaaa. a ‑nʋänyɩ, a nɩ tɩ ngänɩ!

'A 'bhlɩlowli ‑wʋ yi dɔ'wʋ.

‑Sʋkʋfanɩyu ɔ glɩɛ ‑gömö. # 12.15 Zakalii 9.9.

16‑Maa ‑li 'la 'plɩɛ sa'a 'wʋʋ, Zezwii 'a ‑gänɩwaa 'niɛ ‑pa 'mö 'nʋ. ‑Maa ‑zlɩ Zezwii 'libhïä 'ɔ 'ghïlinɔɔ 'wʋ 'wëë, 'n wa yia'aa sɛ yɩbhlɩmanɩ nɩɩ, wɛlɩkïbhë 'la ‑a cɛlɩɛ ‑mä Lagɔbɔgʋʋ 'möö, Zezwii a dɛ a bhïlaa, nza ɔ ‑wʋ a‑a ‑mä Zeluzalɛɛmö plɛ dɔ'wʋ, 'n ‑li 'la 'wuë yi a‑a ‑sɩbhä 'wʋ 'plɩ.

17-18‑Maa nɩkpa 'la 'wuë ‑wa yiɛ Zezwii 'yio 'wʋʋ, nyɩasɛ wa 'nɔɔ ‑sɩbhä 'yio 'wʋ yi, ‑maa ‑zlɩ ɔ 'nɩgbö a‑a ‑lɛ Lazaa a lesikpëa nuë 'wʋ 'n ɔ yiɛ Lazaa wäzɩ, 'n Lazaa yiɛ gɔlɔ 'n ɔ yiɛ ‑mä 'wlʋʋ, nɩkpaa 'wuë ‑wa ‑wʋmö a‑a ‑lɛ, tɩtɩ 'la, ‑sɛ wa ‑sɩɩɛ tenyii. Zaa, zɩzɛ 'la Zezwii 'pä a‑a, ɛ tɩtɩɩ 'mö nɩkpa 'nʋä, nza nɩkpa 'kɔkɔmlɛ yoo 'yio 'wʋ. 19‑Maa Falizɩɛwaa wabhlɩ, wa 'yize jijo'wʋ wa lɛ naa: «‑A'a slɛlɛɛ 'wuë ‑a yɛɛ ‑bhlɛ nɩkpɛ nɩ a dɛ 'pää, nyɩasɛleyiɛ. A yɩɛ, 'bhlɩbhëa 'wuë wa kɔ 'bɩwʋ sɛ 'sulo 'wë.»

Lɛgäwa ‑mumuë yɩbhä wa 'kä Zezwii 'ylɩmö

20‑Maa nɩkpaa ‑wa yi a‑a ‑mä Zeluzalɛɛmö 'fɛtɩ ‑sɛɛ, wa 'kä Lagɔ bʋbɔɔ, wa gla'mö Glɛköwa ‑wʋ a‑a ‑mä. 21Nɩkpa 'la, Filiipö ‑ɔ glɩnɩɛ ‑mä Galilee‑bhölɩɩ 'mö a ‑glɔɔ wa laa Bɛtɩsayidaa a nɩkpɛɛ, 'mö wa ghlɩɛ ‑mä, wa lɛ naa: «‑Atʋ, ‑a yɩbhä ‑a 'kä Zezwii 'ylɩmö.» 22Wa gbää sa'aa, 'n Filiipö yiɛ ‑sɩbhä Adlee 'dɩ 'nyɛ, wa 'sɔ ‑kpɔ 'n wa yiɛ ‑mä Zezwii 'dɩ kwä. 23Wa 'nyɔɔ 'dɩɩ, Zezwii lɛ naa: «Nɩkpɛ a 'Yu, 'tɛnyɩɩ ɔ 'kää 'ɔ 'ghïlinɔɔ 'mö 'wʋ 'libhïnɩɩ, ɛ yɛ ghlɛ. 24‑Maa ‑tiamö n nyanyɩɛ dɛ'ɛ 'dɩ nɩɩ, lileyeyi, 'n wa 'nɛ glu 'zʋʋ, ‑bhlʋ ɛ glɩnɩɛ 'kwädlɩ. ‑Maa wa ‑kɛɛ glu 'zʋ, ɛ ‑kä 'wlʋ, ɛ zɛmö a bhëa ‑kä zɛ 'wëë, 'n ɛ tlʋä 'yʋ a ‑bɛ. 25Sɛ'ɛ n gbää nɩɩ, ‑ɔ ‑kä 'ɔ pɩwʋʋ 'wʋ gwɩɩ, mɔɔ 'kää 'yli bhɩɛ. ‑Maa mä'ä dʋdʋ 'wʋ a dɔ'wʋ, ‑ɔ 'nɩ 'ɔ pɩwʋʋ dlɩ 'wʋ 'pää, ɛ nɩkpɛ 'la mɔɔ 'kää 'pɩwʋ mää 'naa 'kää 'yli bhɩɛ ghlɩ. 26Zaa, ‑ɔ ‑kä ɔ ‑kaa 'yli ‑wʋ nʋʋ, ɔ nɩ ‑gänɩɩ. ‑Lɛ a dɔ'wʋ, dɛ n 'kää möö, ɔ 'kä ‑lɛ 'mämö. ‑Ɔ ‑kaa ‑sɩbhä 'yli ‑wʋʋ, na dɩba Lagɔ a'bhë mɔɔ 'kɔɔ 'nglɩ 'nyɛ.

Zezwii yɛ 'ɔ 'kwiea a dɛ bhïla

27‑Maa na'bhë, ‑sɩkaa a dɔ'wʋ, 'saa lɛ ‑kaaa ghlɩ a za, na dlɩ libho tenyii. Miɛ abhlɩ da'a 'wë, ‑maa zaa, sɛ n 'kä bhä nʋ 'nɩ? N 'kä bhä nɩɩ, ‑Atʋ Lagɔ, ‑li 'la 'wuë, gbä yɩ ‑tɩɩa ghlɩ, ‑sɩbhä n nɩ nʋ bhä ‑a? N'nn! 'Naa 'kä ‑sɩbhä nʋ. ‑Maa zwɩ nɩ a'bhë, n 'kɛ zi a za, nza n yiɛ mä'ä dʋdʋ 'wʋ. 28Zaa, ‑Atʋ Lagɔ, yɩ 'wuë 'mö, ‑na'a nglɩɩ mɩɩ nɩ 'ghlimanɩ.» Ɔ gbää sa'aa, 'n wɛlɩ yiɛ ‑mä ghäyɩ 'wʋ 'bhöönɩ, yɩ lɛ naa: «'Na nglɩɩ, n kɩ a 'kwädlɩ 'ghlimanɩ 'wë, 'n n yiɛ ‑bhlɛ 'ghlimanɩ 'yize.» 29Wɛlɩɩ nʋä sa'aa, nɩkpaa ‑wa ‑wʋmö a‑a ‑lɛ, wa 'nʋmiɛ, wa lɛ naa: «‑Gbägbadɛɛ ‑gbaa da'a.» ‑Mumuë lɛ naa: «Lagɔzuzukwëë 'nyɔɔ da'a 'dɩ.» 30‑Maa Zezwii lɛ naa: «Wɛlɩ 'la, na za yɩ'ɩɛ ‑mä ghäyɩ 'wʋ 'bhöönɩ, ‑maa a'bhï, a za yɩ 'bhöönɩɛ ‑mä. 31'Tɛnyɩɩ Lagɔ 'kää mä'ä 'pɩwʋ a nɩkpaa 'wuë ‑zijli 'mö tunɩɩ, ɛ yɛ ghlɛ 'wë. Zuzukuzoku a 'kifii ‑ɔ 'kämanɩɛ mä'ä 'pɩwʋ a nɩkpaa ‑gömö, 'tɛnyɩɩ 'ɔ 'kämanɔɔ 'kää 'mö 'gblizoo, ɛ yɛ ghlɛ 'wë. 32‑Maa na'bhë, ‑zlɩ nɩkpa 'wuë ‑kaa ghäyɩ yɩlɩɩ, n yuë nanyɩ yɔwʋ jlinɩ.» 33‑Maa 'ɔ sɛ ɔ 'kää 'kuu, ‑sɩbhä ɔ gaaa da'a. 34Zaa, ɔ gbää sa'aa, nɩkpa ‑wa suä ‑lɛ, wa lɛ naa: «‑A'a Lagɔbɔgʋʋ 'mö a wɛlɩɩ, sɛ'ɛ yɩ nʋä nɩɩ, Kliisɩ, Puënyɔɔ Lagɔ ‑sɛɛ ‑lɛɛ, 'kwädlɩ ɔ 'kää ‑bhölɩ. Nɩɩ, ‑nmö ‑naa, sɛ yɩ ‑wʋ ɔ 'mö n‑n nʋ nɩɩ, Nɩkpɛ a 'Yu, wa yo ghäyɩ yɩlɩ. 'Lɩlɩlɩ a dɔ'wʋ, ‑n laa da'a Nɩkpɛ a 'Yu, ‑mɔ a'bhë bhä?» 35Zezwii lɛ naa: «Sɛ'ɛ n gbää nɩɩ, ‑ɔ ngla nɩkpa 'wʋ, ɔ ‑wʋanyɩɛ ‑bhlɛ jijo'wʋ, ‑maa ɔ yeanyɩa'a ‑pa jijo'wʋ 'bhöö. Zaa, bhälɛ ɔ ‑wʋanyɩɛ 'wʋ ngäla dɔ'wʋ, 'yioo ɔ 'pänanyɩɛ, a nɩ bhlu, nzɩɩ 'yuylukwëa tanyɩa zɛmö ‑vu. ‑Maa nɩkpɛ a ‑mɔɔ nɛmöä 'yuylukwë 'möö, dɛ ɔ mönɩɛ, ɔ'ɔɔ ‑lɛ ‑yi. 36‑Sɩbhä a za, ‑ɔ ngla nɩkpa 'wʋ, bhälɛ ɔ ‑wʋanyɩɛ jijo'wʋʋ, a nɩ kɔ dlɩ 'wʋ, ‑sɩbhä a dɔ'wʋ a yi nɩkpa a ‑muë ‑ngla 'wʋ glɩnɩ.» Zezwii 'nyʋää ‑sɩbhä 'dɩ 'wëë, 'n ɔ yuëë yɔwʋ 'bhöö, 'n ɔ yiɛ käböbɛyɩ zizoo mö.

Zwiiföwaa 'nɩɛ Zezwii dlɩ 'wʋ ‑kä

37Zɩzɛɛ Zezwii 'pänɩɛ Zwiiföwaa 'yila 'klʋʋ, ɛ'ɛɛ muënɩ. ‑Maa ‑sɩbhä yɩ ‑wʋ 'mö, wa 'nɔɔ dlɩ 'wʋ ‑kä 'yize. 38‑Maa wa 'nɔɔ da'a dlɩ 'wʋ ‑kää, wɛlɩɩ Lagɔ a 'möbhïlanɩnyɔ Ezayii bhïla a‑a, mɩɩ 'wlʋnɩɛ da'a 'yli. Sɛ'ɛ ɔ gbä a‑a nɩɩ:

‑Alowli Lagɔ,

‑na'a wɛlɩɩ ‑a 'nyɛɛ nɩkpaa,

‑ɔ kɩ bhä dlɩ 'wʋ 'nɩ?

Lagɔ 'a 'mötɛɛnɔɔ ɔ 'wälanɩɛ 'ylii,

‑bɛ 'nuä yɩbhlɩnɩ. # 12.38 Ezayii 53.1.

39‑Maa 'saa kää 'nglɩ, 'n wa 'nɩɛ mlɩnɩ wa 'kä Zezwii dlɩ 'wʋ ‑kää, Ezayii bhïla a 'yɛ yɩ dɛ. Sɛ'ɛ ɔ gbä a‑a nɩɩ:

40 Nɩkpa nɩ, Lagɔ kʋä 'kukwle Sɩbhä.

Ɔ yɛ 'wa dilaa 'mö 'tumanɩ,

nzɩɩ wa tɩa sɛ yɩlɩ,

wa tɩa ‑lu 'mö 'nʋ,

wa tɩa ligba,

wa tɩa 'wa ‑lizokuu kɛ'mö ‑sɛ,

ɔ tuëa puë a za. # 12.40 Ezayii 6.9-10.

41Ezayii ‑kä ‑sɩbhä gbää, Zezwii 'a 'ghïlinɔɔ 'mö ɔ 'yɩɛ 'ylɩmö, nza ɔ bhïla ɔ dɛ.

42Miɛ abhlɩ da'a 'wë, ‑maa Zwiiföwaa 'a 'kädɩɩ a'bhï, wa gla'mö a ‑mumuë a ‑bɛ, wa kä Zezwii dlɩ 'wʋ, ‑maa Falizɩɛwaa tuëa ‑mä Zwiiföwaa 'a Lagɔbuduu 'mö kpëtia za, nza wa'a ‑sɩɩɛ ngli. 43Wa 'kä nɩkpa dlɩ yɔwʋ nɛnɩ, 'mö wa tɛlɩɛ tenyii sɛ, ‑maa wa 'kä Lagɔ dlɩ yɔwʋ nɛnɩ a gbʋ 'nuëë plɛnɩ.

Zezwii mɔɔ glɩnɩɛ lɩlɛɛ

44'N Zezwii yiɛ wɛlɩ ghäyɩ 'pä. Ɔ lɛ naa: «‑Ɔ ‑kaa dlɩ 'wʋ ‑kää, na 'yize ‑amö ɔ 'nɩɛ dlɩ 'wʋ ‑kä, ‑maa ‑ɔ tieaaa 'mö ɔ ‑kämöä da'a dlɩ 'wʋ. 45‑Ɔ ‑kaa 'ylɩmöö, ɔ yɛ ɔ tieaaa 'ylɩmö. 46N 'kä 'bhlɩbhëa 'wuë 'wʋ ngäla, nza n yiɛ mä'ä dʋdʋ 'wʋ, nzɩɩ nɩkpɛ a ‑mɔɔ ‑kaa dlɩ 'wʋ ‑kää, ɔ tɩa 'yuylukwë 'mö nɛmö. 47‑Ɔ ‑kä 'na wɛlɩɩ 'yukwli ‑pʋnɩ 'wë, ‑ɔ 'ni 'klʋkpamö zʋʋ, ‑amöö 'naa 'kɔ gbʋ köbhä. Ɛ'ɛ ‑bhö nyɩasɛ, ‑maa n yiɛ mä'ä dʋdʋ 'wʋʋ, n 'kä 'bhlɩbhëa gbʋ köbha a za, nza n'n‑ä yi, ‑maa n 'kʋä puë a za n yiɛ. 48‑Ɔ ‑nɩɩ 'yukwli ‑pʋnɩ, ‑ɔ 'nɩ 'na wɛlɩɩ 'wʋ ngluu, 'ɔ wɛlɩɩ yɛ da'a 'wlu 'doo 'wë Lagɔ a 'yila 'klʋ a dɔ'wʋ. Miɛ nɩɩ, 'na wɛlɩɩ n 'nyɔɔ, 'ɔ sɛ ɔ 'niɛ 'yukwli ‑pʋnɩ a za, 'pɩwʋ a 'ylibhɩɛdaa ‑kä ghlɛɛ, mɩɩ 'kɔɔ gbʋ köbha. 49Ɛ'ɛ ‑bhö nyɩasɛ, ‑maa n ‑kä nɩkpa 'dɩ 'nyɛɛ, nanyɩ a 'nglɩ 'mö n'n‑ä bhïla. ‑Maa na dɩba Lagɔ ‑ɔ tieaaa, wɛlɩɩ 'wuë n 'kää nɩkpa 'nyɛɛ, ɔ'bhë mɔɔ nyɩa'miɛ, mɔɔ gbää n nɩ bhïlii. 50N ‑yi sɛ nɩɩ, wɛlɩ 'la ɔ nyɩaaa n 'kɩ nɩkpa 'nyɛɛ, mɩɩ nyɛɛ nɩkpa 'pɩwʋ mää 'naa 'kää 'yli bhɩɛ. Zaa, 'na wɛlɩɩ 'wuë n bhïlaa, sɛɛ na dɩba Lagɔ gbää n nɩ bhïliii, ‑sɩbhä n bhïliɛ 'tɩɩ.»

Currently Selected:

Zaa 12: bet

Highlight

Copy