Matayo 22
22
OBWENGA BW’OMUTABANI W’OMUKAMA.
1Yezu nasuba kufumora mu ngani, nabagambira ati: 2Obukama bwo mw’igulu bukusana nk’omukama ayagirire omutabani obwenga. 3Natuma aberu be kuza kweta abaliga balalikirwe ha bwenga, nibayanga kwiza. 4Nasuba kutuma aberu bandi nagira ati: Mugambire abalalikwa muti: Nachumire amageni gange, nabagire enumi zange n’enkone z’amasazu, byona byategekirwe: mwize ha menga. 5Nawe bonene nibagaya, nibagenda, ondi ha musiri gwe, ondi ha buguzi bwe; 6kandi abandi nibakwata aberu be, nibabagirira kubi, nibabeta. 7Mbe omukama ka yahulire, akasaya, natuma embaga ye, nemaraho abesi abo, neyocha ekikale chabo. 8Aho nagambira aberu be ati: Amageni gachumirwe, nawe abalalikirwe sanga batahikire. 9Mbe nimugende ha ntaganiro z’emihanda, abo mulasanga bona, mubalete ha bwenga. 10Aho aberu nibagenda ha mihanda, nibakoka bona abo babonaga, ababi n’abazima; mbe enzu y’amageni neizura abekazi. 11Mbe omukama natahamo kulora abekere, nabonamo omuntu omo atazwere omwenda gw’amageni. 12Namugambira ati: Munwani, wataha munu ota otazwere omwenda gw’amageni? Wenene nabuza. 13Aho omukama nagambira abahereza ati: Mumubohe emikono n’amaguru, mumunage mu mwirima gwa hanza, niyo haliba kulira no kuteranisy’ameno. 14Kuba bakayetwa bengi, nawe abasozirwe ni bake#22, 14 Omukama ogwo niwe Mungu wenene. Akatandika kulalika Abayahudi; entumwa ze, abalagi na Yohana Batista, zikabohwa nizitwa. Omukama Mungu nabaletera embaga y’Abanaroma, bakambule Yeruzalemu, baite abantu bona. Nalagira abahemba be kusugana mu nsi yona, balalike abantu bona mu mageni ge, niyo Eklezia n’igulu. Myaka mike, edini ya Yezu Kristu nesugana honahona, abantu bengi nibagikiriza nibekara mu nzu y’amageni ha mwanya gw’Abayahudi. — Omwenda gw’obwenga niyo enema ntakatifuza: atali nayo alinagwa mu muliro ogutahwaho..
EBYA MUNGU N’EBYA KAIZARI. — KUZOKA KW’ABAFU.
15Mbe aho Abafarizayo nibagenda kutegekerana, bahiche kubasya Yezu mu bigambo bye. 16Mbe nibamutumira abahemba babo n’Abaherodyani#22, 16 Abaherodyani nibo abahemba b’omukama Herode. Naho baliga bali bahate b’Abafarizayo, bakalagana nabo, bahiche kubasya Yezu., nibamugambira bati: Mwolekerezi, tukumanya okw’okugamba ebikomereze, kai okwolekerera omuhanda gwa Mungu mu bikomereze, otakutina muntu, kuba tokulora okw’omuntu ali. 17Mbe notugambire, okuchwa ota? Si ni kuzima kuha Kaizari omusoro, nangu pai? 18Nawe Yezu, obwo yamanyaga obubi bwabo, nagira ati: Mukundoleza ki, bazig’imwe? 19Nimunoleke efweza y’omusoro. Nibamuletera sumuni. 20Yezu nabagambira bati: Ekisusano kinu ni cha ga, n’olwandiko ni lwa ga? 21Nibamugira bati: Ni bya Kaizari. Mbe nabagambira ati: Mbe nimuhe Kaizari ebya Kaizari, na Mungu ebya Mungu. 22Ka bahulire, nibakuma muno, nibamuleka, nibagenda#22, 22 Bayendaga kutega Yezu mu bigambo bye, bahiche kumulega, akiba nagamba ati: Mutakwata omusoro gwa Kaizari; nawe Yezu nayatura obukeruke bwabo, nabasinga n’obwenge bwe..
23Ha lunaku olwo Abasadusayo#22, 23 Abasadusayo bayangaga kwikiriza kuzoka kw’abafu n’obulame bw’omwoyo. nibamwizaho, abagiraga bati: tihaliyo kuzoka, nibamubuza, 24nibagira bati: Mwolekerezi, Musa akagira ati: Omuntu akafwa atali na mwana, mutabani wabo ali no kuhungula omukazi we, azalire mutabani wabo abana. 25Mbe owetu haliga haliyo ab’end’emo musanzu. Owo kutandika naswera omukazi, nafwa atali n’abana, nasigira mutabani wabo omukazi. 26Nikwo batyo n’owa kabili, n’owa kasatu, kuhika ha wa musanzu. 27Ka bahwereho bona, omukazi nafwa. 28Mbe ha kuzoka, omukazi ogwo aliba wa ga mu bantu musanzu abo, obwo bona bamuswereho? 29Yezu nasubamo nabagira ati: Mukuhaba, timukumanya Enandiko n’amani ga Mungu. 30Kuba ha kuzoka tibaliswera, kai tibaliswerwa, nawe baliba nk’abamalaika ba Mungu mw’igulu. 31Nawe ebyo kuzoka kw’abafu, si timukasomaga ebyagambirwe Mungu, nabagira ati: 32N’ine Mungu wa Ibrahimu, na Mungu wa Izaki, na Mungu wa Yakobo? Tali Mungu w’abafu, nawe w’abazima. 33Embaga ka yahulire, nekumisibwa obwolekerezi bwe.
EKILAGIRO KIKURU. — MASIHA NI MWANA W’OMUKAMA DAUDI.
34Nawe Abafarizayo, ka bahulire okwo Yezu yayesirize Abasadusayo, nibekobyanya hamo; 35mbe omo muli bonene, omwolekerezi w’ebilagiro, namuroza namubuza ati: 36Mwolekerezi, ekilagiro kikuru ch’ebilagiro ni kiha? 37Yezu namugambira ati: Oyendega Omukama Mungu wawe n’omutima gwawe gwona, n’omwoyo gwawe gwona, n’obwenge bwawe bwona. 38Echo nich’ekilagiro kikuru n’echo kutandika. 39Nawe echa kabili, ekisusana n’echo, ni kinu: Oyendega owezanu nk’ewe omwene. 40Mu bilagiro ebyo bibili nimwo bili ebilagiro byona n’abalagi#22, 40 Ebilagiro bibili ebyo bikutwoleka byona ebyo Mungu akwenda. Ebilagiro bisatu byo kutandika bikulagira kukolera Mungu, ebindi musanzu, abezasu..
41Mbe Abafarizayo ka basumbire, Yezu nababuza, 42nagira ati: Mukuchwa muta? Kristu ni ga? ni mwana wa ga? Nibamugira bati: Wa Daudi. 43Nabagambira ati: Kai Daudi akumwetera ki mu mwoyo ati: Mukama, nagira ati: 44Omukama akagambira Omukama wange ati: Ikara ha bulyo bwange, kuhika ngire abahate bawe buhumuzo bw’amaguru gawe? 45Mbe raba Daudi namweta ati: Mukama wange, kai ni mwana we ata? 46Mbe tihabwenweho muntu ayahikize kumusubiramo kigambo, hona kurug’olunaku olwo tihaliho muntu ayahigahere kumubuza.
Currently Selected:
Matayo 22: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
