Luka 7

OMWIRU W’OMUKURU W’ABASIRIKALE IGANA NAKIZIBWA.

1Ka yamazire ebigambo ebyo byona mu matwi g’abantu, nataha Kafarnahumi. 2Omukuru w’abasirikale igana yaliga ali n’omwiru we, owe yayendaga muno, arwere nayenda kufwa. 3Ka yahulize Yezu, namutumaho abagurusi b’Abayahudi kumulembereza aize kukiza omwiru we. 4Abo ka bezire hali Yezu, nibamusaba kasyeberere nibagira bati: Ahikire omukolere ebyo; 5kuba akwenda ihanga lyetu, kai wenene niwe yatwombekere isomero. 6Mbe Yezu nagenda nabo. Baliga batakili hara n’enzu, omukuru w’abasirikale igana namutumaho abanwani be, nagira ati: Mukama wange, otanara oti, kuba ine timpikire iwe otahe mu nzu yange. 7Nicho nayetekatekera, nasanga ntahikire kukwizaho; nawe gamba ekigambo, kandi omwiru wange akukira. 8Kuba n’ene ndi muntu akulirwe ondi, kai ndi n’abasirikale abo ntwere, nkugambira onu nti: Roko, yagenda; kai ondi nti: Iza, yeza; kai omwiru wange nti: Kora gunu, yakora. 9Wenene Yezu ka yahulire atyo, nakuma, nahindukira ha mbaga eyamurubaga, nagira ati: Koto nkubagambira nti: Tinkabonaga kwikiriza kutyo mul’Israeli yonene#7, 9 Lora Matayo 8, 12.. 10Abaliga batumirwe, ka basubire mu ka, nibasanga omwiru ayaliga arwere yehulire.

OMWANA W’OMUFWERW’EBA WA NAIMU NAZOKA. — YOHANA NATUMIRA YEZU ABAHEMBA BE.

11Mbe nasuba nagenda mu charo ekikwetwa Naimu, abahemba be n’embaga ningi nibalibata nage. 12Ka yahikire h’elembo ly’echaro, niwe n’omufu owe basagaraga kunaga, yaliga ali mwana nagumo hali nina, kai na wenene yaliga afwererwe iba; n’abantu bengi bo mu charo baliga bali nage. 13Omukama ka yamubwene, namwitirw’ekisa, namugambira ati: Noleke kulira. 14Nairira hehi, nakwata ilaro. Abateguzi nibemerera. Aho nagira ati: Musigazi, nkukugambira nti: Imuka. 15Mbe ayaliga afwire naimuka, natandika kufumora. Naba wo kumuha nina. 16Bona nibakwatw’obutini; nibakuza Mungu nibagira bati: Kuba omulagi mukuru aimukire mul’itwe, kai hona kuba Mungu asuzire ihanga lye. 17Enkuma z’ihano elyo nizisugana Buyahudi yona n’ensi za hehi aho.

18Mbe abahemba ba Yohana nibamurobeza ebyo byona. 19Yohana nayetaho babili bo mu bahemba be, nabatuma hali Yezu kumugira bati: Si n’iwe aliza, nangu tuli no kulinda ondi? 20Mbe abantu abo ka bamwizireho, nibagira bati: Yohana Batista yatutuma hal’iwe, ati: Angu n’iwe aliza, nangu tuli no kulindayo ondi? 21Nawe mu katungu ako yaliga nakiza bengi mu ndwara na mu busasi na ha myoyo z’obulofu, abahume bengi nabaha kusuba kubona. 22Mbe nasubamo nabagambira ati: Mugende, mugambire Yohana ebyo mwahulira n’ebyo mwabona: abahume bakubona, abalemere amaguru bakulibata, ab’omubili bakukira, abazibire amatwi bakuhulira, abafu bakuzoka, abahabi bakwolekererwa Evanjeli; 23kandi buli atakusitazibwa ine ali n’omugisa#7, 23 Lora Matayo 11, 6..

YEZU NASIMA YOHANA. — OMUKAZI MUHENI NASIGA YEZU EBIKUNUNKA KUZIMA.

24Entumwa za Yohana ka zagenzire, natandika kugambira embaga ebya Yohana ati: Mukaza kulora ki mw’iswa? Si ibingo elikutengesibwa omuyaga? 25Mbe mukaza kulora ki? Si ni muntu azwere ebizwaro byorobire? Lora, abazwere emyenda z’obuguzi bwingi n’abakusemererwa bali mu mazu g’abakama. 26Nawe imwe mukaza kulora ki? Omulagi si? Nikwo, nkubagambira nti: akukira hara omulagi. 27Ogwo niwe byandikirweho biti: Lora, natuma mumalaika wange kwebembera obusyo yawe, niwe alisemeza omuhanda gwawe obusyo yawe. 28Kuba nkubagambira nti: Mu bazerwe abakazi tihalimo omulagi mukuru muno kukira Yohana Batista. Nawe omunoro mu ngoma ya Mungu niwe mukuru kukira wenene#7, 28 Lora Matayo 11, 11.. 29Mbe abantu bona abamuhulire n’abasoroza, bakasima Mungu nibabatizibwa batisimu ya Yohana. 30Nawe Abafarizayo n’abakana bilagiro bakagaya obwetegeki bwa Mungu hali bonene, nibayanga kubatizibwa wenene#7, 30 Lora Matayo 3, 7.. 31Nawe Omukama nagira ati: Abantu b’oluzaro lunu mbalenganisye na kiha? kai bonene bakususa bata? 32Bakususana na banamuto abakuba bekere mw’iguliro, nibagambirana, nibafumora bati: Twabaterer’engoza, kai imwe mwabura kuzina; twabaterer’empamo, mwabura kulira. 33Kuba Yohana Batista akeza atakuly’omukate, atakunwa evini; nimugira muti: Ali na sitani. 34Omwana w’omuntu naiza, nalya nanwa, nimugira muti: Lora omuntu w’obululu n’omunwi w’evini, omunwani w’abasoroza n’abaheni. 35Kandi obwekomereza bukasimwa abana babwo bona#7, 35 Lora Matayo 11, 19..

36Mbe omo wo mu Bafarizayo namusaba aize kulya nage. Ka yatahire mu nzu y’Omufarizayo, naikara h’eliro. 37Omukazi ayaliga ali mu charo omwo, ali muheni, ka yamanyire okw’ali h’eliro mu nzu y’Omufarizayo, naleta akabya k’ebikununka kuzima; 38naimerera enuma ha maguru ga Yezu, natandika kusabya amaguru ge n’amaziga, nagakubuza isoke lya ha mutwe gwe, nanwegera amaguru ge, nagasiga amazuta. 39Nawe Omufarizayo ayaliga amwesire ka yabwene, nagira mu mutima gwe ati: Onu akiba ali mulagi, yakumanyire koto omukazi akumukwataho ogwo echo ali n’omwo asubire, kuba ni muheni. 40Yezu nasubamo namugira ati: Simoni, ndi n’ekigambo cho kukutengera. Wenene ati: Mwolekerezi, tenga. 41Omuntu ogwo yaliga ali n’ab’amabanza babili: omo ali n’ibanza ly’edenari magana atanu, ondi makumi atanu#7, 41 Denari yaliga neingana na shilingi emo.. 42Bonene nibaburwa echo kuliha, nabasasira ha bubili bwabo. Mbe akumwenda kukiraho n’oha? 43Simoni nasubamo nagira ati: Ine nkuchwa nti: N’owe yasasire bingi. Yezu namugambira ati: Walamura kuzima. 44Nachokera ha mukazi ogwo, nagira Simoni ati: Okubona omukazi onu? Nkataha mu nzu yawe: tiwamp’amenzi g’amaguru gange; nawe onu yannabya amaguru n’amaziga, kai yakubuza isoke lye. 45Iwe tiwannwegera, nawe onu kuruga aho yatahamo, tiyaleka kunweger’amaguru gange. 46Tiwasiga omutwe gwange n’amazuta; nawe onu yasiga amaguru gange n’ebintu ebikununka kuzima. 47Nicho nkukugambirira nti: Yakizibw’ebiheno bingi, obwo yayenda muno. Nawe akukizibwa bike, akuba nayenda kake. 48Mbe nagira omukazi ogwo ati: Wakizibwa ebiheno byawe. 49Abaliga bekere nage h’eliro nibatandika kugira mu mitima zabo bati: Onu n’oha akukiz’ebiheno? 50Wenene nagambira omukazi ogwo ati: Kwikiriza kwawe kwakukiza; roko, ochulere.

Currently Selected:

Luka 7: KED1946

Highlight

Copy