Luka 12

ALI NO KUTINWA N’OHA? — OMUGASO GW’EBINTU BY’ENSI. — KUGIRA OBWESIGE.

1Mbe embaga ningi ka yasumbire, nibatamwa nibalibatana, natandika kugambira abahemba be ati: Mwekenge h’etumbyo ly’Abafarizayo, nibw’obuzigi. 2Nawe tikiliho ekiswekire ekitalisuruka, n’ekiserekire ekitalimanywa. 3Kuba ebyo mwatengire mu mwirima, biligambwa ha musana; n’ebyo mwahwehwesire mu kutwi muli mu nzu, bilyatulirwa ha luswi.

4Nawe nkubagambira, imwe banwani bange, nti: Mutatina abantu abakwit’engingo, kai kumara ebyo, batali na bindi ebyo balakola. 5Mbe ka mboleke owe muli no kutina: nimutine akumara kwita ali n’obuhicha bwo kunaga mu muliro ogutahwaho. Nkubagambira nti: ogwo niwe mutine. 6Si tibakugula masyantale atanu hela ibili, kandi tihaliho n’elimo elyo Mungu akuyebwa? 7Kai hona n’isoke lya ha mitwe zanu lyona libazirwe. Mbe nimuleke kutina; imwe mukukira masyantale mengi. 8Nawe nkubagambira nti: Buli muntu alinikiriza mu meso g’abantu, mbe n’Omwana w’omuntu alimwikiriza mu meso ga bamalaika ba Mungu. 9Nawe akuneyoga mu meso g’abantu, alyeyogwa mu meso ga bamalaika ba Mungu. 10Na buli muntu akugir’ekigambo cho kuzuma Omwana w’omuntu alikizibwa; nawe akuzuma Omwoyo Mutakatifu, ogwo talikizibwa#12, 10 Lora Matayo 12, 32.. 11Ka balibasagara mu masomero n’obusyo y’abalamuzi n’abali n’obuhicha, muleke kuhahibwa okwo n’ebyo mulisubamo, n’ebyo mulitenga; 12kuba Omwoyo Mutakatifu alibolekerera mu katungu ako ebyo muli no kutenga.

13Mbe omo naruga mu mbaga nagira ati: Mwolekerezi, nogambire mutabani wetu tugabane ekihunguro chetu. 14Wenene namugambira ati: Muntu we, ayantereho kubalamula no kubagabira n’oha? 15Kandi nabagambira ati: Mwetegereze nimwekenge ha bununu bwona; kuba obuzima bwa buli muntu tibuli mu bwingi bwa byona ebyo ali nabyo. 16Nabachwera olugani nagira ati: Ensambu y’omuntu ogwo muhango ekamwereza ebilyo bingi. 17Mbe natekateka mu kalezi ke nagira ati: Nkugira nta, kuba tindi n’aho kubika ebilyo byange? 18Nagira ati: Nkugira nti: nkukambula ebitala byange, mbigazihye; nimwo ndahunikira ebyo nayeza byona, n’ebintu byange. 19Ngambire omwoyo gwange nti: Mwoyo gwange, oli n’ebintu bingi ebyabikirwe emyaka mingi; chulera, olye, onwe, osemererwe. 20Nawe Mungu namugambira ati: Musiru we, mu kiro kinu bakukwaka omwoyo gwawe; mbe kai ebyo wahunikire bikuba bya ga? 21Nikwo omwetungisya ali atyo, k’akuba atali muhango hali Mungu.

22Kandi nagambira abahemba be ati: Nicho nkubagambirira nti: Nimuleke kuhahira emyoyo zanu ha byo mulalya, n’engingo zanu ha byo mulazwara. 23Omwoyo gukukira ebilyo, n’engingo zikukira ebizwaro. 24Mwetegereze amakozinga, tigabiba, tigagesa, tigagira bubiko, n’ekitara pai; kai Mungu akugalisya. Kai imwe mugakizire muta! 25Mul’imwe ni ga mu kutekateka akuhicha kwongera ha bulehi bwe mukono gumo? 26Mbe raba mutakuhicha n’ebinoro, kai mukuhahibwa ki si ebindi? 27Mwetegereze okw’obwasyo bukumera: tibukora milimo, tiburuka myenda; nawe nkubagambira nti: Na Salomoni mw’ikuzo lye lyona tiyazwaraga nk’olumo muli bwonene. 28Mbe raba Mungu nazweka atyo inansi eliliho lero, kai nencha likanagwa mu muliro, kai kuta imwe abo kwikiriza kuke! 29Mbe nimuleke kuhiga echo mulalya n’echo mulanwa, muleke kweleterera kuhaha. 30Kuba ebyo nibyo amahanga gona g’ensi gakuhiga; nawe Iso akumanya okwo mukuzur’ebyo. 31Hatyo mutandike kuhiga obukama bwa Mungu n’obuhikire bwabwo; mbe byona balibibayongeraho#12, 31 Lora Matayo 6, 34.. 32Mutatina, imwe kihyo kinoro, kuba Iso akasemererwa kubaha engoma. 33Muguze ebyo muli nabyo, mubigabire abahabi; nimwegirire ensaho ezitakukokora, ensabo etakuhwaho mw’igulu, ey’omusuma atakugenda, n’amahuka gatakugilya#12, 33 Lora Matayo 6, 20.. 34Kuba si aho ensabo yanu eli, niho n’omutima gwanu guliba.

OLUGANI LW’ABERU ABATANAGIRA. — OMULIRO MU NSI. — ENYAMO Z’ENAKU.

35Ebibunu byanu bibe byebohire, n’emuli zyake mu ngaro zanu. 36Kai imwe mususane n’abantu abakulindirira omukama wabo naruga mu bwenga, niho k’aliza akakinguza, aho n’aho nibamukingulira. 37Aberu abo bali n’omugisa, ab’omukama wabo yezire akabasanga nibalora; koto nkubagambira nti: Akweboha nabekaza kuzima, nabarabamo kubagabira. 38Mbe akaiza ha lubu lwa kabili#12, 38 Lora Matayo 14, 25. lwo kusisimuka, hamo akezira ha lwa kasatu, kai akasanga atyo, aberu abo bakuba n’omugisa. 39Mbe nimumanye okwo kanaka akaba namanya akatungu ak’omusuma yakwizireho, koto tiyakunagire, kai tiyakulekire enzu ye kusimbwa. 40N’emwe mwikare mwechumire, kuba mu katungu ako mutakutekateka, niko Omwana w’omuntu aliziramo.

41Petro namugambira ati: Rugaba, si n’itwe twenka ab’okugambira olugani olwo, nangu ni bona? 42Omukama nagira ati: Okuchwa oti: omunampara w’omutima n’omwesagazi n’oha, owe omukama yatereho kwemererera abo mu ka ye, ahiche kubaha ebilyo mu naku zihikire? 43Omwiru ogwo ali n’omugisa, owe omukama k’aliza, akasanga atyo. 44Nkubagambira koto nti: Alimuha kwemererera byona ebyo ali nabyo. 45Nawe omwiru ogwo akagira mu mutima gwe ati: Omukama wange yerirwa kwiza; akatandika kuter’aberu n’abazana, no kulya no kunwa no kutamira; 46omukama w’omwiru ogwo akwizira ha lunaku olwo atakutegeza na mu katungu ako atakumanya, akumwhihaho namuha omugabo gwe hamo n’abazigi. 47Nawe omwiru oliya akumanya eby’omukama we akwenda, kai akabura kwetegeka no kukolera omw’omukama we akwendera, aliterw’enkoni ningi; 48nawe oliya atamanyaga, kai akakola ebihikire kuterwa, aliterwa nkoni noro. Mbe buli akuhabwa bingi alibuzibwaho bingi; kai akusindikirwa bingi, balimusabaho kukiraho#12, 48 Mu nazu ezo omunampara niwe yaliga nagabira abakozi ebilyo byabo..

49Nkeza kuchumik’omuliro mu nsi, tinkwenda kindi, nkwenda gwake#12, 49 Omuliro ogwo nibw’obunale n’amazongoko; lora Matayo 10, 23.. 50Ndi na batisimu yo kubatizibwa, nkunaranara nta kuhika esomboke! 51Mukuchwa muti: nkeza kuha omulebo mu nsi? Pai, mbagambire, nawe obuhabane. 52Kuba kuruga hati baliba batanu mu nzu bahabene; abasatu n’ababili, kai ababili n’abasatu. 53Balihabana: ise n’omwana we, kai omwana n’ese, nina n’omuhara, kai omuhara na nina, ninazara na mukamwana, kai mukamwana na ninazara#12, 53 Lora Matayo 16, 25–26..

54Nagambira n’embaga ati: Ka mukubona elire niliruga mu bugwa, aho n’aho mwagira muti: Enzula yeza; kai nikwo bikuba bityo. 55Kai amalimbe ka gakuhemba, muti: Ekuba mpita; kai ekubaho. 56Bazigi mwe, mukumanya kulenga obusyo bw’igulu n’obw’ensi; kai kubaki mutakumanya enaku za hati? 57Kubaki si mutakwemanya imwe abene ebihikire? 58Okaba nogenda n’omutonganisya wawe ha mulamuzi, mu muhanda oteho amani go kumweihaho, atakusagara ha mulamuzi, kai omulamuzi akakuha omunaranaza, kai omunaranaza akakusagara mw’ibohero. 59Nkukugambira nti: Omwo tolirugamo otalihire esenti yo kumaliza.

Currently Selected:

Luka 12: KED1946

Highlight

Copy