Mark 16
16
CHAPTIR SAXTEEN.
The risin frae the deid. He schaws his sel; and then ascends.
1The Sabbath bein by, Mary Magdalene, and Mary oʼ James, and Salome, coft them spices, that they micht come and anoint him.
2And early on the first day oʼ the week, they come to the tomb, at the sun‐risin.
3“And they war sayin to thir sels, “Wha wull row us awa the stane frae the door oʼ the tomb?”
4And, lookin up, they see that the stane is rowʼt awaʼ; for it was an unco bouk.
5And, gangin intil the tomb, they saw a young man sittin on the richt, clad in a lang, white robe; and they war unco fleyʼt.
6But he says to them, “Be na fleyʼt! Ye seek Jesus, the Nazarene, the Crucifyʼt. He raise! He isna here! See the place whaur they laid him.
7“But gang; tell his disciples and Peter,#16:7 See hoo unco tender the Lord was toward Peter! Nae doot he grat (ver. 10) mair than ony oʼ them — for he had mair to greet for! Wha faʼs farʼest, has maist need oʼ raisin up! that he gaes afore you intil Galilee, thar sal ye see him; eʼen as he tauld ye.”
8And gangin oot, they fled frae the tomb; for fear and quakin had come on them; and they tauld nocht to ony; for they war terrifyʼt.
9And, comin forth early on the first day oʼ the week, he was first made kent to Mary Magdalene, frae wham he had cuisten oot seeven demons.
10She gaed awaʼ and tellʼt thae that had been wiʼ him, as they maenʼd and grat.
11And they, whan they war tellʼt that he was leevin, and seen by her, wadna believe.
12And eftir thae things, he was schawn in anither form to twa oʼ them, as they walkit and gaed oot intil the kintra.
13And they gaed awaʼ, and tellʼt it to the lave: neither believʼt they them.
14But eftir, to the Eleeven their sels he was schawn, as they sat at meat; and he wytit them for their dootsomness and hardness oʼ heart, no to lippen to them wha had seen him eftir he raise.
15And he said to them, “Gang ye to aʼ the warld, and preach the Gude‐Tidins to the hale creation!
16“Wha believes and is bapteezʼt sal be savʼt; but wha disbelieves sal be condemned.
17“And uncos sal follow them that believe; in my name sal the demons be cuisten oot; they sal speak wiʼ tongues;
18“They sal tak up vipers; and gin aiblins they drink ony deidly draught, it sal be nae ill to them; they sal lay hauns on the sick, and they sal be weel!”
19Sae than the Lord Jesus, eftir he had spoken to them, was taʼen up till Heeven, and sat doon on the richt haun oʼ God:
20And they gaed oot, and preached aʼ‐gate; the Lord workin wiʼ them, and makin siccar the Word wiʼ the uncos that followʼt.
Currently Selected:
Mark 16: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
