Acts 6
6
CHAPTIR SAX.
Deacons to tak tent oʼ the needy. Stephen taen haud oʼ.
1Noo, iʼ thae days, thar gat up a murmurin amang the Grecian Jews again the Hebrew anes, aboot the weedows bein owerlookit iʼ the giean‐oot oʼ the daily breid.
2And the Twalʼ brocht the thrang oʼ the disciples thegither, and quoʼ they, “Itʼs no bonnie that we soud leaʼ the service oʼ the Word oʼ God, and serʼ tables.
3“Sae, brethren, look ye oot frae ʼmang yersels seeven men oʼ gude name, wyss men, fuʼ oʼ the Spirit, that we may set ower this maitter.
4“But we wull mainteen oorsels aye in prayer, and iʼ the service oʼ the Word.”
5And the word was weel thocht oʼ aʼ the thrang; and they named Stephen, ane fuʼ oʼ faith and the Holie Spirit, and Philip, and Prochorus, and Nicanor, and Timon, and Parmenas, and Nicolas, a proselyte frae Antioch.
6Wham they set fornent the Apostles; and whan they had prayed they set their hauns on them.
7And the word oʼ God grew uncolie; and the feck oʼ the disciples multiplyʼt in Jerusalem; and an unco thrang oʼ the priests followʼt the faith.
8And Stephen, fuʼ oʼ love and pooer, wrocht great warks and ferlies amang the folk.
9But certain anes raise up, oʼ the Synagogue caʼd “Oʼ the Freemen,” baith Cyrenians and Alexandrians, and thae frae Cilicia and Asia, arguin wiʼ Stephen.
10And they warna fit to staun again the wisdom and the Spirit he spak wiʼ.
11And they set on men, wha said, “We hae heard him lichtlie Moses, and lichtlie God!”
12And they made a steer amang the folk, and elders, and scribes, and cam on him, and grippit him, and harlʼt him to the Cooncil,
13And set up witnesses forsworn, wha said, “This man is aye speakin ill oʼ the Holie Place, and the Law;
14“For we hae heard him threep that this Jesus oʼ Nazareth sal whammle ower this place, and sal do awa wiʼ the orderin that Moses gied us.”
15And aʼ that war iʼ the Cooncil, glowerin at him, saw his face eʼen like an Angelʼs face!
Currently Selected:
Acts 6: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
