Acts 4
4
CHAPTIR FOWR.
The Apostles afore the Cooncil. They pray, no for safety, but for faith and bravery; and the very yirth trimles as God says, “Aye!”
1And, as they war speakin to the folk, thar cam on them the priests, and the Captain oʼ the Temple, and the Sadducees;
2Bein sair put‐aboot that they soud be teachin the folk, and preachin throwe Jesus the Risin‐Again frae the deid.
3And they grippit them, and pat them in ward till the morn; for it was noo the gloamin.
4But mony oʼ thae that heard the word believed; and the number oʼ the men cam to be aboot fyve thoosand.
5And, it cam, on the morn, that their rulers, and elders, and scribes,
6Wiʼ Annas the Heigh‐priest, and Caiaphas, and John, and Alexander, and aʼ the lave oʼ the Heigh‐priestʼs kin, war gaitherʼt thegither in Jerusalem.
7And whan they had putten them iʼ the mids, they speirʼt, “By whatna pooer, or whatna name, hae ye dune this?”
8Than Peter, fuʼ oʼ the Holie Spirit, answerʼt, “Ye rulers oʼ the nation, and elders!
9“Gin we be this day taen to task anent the gude deed dune to the feckless man, by whase hauns he is made hale,
10“Be it kent till ye aʼ, and till aʼ the nation oʼ Israʼl, that iʼ the name oʼ Jesus Christ oʼ Nazareth, that ye crucifyʼt, wham God raised frae the deid, eʼen by him this man stauns afore ye hale.
11“Here is the stane lichtlied by ye that bigg, and it is made the copin oʼ the corner.
12“And thar is salvation in nae ither; for thar isna anither name ʼneath the skies gien to men, whaurby we maunʼ be saved.”
13Noo, whan they saw the boldness oʼ Peter and John, and deteckit that they wantit lear, and war common folk, they ferlied at them; and they took tent that they had been wiʼ Jesus.
14And seein the man that was made hale staunin wiʼ them, they coud say nae mair again it.
15But, ordering them oot oʼ the Court, they coonsellʼt amang their sels,
16Sayin, “What are we to do wiʼ thir men? for indeed that a great wunner‐wark has been dune by them, is noo weel kent to aʼ the folk oʼ Jerusalem; and we canna lichtlie it;
17“But sae as it spreads abreid nae farʼer amang the folk, let us stricklie chairge them to speak to nae man iʼ this name, frae this oot.”
18And they caʼd them in, and gied them the sweeping chairge no to speak ava, nor to teach, iʼ the name oʼ Jesus.
19But Peter and John, answerin said, “Gin it be richt for us to list to you, mair than to God, judge yersels!
20“For we canna forbear speakin oot the things we hae seen and heard!”
21And whan they had gien them mair warnin, they loot them gang, no seein hoo they coud punish them, on account oʼ the folk; for aʼ glorifyʼt God for what was dune.
22For the man on wham this ferlie oʼ healin was wrocht, was mair nor forty year auld.
23And bein let gang, they cam to their ain folk, and gaed ower aʼ that the Heigh‐priests and the elders had said.
24And they, whan they heard it, liftit up their voice to God wiʼ ae heart, sayin, “Soveran Ane! thou that did mak the heeven and the yirth, and the sea, and aʼ things in the same,
25“Wha, by the Holie Spirit, by the mouʼ oʼ Dauvid#4:25 We are tellʼt that the Jews, in oor ain day, dinna like to expone this second Psalm; it testifies ower muckle aboot Jesus. Nae doot this wad be ane oʼ the bits oor Lord exponed to the twa gaun to Emmaus. thy servant, said, ‘Why raged the nations? and the folk wiʼ their minds fuʼ oʼ feckless things?
26“ ‘The kings oʼ the yirth stude up, and the rulers forgatherʼt, again the Lord, and again his Anointit Ane.’
27“For oʼ a truth they war gaitherʼt in this citie, again thy Holy Ane Jesus, that thou did anoint, baith Herod and Pontius Pilate, wiʼ Gentiles and folk oʼ Israʼl,
28“To do what thy haun and thy mind had markit‐oot aforehaun to come to pass.
29“And as to things e‐noo, Lord, look hoo they wad daunton us! and gie to thy servants a bauldness to speak thy word;
30“Eʼen while thou sal rax oot thy haun to heal; and that tokens and ferlies may be dune iʼ the name oʼ thy Holie Ane, Jesus.”
31And whan they had prayed, the hoose trimilʼt whaur they war gaitherʼt; and ane‐and‐aʼ oʼ them war fuʼ oʼ the Holie Spirit; and they spak the word oʼ God wiʼ aʼ bravery.
32And aʼ the thrang oʼ them wha believed war oʼ ae heart and ae saul; and nae man said ocht oʼ his haddin or his plenishin, was his ain; but they had aʼ things throwe‐ither.
33And the Apostles, wiʼ great pooer, gae witness oʼ the Risin‐Again oʼ the Lord Jesus; and muckle love was bidin on them.
34Naither was thar ony amang them that wantit; for as mony as aucht hooses or grund sellʼt them, and brocht the prices oʼ what they sellʼt,
35And pat them doon afore the Apostlesʼ feet; and a proportion was gien to every ane as ilk ane had want.
36And Joseph, wha was caʼd Barnabas (that is, the Son oʼ Gude‐Guidin), a Levite, a man oʼ Cyprus,
37Haein a bit grund, sellʼt it, and brocht the siller, and pat it doon at the Apostleʼs feet.
Currently Selected:
Acts 4: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
