Luk 3
3
Ioanes ga tagurei no ngaas
(Matiu 3.1-12; Mak 1.3-6)
1Ing Taiberias, no tamat ta ira lualua na gil warkurai gata warkurai a sangahul ma liman na tinahon, io, ta iakanong ra pakana bung ne Pontias Pailat ga warkurai tano hanua Iudeia. Ma ne Herot ga warkurai taar tano hanua Galili ma no tasina, ne Pilip, ga warkurai taar ta ira airua hanua Ituria ma Tarakonitis. Ma ne Lisanias ga warkurai taar tano hanua Abilene. 2Ma ne Anas ma ne Kaiapas dir ga tamat at ta diet ira mes na pris. Ta iakano pakana bung Kalou ga tar no nuna nianga ta Ioanes no nati Sekaria aram ra hanua bia. 3Io, Ioanes ga haan ta ira hanua bakut kaia huteta tano taah Ioridaan ma ga harharpir hoken: “Muat na kap no bapitaiso na lilik pukus waing Kalou naga lik luban sei ira numuat magingin sakena.” 4Io hua, gaam haruat ma ira pakpakat tano poropet Aisaia. Ga tangai hoken,
“Maram ra hanua bia a ingana tikai i taatau,
‘Tagurei no ngaas tano Watong,
Gil hatakodasnei ia wara nuna hinanuat.
5Ira kastung bakut da bus,
ma ira uladih da kut hasur.
Ira pusukana ngaas da gil hatakodas,
ma ira sakana sibaan da mal timaan.
6Ma ira tunatuna bakut diet na nas no harhalon ta Kalou.’”
7Ma a tamat na mataniabar ga haan tupas Ioanes bia naga bapitaiso diet. Ma ga tangai ta diet bia, “A sakana tena bisbis muat! Siga ga hatumarang muat bia muat na hilau talur no harpidinau nong Kalou i huteta bia na tar ia? 8Gaar tahut bia muat na gil ira linga ing na haminis bia muat ta lilik pukus! Io, muat tangtangai bia a bulumur tane Abraham muat, kaikek muat lik bia i tale muat bia muat na hilau talur no harpidinau ta Kalou. Senbia waak muat liklik hua. Pa na tutuna. Pai tamat na linga bia a bulumur tane Abraham muat. Iau tangai ta muat bia, Kalou i tale bia na hatahuat lah ta bulumur ta Abraham ma kaiken a mon ra haat. 9No matau ia kek ra bola dahai, ma i tagura taar wara katkato hasur ira dahai. Ma ira dahai bakut ing pa diet la hatahuat ta tahut na hunue diet, na kato hasur ma na sei tar tano ula iaah.”
10Ma ira mataniabar diet ga tiri ia bia, “Io, ing bia hua, mehet na gil sa?”
11Io, Ioanes ga balu diet, ma ga tangai bia, “Ing bia airua ra num sigasigam, u na tar tikai ta nong i supi. Ma nong i mon haleng na nian, i tahut bia na gil mah hua.”
12Ira tena kap takis diet ga haan tupas ia bia na bapitaiso diet. Ma diet ga tiri ia bia, “Tena hausur, mehet na gil sa?”
13Ga tangai ta diet bia, “I tahut bia muat na kap haruatanei mon ing di ta kurei tar ta muat ma waak muat laklakai iakano warkurai.”
14Ma aring umri diet ga tiri ia bia, “Ma mehet, mehet na gil sa?”
Ioanes ga balu diet bia, “Waak muat hapar lah ra kinewa ta ira mataniabar ma waak muat takun habisbisnei tikai. I tahut bia muat na lik bia ira numuat kunkulaan i haruat mon.”
15Ma ira lilik nudiet ira mataniabar ga tahuat bia a mangana linga na hanuat ma diet ga manga lilik bia no Mesaia#3.15 No kukuraina i haruat ma ‘Karisito’. dak um tane Ioanes. 16Ma Ioanes ga balu diet gaam tangai bia, “Iau la bapitaiso mon muat ma ra taah, ma senbia nong i tamat tagu na hanuat. Ma pa iau tale bia iau na palas ira hinau ta ira nuna sendal. #3.16 Ioanes ga hirhir bia na gil iakan ra magingin ing tiga maris gaar gil tar tiga watong kanong Iesu i manga tamat sakit. Ia at na bapitaiso muat ma no Halhaliana Tanua, ma ra iaah. 17Ma i palim tar no nuna saol wara seisei haut ira wit taar tano dadaip nong na puh sei ira suruna ma ira parahona. Senbia ira tahut na pat na wit ing diet tirih ma diet puka suur, na reng hulungai ukaia tano nuna hala na bul wit. Ma na sei tar ira suruna ma ira parahona taar tano iaah kis.” 18Io hua, Ioanes ga hadadas ira mataniabar ma ra haleng na mes na nianga mah ing ga pirpir diet ma no tahut na hinhinawas. 19Senbia Ioanes ga bor Herot no lualua kanong ga tolai lah Herodias no hahin tano tasina. Ma pa ga bor ia uta iakanong sena mon. Herot ga gil mah ari mes na sakana magingin. 20Ma bia Ioanes ga gil hua, Herot ga gil iakan ra sakana linga tutun at: ga banus bat Ioanes narako tano hala na harpidinau.
Ioanes ga bapitaiso Iesu
(Matiu 3.13-17; Mak 1.9-11)
21Ma ta iakano pakana bung bia ira mataniabar diet gata kap bapitaiso, io, Iesu mah ga kap bapitaiso. Ma bia ga saasaring, no mawai ga tapapos. 22Ma no Halhaliana Tanua ga hansur taar tana ma ga haruat hoing tiga bun. Ma a ingana tikai ga ianga suur maram ra mawai hoken: “Uga no Natigu, ma iau manga sip uga ma iau guama sakit taam.”
Ira hintubu Iesu
(Matiu 1.1-17)
23Ma bia Iesu ga hatahun no nuna pinapalim, ga wara haruat ma itul a sangahul na tinahon. Ma tano lilik ta ira mataniabar bia Iesu no nati ne Iosep.
Ma Iosep no nati ne Heli,
24ma Heli no nati ne Matat,
Matat no nati ne Lewi,
Lewi no nati ne Melki,
Melki no nati ne Janai,
Janai no nati ne Iosep,
25Iosep no nati ne Matatias,
Matatias no nati ne Emos,
Emos no nati ne Nahum,
Nahum no nati ne Esli,
Esli no nati ne Nagai,
26Nagai no nati ne Mat,
Mat no nati ne Matatias,
Matatias no nati ne Semen,
Semen no nati ne Josek,
Josek no nati ne Joda,
27Joda no nati ne Joanan,
Joanan no nati ne Resa,
Resa no nati ne Serubabel,
Serubabel no nati ne Sieltiel,
Sieltiel no nati ne Neri,
28Neri no nati ne Melki,
Melki no nati ne Adi,
Adi no nati ne Kosam,
Kosam no nati ne Elmadam,
Elmadam no nati ne Er,
29Er no nati ne Josua,
Josua no nati ne Elieser,
Elieser no nati ne Jorim,
Jorim no nati ne Matat,
Matat no nati ne Lewi,
30Lewi no nati ne Simion,
Simion no nati ne Iuda,
Iuda no nati ne Iosep,
Iosep no nati ne Jonam,
Jonam no nati ne Eliakim,
31Eliakim no nati ne Melia,
Melia no nati ne Mena,
Mena no nati ne Matata,
Matata no nati ne Neitan,
Neitan no nati ne Dewit,
32Dewit no nati ne Jesi,
Jesi no nati ne Obet,
Obet no nati ne Buas,
Buas no nati ne Salmon,
Salmon no nati ne Nason,
33Nason no nati ne Aminadap,
Aminadap no nati ne Etmin,
Etmin no nati ne Arni,
Arni no nati ne Hesron,
Hesron no nati ne Peres,
Peres no nati ne Iuda,
34Iuda no nati ne Iakop,
Iakop no nati ne Aisak,
Aisak no nati ne Abraham,
Abraham no nati ne Tera,
Tera no nati ne Nahor,
35Nahor no nati ne Seruk,
Seruk no nati ne Reu,
Reu no nati ne Pelek,
Pelek no nati ne Eber,
Eber no nati ne Sela,
36Sela no nati ne Keinan,
Keinan no nati ne Arpaksat,
Arpaksat no nati ne Siem,
Siem no nati ne Noa,
Noa no nati ne Lamek,
37Lamek no nati ne Metusela,
Metusela no nati ne Enok,
Enok no nati ne Jaret,
Jaret no nati ne Mahalalel,
Mahalalel no nati ne Kenan,
38Kenan no nati ne Inos,
Inos no nati ne Set,
Set no nati ne Adam,
Adam no nati Kalou.
Currently Selected:
Luk 3: GFKH
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
