Málɩ́kɩ 5

Zozíi sa nyɔ nyumozìzi kɔ́kɔ́mnɩ́ jɩ̀

(Matíe 8.28‑34; Lúkɩ 8.26‑39)

1Zozíi ya ɔ́ kʋjɩ̀nyʋ̀àà sɔ́ dí lé á ŋnɩ nyíé a bɩ́, Zelazenɩ́nyʋa#5.1 Zelazenɩ́nyʋa: A dúó ʋ́mʋ́ á wlele Zelazáa. a bhlɩ́ɛ́ a mnɩ́. 2Mà á ŋnɩ lé Zozíi kwlíi kɔ́ɔ̀kʋ́ a, nyɔ wlʋ́ lésigwlèè kʋ ʋ́ gɔ̀ a mnɩ́ lé ɔ́ yi Zozíi nyúzɔ kʋ́. Nyɔɔ́ nyumozìzi kʋ̀ ɔ la jɩ̀, 3lésié a nyièdɩ ɔ́ pʋ́lɛ. Mà nyɔɔ́, nyʋaá nɩ́ míi lé a kɔ́ɔ́ kpó ŋwʋ́. Ɔ́ bhɩɩ́ a gʋagʋ́ nɩ́ yɩ́ ɔ yɩ́ lɛ́ ŋwɔ́ɔ. 4Á ya kɔ́kɔ́mnɩ́ kʋ́ trányɩ, á yɔɔ́ kpí bhɩ ŋwʋ́, á yɔɔ́ sáà cɩ́ɩ ŋwʋ́. Mà ɔ́ ŋáta kpíé, lé ɔ́ díé cɩ́ɛ. Nyɔ nɩ́ ʋ́ kʋ lé ɔ kɔ́ɔ́ míi. 5Gàgàzrɩ̀, lé dɩ́bɩ, ɔ́ bile lésié yà kíkíé sɔ́ a nyièdɩ, lé ɔ́ gbo. Ɔ́ ka cɔ́kwɩpɩ lé ɔ́ kpakpla ɔ nyoku.

6Mà, ɔ yɩ́ bhli kɔ́ɔ̀kʋ́ Zozíi jɩ̀ drɩ̀ mɔ̀ɔ a, ɔ́ fa sóo lé ɔ́ mʋ lé ɔ́ sra koti sá, 7lé ɔ́ bhɩa wɔlɩ́, ɔ́ anɩ́: «Lagɔ a Yuwliyʋ, Zozíi! Wɔlɩ gbá ɩ̀ yrálɛ mɔ́ɔ mʋ́ a? Ɩ́bhìè, ɩ́ sra mɔ̀ wlú! Lagɔ a ŋnɩ́ɛ́ mʋ́, nà nyɛ́ mɔ́ɔ nyakalɩ!» 8Bhʋ́ Zozíi srʋ nyumozùzùò mà: «Wlʋ́ nyɔɔ́ jɩ̀, nyumo zùzù!» 9Lé Zozíi yrá nyɔɔ́, ɔ́ anɩ́: «Nà ŋnɩ́ áa?» Nyɔɔ́ anɩ́: «Ná ŋnɩ́ ɩ̀ ŋwɔ́ɔ, à nɩ́ bɛ́. À zù kpanyɩ.» 10Lé ɔ́ bhibhie sɔ́kʋ́ Zozíi lé ɔ́ srʋ ɔ́ mà ɔ ná jɩ́ɩlɩɩ́ bhlɩ́ɛ́ lɩ̀à mnɩ́.

11Mà kíké kʋ ʋ́ gɔ̀, lé gékpíbhuzàlɩ a kpa káda kʋ mɔ̀ɔmɔ̀ ɩ́ lie. 12Naa nyumozìzìè srʋ Zozíi, ɩ́ anɩ́: «Ɩ́bhìè, fa àmɔ̀ bhuzàlɩ kpà kádàà mnɩ́ bhè cíe àmɔ̀ mɔ̀ɔ sá bhè à kà a mnɩ́ pla!» 13Lé Zozíi nyɩ́ɩ́ nyúzɔ lé ɩ́ wlʋ́ nyɔɔ́ jɩ̀. Ɩ́ mʋ lé ɩ́ pla bhuzàlɩ̀ɛ̀ a mnɩ́. Mà bhuzàlɩ̀ɛ̀ fa sóo, lé ɩ́ kwlíi kíkéé. Lé ɩ́ lɔ̀fɩ́ɛ́ kɔ́sɔ jié lé jié bhlɩ́ɩ́. Ɩ́ ŋwɔ́ɔ yuosa bhuzàlɩ a du.

14Mà nyʋaá à síe bhuzàlɩ̀ɛ̀ a á gú. Á gú lé á fa dú dí, lé á fa sáà bìdí kʋ́ dí. Ɩ́ ka ŋnɩ́ a, nyʋa wlʋ́ mɔ̀ɔmɔ̀, lé á yi dʋdʋ̀ kà. 15Á ŋnɩ Zozíi gɔ̀ a, á dʋdʋ̀ a, nyɔɔ́ nyumozìzi kɔ́kɔ́mnɩ́ɛ́ kʋ la jɩ̀ a, ɔ́ bɔ́ɔ ʋ́ ɔ yíjɩ̀ ya gbɩ́ ɔ́ pla koti mʋ́. Mà nyʋaá yɛ́ ɔ́ a, ŋanɩmɛɛ́ yi la kʋ́. 16À yɛ́ wɔlɩ́ɛ́ a bhá dà, á sa nyʋa ànàà dí. Wɔlíɛ́ fɩ́ɛ́ ɩ̀ ŋnɩ nyɔɔ́, lé ɩ̀ ŋnɩ bhuzàlɩ̀ɛ̀ a, á sɩɩ́ mɔ̀ɔ. 17Mà, nyʋaá sra Zozíi wlú, á anɩ́, ɔ wlʋ́ á bhlɩ́ɛ́ a mnɩ́.

18Zozíi pla gɔ́lʋ́ɔ́ ɔ ká yrɩ́bhà, nyɔɔ́ nyumozìzìè wlʋ́ lɛ́ jɩ̀ a ɔ́ yi lé ɔ́ bhibhie Zozíi lé ɔ yɔ̀sɔ́ ká mʋ. 19Mà Zozíi nɩ́ ŋwnʋ́. Ɔ́ srʋ nyɔɔ́, ɔ́ anɩ́: «Mʋ gbó, mʋ nà nyʋa gɔ̀, lé sa laa dí. Cémʋ́ Kanyɔ yɛ́ nà gbɩ́ a ŋazɩ kʋ́, lé ɔ́ nɩ nà zà a, mʋ lé sa laa dí.» 20Ɔ́ cí sɩ́tɛ̀ a, nyɔɔ́ ɔ́ɔ mʋ yɩ́. Ɔ́ mʋ a, ɔ́ bhli ɔ bhlé a bhlɩ́ɛ́ á wlele Dí Kʋ́gbá a lé ɔ́ sa mɔ̀ɔ a nyʋa dí. Ɔ́ srʋ á cémʋ́ Zozíi nɩ ɔ́ zà a. Mà nyʋaá fɩ́ɛ́ nú wɔlɩ́ɛ́ a, ɩ́ mna a neé.

Zozíi yalɩma ŋwnɔ́ a múó lé ɔ́ galà Zayilúsʋ a ŋnɩ́keyʋ

(Matíe 9.18‑26; Lúkɩ 8.40‑56)

21Tányɩɛ́ mʋ́ Zozíi wlʋ́ nyíé a bɩ́ lé ɔ́ dí a, ɔ́ kʋ àyɩ nyíé gɔ̀, lé nyʋa kɔ́kɔ́mnɩ́ yi lé á glalɔɔ́ klʋ́. 22Bhʋ́ á kʋ lé zúfʋcɛcɩwlʋɔ́ a cífɩnyʋaá á nyièdɩ a cífɩɛ́ á wlele Zayilúsʋ a, ɔ́ yɛ́ Zozíi a, ɔ́ yi lé ɔ́ bhli ɔ́ bhɔ kʋ́, 23lé ɔ́ srʋ ɔ́ mà: «Ɩ́bhìè, ɩ́ sra mɔ̀ wlú, ná ŋníkeyʋɔ́ ɔ́ɔ kúé, yi bhè bhibhie ɔ wlú ɔ ká ʋ́ neé wlʋ́ àyé.» 24Lé ɔ yà Zozíi sɔ́ mʋ, mà nyʋaá à jɩ́ á kʋ́ a, a nɩ́ zumole bɛ́.

25Mà ŋwnɔ́ a múó kʋ á nyièdɩ, lɩkpɩ kʋ́gbá lɩkpɩ sɔ́ lɛ̀ lé dòlú wlʋ́ɔ́ mʋ́. 26Ŋwnɔ́ɔ́, ɔ́ ya kpanyɩ kalɩmɛ yɛ́ dɔ̀tányʋa wlɩɩ́, ɔ́ kakalɩɛ́ fɩ́ɛ́ ɔ́ yɩɩ́ nyʋa nyɛ́ ɔ ká yalɩma, bhè ɔ nɩ́ yalɩma, gúó pɩalɔɔ́ kɔ́ɔ̀kɔ́ kʋ́. 27Ɔ́ nú Zozíi a wɔlɩ́ a, bhʋ́ ɔ́ yi lé ɔ́ pla nyʋaá nyièdɩ lé ɔ́ plɩ́ Zozíi a bɩ́, lé ɔ́ gbɔ́ ɔ bàna. 28Ɔ́ srʋ ɔ nyoku mà: «Nɩ trányɩ lé nɩ gbɔ́ ɔ bàna a pʋpʋ́ a, ɩ́ yi yalɩma.» 29Mà ŋwnɔ́ɔ́ kʋ dáamúó lé dòlúó ʋ̀ wlʋ́ ɔ́ la mʋ́ a, ʋ́ dúò lé ɔ́ yɩbhlɩ saá mà ɔ́ ya yalɩma. 30Mà Zozíi yɩbhlɩ kakamnɩ́lɛ́ saá mà fɩ́ yɔɔ́ mʋ́ wlʋ́. Ɔ́ yrɩ́bhà, lé nyʋaá a nyièdɩ̀ɛ̀, ɔ́ yrá á mà: «Ɔ̀ gbɔ́ ná kótuó a?» 31Bhʋ́ ɔ́ kʋjɩ̀nyʋ̀àà srʋ ɔ́ mà: «Ɩ̀ lɛ́bhɛ nyʋaá, á jɛ́jɩa mɔ̀ wlú lé ɩ̀ yrá á mà ɔ̀ gbɔ́ mɔ́ a?» 32Lé Zozíi pláa yɩ́ lé ɔ́ dʋdʋ̀ ɔ nyoku gɔ̀, nyɔɔ́ ɔ̀ gbɔ́ ɔ́ a, ɔ kɔ́ ɔ́ yɛ́. 33Ŋwnɔ́ɔ́ ŋanɩmɛ yiloó kʋ́ ɔ́ lɔ̀fɩ́ɛ́ ɔ́ tɩ́tɛlɛ, wɔlɩ́ɛ́ ɩ̀ plɩ́ɩ ɔ́ kpɩkpɩ a mnɩ́ a zà, ɔ́ yi lé ɔ́ bhli Zozíi a drɩ̀, lé ɔ́ plɩ́ wɔlɩ́ɛ́ fɩ́ɛ́ kʋ́ lé ɔ́ cí ɩ cɩ́cása. 34Lé Zozíi srʋ ɔ́, ɔ́ anɩ́: «Ná yʋ́ʋ̀, nà fádùò ya mɔ̀ pʋ́à. Nà gúó ya zɩmnɛ́ bhɩa, mʋ yɩ́ blɔ̀blɔ́ a mnɩ́!»

35Wɔlíɛ́ kʋ bhlà Zozíi neé bhè nyʋa wlʋ́ zúfʋcɛcɩwlʋɔ́ a cífɩ a gbó, lé á yio srʋ ka mà: «Yʋ́ɔ́ ya kú, nàa ya flɛ́flɛ sa Másɛɛ̀ klʋ́!» 36Zozíi nú wɔlɩ́ɛ́ á cí a, mà ɔ nɩ́ ɩ́ mányɩ ɔ́ srʋ Zayilúsʋ mà: «Nàá gú, ŋwʋ́ mɔ̀ duo.» 37Ɔ́ na ká Zayilúsʋ a gbó mʋ a, cémʋ́ ɔ nɩ́ yrá lé yígàdà nyɔ jɩ́ ɔ́ kʋ́ a, ɔ́ srʋ Pɩ́ɛ́lɩ, Zákɩ lé ɔ nɩ́ayʋ́ Záan sɔ́ mà a yi a yɔ̀sɔ́ ká mʋ. 38Mà á ŋnɩ gbó a, nyʋaá kʋ̀ mɔ̀ɔ a, á dídilo bɩ́, á bhɔtɔ, a nyúgbùyrè klue. 39Zozíi pla wlʋɔ́ a mnɩ́ a, ɔ́ yrá nyʋaá mà: «Ɛ̀kʋ̀ʋ̀ bhè a ŋwíé lé a sa yrè a? Yʋ́ɔ́ nɩ́ kú, ɔ́ɔ ŋwɔ́mɛ.» 40Ɔ́ cí sɩ́tɛ̀ a, áa nyɩalɔɔ́, bhʋ́ ɔ́ jɩ́ɩlaá. Lé wlʋdrèè mnɩ́ á ŋwʋ́ yʋ́ɔ́ a, ɔ yà yʋ́ɔ́ ɔ tʋ́ lé ɔ nɛ́ lé ɔ́ kʋjɩ̀nyʋ̀àà taá sɔ́ pla mɔ̀ɔ. 41Lé ɔ́ bhli yʋ́ɔ́ a glɔ̀gbá kʋ́, lé ɔ́ srʋ ɔ́ mà: «Talita kúmʋ!» Ɩ́ gba ŋwɔ́ɔ mà: «Ná ŋnɩ́keyʋ, náa srʋɛ mɔ̀ mà soglù.» 42A kʋ dáamúó lé yʋ́ɔ́ soglù lé ɔ́ náa. Mà nyʋaá fɩ́ɛ́ kʋ̀ la ʋ́ a, neé mna a. Yʋ́ɔ́ ŋwɔ́ɔ lɩkpɩ kʋ́gbá lɩkpɩ sɔ́ a yʋ́. 43Mà Zozíi cɩa a nyúkwlí lé ɔ́ srʋ á mà wɔlɩ́ɛ́ a yɛ́ lɛ́ a, nyɔ ná yɩbhlɩɩ́, mà a nyɛ́ yʋ́ɔ́ lelilɩ ɔ ká li.

Currently Selected:

Málɩ́kɩ 5: NEY

Highlight

Copy