Málɩ́kɩ 2

Zozíi yalɩma kplákplányɔ lé ɔ́ cieloó ɔ́ nyumoé

(Matíe 9.1‑8; Lúkɩ 5.17‑26)

1Yrií zùò plɩ́ a, Zozíi yrɩ́bha Kapɛnayʋ́mʋ. Nyʋaá nú mà ɔ́ kʋ gbó a, 2á lɔ̀fɩ́ɛ́ yi lé á ŋnɩlɔ̀ ɔ̀ wlú. Mà wlʋɔ́ yíè lé nyʋa àna tuo jrùkʋ́. Ɩ́ nɩ lé bhɔɔ́ a ŋwʋ́da nɩ́ kʋ. Bhʋ́ á kʋ lé ɔ́ cɩ́alaá Lagɔ̀wɔ̀lɩ̀ɛ̀. 3Nyʋa àna yio gɔ̀, á nyièdɩ̀ɛ̀, àna á mɔ̀na gbɩdɩɛ kplákplányɔ gbàpʋ́ jɩ̀. 4Mà nyʋaá a zumoleé ka ŋnɩ lé a nɩ́ míi lé a kɔ́ɔ́ Zozíi a drɩ̀ fa. Ɩ́ ka ŋnɩ́ a, á gblà wlʋɔ́ wlú, lé á dí mɔ̀ɔ fleé, ɔ́ kʋ gbàpʋ́ɔ́ jɩ̀, lé á kwléeloó Zozíi drɩ̀. 5Zozíi yɛ́ a fá dùò a, ɔ́ srʋ kplákplányɔɔ́, ɔ́ anɩ́: «Ná yʋ́ʋ̀, nà nyumoé ya mɔ̀ cieloò!»

6Ɔ́ cí saá a, lɔ̀ a másɛnyʋaá kʋ̀ wlʋɔ́ a mnɩ́ a, á yráyra a, ɩ́mɩ́ ŋwɔ́ɔ mà: 7«Ɛ̀kʋ̀ʋ̀ lé nyɔɔ́ cíé saá a, lé ɔ́ ŋáta Lagɔ a ŋnɩ́ à? Ɔ̀ yi míi lé ɔ̀ yi nyɔ ɔ́ nyumoé cie á? Ɛ̀ nɩ̀ nɩ́ Lagɔ a múó ŋwɔ́ɔ a!» 8Zozíi yɩbhlɩ kɔ́ɔ̀kʋ́ a bhobhoé kʋ̀ á di a yɩ́ a, ɔ́ yrá á mà: «Ɛ̀kʋ̀ʋ̀ lé a ka saá a bhobhoé a? 9Ká kplákplányɔ srʋ mà: Nà nyumoé ya mɔ̀ cielo a, ɩ́zà kɔ́ɔ́ sáà srʋ mà, bhá nà gbàpʋ́ɔ́ kʋ́ lé ka náa a, ɩ́mɩ́ wɔlɩdrìè sɔ́ lɩ̀à mnɩ́ɛ́ àna gbá ka fɩ́ a? 10A ka lé a ká saá yɩbhlɩ mà, dɛ́ dʋ̀dʋ̀ɔ̀ lɩ̀à kʋ́ɔ́, Nyɔɔ́ a Yuwliyʋɔ́ míi lé ɔ ká nyʋa a nyumoé ciè.» Zozíi cí lɛ́ sɩ́tɛ̀ a, ɔ́ srʋ kplákplányɔɔ́, ɔ́ anɩ́: 11«Náa srʋɛ mɔ̀ mà: Soglù, bhá nà gbàpʋ́ɔ́ kʋ́ lé mʋ gbó!» 12Á kʋ dáamúó nyʋaá lɔ̀fɩ́ɛ́ a klʋ́ jɩ̀, nyɔɔ́ soglù, ɔ́ bháʋ́ ɔ gbàpʋ́ɔ́ lé ɔ́ mʋ. Nyʋaá neé mnaá, á anɩ́: «À nɩ́ à zà saá wɔlɩ́ yɛ́!» Ɩ́ ka ŋnɩ́ lé á fa Lagɔ ŋnú.

Zozíi yi bhàlʋ̀nyʋa á zà

(Matíe 9.1‑17; Lúkɩ 5.27‑39)

13Ɩ̀lɩa lɔ̀fɩ́ɛ́ plɩ́ yɩ́ a, Zozíi yrɩ́bha sɔ́kʋ́ Galilée a nyíplʋɔ́ gɔ̀, nyʋa kɔ́kɔ́mnɩ́ yio gɔ̀ cɩ́á ka. 14Ɔ́ kʋ plɩ́ɩda lé ɔ́ yɛ́ lapóowlʋ a mnɩ́ nyɔ, Afée a yʋ́ɔ́ á wlele Levíi a, lé ɔ́ pɔ́ɔ́ wɔlɩ́ ɔ́ anɩ́: «Levíi, jɩ́ mɔ́ɔ kʋ́!» Lé Levíi soglù, lé ɔ́ jɩ́ ɔ́ kʋ́.

15Tányɩ a múó Zozíi mʋ Levíi a gbó li ka ɔ yà ɔ́ kʋjɩ̀nyʋ̀àà sɔ́, yà lapóo a kʋbhlinyʋa#2.15 lapóo a kʋbhlinyʋa: Nyʋa à bhlie wá lapóo zúfʋbhlɩ kʋ́ a, á bhá wá má bhàlʋ̀nyʋa kʋ́. lé yígàdà bhàlʋ̀nyʋa kɔ́kɔ́mnɩ́ sɔ́. Sɩ́tɛ̀ a nyɩ́kpɔceé à jɩ́ɛ́ la mɔ́ kʋ́ a a nɩ́ zumole bɛ́. 16Naa, tányɩɛ́ mʋ́ Falizɩ́ɛnyʋaá a jrèè a mnɩ́ a lɔ̀ a másɛnyʋa yɛ́ Zozíi, ɔ yàsɔ́ kʋ liɩ̀da a, bhʋ́ á yrá ɔ́ kʋjɩ̀nyʋ̀àà mà: «Ɛ̀kʋ̀ʋ̀ lé ɔ yà lapóo a kʋbhlinyʋaá lé bhàlʋ̀nyʋ̀àà sɔ́ lile kʋ́ a?» 17Zozíi nú wɔlɩ́ɛ́ á cí a, bhʋ́ ɔ́ srʋ á, ɔ́ anɩ́: «Nyɔɔ́ ɔ̀ kɔ̀ɔ̀ lɩ́ tɛ́ mʋ́ a, ɔ nɩ́ mʋ́mɔ gɔ́zɩ̀nɩ̀nyʋa, mà gupuonyʋa ámá mʋ́mɔ gɔ́zɩ̀nɩ̀nyʋa. Nyʋaá ànàà à kà a nɩnɩgbɩ srí sá a, nɩ́ a zà yi, mà bhàlʋ̀nyʋ̀àà á zà ɩ́ yi.»

Bhlagɔ̀gɔ̀ gbɩ yà Lagɔ a Námadìè sɔ́ nɩ́ wlʋ́ʋ̀

(Matíe 9.14‑17; Lúkɩ 5.33‑39)

18Yruú kʋ ʋ́ a Zán Batísɩ a kʋjɩ̀nyʋ̀àà yà Falizɩ́ɛnyʋa sɔ́ pʋ́ʋ kleé. Nyʋa yi Zozíi gɔ̀, lé á yrɔ́ɔ́, á anɩ́: «Ɛ̀kʋ̀ʋ̀ bhè Zán Batísɩ a kʋjɩ̀nyʋ̀àà yà Falizɩ́ɛnyʋa sɔ́ pʋ́ʋlɛ kleé bhè nà naá nɩ́ pʋ́ʋ kleé ámá bhísakʋ́ a?» 19Bhʋ́ Zozíi srʋ á, ɔ́ anɩ́: «Nyɔ nɩ fláa ŋwnɔ́, lé bhʋ́alɛ́ lɔlɔ nɩ dà à, lelilɩ nɩ kʋ ʋ́ a, ɔ bheyinyʋaá ɔ́ wle a á yi ɔ́mɔ́ yʋwlɩɛ́ ɔ̀ síé lɛ́ a drɩ̀ kʋ lé, á yi kleé pʋ́ʋ? A nɩ́ nɩ saá. Dɛ́ɛ́ a yà yʋwlɩɛ́ sɔ́ kʋ àyɩ ʋ́ a, á nɩ́ ka kleé pʋ́ʋ. 20Mà tányɩ yi ʋ́ kʋ lé á yi a yʋwlɩɛ́ nyièdɩ sa à. Bhʋ́ a tányɩɛ́, á yi kleé pʋ́ʋ.

21Nyɔ nɩ́ bhá lokupɩʋ yalʋ lé ɔ kʋ́ʋ́ kótu zʋ jɩ̀ kplá a. Ɔ nɩ nɩ saá, lokupɩʋ yalʋɔ́ jrie kótu zʋ̀ɔ̀ lé ʋ́ díú gɔ̀ fleé lé fleé ghlímole. 22Nyɔ nɩ́ bhá sáà nɔyalʋ lé ɔ kʋ́ʋ́ bhlagɔ̀gɔ̀ jìdàní#2.22 jìdàní: Nyidìè mnɩ́ á ŋwʋ́ɛ́ wá nyú, bhlibhlʋ yà nʋ́ sɔ́ sá. a mnɩ́ sá ŋwʋ́ʋ. Ɔ nɩ nií a, nʋ́ɔ́ yi bháa lé jìdàníé yi wlɔwlɔɔ̀, lé nʋ́ɔ́ yà jìdàníé sɔ́ yi ŋátɔ̀. Ɩ́ ka ŋnɩ́ a nʋyalʋ, jɩ̀dàní yalɛ a mnɩ́ á ŋwʋ́lʋʋ sá.»

Zozíi sa Zúfʋnyʋa a nyɔbhleyruó gbɔ̀ɔ

(Matíe 12.1‑4; Lúkɩ 6.1‑11)

23Zúfʋnyʋa a nyɔbhleyru kʋ́, Zozíi yà ɔ́ kʋjɩ̀nyʋ̀àà sɔ́ kʋ nyɔ̀làgbɩ a bhlii da, á plɩ́ɛ́ á mnɛ, mà ɔ́ kʋjɩ̀nyʋ̀àà námɛ bhè á kpla lágbɩ a mnɩ́ a nyɔ̀ɔ̀#2.23 nyɔ̀ɔ̀: Siyʋɔ́ á bhá lé á nie flɔ́ɔ pʋ́ a, ʋ́mʋ́ á sa, mà cémʋ́ ʋ nɩ́ à bhlé kʋ a, ɩ́zà à bhá nyɔ̀ɔ̀ lé à pápa a. yɩ́. 24Falizɩ́ɛnyʋaá yɛ́ á, á srʋ Zozíi, á anɩ́: «Lɛbhɛ cémʋ́ nà kʋjɩ̀nyʋ̀àà nie nyɔbhleyruó kʋ́ a! Ɛ̀kʋ̀ʋ̀ lé a nɩ́ ŋwʋ́ lɛ́ à jràmáá kpá a?» 25Bhʋ́ Zozíi srʋ á, ɔ́ anɩ́: «Wɔlɩdrèè Davídɩ nɩ wá a, a nɩ́ a zà má Lagɔ̀bɔ̀gʋ a mnɩ́ zɛɛ? Tányɩ a múó, Davídɩ yà ɔ́ kʋjɩ̀nyʋ̀àà sɔ́, a nɩ́ lelilɛ ka kleé bhlá a, 26bhʋ́ ɔ́ pla Lagɔ̀bʋ̀bɔ̀dàà, Lagɔ̀bʋ̀bɔ̀nyɔ̀kádɔ̀ɔ̀ Abiatáa a tányɩ. Mà bʋbɔ̀dàà flɔ́ɔ ʋ́mʋ́ Davídɩ bháʋ́ lé ɔ́ li. Ɔ́ nyɛ́ sáà ɔ́ kʋnamnɩnyʋaá lé á li. Bhè bʋbɔ̀nyʋa a múó kà lɔ̀ lé a kʋ̀ʋ̀ li.#2.25‑26 A zɛlɩɩ sáà 1 Samʋ́ɛ́lɩ 21.2‑7.» 27Lé Zozíi srʋ á sɔ́kʋ́, ɔ́ anɩ́: «Nyɔbhleyruó nyɔ a zà ʋ́ nilo, mà nyɔ nɩ́ nyɔbhleyruó a zà nilo. 28Ɩ́zà Nyɔɔ́ a Yuwliyʋɔ́ ŋwɔ́ɔ lɛ́ nyɔbhleyruó a Kanyɔ.»

Currently Selected:

Málɩ́kɩ 2: NEY

Highlight

Copy