Lúkɩ 24

Zozíi galɔ̀

(Matíe 28.1‑10; Málɩ́kɩ 16.1‑11; Záan 20.1‑10)

1Sɔ́lɩ a geglìà míí, ŋwnáá soglù lé á bhá dàŋwónié á yrɩ̀lɩ̀la a, lé á mʋ lési jɩ̀. 2Mà á dʋdʋ̀ a, cɔ́kʋɔ́ ɔ̀ sú la lésuó a pladàà né a, ʋ́ ya ʋ́ nékʋ́ wlʋ́. 3Ŋwnáá pla lésuó a mnɩ́ lé á dʋdʋ̀ a, Kanyɔ Zozíi a gàzɛ̀ɛ̀ nɩ́ mɔ̀ kʋ. 4Wɔlíɛ́ a ká cí a, a nɩ́ɩ yì, á dʋdʋ̀ sɔ́kʋ́ a, á yɛ́ nyʋa a sɔ́, bànɩ á pla mʋ́ a, ɩ́ lʋɛ plátatata. 5Mà Ŋanɩmɛɛ́ nɩ á lé á sra sra wɛ́ sá, lé nyʋaá yráa mà: «Ɛ̀kʋ̀ʋ̀ lé nyɔɔ́ ɔ̀ gà a, a mʋ́mɔlɔɔ́ kúdùkuo nyièdɩ áa? 6Ɔ́ nɩ́ dɛ́ kʋ, ɔ́ ya galɔ̀. Bhè a luo bhlɛ́! Tányɩɛ́ mʋ́ a yɔ̀sɔ́ kʋ wá Galilée a, cémʋ́ ɔ́ srʋ wá amɔ a, sɩ́tɛ̀ mʋ́ ɩ́ plɩ́ɩ. 7Ɔ́ srʋ wá amɔ mà: Á ka lé a ká Nyɔɔ́ a Yuwliyʋɔ́ bhalʋnyʋa wlɩɩ pɛ́lʋ́ ŋwʋ́ lé a kɔ́ɔ́ kúsu jɩ̀ kʋ a kɔ́ɔ́ bhlá. Mà ɔ nɩ kú a, tayruó kʋ́, ɔ́ yi galɔ̀.» 8Nyʋaá cí saá a, ŋwnáá luo Zozíi a cícíwɔlɩɛ́ kʋ́.

9Á wlʋ́ lesuó a mnɩ́ lé á yi a, áa sa Zozíi a cíecíenyʋaá kʋ́gbá bhlɛ̀gbɩɛ́ lé kʋjɩ̀nyʋ̀àà àna fɩ́ɛ́ sɔ́ dí. 10Malí Madɩlɛ́nɩ lé Zánɩ, lé Zákɩ ɔ nɛ́ Malíi, lé yígàdà ŋwna àna, ámá là díé lé a srʋ cíecíenyʋaá. 11Mà a nɩ díé á la a, wɔlɩ́ kʋ́ bhá, á dùòkʋ́ áa nyɩ́glɩlaá. 12Mà sɩ́tɛ̀ ɩ́ kʋ lé Pɩ́ɛ́lɩ soglù, lé ɔ́ fa soó lé ɔ́ mʋ lésuó gɔ̀, ɔ́ gbísá lé ɔ́ dʋdʋ̀ ʋ mnɩ́ a, lɔkwɩɛ́ á bhá lé á pɩpɩa la gàzɛ̀ a, ɛ́ pʋ́ lesuó a mnɩ́ dʋ̀dʋ kʋ́. Neé mna Pɩ́ɛ́lɩ lé ɔ́ yrɩ́bha lé ɔ́ mʋ gbó.

Kʋjɩ̀nyʋa sɔ́ mʋ Emayúsʋ lé Zozíi flʋlaa yɩ́

(Málɩ́kɩ 16.12‑13)

13Bhʋ́ a yru a múó mnɩ́, Zozíi a kʋjɩ̀nyʋ̀àà a sɔ́ mʋ dú a múó a mnɩ́, ʋ́mʋ́ á wlele Emayúsʋ. Nyɔ ká Zelízalɛ́mʋ wlʋ́ lé ɔ ká Emayúsʋ mʋ a, ɔ́ nie glíyi sɔ́ nyúzɔ kʋ́. 14Naa, wɔlɩ́ɛ́ fɩ́ɛ́ ɩ̀ plɩ́ɩ Zelízalɛ́mʋ a, á namɛ bhè á ŋwʋ́lɩɩ́ dí kʋ́. 15Mà á bhábhalɛ wɔlɩ́ neé á námɛ a mnɛ lé Zozíi ŋnɩ á gɔ̀, lé ɔ yà sɔ́ námnɩ kʋ́. 16Á yɛ́ ɔ kʋ́, mà a nɩ́ ɔ́ yɩbhlɩ. 17Lé ɔ́ yráa mà: «Wɔlɩ́ gbá a bhábhalɛ lɛ́ neé bhè a námɛ a?» Ɔ́ yrá a, áa nynʋ́vʋ̀, kpɩkpɩ wɔtɔmalaá gɔ̀. 18Lé á nyièdɩ a nyɔ a múó sa ne, ɔ́mɔ́ á wlele Kleopásɩ, ɔ́ anɩ́: «Wɔlɩ́ɛ́ ɩ̀ plɩ́ɩ Zelízalɛ́mʋ yrié sɔ́ɔ́ lɩ̀à a, nà múó coco ŋwɔ́ɔ nyɔ lé ɔ̀ kʋ̀ la ɔ̀ lé ɔ̀ nɩ́ɩ yìi.» 19Ɔ́ anɩ́: «Wɔlɩ ànɩ gbá áa?» Bhʋ́ á srʋ ɔ́ mà: «Wɔlɩ́ɛ́ ɩ̀ ŋnɩ Nazalɛ́tɩ a Zozíe ɔ̀ ŋwɔ́ɔ wázɔ̀ Lagɔ a nékʋ́cinyɔ kádɔ̀ɔ̀ lé ɔ̀ kɔ̀ɔ̀ nɩnɩgbɩ yà ɔ cícíwɔlɩ sɔ́ ka wázɔ̀ pɔ́wa Lagɔ yà bhlɩ́ a mnɩ́ a nyʋa sɔ́ drɩ̀ a. 20À Lagɔ̀bʋ̀bɔ̀nyʋ̀àkádàà lé à nyɩ́kpɔkáda a sɔ́ núnuu lé á salɔɔ́ nyʋa wlɩ a kɔɔ́ kúbhlajɩ̀ɩ ŋwʋ́ lé á kʋlɔɔ́ kúsu jɩ̀ a. 21Bhè àmɔ̀, à di yì la saá mà ɔ́mɔ́ yi la lé ɔ̀ ka la ʋ́ Izrayɛ́lɩnyʋa a bhlɩ́ɛ́ ʋ́ neé saà. Wɔlíɛ́ plɩ́ lɛ́ a, ɩ́ yri ta lɛ̀ zɩmnɛ́. 22Wɔlíɛ́ plɩ́ a, ŋwnáá zùò kʋ̀ amɔ nyièdɩ lé á mna àmɔ̀ neé, zizìèdàà lɩ̀à á mʋ lésuó gɔ̀. 23Á mʋ a, á nɩ́ ɔ̀ gàzɛ̀ɛ̀ lésuó a mnɩ́ ŋnɩ, ámá srʋ lɛ́ àmɔ̀ mà, kplɔkplɔzìzi flʋlaa yɩ́, lé ɩ́ srʋ á mà Zozíi ya gàlɔ̀. 24Lé nyʋa wlʋ́ àmɔ̀ nyièdɩ, lé á mʋ sáà lesuó gɔ̀, céé ŋwnáá cí a, ɩ́mɩ́ tɛ̀ɛ̀ á ŋnɩ ɔ̀, a nɩ́ ɔ́ yɛ́.»

25Nyʋaá a cícíwɔlɩɛ́ bhli a, bhʋ́ Zozíi srʋ á mà: «Amɔ a nɩ́ bhobhoé kaà lé á di nɩ́ bhli sɩsɔɔ́ wɔlɩ́ kʋ́, ɩ́ ka ŋnɩ a, wɔlɩ́ɛ́ fɩ́ɛ́ Lagɔ a nékʋ́cinyʋa cí wá a, a nɩ́ ɩ́ wɔlɩ́ kʋ́ bhá! 26Kláyɩ́sɩ nɩ́ ka la fɩ́ɛ́ kalɩmɛ yɛ́ fɩ́ɛ́ lé ɔ ká la ɔ́ blɔ́blɔ́ɔ́?» 27Lé wɔlɩ́ɛ́ ɩ̀ kʋ̀ Lagɔ̀bɔ̀gwɩ a mnɩ́ lé á cí ɔ́ zà kàkàkà a, bháa Moyízɩ yà Lagɔ a nékʋ́cinyʋaá a lɔ̀fɩ́ɛ́ sɔ́ jɩ̀ lé kɔ̀ɔ̀ jɩ̀ ŋnɩ a, ɔ́ sɩsa à mɩ́ mʋ́.

28Dúó mnɩ́ á mnɛ a, á mnɛ yɩ́ mʋ́ gɔ̀ ŋnɩ ka a, Zozíi nɩ cémʋ́ ɔ́ɔ plɩ́ɛ́ a. 29Mà bhʋ́ á tɛ́ma ní kʋ́ lé á srʋ ɔ́ mà: «Pʋ́ʋ amɔ gɔ̀ mà yrʋ́ ya lagɔ bhɩa, lé cúcú pla yɩ́.» Ɔ́ nú a cícíwɔlɩɛ́ lé ɔ́ pla ʋ́. 30Mà á gblà lelitebhle jɩ̀ a, ɔ́ bháʋ́ flɔ́ɔbuó, ɔ́ pá Lagɔ yúó lé ɔ́ dédìà mʋ́, lé ɔ́ bhábhalaá. 31Bhʋ́ a yɩ́ kalɔ klʋ́ lé á yɩbhlɩlɔɔ́. Mà á kʋ dáamúó lé ɔ́ mɔ́mnɔlaá yɩ́. 32Ɔ́ mɔ́mnɔ ʋ́ a, bhʋ́ á nie cɩɩ́ mà: «Mà ɩ́mɩ́ ɩ̀ nɩ́ la lɛ́ ŋnɩ́ ka lé à dié nɩ́ si la lɛ́ àmɔ̀ mnɩ́ nyúzɔ kʋ́ʋ Tányɩɛ́ mʋ́ ɔ́ sɩsala lɛ́ àmɔ̀ Lagɔ̀bɔ̀gʋ̀ɔ̀ mnɩ́ a jɩ́jràlɩ̀ɛ̀ mʋ́ a?»

33Á bhɩa cícíé zɔ̀ a, áa soglù lé á yrɩ́bha Zelízalɛ́mʋ, á mʋ a, á ŋnɩ ɔ̀ nyʋa ànàà cíecíenyʋaá kʋ́gbá bhlɛ̀gbɩɛ́ yà kʋjɩ̀nyʋ̀àà àna sɔ́, á ŋnɩlɔ ʋ́ wlú. 34Lé á srʋ á mà: «Kanyɔɔ̀ ya cɩ́cása galɔ̀! Ɔ́ ya Simɔ́ɔ yɩ́ flʋ!» 35Lé áa sɔ́ɔ́, cémʋ́ á yɩbhlɩlɔɔ́ a, á sa mɔ̀ mɩ́, lé wɔlɩ́ɛ́ fɩ́ɛ́ ɩ̀ plɩ́ɩ nyúzɔ kʋ́ a, lé á kʋ liìda a, ɩ flɔ́ɔbhuó a bhábhadàà, bhʋ́alɛ á yɩbhlɩlɔɔ́, á sa mɔ̀ɔ ɩ́ lɔ̀fɩ́ɛ́.

Zozíi flʋ ɔ́ kʋjɩ̀nyʋ̀àà yɩ́

(Matíe 28.16‑20; Málɩ́kɩ 16.14‑18; Záan 20.19‑23)

36Mà wɔlɩ́ɛ́ kʋ á bhlà neé bhè blà, Zozíi nynʋ́vʋ̀ á nyièdɩ kʋ́. Lé ɔ́ srʋ á: «Ɔ́ anɩ́, pʋ́pʋ́ɛ́ yi!» 37Mà ŋanɩmɛɛ́ yilaá kʋ́ lé á ghéè, á dùòkʋ́ gàgàkʋ flʋlaa yɩ́. 38Lé ɔ́ srʋ á mà: «Ŋanɩmɛ gbá bhlá amɔ áa? Ɛ̀kʋ̀ʋ̀ lé a gúé áa? 39A dʋdʋ̀ ná glɔ̀gbɩ́ɛ́, lé ná kokokpíé sɔ́, mɔ́ɔ kʋ̀ʋ, mɔ́ɔ mɔ̀glʋ̀ kʋ̀ʋ. A gbɔ́gbɔ̀ mɔ́ɔ a, a dʋdʋ̀ʋ̀, zuzu nɩ́ yɛ́kɛ́ ka a, ʋ nɩ́ féyi ka a, bhè mɔ́ɔ ɩ́ kaa yɛ́kɛ́ yà féyi sɔ́.» 40Ɔ́ cíé bhè ɔ́ pápalaá ɔ́ glɔ̀gbɩ́ɛ́ lé ɔ́ kokokpíé. 41Mà neé mnaá, lé lɔlɔ ka ŋnɩ́ lé a nɩ́ wɔlɩ́ɛ́ ɔ́ cí a cɩ́cása kʋ́ bhá. Lé ɔ́ yrá á: «A ka dɛ́ lelilɛɛ?» 42Á lɔɔ́ flányɩflányɩ zrìdrè. 43Lé ɔ́ bháʋ́ má lé ɔ́ li a klʋ́ jɩ̀. 44Lé ɔ́ srʋ á mànɩ́: «A lɛ́bhɛɛ wɔlɩ́ɛ́ ɩ́ srʋ wá amɔ tányɩɛ́ mʋ́ yáà amɔ sɔ́ à kʋ̀ àyɩ wá ʋ́ a, ɩ́ srʋ wá amɔ mà: Ná wɔlɩ́ɛ́ fɩ́ɛ́ ɩ̀ jɩ́jrɔ̀ wá Moyízɩ a Jràmábɔ̀gwɩ̀ɛ̀ a mnɩ́, lé Lagɔ a nékʋ́cinyʋaá a bɔ́gwɩ̀ɛ̀ a mnɩ́ lé lɔbhlɩbɔ̀gwɩ̀ɛ̀ a mnɩ́ a, ɩ́ yi niloò.» 45Lé ɔ́ ka á bhobhoé klʋ́, a ká Lagɔ̀bɔ̀gʋ a mnɩ́ nú. 46Ɔ́ srʋ á mà: «A jɩ́jrà mà Kláyɩ́sɩ yi kalɩmɛ yɛ́, lé ɔ́ yi galɔ̀ tayruó kʋ́, 47lé ɔ ŋnɩ́ mʋ́, á na ká lɔ́wɩ a lɔ̀fɩ́ɛ́ Lagɔ̀wɔ̀lɩ̀ɛ̀ gɔ̀ cíi lé a ká a nyumoé a gbʋ́ wlʋ́ lé Lagɔ ká a ciè, Zelízalɛ́mʋ mʋ́ ɩ́ na ká niníé bháa. 48Amɔ yɛ́ɛ ɩ́ lɔ̀fɩ́ɛ́ lɩ̀à a dá lé à ŋwɔ́ɔ ɩ ŋwɔ́nɩ́srɩ̀nyʋa. 49Lé wɔlɩ́ɛ́ à Tʋ́ cí wá mà ɔ́ yi wá amɔ nɩ a, mɔ́ɔ mɔ̀glʋ̀, nɩ mʋ a, ɩ́ yií amɔ jɩ̀ kwlée. A kʋ dú a gláa mà Lagɔ a pɔ́wa yi amɔ jɩ̀ kwlíi.»

Zozíi gblà lagɔɔ́

(Málɩ́kɩ 16.19‑20; Nɩnɩgbɩ 1.9‑11)

50Yri plɩ́ a, Zozíi yà ɔ́ kʋjɩ̀nyʋ̀àà sɔ́ wlʋ́ Zelízalɛ́mʋ lé á mʋ Betaníi a gbàkɩ, lé ɔ́ bhá glɔ̀gbɩ́ kʋ́, lé ɔ́ pá á nyú. 51Ɔ́ kʋ a nyúpada lé Lagɔ bhá à mɔ́ nyièdɩ lé ɔ́ gblà lagɔɔ́. 52Bhè ámá, á bhɩa ɔ́ bʋbɔ̀lɛ̀ zɔ̀ a, áa bháa ʋ́ lɔlɔ kʋ́ lé à yʋ sɔ́ yrɩ́bha lé á mʋ Zelízalɛ́mʋ. 53Yrié fɩ́ɛ́ kʋ́, á kʋ Lagɔ̀wlʋ̀kádʋ̀ɔ̀ a mnɩ́, á falɛ Lagɔ ŋwnú.

Currently Selected:

Lúkɩ 24: NEY

Highlight

Copy