Záan 4

Zozíi yà Samalíi a ŋwnɔ́ sɔ́ bhla wɔlɩ́ kʋ́

1Tányɩ a múó, bhʋ́ Falizɩ́ɛnyʋa nú cémʋ́ Zozíi á kʋjɩ̀nyʋ̀àà ŋwʋ́ɛ́ nyú wlú a, á zù lé á plɩ́ɩ Záan a nɩ kʋjɩ̀nyʋ̀àà kʋ́, wɔlɩ́ɛ́ ɩ́mɩ́ ɩ̀ pla Zozíi a nyúkwlí. 2Bhè cɩ́cása lé Zozíi mɔ̀glʋ̀ nɩ́ ŋwʋ́ nyʋaá nyú wlú mà ɔ́ kʋjɩ̀nyʋ̀àà má ŋwʋ́ɛ́ nyʋa nyú wlú. 3Ɩ́ ka ŋnɩ́ lé Zozíi wlʋ́ Zudée lé ɔ́ yrɩ́bha Galilée. 4Bhè ɔ ká Galilée mʋ a, ɔ́ ka lé ɔ yra Samalíibhlɩɛ́ mʋ́. 5Ɔ́ mʋ lé ɔ́ ŋnɩ Samalíibhlɩ a dúó á wlele Sisáa a gɔ̀. Bhè Sisadùò ʋ́mʋ́ gɔ̀ dʋ̀dʋ̀drèè Zakɔ́bʋ nyɛ́ wá ɔ yʋ́ Zɔ̀zɛ́fʋ a kʋʋ̀. 6Bhʋ́ Zakɔ́bʋ a nyúbhukuó kʋ sáà. Zozíi sɩa náanʋ́ a, ɔ́ plɩ́ɩ nyúbhukuó gɔ̀ lé ɔ́ bɔ́ɔ sá. Yrʋ́ ya la yiosa wlú nyièdɩ ŋnɩ.

7Samalíi a ŋwnɔ́ a múó yi nyú plí ka a, ɔ́mɔ́ Zozíi srʋ ɔ́ mà: «Ɩ́ bhìè nyɛ́ mɔ́ɔ nyú ká mná àyé.» 8Bhʋ́ a tányɩɛ́, ɔ́ kʋjɩ̀nyʋ̀àà ya dú pla a ká lelilɛ mʋ́mɔɔ̀. 9Mà ɔ́mɔ́ ŋwnɔ́ɔ́ ɔ́ srʋ ɔ́ mà: «Ɛ̀kʋ̀ʋ̀ lé mɔ̀ Zúfʋyʋɔ́, ɩ̀ yrálɛ mɔ́ɔ Samalitɛ́ɛŋwnɔɔ́ mnámnányu mʋ́ a?» Máà Zúfʋnyʋa yà Samalíi a nyʋa sɔ́ nɩ́ pla pla dú. 10Lé Zozíi srʋ ɔ́, ɔ́ anɩ́: «Nɩ̀ yì la cémʋ́ Lagɔ a nyɛ́nyɛ́lɛ kʋ a, lé nɩ̀ yì la sáà nyɔɔ́ ɔ̀ yrálɛ lɛ́ mɔ̀ mnámnányuó mʋ́ a, mɔ̀ nà kɔ̀ɔ la nyú mʋ́ yráa, lé ɔ ká la mɔ̀ nyúó ʋ̀ kla duo a, nyɛ́.» 11Bhʋ́ ŋwnɔ́ɔ́ srʋ ɔ́ sɔ́kʋ́ mà: «À tʋ́ʋ̀, nɩ́ mʋ́plilɛ ka à, lé nyúbhukuó trʋ̀ mʋ́, dɛ́gbá nà kà bhʋ́anɩ nyúó bhá à? 12Mɔ̀, ɩ zi à tɩtɔ Zakɔ́bʋ kʋ́ ʋ? Ɔ́mɔ́ nyɛ́ àmɔ̀ nyúbhukuó lɩ̀à, ɔ́mɔ́ mɔ̀glʋ̀ ɔ́ mná a nyú lé ɔ yúó yà ɔ mnaá sɔ́ mná sáà a nyúó.» 13Lé Zozíi srʋ ɔ́, ɔ́ anɩ́: «Nyɔ yi nyúó lɩ̀à mná lé mnátʋ yi àyɩ mɔ́ bhlá, 14mà mɔ́ɔ, nyɔɔ́ ɔ̀ yi nánɩ nyúó ná kɔ́ɔ́ mnáada nyɛ́ a mná a, mnátʋ nɩ́ kɔɔ́ kɔ́ɔ̀kɔ́ bhlá. Nyúó ná kɔ́ɔ́ nyɛ́ a, ʋ́ yio mʋ́ kʋ̀ nànɩ́ cémʋ́ nyúdɔ̀lʋ́ɔ́ ʋ̀ nyɛ́ kɔ́ɔ́ ʋ̀ nɩ́ bhɩada ka a.» 15Ŋwnɔ́ɔ́ anɩ́: «À tʋ́ʋ̀, nyɛ́ mɔ́ɔ bhʋ́anɩ nyúó, bhè mnátʋ nɩ ka kɔ́ɔ̀kɔ́ mɔ́ɔ bhlá, bhè nɩ ka yɩ́ sɔ́kʋ́ dɛ́ nyú plí ka yi.»

16Zozíi anɩ́: «Mʋ lé wle ɩ̀ nyɩ̀tʋ, lé kà yi.» 17Ŋwnɔ́ɔ́ anɩ́: «Nɩ́ sí.» Zozíi anɩ́: «Nɩ̀ cí mànɩ́ nɩɩ́ sí a, nà wɔlɩ́ mɛ́, 18yà cɩ́cása yuwle a gbɩ́ bhá, lé ànɔ̀ɔ̀ ɔ̀ kɔ̀ɔ̀ gbó mʋ́ ɩ̀ kʋ̀ lɛ́ a, ɔ nɩ́ ɩ̀ nyɩtʋ ŋwɔ́ɔ. Ɛ̀ nɩ̀ ŋwɔ́ɔ ɩ́mɩ́ a, cɩ́cása ɩ̀ ŋwʋ́ɛ́.» 19Ŋwnɔ́ɔ́ anɩ́: «À tʋ́ʋ̀, ɩ́ yì saá mà Lagɔ a nékʋ́cinyɔ ɩ̀ ŋwɔ́ɔ̀! 20Ɩ̀ lɛ́bhɛɛ, kíkéé lɩ̀à wlú à tɩtɩa Samalitɛ́ɛnyʋa bʋbɔlɛ wá Lagɔ, lé amɔ Zúfʋnyʋa a cí mànɩ́ Zelízalɛ́mʋ ʋ̀ ŋwɔ́ɔ Lagɔ a bʋbɔ̀da.» 21Zozíi anɩ́: «Ŋwnɔ́ɔ̀, ka ná cɩ́cása, mà a yi yɩ́ ʋ́ kʋ lé à nɩ ka yɩ́ à Tʋ́ Lagɔ kíkéé lɩ̀à wlú lé Zelízalɛ́mʋ sɔ́ bʋbɔ̀ kà mʋ. 22Amɔ Samalitɛ́ɛnyʋa, Lagɔ̀ɔ̀ a nɩ́ yì a, ʋ́mʋ́ a bʋbɔlɛ, àmɔ̀ Zúfʋnyʋa, à yìò, ɩ́zà à bʋbɔlɔɔ́, àmɔ̀ mʋ́ Lagɔ na ká plɩ́ɩ lé ɔ ká ʋ́ yrúkanyʋa neé saà. 23Tányɩ yi ʋ́ kʋ, ɩ́zà ɛ́ ya yɩ́ sáà ŋnɩ, lé cɩ́cábʋ̀bɔ̀nyʋ̀àà à bʋbɔlɛ à Tʋ́ Lagɔ a, ʋ́ blɔ̀blɔ̀zùzùò ʋ́mʋ́ nà kà a tíe lé cɩ́cása a mnɩ́ á na kʋ́ʋ́ bʋbɔ̀. Bhʋ́anɩ Lagɔ̀bʋ̀bɔ̀nyʋ̀àà ámá à Tʋ́ Lagɔ mʋ́mɔ. 24Lagɔ ŋwɔ́ɔ Zuzu, mɔ̀ɔ nà kʋ̀ʋ̀ bʋbɔ̀ a, bʋbɔ̀lʋ̀ʋ̀ blɔ̀blɔ̀zùzùò mʋ́ lé cɩ́cása a mnɩ́.» 25Ŋwnɔ́ɔ́ anɩ́: «Ɩ́ yì sáà mà Kláyɩ́sɩ yie, à ʋ́neésanyɔ, ɔ nɩ yi a, ɔ́mɔ́ ɔ̀ yi àmɔ̀ wɔlɩ́ɛ́ fɩ́ɛ́ mʋ́ sɩsa à.» 26Bhʋ́ Zozíi srʋ ɔ́ mà: «Mɔ́ɔ ɔ̀ cíle lɛ́ mɔ̀ gɔ̀ a, mɔ́ɔ ŋwɔ́ɔ Kláyɩ́sɩ.»

27Wɔlíɛ́ kʋ á neé bhè blà ɔ́ kʋjɩ̀nyʋ̀àà pla, neé mna a sɛ́fʋɔ́, céé á ŋnɩ Zozíi yà ŋwnɔ́ɔ́ sɔ́ cícíwɔlɩ neé a. Sɩ́tɛ̀ ɩ́ kʋ lé a nyièdɩ a nyɔ nɩ́ ɔ́ wɔlɩdrè kʋ́ yráa mà: «Wɔlɩ́ gbá ɩ̀ yrálɔɔ́ kʋ́ a? Ɩ́zà wɔlɩ́ gbá yɔ̀sɔ́ a cíé à?»

28Ŋwnɔ́ɔ́, bhʋ́ ɔ́ tɩ ʋ́ ɔ nyúkonyìdèè, lé ɔ́ mʋ dú a nyʋa srʋ ka. 29Ɔ́ mʋ a, ɔ́ pá wɔlɩ́: «A yi, a yi a ká dʋdʋ̀ mà nyɔ! Ɔ́ srʋ mɔ́ɔ ná kpɩkpɩ a mnɩ́ a wɔlɩ́ɛ́ fɩ́ɛ́ yáa nɩ a, Kláyɩ́sɩ nɩ ká lɛ́ ʋ́ kʋʋ?» 30Ŋwnɔ́ɔ́ pá lɛ́ sɩ́tɛ̀ wɔlɩ́ a, nyʋaá wlʋ́ dú á yi Zozíi dʋdʋ̀ kà.

31Bhè ɔ́ kʋjɩ̀nyʋ̀àà kʋ ɔ gɔ̀ á bhibhio bhlà, á nie: «Kanyɔɔ̀, kà yɩ́ li à!» 32Bhè Zozíi nie: «Lelilɩɛ́ ɩ́ ka lé ká li a, a nɩ́ɩ́ yìì.» 33Ɔ́ kʋjɩ̀nyʋ̀àà ŋwúŋwuole, á nie mà: «Áa lɔɔ́ lelilɩɩ?» 34Bhʋ́ Zozíi srʋ á mà: «Ná lelilɩɛ́ ɩ́mɩ́ ŋwɔ́ɔ mà, nyɔɔ́ ɔ̀ cíe mɔ́ɔ a, wɔlɩ́ɛ́ ɔ́ yrá a, ɩ nii lé nɔnʋɔ́ ɔ́ nyɛ́ mɔ́ɔ a, ɩ bhɩʋ́ zɔ̀. 35Amɔ mɔ̀glʋ̀ nɩ́ lɛ́ cí mànɩ́ cɩ́ a mɔ̀na a mnɩ́ sɩ́ká a fáfátanyɩ ya ŋnɩɩ? Mà, mɔ́ɔ ná anɩ́ bhá yɩ́ kʋ́ a dʋdʋ̀ lágbɩ̀ɛ̀, sɩ́ká ya wá zalɩmà, á ya wá fáàda ŋnɩ. 36Nyɔ nɩ mʋ sɩ́kálàgbaá sɩ́ká gbalà kà lé a nɩ nyɛ́ ɔ nɩ dá a, ɔ́ɔ gʋ́gwlàlaá kʋ́ kɔ́ɔ́ ʋ̀ nɩ́ bhɩada ka a zà. Bhʋ́ a tányɩɛ́ nyɔɔ́ ɔ̀ glɩɛ, lé ànɔ̀ɔ̀ ɔ̀ fá a, gá mʋ́ lɔlɔ bhlálaá. 37Núnúó á pá a, lé à ŋwɔ́ɔ mà: Ànɔ glɩɛ, lé ànɔ fá a, á ŋwɔ́ɔ cɩ́cása à. 38Lágba à kà a nɔnʋ a nɩ́ zrɩ a, a mnɩ́ mʋ́ ɩ́ fa amɔ fá ka, nyʋa àna yɛ́ kalɩmɛ lé à zrɩɩ, ɩ́zà amɔ yɛ́ bʋ̀zɛ.»

39Wɔlíɛ́ ŋwnɔ́ɔ́ cí Zozíi a zà lé ɩ̀ ŋwɔ́ɔ mà, ɔ́ srʋ mɔ́ɔ ná kpɩkpɩ a mnɩ́ a wɔlɩ́ɛ́ fɩ́ɛ́ ɩ́ nɩ a, ɩ́ nɩ lé dúó mnɩ́ a Samalitɛ́ɛnyʋa kɔ́kɔ́mnɩ́ ka yɩ́ la Zozíi a fádùò. 40Ɩ́ kà ŋnɩ́ lé Samalitɛ́ɛnyʋa yio srʋ ka mà ɔ kʋ àyɩ ámá gɔ̀, ɩ́ nɩ lé Zozíi zi á gɔ̀ yri sɔ́. 41Lé nyʋaá à kà Zozíi a zà fádùò a, á zumò sɔ́kʋ́ lé á plɩ́ gɔ̀, ɔ cícíwɔlɩɛ́ a zà. 42Lé á srʋ ŋwnɔ́ɔ́ mà: «Nànɩ wɔlɩ́ɛ́ ɔ́ srʋ mɔ̀ lé ɩ̀ cí lɛ́ a, ɩ́ a múó a zà à nɩ́ yɩ́ lɛ́ ɔ́ zà fádùò ka a, mà àmɔ̀ mɔ̀glʋ̀, à pʋɔ nyúkwlí, lé à yì saá mà ɔ́ɔ yì lé ɔ ká cɩ́cása kɔ́ a nyʋa ʋ́ neé saà.»

Zozíi ŋnɩ Galilée lé mɔ̀ɔ a nyʋaá gboloó kʋ́

43Yri sɔ́ɔ plɩ́ a, Zozíi ɔ́ɔ mʋ Galilée. 44Ɔ́mɔ́ mɔ̀glʋ̀ ɔ́ ya wá cí mà, Lagɔ a nékʋ́cinyɔ nɩ yi ɔ bhlé#4.44 A zɛlɩɩ sáà Matíe 13.57; Málɩ́kɩ 6.4; Lúkɩ 4.24. a, ɔ bhílie nɩ́ ŋwʋ́ ʋ́ mɔ́. 45Sɩ́tɛ̀ ɩ́ kʋ bhè ɔ́ pla Galilée a, nyɔ nɩ́ tuo, á yio nyúzɔ kʋ́. Máà tányɩɛ́ mʋ́ á mʋ Flíiflíiglɩ̀sɩ́sɩ̀ɛ̀ a zà Zelízalɛ́mʋ a, wɔlɩ́ɛ́ fɩ́ɛ́ ɔ́ nɩ mɔ̀ɔmɔ̀ a, gáàgá mʋ́ á yɛ́lɩɩ́.

46Lé Zozíi yrɩ́bha lé ɔ́ mʋ Galilée a dúó á wlele Kanáa a, dúó mnɩ́ ɔ́ nɩ wá lé nyúó cɩ́cɩ wá duváa mʋ́ a.

Zozíi yalɩma lóo a cóyʋ a yʋ́

(Matíe 8.5‑13; Lúkɩ 7.1‑10)

Dúó á wlele Kapɛnayʋ́mʋ a, nyɔ a múó ɔ̀ ŋwɔ́ɔ mɔ̀ɔmɔ̀ a lóo a nɔnʋzrɩ̀nyɔ kádɔ a, ɔ́ yuwliyʋ nɩ́ yà. 47Ɔ́mɔ́ nyɔɔ́ nú mà Zozíi ya Zudée wlʋ́ ɔ́ ya Galilée yi a, ɔ́ yio bhibhie ka ɔ ká Kapɛnayʋ́mʋ yi mà ɔ yʋ́ʋ̀, ɔ́ɔ kúé a, ɔ́ kɔ́ɔ́ yalɩmà. 48Bhʋ́ Zozíi srʋ ɔ́ mà: «Amɔ, a nɩ nɩ́ zʋ̀zʋa yà lɛ̀wɔ̀lɩ sɔ́ yɛ́ a, a nɩ́ ka kɔ́ɔ̀kɔ́ fádùò ka a.» 49Lé lóo a nɔnʋzrɩ̀nyɔ̀ɔ̀ srʋ ɔ́ mà: «Ɩ́bhìè Kanyɔɔ̀ yi, dɛ́ɛ́ ná yʋ́ɔ́ nɩ́ àyɩ kú a!» 50Zozíi anɩ́: «Mʋ mà nà yʋ́ɔ́ gà.» Nyɔɔ́ bhá Zozíi a cícíwɔlɩɛ́ cɩ́cása kʋ́ lé ɔ́ yrɩ́bha.

51Ɔ́ kʋ mʋmʋnyùzɔ kʋ́ lé ɔ cóyuo yio srʋ ka, á anɩ́: «Nà yʋ́ɔ́ gà!» 52Lé ɔ́ yrá á, ɔ́ anɩ́: «Glíiyie gbá mʋ́ yʋ́ɔ́ a yíjɩ̀ gbɩ a?» Á anɩ́: «Káàla a kosúgbòsa a tányɩ bhʋ́ wɔtrɔɔ́ dúò.» 53Bhʋ́ yʋ́ɔ́ ɔ tʋ́ luo mà, tányɩɛ́ a múó ɛ́mɛ́ mnɩ́ Zozíi srʋ ɔ́ la mà: «Mʋ mà nà yʋ́ɔ́ ya kwɩ́ neé wlʋ́.» Ɩ́mɩ́ wɔlɩ́ɛ́ lɩ̀à nɩ lé nyɔɔ́ yà ɔ gbó a mnɩ́ a nyʋaá fɩ́ɛ́ sɔ́ bháa ʋ́ Zozíi a fádùò a kalɛɛ́ kʋ́.

54Ɩ́mɩ́ ŋwɔ́ɔ Zozíi a sɔ́ lɛ̀wɔ̀lɩ̀ɛ̀ ɔ́ nɩ tányɩɛ́ mʋ́ ɔ́ wlʋ́ Zudée lé ɔ́ yrɩ́bha Galilée a.#4.54 A zɛlɩɩ sáà 2.11.

Currently Selected:

Záan 4: NEY

Highlight

Copy