Makö 5

Zozii ‑sä nyɩkpɔ ‑zizinyenyi ‑bhutukpä kätää'

(Matie 8.28‑34; Lukö 8.26‑39)

1Wa tɔɔ‑ 'nɩ wa yi 'nyiee klë ŋëë, ‑mɔɔ Zelazɛnɩɛ‑nyʋaa'#5.1 Zelazɛnɩɛ‑nyʋaa: Waa' 'duu 'mʋ wa laa Zelaza. 'bhlɩɛ 'mnö. 2Wa ‑ŋëë lä 'nɩ Zozii yi kwli. ‑Mä lesigwlë ‑kʋ bhlä ‑lɔɔ yëku nä, amä 'mnö nyɩkpɔ ‑bha ‑mɔɔ, 'nɩ ɔ yi Zozii ‑blɔ 'kʋ yi. Nyɩkpɔɔ nä, ‑zuzunyënyu ‑kʋɔ bhä kätää' nä, 3‑mɔɔ' lesi‑kpakpüü nëëdë ɔ goo bhä. 'Nɩ nyɩkpaa' mii bhɔɔ 'sɩɩ ɔɔ' kpüü' 'ŋʋlɩ. ‑Abhluëkä 'titii' bhɔɔ ɔɔ' 'yii lʋʋ plöö‑. 4Nyɩkpa yä bhɛ 'ci bhutukpä 'tlänyɩ 'nɩ wa yɔ bhɛ kpü bhɩɩ' 'ŋʋ tɛɛ. Wa yɔ bhɛ 'sɩɩ ‑säklöö' 'ŋʋ tɛɛ ‑mä kɔ nyima kpüü 'nɩ ɔ dö ‑säklöö. Nyɩkpɔɔ' bhɔɔ ‑kʋ 'nɩ ɔ 'kɔ mii. 5‑Gägä‑zëlüü', ɩyä 'sabo, nyɩkpɔnɔ jlä ‑mɔɔ lesi‑kpakpüü ‑yä 'küküü 'sɔ nëëdë, 'nɩ ɔ woo bhä. 'Nɩ ɔ ‑kä cɛkwɩ‑pɛlɩ 'nɩ ɔ kwäsɛ bhä ɔ yëku.

6‑Mä, ɔ 'nii‑ lä 'gää Zozii ‑blëlë 'yi nä, kɔ ‑paa 'nɩ ɔ pɔɔ‑ ‑kokoowli dëlü glu, 7'nɩ ɔ gaa‑ 'mʋ, ɔ lä 'Kʋzi Laagɔ ‑Yowli Zozii! Wälɩ‑ ‑sä ‑n 'ylänö'ö ‑kɛ 'noo? Bheeje, n slä‑ä 'wlu Laagɔɔ' 'ŋnöö 'mnö, ‑naa ŋʋ'ʋ ‑lä ‑jämɩɩ'! 8Kä Zozii ‑soo bhlä ‑zuzunyënyuu nynä ʋ ‑bha nyɩkpɔɔ kätää' nä, 'ɩzä ʋ ci bhlä sɔɔ. 9'Nɩ Zozii yi nyɩkpɔɔ 'ylä, ɔ lä ‑naa 'ŋnö bhää? Nyɩkpɔɔ lä 'naa 'ŋnöö‑ plöö‑ ‑Aa ‑Wʋ 'Bɛ. Kä ‑a ‑zu 'sää 'titi kpänyɩ. 10'Nɩ ɔ yi Zozii 'wlu slä nynä ɔɔ' 'tlii ‑lä 'bhlɩɛ 'mnö.

11‑Ma, 'kükë ‑kʋ bhä ‑lɔɔ yëku, 'nɩ bholuzakpö 'kädä ‑kʋ bhä ‑mɔɔ 'nɩ a lü bhä. 12'Nɩ ‑zizinyenyii yi Zozii soo, ɩ lä bheeje, ‑n fänö‑anyɩ bholuzälöö' 'pɛlʋʋ ‑yä ‑a 'gɩ 'mnö plä! 13'Nɩ Zozii yii ‑blɔ 'nyɛ. 'Nɩ ɩ yi nyɩkpɔɔ kätää' ‑bha 'nɩ, ɩ yi bholuzälöö 'mnö plä. ‑Mä bholuzakpaa ‑paa 'nɩ a kwlii‑ 'kükëa ‑kpʋkpʋʋ sämɩɩ'. 'Nɩ ɩmɩ 'fɩɩn yi 'nyibhlëa 'mnö jɛɛ, 'nɩ 'nyiee yii 'bhlä. Ɩ ‑bhlü bhä bholuzälöö' ‑bhɛgö 'sɔ (2.000) yiosä.

14‑Mä nyɩkpaa ‑wa ‑lä bhlä bholuzälöö 'kʋ lü ‑kää nä, wa guu‑ 'nɩ wa ‑fä duu' 'dö 'nɩ wa ‑fä 'sɩɩ ‑bhlüdüü 'kʋ 'dö. Ɩ ‑kä 'ŋnö nä, nyɩkpa ‑bha ‑mɔɔ 'nɩ wa ‑yi wloo ‑kää. 15Wa ‑ŋëë ylä Zozii yëku nä, wa lä wa wloo nä, nyɩkpɔɔ ‑zuzunyënyuu ‑kʋ bhlä kätää' nä, ɔ ‑kʋ bhɛ ‑lɔɔ sä. Ɔ 'wlu yä bhɛ 'kʋ gögä 'nɩ, ɔ ‑plä bhɛ 'mʋ. ‑Mä nyɩkpaa nio‑ lä 'yi nä, kä ‑ŋänö ‑plʋwa. 16'Nɩ ‑wa 'nii‑ bhlä ‑lɔɔ nä, wa sää bhä ‑mɔɔ' ‑lʋa 'dö. ‑Zizinyenyii ‑bha lä nyɩkpɔɔ kätää' nä, ɩyä 'klüü‑ ‑ŋëë lä 'sɩɩ bholuzälöö nä, wa ‑sänɩɩ bhä 'dö 'kʋ. 17‑Mä nyɩkpaa ‑slä Zozii 'wlu wlä bheeje, n ‑bha ‑anyɩa 'bhlɩɛ 'mnö.

18Zozii plä bhɛlä 'gokpë ‑yä ɔ 'kä mʋ nä, nyɩkpɔɔ ‑zizinyenyii ‑bha bhlä kätää' nä, ɔ ‑yi 'nɩ ɔ yi Zozii 'wlu slä nynä ɔ ‑yɔsɔ 'kä nää. 19‑Mä Zozii' ‑wʋ ŋoo‑. Ɔ ‑soo nyɩkpɔɔ, ɔ lä ‑n mʋ gbëë'! ‑N mʋ ‑naa nyʋä nëëdë ‑yä ‑n ‑sänʋwa 'dö! Sä Kwlienyɔ ‑yibhënö‑ö lä ŋäzö, 'nɩ ɔ ‑nʋ lä ‑naa ‑zaa nä, ‑n ‑sänʋwa sɔɔ! 20Ɔ cii‑ ylä sɔɔ nä, kä nyɩkpɔɔ ‑mʋ yɩ 'nɩ ɔ ‑bhlü Di ‑Kakpüü 'Kʋgbää' 'bhlɩɛ, 'nɩ ɔ yi ‑mɔɔ' nyɩkpaa 'dö ‑sä. Ɔ ‑sonʋwa yɩ sä Zozii ‑nʋ lä ɔɔ' ‑za nä. ‑Mä nyɩkpaa 'fɩɩn nükpëë' ‑slʋwa.

Zozii ‑yamä 'ŋnɔ 'nɩ Zayilusö ‑yɔŋnɔ ‑glɔɔ 'kuëë

(Matie 9.18‑26; Lukö 8.40‑56)

21Zozii 'ylɩbhɔ‑ 'nɩ ɔ ‑ŋëë lä nä, ɔ ‑kʋ ‑lätee ‑lɔɔ 'nyie yëku 'nɩ nyɩkpa ‑bhutukpä ‑yio yëku, 'nɩ wa ‑glänöɔ 'klʋ. 22Laagɔ‑bhutuu' nëkʋ kʋnyɔɔ wa laa bhlä Zayilusö nä, ɔ nio‑ lä 'yi nä, ɔ ‑yi 'nɩ ɔ ‑klɔɔ bho, 23ɔ lä n ‑slä‑ä 'wlu, 'naa 'yuŋnʋgbɛnyɔɔ kɔ ku lä nä, bheeje, ‑n yi ‑yä ‑n gbɩɔ ‑klɔgbä 'kʋ ‑yä ɔ 'kä lɔɔ nëë' ‑bha ‑yä ɔ 'kä zëkpë 'kʋ kʋmʋ. 24Nä Zozii ‑yɔsɔ mʋ ylä nä, nyɩkpa ‑bhutukpä güo‑ bhä 'kʋ 'nɩ wa 'mɩmɩänöɔ‑ bhä 'kʋ.

25‑Mä 'ŋnɔ ‑bhlo ‑kʋ a ‑lɔɔ. Ɩ nʋ bhɛ 'ylʋbɔ 'kʋgbä 'sɔ 'nɩ dolu kwlinöɔ bhlä. 26'Ŋnɔɔ nä, 'kwlɩ yɔ bhɛ kpänyɩ ‑dɔtönyʋä wlɩɩ' bhɩä. Ɔɔ' kääkäälɩɩ 'fɩɩn ɔ nyɩɩ‑ ‑yä wa 'kɔ yamä. ‑Mä ɔɔ' ‑wʋ ‑yamä 'nɩ guu mʋmʋ bhä klä. 27Ɔ nuu‑ bhɛ lä Zozii' yëkuu' wälɩ nä, ɩ ‑kä 'ŋnö 'nɩ ɔ ‑yi 'nɩ ɔ ‑plä nyɩkpaa' 'kpaa nëëdë. Ɔ ‑ghlää Zozii 'wuklë 'nɩ ɔ yi ɔɔ' ‑bänaa' numnuu 'taa. 28Kɔ ‑soo bhä ɔ yëku, ɔ lä n kä mii‑ 'nɩ n kä ɔɔ' ‑bänaa ‑kpakpa 'taa nä, n yi yamä. 29‑Mä 'kpobhuu ‑bhlo 'kʋ, 'ŋnɔɔ nii‑ 'yi nynä ɔ yä bhɛ yamä. Doluu ‑ʋ kwlinöɔ bhlä nä, ʋ yä bhɛ 'kʋ doo. 30'Tänyɩɛ ‑bhlobhlo 'mnö Zozii nii‑ 'yi nynä ɔmɔ 'titi 'tɛtɩ ‑bhɔɔ 'mʋ. Ɔ 'ylɩbhɔ‑, 'nɩ nyɩkpaa nëëdë ɔ yi 'ylä, ɔ lä lɔɔ ‑sä 'taa‑ bhä 'naa 'kotuu? 31Ɔɔ' 'kʋgënyʋa lä ‑mä‑n ni ‑kä 'yi nyɩkpaa sɩɔsɩɔnö‑ö ‑kä, 'nɩ ‑n ylä nynä ‑mä ‑ɔ 'tanö‑ö bhää ‑a? 32‑Maa, Zozii bie bhä 'yi, 'nɩ ɔ wloo bhä ɔ yëku yëku ‑yä ‑lɔɔ 'tanöɔ‑ bhlä nä, ɔ 'kɔ 'yi 'ni. 33'Ŋnɔɔ nii‑ lä wälɩɩ‑ plöö‑ lä ɔ 'yɛkɛɛ 'mnö 'kʋ nä 'yi nä, kä ‑ŋänö ‑plɔɔ. Ɔɔ' ‑lɔɔ yëku tɩtɛ nä, ɔ ‑yi 'nɩ ɔ ‑bhlüü Zozii dëlü, 'nɩ ɔ yio wälɩɩ 'fɩɩn‑ plöö‑ lä 'kʋ nä, ɩɩ' ‑nʋawlɛɛ soo. 34Zozii lä 'naa 'yunɔ, ‑naa pɔlötɛtɛ yä‑ä püë nä, ‑n yamä ‑yä ‑n mʋʋ 'kʋ wɔtɔlɩɩ!

35Wälɩɩ ‑kʋ ‑bhlɛ Zozii nëë' 'nɩ nyɩkpa ‑bha Laagɔ‑bhutuu' nëkʋ kʋnyɔɔ' ‑gbäsɩɩ 'nɩ wa yio soo ‑kää yi, wlä ‑n ‑yɔŋnɔ yä 'ku nä, ‑naa bhɩä ‑läyɩɔ 'flɛ Cɩanyɔɔ 'kwlɩ! 36Zozii nui‑ ‑mä ɔ 'nɩɩ ‑wʋ 'mänyɩ. Kɔ ‑soo Zayilusö, ɔ lä ‑n 'ŋʋ ‑mɔɔ plɛ ‑yä ‑n 'tɛnö'ö dë. 37Ɔ 'kä lä Zayilusöö' ‑gbäsɩɩ mʋ nä, ɔɔ' bhɔɔ ‑waa nynä 'yigäda nyɩkpɔ 'güo bhä 'kʋ, 'nɩ ‑ɔ 'nö Pɩɛlö, Zakö ‑yä ɔɔ' bheli Zään 'sɔɔ‑. 38Wa ‑ŋëë lä 'gbëa 'mnö nä, nyɩkpa ‑kʋ bhä ‑mɔɔ 'nɩ waa' kplü gbä bhä, 'nɩ wa tu bhä 'nɩ waa' 'nʋgbʋ‑saglöö gbä bhä. 39'Nɩ Zozii yi plä 'nɩ ɔ yiwa 'ylä, ɔ lä ‑ɔnözä 'nɩ a tu bhä 'nɩ anyɩa' ‑jiji gbä bhää? 'Yuoo‑ ‑wʋ kuu‑ ‑mä kɔ ŋɔɔ lä. 40Ɔ cii‑ lä sɔɔ nä, kwa ‑nyɩänöɔ. 'Nɩ ɔ yi nyɩkpaa' 'fɩɩn 'tlü. 'Nɩ ‑bhutuklëa wa ŋʋʋ‑ bhlä 'yuo 'mnö nä, ɔ ‑yä 'yuo ɔ 'bä, ɩyä ɔ 'nɔ, ɩyä ɔɔ' 'kʋgënyʋa taa, 'nɩ wa yi ‑mɔɔ plä. 41‑Mä ɔ ‑klä 'yuoo' ‑klɔgbä 'nɩ ɔ yio soo, ɔ lä Talita kumi! Kɩ sä lä ‑zɔɔ nynä ‑mä n ‑yɔŋnɔ, kä n sonö‑ö yɩ nynä ‑mä, ‑n ‑bha 'kʋ! 42'Kpobhuu ‑bhlo 'kʋ 'nɩ 'yuo yi 'kʋ ‑bha, 'nɩ ɔ yi näälɩ 'kʋ cie. ‑Mä nyɩkpaa 'fɩɩn‑ ‑kʋ bhlä ‑lɔɔ nä, kä nükpëë' slʋwa. 'Yuo ‑glö bhä 'ylʋbɔ 'kʋgbä 'sɔɔ 'yu. 43‑Mä Zozii ‑jlüwa 'nyukwli nynä wälɩɩ ‑ɩ plöö‑ lä 'kʋ nä, waa' ‑sänɩ ‑lä nyɩkpɔ ‑mä wa 'nyɛ 'yuo lülülɩɩ ɔ 'kä lü.

Currently Selected:

Makö 5: god

Highlight

Copy