Makö 3

Zozii ‑yamä ‑klɔɔpɛkänyɔ Sabaa‑gwlɛylʋ 'kʋ

(Matie 12.9‑14; Lukö 6.6‑11)

1Zozii ‑yi bʋkʋ Laagɔ‑bhutuu 'mnö. Ɔ lɔ yi nä, ‑klɔɔpɛkänyɔ ‑kʋ ‑mɔɔ. 2‑Mä Falizɩɛnyʋa‑ ‑kʋ bhlä ‑lɔɔ nä, wa bɩä bhä Zozii ‑yä wa 'kä 'ni, ɔ kä bhä nyɩkpɔɔ Sabaa‑gwlɛylʋʋ 'kʋ ‑yamä nä, wa 'kɔ gbʋ klaa. 3'Nɩ Zozii yi ‑klɔɔpɛkänyɔɔ soo, ɔ lä ‑n ‑bha 'kʋ ‑yä 'nynigo 'kʋ nyɩkpanä 'fɩɩn 'klʋ!

4'Nɩ Zozii yi ‑jlëa 'ylä, ɔ lä ‑maa, Sabaa‑gwlɛylʋ 'kʋ nä, ‑Jlämaa ci bhä nynä ‑mä nyɩkpɔ nʋ 'nää ‑a, ‑mä nyenyi‑ ɔ lɔ nʋ bhä ‑a? Ɩ ‑ŋwa bhä 'kʋ nynä ‑mä nyɩkpɔ puë ɔ ‑lie ‑a, ‑mä ɔ wluo 'yi ‑yä ɔ 'ku bhä ‑a? Ɔ ylää‑ lä sɔɔ nä, waa' ‑lefɩɩn ‑düdüdlüü! Nyɩkpɔ ‑bhlo 'coo ‑wʋ në ‑sä. 5Ɔ ‑bie 'yi 'nɩ ɔ ‑wloo ‑jlëa ‑plɩɩ, 'nɩ plɛkʋ yio si. Ɩ ‑kamänöɔ bhɛ yëku waa' 'mnönyunɔɔ' ‑za. 'Nɩ ɔ yi ‑klɔɔpɛkänyɔɔ soo, ɔ lä ‑n gbɔɔ ‑naa sɔɔ 'mʋ! ‑Mä nyɩkpɔɔ gbɔɔ‑ lä 'gää ɔɔ' sɔɔ 'mʋ nä, kʋ ‑yamä.

6'Kpobhuu ‑bhlo 'kʋ, Falizɩɛnyʋa ‑bha lä Laagɔ‑bhutuu' nä, kwa ‑yä Elodöö' ‑jɛnyɩɛɛ' nyɩkpa 'sɔ 'nii‑ ‑yä sä wa 'kä lä Zozii 'bhlä nä, wa 'kä sɔɔ 'kʋ 'ŋʋʋ.

Nyɩkpaa ‑bhutukpä ‑yii Zozii

(Matie 10.1‑15; Lukö 6.12‑19; Nʋnʋ 1.13)

7'Tänyɩ ‑kʋ bʋkʋ ‑lɔɔ 'nɩ Zozii ‑yä ɔɔ' 'kʋgënyʋä 'sɔ mʋ bhä Galilee' 'nyibhlëa yëku, 'nɩ nyɩkpa ‑bhutukpä güo‑ bhä 'kʋ. ‑Nänʋä ‑bha bhä Galilee‑bhlɩɛ ‑yä Zudee‑bhlɩɛ 'mnö. 8‑Nänʋä ‑bha Zolizalɛmʋduu'. ‑Nänʋä ‑bha Yidumee‑bhlɩɛɛ' ‑yä Zludɛɛ‑nyie klë. ‑Nänʋä ‑bha Tilö ‑yä Sidɔɔ‑bhlɩɛ 'mnö. Wälɩɩ Zozii nʋ bhlä 'nɩ nyɩkpaa nu bhlä nä, ɩɩ ‑zä waa' ‑bhutukpä yinöɔ bhlä. 9'Nɩ Zozii yi ɔɔ' 'kʋgënyʋa soo nynä wa tänöɔ 'gokpë ‑yä ɔ 'ka 'mnö ‑gblää ‑mä nyɩkpaa' kɔ ‑kä pɩä. 10Sä ɔ yamä bhɛ lä nyɩkpa ‑bhutukpä nä, nyɩkpaa 'fɩɩn guu bhlä bhlä nä, wa 'tɩtɔ bhä nynä wa 'kɔ 'taa. 11Nyɩkpaa ‑zizinyenyii ‑kʋ bhlä kätää' nä, sä wa ni lä 'gä Zozii 'yi nä, kwa bhlünöɔ dëlüü ‑zɔɔ 'nɩ ‑zizinyenyii gaa 'mʋ 'nɩ ɩ ci bhä, ɩ lä ‑mɔɔ nä, ‑n ‑glö Laagɔ ‑Yowli! 12‑Mä Zozii sonɩɩ bhä nynä ɩ bhlü në 'kʋ ‑mä, ɩɩ' kä gbä nyɩkpaa' kɔ yibhë.

Zozii ‑sä ɔɔ' lobho lobhonyʋä 'kʋgbä 'sɔ

(Matie 10.1‑4; Lukö 6.12‑16)

13Zozii ‑mʋ 'kükë 'wlu, 'nɩ nyɩkpaa ɔ ‑waa bhlä nä, ɔ pʋwa‑ wälɩ 'nɩ wa yio yëku yi. 14Ɔ ‑gbäzö lʋä 'kʋgbä 'sɔ 'mʋ [wamä ɔ laa‑ lä ɔɔ' lobho lobhonyʋä]. Wamä ɔ ‑yʋwa 'sɔ 'kä bhlä nää ‑yä, ɔ 'kwa lobho. Ɩyä wa 'kä Laagɔɔ' 'Nägädöö bie. 15Ɩyä ɔ 'kwa 'päwä 'nyɛ wa 'kä ‑zizinyenyi 'tlü. 16A ni wamä 'kʋgbä 'sɔɔ 'ŋnöö. ‑Bhlo plöö Simɔɔ, ɔmɔ Zozii ‑zie lä Pɩɛlö, 17'nɩ Zebedee ‑yowlie Zakö ‑yä Zään 'sɔ, wamä ɔ bhizie bhä Boanɛgɛsö. Kɩ sä lä ‑zɔɔ nynä ‑ɔ guglu nynä ‑laagɔ‑. 18Ɔ laa‑ Adlee ‑yä Filipʋ ‑yä Batlemii. Ɔ laa‑ 'sɩɩ Matie ‑yä Tomaa ‑yä Afee ‑yowli Zakö. Ɔ laa‑ Tadee, 'nɩ ɔ laa‑ 'sɩɩ Simɔɔ wa bhizie bhlä 'Bhlɩɩ 'Kʋ Bhläänyɔ#3.18 'Bhlɩɩ 'kʋ bhläänyɔ: Nyɩkpaa' ‑nänʋä sä 'ŋnönö ‑zɔɔ nynä ‑mä, ɔ ‑glö bhä 'bhlɩ 'kʋ bhläänyʋaa' ‑jɛnyɩɛ 'mnö nyɩkpɔ, 'nɩ ‑nänʋä ci 'sɩɩ nynä ‑mä ɔ ‑glö bhä Moyizöö' ‑Jlämaa' 'kʋ bhläänyɔ. nä. 19'Nɩ ɔ laa‑ 'sɩɩ Zuda Sikalɩɔtö. Zuda Sikalɩɔtö 'mɔɔ‑ ‑pëë lä Zozii.

Wa nyima Zozii yëku

(Matie 12.22‑37; Lukö 11.14‑23)

20'Nɩ Zozii ‑yä ɔ 'kʋgënyʋä 'sɔ yi gbëë' yi. ‑Mä nyɩkpa ‑zu bhlä kpänyɩ ‑lɔɔ nä, waa' ‑wʋ 'tänyɩ nii‑ ‑yä wa 'kä ‑lü. 21Zozii' 'lɔlʋnyʋä nuu‑ lä sä ɔ nʋ bhlä nä, wlä kä ɔɔ' 'wluu nyimo lä. Ɩ ‑kä 'ŋnö nä, kä wa cii‑ nynä wa 'kɔ gʋʋ yi.

22 ‑Jlämöcɩanyʋa ‑wa ‑bha bhlä Zolizalɛmʋduu' nä, kwa cii‑, wlä ‑zuzunyënyuu ‑ʋ 'kämä lä ‑zizinyenyii 'fɩɩn 'nɩ, wa laa lä Bɛzebuu nä, ʋmʋʋ‑ nyɩɔ lä 'päwä 'nɩ ɔ tlü lä ‑zizinyenyii.

23Ɩ ‑kä 'ŋnö 'nɩ Zozii laa‑ nyɩkpaa 'nɩ ɔ yiwa ‑dɔɔ 'pää. Ɔ lä ‑mä säsä 'Dëvlo yi bhä mii 'nɩ ʋ yi bhä ʋ yëku 'tlüü? 24'Leyidu ‑bhlobhlo 'mnö nyɩkpa kä 'mʋ doo‑ 'nɩ wa kä vë nä, kä ‑lɔɔ' 'leyiduu nuë. 25'Gbë ‑bhloo' 'mnö nyɩkpa 'kä 'mʋ doo‑ nä, kä ‑lɔɔ 'gbëa nuë. 26Nä, 'Dëvlo kä ʋ yëku tʋ ‑lä nä, 'nɩ ʋʋ' 'bhlɩɛ kä 'mʋ doo nä, ʋʋ' 'päwaa' ‑lä dä ŋëë ‑mä, ka 'kä lä mnɔ. 27Ɔ lä a ni, waa' ŋëë‑ ‑wʋ 'sɩɩ 'tɛtɩ‑käänyɔɔ' gbëë' ‑yä wa 'kä 'flɛ ɔɔ' ‑bhutuu ‑zɔɔ plä, ‑yä wa 'kɔ ɔɔ' kääkäälɩɩ ‑sä. ‑Mä wa kä 'fɩa ‑lɔɔ' 'tɛtɩkäänyɔɔ ‑gʋä nä, ‑lɔɔ wa mii 'nɩ wa sɔɔ ɔɔ' kääkäälɩɩ. 28‑Nʋawlɛɛ, n sonö'anyɩ nynä nyenyii' 'cënänä nyɩkpɔ yi lä nʋ nä, sä ɔ yi Laagɔ 'bhɩsɛmɔ ‑bhɩsɛmɔ ‑kaa nä, Laagɔ yi mii 'nɩ ʋ yio cie. 29‑Mä nyɩkpɔ kä Kplɔɔkplɔɔ‑wugɔɔ 'bhɩsɛ nä, ‑lɔɔ' nyɩkpɔɔ' ‑lä 'kɔɔn cienöɔ. ‑Lɔɔ' nyɩkpɔɔ' nyenyii ɔ ‑nʋ lä Laagɔ dëlü nä, ɩɩ' ‑gesii ‑lä 'kɔɔn ‑lɔɔ ‑bha. 30Wa ci bhlä nynä kä Zozii ‑zuzunyënyu ‑kʋɔ kätää' nä, 'ɩzä ɔ sonʋwa bhlä sɔɔ.

Zozii' 'lɔlʋkpönyʋä

(Matie 12.46‑50; Lukö 8.19‑21)

31‑Lɔɔ' 'tänyɩɛ ‑bhlobhlo 'mnö, 'nɩ Zozii ɔ 'nɔ ‑yä ɔ bhelie 'sɔ yi yi. Wa ‑yi lä nä, kwa 'nynigo‑ ‑lɔɔ jlukʋ 'nɩ wa yio nyɩkpa 'kʋ lobho. 32‑Mä nyɩkpa ‑bhutukpä ‑glää bhä Zozii 'klʋ 'nɩ wa ‑kʋ bhä sä. 'Nɩ wa yi Zozii soo, wlä ‑n ‑nɔɔ ‑yä ‑n bhelie 'sɔ ‑kʋ ‑mɔɔ jlukʋ. Wa ylä‑ä bʋkʋ. 33Zozii lä ‑ɔ plöö‑ bhä n ‑nɔɔ ‑yä n bheliee? 34Ɔ ‑bie 'yi 'nɩ ɔ yi nyɩkpaa‑ ‑glänöɔ bhlä 'klʋ nä wloo. Ɔ lä a ni ‑nänʋä, wamää‑ plöö‑ lä n ‑nɔɔ ‑yä n bhelie. 35Nyɩkpɔɔ' lɔɔ‑ nʋ lä Laagɔɔ' pɔlösaa nä, ɔmɔɔ‑ plöö‑ lä n bheli, ɩyä n bhɛŋnɔ, ɩyä n 'nɔ.

Currently Selected:

Makö 3: god

Highlight

Copy