Makö 16

Zozii ‑glɔɔ 'kuëë

(Matie 28.1‑8; Lukö 24.1‑8; Zään 20.1‑2)

1Dä Sabaa‑gwlɛylʋʋ plöö‑ ylä nä, Mali Madlɛɛ ‑yä Zakö ɔ 'nɔ Malii ‑yä Salomee wa zɔɔ‑ ‑daŋwɩɩ ‑yä wa 'kä Zozii' ‑gɛzɛɛ düda ‑kää mʋ. 2'Sɔlɩ 'kʋ zëplü 'pii, wa ‑bha 'kʋ 'nɩ wa yi lesi 'kʋ mʋ. 3‑Mä wa ‑kʋ lä mʋdä nä, wa 'ylä ylää bhɛ, wlä ‑mänɩ ‑ɔ yi‑anyɩ bhä lesi‑këfëa nëkʋʋ' cɛkʋʋ ‑lɔɔ ‑gä ‑sää? 4Ɩ ‑kʋwa nëë' ‑bhlɛ, wa lä wa wloo nä, cɛkʋʋ, ‑ʋ plöö‑ bhlä cɛkʋ ‑gwlikeyee nä, ʋ 'bhisio‑ 'nɩ ʋ ‑bha lesi‑këfëa nëkʋ. 5Wa ‑yi ylä nä, kwa sloo‑ lesie 'mnö. ‑Mä wa la wloo waa' lüüklä 'kʋ nä, nyëblu, ɔ ‑plä ‑bänö 'päpä 'nɩ ɔ ‑kʋ ‑lɔɔ sä. Wa nio‑ lä 'yi nä, kä plɛ ‑bhʋwa 'mnö. 6‑Mä ɔ ‑bhluwa‑ plɛɛ' 'nɩ ɔ ‑sonʋwa, ɔ lä ‑ŋänö 'nä 'bhlä'anyɩ ‑lä! Zozii, Nazalɛtöö' nyɩkpɔɔ, wa ‑bhoo bhlä 'kusuu 'yii nä, ɔmɔ a tään lä. Ɔɔ' ‑wʋ ‑mää ‑kʋ ‑mä ɔ yä 'kuëë glɔɔ. A wloo, dä wa puo‑ bhlä nä, lɔɔ‑ ‑kʋ lä ‑lää. 7A mʋ ‑yä a soo ɔɔ' 'kʋgënyʋa ‑yä Pɩɛlö nynä ɔ ‑bɛnö'anyɩ ‑mɔɔ Galilee'. ‑Mɔɔ a 'kɔ lä 'nii. Sɔɔ ɔ ‑sonö'anyɩ bhlä. 8‑Mä 'ŋwnɩa guu‑ 'nɩ wa ‑bha lesi 'kʋ. Waa' ‑lʋa yëku tɩtɛ bhɛ nä, wa ‑yi lä nä, waa' ‑wʋ nyɩkpɔ ‑soo ‑mä kwa nënümä ‑ŋänöö' ‑za.

Zozii ‑glɔɔ 'kuëë 'nɩ ɔ ‑ghlä nyɩkpa 'yii

[9'Sɔlɩɛ 'kʋ zëplü 'pii, Zozii ‑glɔɔ lä 'kuëë nä, Mali Madlɛɛ 'mɔ ɔ ‑ghlä tɛɛ 'yii. Mali Madlɛɛ ‑glö bhä 'ŋnɔɔ' lɔɔ Zozii ‑sä bhlä ‑zizinyenyi ‑ngbɔɔsɔ kätää' nä. 10Ɔ ‑mʋ 'nɩ ‑lʋa ‑wa ‑yä Zozii 'sɔ nää bhlä 'nɩ ɔɔ' wälɩɩ kamä bhlä yëkuu' 'nɩ ‑wa tu bhlä ‑lätee nä, ɔ yiwa 'dö fä. 11Ɔ ‑yi lä nä, ɔ lä n nii‑ Zozii ‑mä ɔ ‑yä 'kuëë glɔɔ. ‑Mä waa' ‑wʋ ɔɔ' ciciwälɩɩ nyaasäsä laa‑.

Zozii ‑ghlä ɔɔ' 'kʋgënyʋä 'sɔ 'yii

12‑Nɩnɩ plöö‑ ylä nä, Zozii ‑jöjlä 'nɩ ɔ ‑ghlä bʋkʋ ɔɔ' 'kʋgënyʋä 'sɔɔ‑ mʋ bhlä ‑bhlüdë 'kʋ nä 'yii. 13Wamä ‑mä 'nɩ wa yi 'ylɩbhɔ, 'nɩ wa yi ‑mɔɔ' ‑lʋa 'dö fä. ‑Mä ‑nɩnɩ 'fɩɩn nä, wa 'nɩɩ ‑wʋ 'sɩɩ nyaasäsä laa‑.

Zozii ‑ghlä ɔɔ' 'kʋgënyʋä 'kʋgbä ‑bhlo 'yii

14Bhɩädää nä, ɔ ‑ghlä bʋkʋ ɔɔ' 'kʋgënyʋa 'kʋgbä ‑bhlo 'yii, wa lü bhä. Ɔ ‑ŋënʋwa lä ‑lɔɔ nä, sä waa' bhɔɔ lä ɔɔ' 'kuëë glɔɔlɩɩ' pɔlötɛtɛ ‑kä nä, kɔ ‑bhuwa ‑kɔkwɩ.

15'Nɩ ɔ yiwa soo, ɔ lä a mʋ 'ylʋzɔɔ' dää 'fɩɩn ‑yä a ‑sää Laagɔɔ' 'Nägädöö nyɩkpaa 'fɩɩn. 16Nyɩkpɔɔ' lɔɔ ‑ɔ gä 'Nägädöö' pɔlötɛtɛ ‑kä nä, 'nɩ ‑ɔ gä 'ɩza 'nyu 'wlu ŋʋʋ‑ nä, ɔ yi ‑lɔɔ nëë' ‑bha. ‑Mä ‑ɔnö ɩɩ' pɔlötɛtɛ ‑kä nä, Laagɔ yio gbäylö ‑sä. 17A ni 'yiziziogbɩɩ ‑ɩyä pɔlötɛtɛɛ' käänyʋa 'sɔ 'kä lä nää nä. 'Naa 'ŋnöö 'mnö, wa yi ‑zizinyenyi 'tlü, wa yi nuwälɩ ‑leli ci. 18Wa yi ‑leebeli wlɩɩ' ‑klää 'nɩ ɩ 'nʋwa ‑lä lʋʋ nʋ. Wa yi 'pɔyɩzɩ 'mnä 'nɩ ɛ 'nʋwa ‑lä 'bhlä. Wa yi gupanyʋa ‑klɔgbö 'kʋ gbɛɛ 'nɩ wa yi yamä.

Zozii ‑gblää ‑Laagɔɔ'

19Kwlienyɔ Zozii ‑bhɩä lä ɔɔ' 'kʋgënyʋa soolɩ nä, kɔ gblää‑ Laagɔduu' 'nɩ ɔ yi Laagɔɔ' lüüklä 'kʋ sä kʋ. 20'Nɩ ɔɔ' 'kʋgënyʋa ‑mä, wa yi Laagɔɔ' 'Nägädönö dää 'fɩɩn bie ‑kää mʋ. ‑Mä Kwlienyɔ klänʋwa bhä lebhee 'fɩɩn 'mnö, 'nɩ 'yiziziogbɩ nʋɔ bhä 'nɩ ɩ pana bhä 'Nägädöö' nyaasäsä.]

Currently Selected:

Makö 16: god

Highlight

Copy