Matie 28

Zozii' 'kuëë glɔɔlɩɩ' yëkuu' wälɩ

(Makö 16.1‑8; Lukö 24.1‑11; Zään 20.1,11‑18)

1 Sabaa‑gwlɛylʋʋ plöö‑ ylä nä, 'sɔlɩɛ 'kʋ zëplü 'pii, Mali Madlɛɛ ‑yä 'yigädaŋnɔ ‑bhlo, wa lɔɔ bhä 'sɩɩ Malii.#28.1 Zɛɛ 'sɩɩ 27.56. Wamä 'sɔ ‑bha 'kʋ 'nɩ wa yi lesi 'kʋ mʋ ‑yä, wa 'kä bhɛ lesie 'yi 'ni. 2‑Mä ‑Laagɔzuzu ‑bha ‑Laagɔɔ' 'nɩ ʋ kwlii‑ 'nɩ ‑dʋdʋ yi tɩtɛ. ‑Laagɔzuzu kwlii‑ lä nä, kʋ 'bhisie‑ lesi‑këfëa nëkʋʋ' cɛkʋʋ, 'nɩ ʋ yiu 'kʋ sä kʋ. 3‑Mä ʋ lie bhä nynä ‑ŋnäzälö 'nɩ ʋ ‑plä bhä ‑bänä 'nɩ a pɔɔ bhä 'sää plätätä. 4‑Mä 'sʋjaa ‑bɛɛ bhlä lesie 'klʋ nä, ‑ŋänö ‑plʋwa 'nɩ wa tɩtɛ bhä. 'Nɩ yi 'plö nynä lʋä‑ kuu‑. 5'Nɩ ‑Laagɔzuzuu yi 'ŋwnɩa soo, ʋ lä anyɩ nä ‑ŋänöö' 'bhlanyɩ ‑lä! N ‑yi sɔɔ nynä ‑mä Zozii‑ wa ‑bhoo lä 'kusuu 'yii nä, ɔmɔ a tään lä. 6Ɔɔ' ‑wʋ ‑mää ‑kʋ, ‑mä ɔ yä 'kuëë glɔɔ. Sä ɔ cii‑ bhlä nä, sɔɔ ɩ plö lä 'kʋ. A ni ‑lää wa puo‑ bhlä nä, a yi a 'kä wloo! 7A mʋ yɩ 'fäfä ‑yä a soo ɔɔ' 'kʋgënyʋa nynä ‑mä ɔ yä 'kuëë glɔɔ ‑mä, ɔ ‑bɛnö'anyɩ ‑mɔɔ Galilee'. ‑Mɔɔ a 'kɔ lä 'nii.#28.7 Zɛɛ 'sɩɩ 26.32. 'Klünö 'mɩ n yi'anyɩ bhlä soo ‑kää.

Zozii ‑ghlä Mali Madlɛɛ 'yii

8‑Mä 'ŋwnɩa, sä ‑ŋänö ‑plʋwa bhɛ lä kpänyɩ nä, kwa pio 'kʋ 'nɩ wa yi lesi 'kʋ ‑bha. ‑Ŋänö ‑plʋwa bhä 'flɛ ‑mä pleyii mɛnʋwa bhä 'sɩɩ kpänyɩ. Nä wa yi mʋ bhɛ ‑yä wa 'kä Zozii' 'kʋgënyʋa 'dö ‑sää.

9Wa kʋ yɩ mʋdä 'nɩ, ‑bla! Zozii yi waa' ‑blɔɔ 'kʋ yi. Ɔ lä ayayokä! Wa nio‑ lä 'yi 'nɩ wa yio yëku 'jloo. 'Nɩ wa ɔɔ' ‑kokokpüü gbëë 'nɩ wa yio bʋbɔ. 10'Nɩ Zozii yiwa soo, ɔ lä ‑ŋänö 'nä 'bhlä'anyɩ ‑lä, ‑mä a mʋ ‑yä a soo 'naa bhelia nynä ‑mä wa mʋ Galilee‑bhlɩɛ 'mnö ‑mä ‑mɔɔ wa kä'ä lä 'nii.

'Sʋjaa sää lesi 'kʋʋ 'dö

11'Ŋwnɩa ‑kʋ ylä mʋdä nä, 'sʋjaa‑ ‑yi bhlä lesie koo ‑kää nä, wa nëëdëë' lʋä ‑bha ‑mɔɔ lesi 'kʋ 'nɩ wa yi 'Cibhisänyʋaa' 'cifinyʋa 'dö fä. Wälɩɩ 'fɩɩn ‑ɩ plöö‑ lä 'kʋ ‑mɔɔ lesi 'kʋ nä, wa ‑sänɩ. 12'Cibhisänyʋaa' 'cifinyʋa nuu‑ lä wälɩɩ nä, kwa ‑yä ‑Dɔɔpänyʋa 'sɔ 'nii‑ ‑asilee' 'nɩ wa 'ŋʋʋ‑ 'kʋ, 'nɩ wa yi 'sʋjaa monii ‑bhutukpä 'nyɛ 13'nɩ wa yiwa soo, wlä a kä ‑mʋ nä, a ci nynä ‑mä ‑a ‑kʋ 'ylaa 'nɩ ɔɔ' 'kʋgënyʋa ‑yi 'saboo, 'nɩ wa ghlüü‑ ɔɔ' ‑gɛzɛɛ. 14‑Gɔmnɔɔ kɩ nuu‑ nä, ‑anyɩ, ‑a yio plɛɛ' bhlüa. ‑A yi gbä 'nɩ a 'nɩɩ ‑lä gbʋʋ' 'nii. 15'Nɩ 'sʋjaa yi monie 'kʋ 'bhlü. Sä nyɩkpaa ‑sonʋwa bhlä nynä wa nʋ nä, 'nɩ wa yi sɔɔ nʋ. ‑Kpläkplö‑dönö 'sʋjaa ‑bie ylä nä, ɩ ‑bhlü 'Zufʋ‑bhlɩɛ 'fɩɩn. Ɩ ‑kʋ sɔɔ ‑kaaa 'nɩ ‑zɩkä.

Zozii ‑ghlä ɔɔ' 'kʋgënyʋa 'yii

(Makö 16.14‑18; Lukö 24.36‑49; Zään 20.19‑23; Nʋnʋ 1.6‑8)

16Zozii' 'kʋgënyʋa 'kʋgbä ‑bhlo, wa ‑bha 'kʋ 'nɩ wa yi Galileebhlɩ 'kʋ mʋ, 'nɩ 'kükëa Zozii panʋwa‑ bhlä nä#28.16 Zɛɛ 'sɩɩ 26.32. wa yia 'wlu mʋ. 17Wa nio‑ lä 'yi nä, kwa ‑bʋbɔnöɔ. ‑Mä bhloobhlolʋä ‑kʋ bhä ‑mɔɔ 'nɩ ɔɔ' 'kuëë glɔɔ‑wälɩɩ, waa' lɩɩ bhɔɔ nyaasäsä. 18'Nɩ Zozii yiwa yëku 'jloo, 'nɩ ɔ yiwa soo, ɔ lä kä Laagɔ nyɛɛ'ɛ 'päwaa 'fɩɩn. N ‑kä 'päwä ‑mɔɔ Laagɔduu, 'nɩ n ‑kä 'sɩɩ 'päwä ‑mää ‑dʋdʋkʋ. 19A mʋ 'bhlɩɩ 'fɩɩn 'mnö ‑yä a wlʋa ‑mɔɔ 'naa 'kʋgënyʋä.#28.19 Zɛɛ 'sɩɩ Nʋnʋ 1.8. A 'ŋʋwa 'nyu 'wlu, 'Bäɔ ‑yä ɔ ‑Yowlio ɩyä Kplɔɔkplɔɔ‑wugɔɔ' 'ŋnöö 'mnö. 20Sa 'fɩɩn n ‑sonö'anyɩ lä nynä ‑mä a nʋ nä, a cɩwa sɔɔ. 'Nɩ ylɩɩ 'fɩɩn 'mnö nä, ‑amʋ n ‑kʋ'anyɩ yëku. 'Nɩ n yi'anyɩ yëku kʋ ‑aaa, 'nɩ zëkpëa' bhɩäylʋʋ yi ŋëë.

Currently Selected:

Matie 28: god

Highlight

Copy