Matie 25

Ŋnʋgbɛnyʋa 'kʋgbää' ‑nyädlaa

1 Laagɔɔ' 'Leyiduu nä, kʋ panalɩɩ ‑kʋ lä nynä ŋnʋgbɛnyʋä 'kʋgbää' yëkuu' wälɩɩ. A ni, ŋnʋgbɛnyʋä 'kʋgbä, waa' lʋä‑ bhɔɔ ‑lä ŋwadi ‑yi nä. 'Tänyɩ ‑kʋ ‑lɔɔ 'nɩ waa' 'wli yi bhä. 'Nɩ wa bhlüü‑ lä 'näpö 'kʋ ‑yä wa 'kä 'wlinɔ ‑blɔkʋ mʋ. 2‑Mä ŋnʋgbɛnyʋa pää' lʋä ‑ngbü ‑kʋ bhä ‑mɔɔ 'nɩ wa bhɔɔ 'fika‑, 'nɩ ‑ngbü 'fika‑ bhä. 3‑Waa ‑wʋ lä 'fika nä, wa bhɛɛ‑ bhä 'näpö ‑mä waa' bhɔɔ ɩɩ' ponuvii' bhlëë' 'ŋʋʋ lɛɛ bhɛɛ. 4‑Lʋa ‑ngbü ‑wa 'fika lä nä, wa ‑yie waa' 'näpöö ponuvii 'kʋ 'fɩa, 'nɩ wa ŋʋʋ‑ 'kplä 'mnö ponuvii' gbäkö 'kʋ. 5‑Mä ŋnʋgbɛnyʋänä 'kʋgbä ‑bɛɛ 'wlio ‑aaa, ɔɔ' yi ‑wʋ, 'nɩ 'ylaa yiwa ghlü 'nɩ wa yi ŋɔɔ waa' ‑lefɩɩn. 6‑Mä 'sää dodoogö‑tänyɩɩ', 'nɩ nyɩkpɔ paa‑ wälɩ, ɔ lä 'wlio 'mɔɔ‑ yi lä! A 'wlʋ ‑zɔɔ ‑yä a 'kɔ ‑blɔkʋ mʋ! 7'Nɩ ŋnʋgbɛnyʋa 'fɩɩn yi glɔɔ, 'nɩ wa yi waa' 'näpöö kpäta ‑yä wa 'kä 'wlio ‑blɔkʋ mʋ. 8‑Mä ‑waa bhɔɔ lä 'fika‑ nä, wa ‑soo ‑mɔɔ' ‑lʋa, wlä bheeje, a 'nyɛmʋ‑anyɩ ponuvii ‑mä kä ‑anyɩa 'näpöö ŋomo lä! 9‑Wa 'fika‑ lä nä, wlä ‑ɔ! ‑anyɩa ponuviee' ‑wʋ ‑zu 'nɩ ɛ 'kanyɩ 'kʋ ŋëë nä, a mʋ ‑gbäsɩɩ wa ŋʋɛ lä 'kpä nä, ‑yä a 'kä anyɩa' lɛɛ zɔɔ. 10Ŋnʋgbɛnyʋänä ‑mʋ yɩ ponuvii zɔɔ ‑kää 'nɩ, ‑bla! 'wlio yi 'kʋ ghlä. Ɔ ‑ghlä lä 'kʋ nä, ŋnʋgbɛnyʋa‑ ‑ghlɩlɩ bhlä nä, kä wa ‑yɔsɔ ‑plä yɩ wlunö‑bhutuu 'mnö 'nɩ 'gbëa kpluu yi gbɔɔ. 11Wa ‑plä lä nä, ‑lɔɔ ‑gwlɛ 'fɩa 'mʋ 'nɩ ‑wa ‑mʋ bhlä ponuvie zɔɔ ‑kää nä, wa yi yi. Wa ‑yi lä nä, wa bhütë bhɛ 'gbëa, wlä Kwlienyɔ‑! Kwlienyɔ‑! Bheeje, ‑n känö‑anyɩ 'gbë! 12'Wlio lä n 'kanyɩ yɩ ‑nʋawlɛɛ soo, anyɩ nä, n nö'anyɩ ‑wʋ ‑yi.

13'Nɩ Zozii yiwa soo, ɔ lä aa' ŋɔɔ ‑lä ‑mä aa' ‑wʋ ylʋʋ ‑yä 'gliyee 'sɔ ‑yi!

‑Gänʋnyʋa taa' ‑nyädlaa

(Lukö 19.12‑27)

14‑Lɔɔ' 'tänyɩɛ yi kʋ nynä ‑n ‑näsä nyɩkpɔ bha lä 'kʋ 'nɩ ɔ mʋ lä lowluu' nä. ‑Mä ɔ 'kä lä mʋ nä, ɔ laa‑ ɔɔ' ‑gänʋnyʋa 'nɩ, ɔ yiwa ɔɔ' 'nää yëku të. 15Ɔ ‑të ‑nɔnɔ ‑sikaabhü ‑ngbü, ɔ ‑të ‑nɔnɔ ‑sikaabhü 'sɔ, 'nɩ ɔ ‑të ‑nɔnɔ ‑sikaabhë ‑bhlo. Sä nyɩkpɔ nyɩkpɔ yi bhlä klälɩ mii nä, sɔɔ ɔ nyɩɔ‑ lä. 16‑Gänʋnyɔɔ wa ‑të lä ‑sikaabhüü ‑ngbü nä, ɔɔ' ‑wʋ ‑bʋä ‑mä kɔ bhlii‑ 'kʋ 'nɩ ɔ paa‑ 'kwäsɛ, 'nɩ ɩ yi 'mʋ gänö ‑gänö. ‑Sikaabhüü ‑ngbü ‑länöɔ ‑sikaabhü ‑ngbü bʋkʋ. 17‑Gänʋnyɔɔ wa ‑të lä ‑sikaabhüü 'sɔ nä, ɔ ‑mʋ 'sɩɩ 'nɩ ɔ paa‑ 'kwäsɛ, 'nɩ ɩ ‑gänö ‑gänö 'mʋ. ‑Sikaabhüü 'sɔ ‑länöɔ ‑sikaabhü 'sɔ bʋkʋ. 18‑Mä ‑gänʋnyɔɔ wa ‑të lä ‑sikaabhëa ‑bhlo nä, kɔ ‑mʋ 'nɩ ɔ ‑koto glu, 'nɩ ɔ yia ‑mɔɔ zizie.

19‑Lɔɔ ‑gwlɛ yɩ 'mʋ. 'Nɩ 'gbëa käänyɔ yi 'ylɩbhɔ. Ɔ ‑yi lä nä, kɔ laa‑ ɔɔ' ‑gänʋnyʋa ‑yä, sä wa ‑klä lä 'nää nä, wa 'kɔ yɩ 'dö ‑sää. 20Tɛɛtɛɛlɔɔ ‑të bhlä ‑sikaabhüü ‑ngbü nä, ɔ ‑yi lä nä, ɔ lä Käänyɔ‑, ‑sikaabhüü ‑ngbü ‑n ‑të'ë bhlä nä, n 'pänɩɩ‑ 'kwäsɛɛ' 'nɩ n nii‑ bʋkʋ ‑sikaabhü ‑ngbü. 21Ɔɔ' käänyɔ lä ‑n ‑glö ‑gänʋnyɔɔ' 'nägälɔɔ, n 'tɛnö‑ö yɩ dë! N nyɛɛ‑ɛ ‑lɛɛ pɛ, 'nɩ ‑n ‑nʋnöɔ 'nägä‑lebhee'. N ‑kä yɩ ‑naa pɔlötɛtɛ. N yi‑i yɩ ‑lɛɛ bhutukpä 'kʋ wloodä 'nyɛ. ‑N yi ‑yä ‑a nʋʋ ‑pʋpɛ däbhloo'! 22'Sɔnalɔɔ ɔ ‑të bhlä ‑sikaabhüü 'sɔ nä, ɔ ‑yi, ɔ lä Käänyɔ‑, ‑sikaabhüü 'sɔ ‑n ‑të'ë lä nä, n 'pänɩɩ‑ 'kwäsɛɛ' 'nɩ n nii‑ bʋkʋ ‑sikaabhü 'sɔ. 23Ɔɔ' käänyɔ lä ‑n ‑glö ‑gänʋnyɔɔ' 'nägälɔɔ, n 'tɛnö‑ö yɩ dë! N nyɛɛ‑ɛ ‑lɛɛ pɛ 'nɩ ‑n ‑nʋnöɔ 'nägä‑lebhee'. N ‑kä yɩ ‑naa pɔlötɛtɛ. N yi‑i yɩ ‑lɛɛ bhutukpä 'kʋ wloodä 'nyɛ. ‑N yi ‑yä ‑a nʋʋ ‑pʋpɛ däbhloo'! 24‑Gänʋnyɔɔ ɔ ‑të bhlä ‑sikaabhëa ‑bhlo nä, 'nɩ ɔ ‑yi yi, ɔ lä Käänyɔ‑, kä ‑naa wälɩ 'tɛ! Dä ‑nn ‑wʋ lä lülülʋʋ ‑gonö nä, ‑lɔɔ ‑n tänönʋ. 'Nɩ dä ‑nn ‑wʋ lä tlʋtlʋsu ‑gonö nä, ‑lɔɔ ‑n tänö ‑naa subhü. 25Nä, ‑amʋ kä n ‑guunö‑ö. Ɩ ‑kä 'ŋnö nä, ‑naa ‑sikaabhëa ‑n ‑të'ë lä nä, kä n ‑koto glu 'nɩ n ŋʋa‑ ‑mɔɔ nä, ‑n ni amä! ‑N 'bhlüa 'kʋ ‑mä ‑naa laa bhlä. 26Ɔ cii‑ lä sɔɔ nä, ɔɔ' käänyɔ lä 'zɛnɔnyɔ‑! ‑N ‑glö 'sää 'titi ‑gänʋnyɔɔ' ‑lɛɛ nyonyo! ‑Zɩglägbäma ‑n ‑yi sɔɔ nynä dä nn' ‑wʋ lä lülülʋʋ ‑gonö nä, ‑lɔɔ n tänönʋ, 'nɩ dä 'nn ‑wʋ lä tlʋtlʋsu ‑gonö nä, ‑lɔɔ n tänö ʋʋ' 'bhü! 27Nä sɩ ‑kʋ bhä 'nɩ 'naa ‑sikaabhëa ‑n 'nöa bhä monii‑bhutuu 'nää ‑klää? 'Tänyɩnɛɛ', a yä bhɛ ‑bʋzʋɛ kätää' pään nä, n ‑yi bhlä nä, kä n bhlüa bhlä 'kʋ 'nɩ, n bhlü bhɛ lä 'sɩɩ aa' ‑bʋzʋɛ 'kʋ. 28'Nɩ käänyɔɔ yi nyɩkpaa‑ ‑kʋ bhlä ‑lɔɔ nä soo, ɔ lä a ‑sɔɔ ‑sikaabhëa ‑yä a 'nyɩa ‑ɔ ‑kä lä ‑sikaabhüü 'kʋgbä nä! 29Nä, a ni 'yi ‑a! nyɩkpɔɔ' lɔɔ‑ ‑kä lä nä, wa yio bʋkʋ 'nyɛ 'nɩ ɔɔ' dä yi zumë. ‑Mä ‑ɔɔ ‑wʋ lä ‑kä nä, sä ɔ ‑kä bhlä nä, wa yio sɔɔ ‑sä. 30'Nɩ käänyɔɔ yi nyɩkpa soo, ɔ lä ‑lää' 'flɛflɛ ‑gänʋnyɔnɔ, a 'pɔɔ ‑mɔɔ jlukʋʋ' 'cucukpaa 'mnö! ‑Gbäsɩɩ ɔ 'kä lä kʋ ‑yä ɔ 'kä 'tu ɔ 'kä gläwluu mnü nä, a pɔɔ ‑mɔɔ!

Laagɔɔ' 'tite 'kädɛɛ pläylʋʋ

31'Tänyɩɩ' Nyɩkpɔɔ ‑Yowli 'kä lä ɔɔ' 'klʋagbaa 'mnö yii nä, kɔ ‑yä ‑Laagɔzizii 'fɩɩn 'sɔ 'kä kwli ‑yä ɔ 'kä ɔɔ' 'Leyi‑këkpëa 'kʋ 'plöö ‑yä ɔ 'kä 'klʋagbaa 'mnö sä 'kʋ. 32'Bhlɩɩ 'fɩɩn yio dëlü 'wlu 'wlää. 'Nɩ, ‑n ‑näsä mnäkpänyɔɔ säsä lä 'bhabhlöö ‑yä 'bhɔɔwö 'sɔ nä, ɔ yi sɔɔ 'ylʋzɔkʋnyʋä ‑säsä. 33Ɔ yi 'bhabhlöö ɔɔ' lüüklä 'kʋ 'ŋʋʋ, 'nɩ ɔ yi 'bhɔɔwöö ɔɔ' mëëcë 'kʋ 'ŋʋʋ. 34'Nɩ Kwlienyɔɔ‑ plöö‑ lä 'sɩɩ 'Loyoo nä, nyɩkpaa ɔ 'ŋʋʋ‑ lä ɔɔ' lüüklä 'kʋ nä, ɔ yiwa soo nynä ‑mä a yi ‑mä anyɩ‑ 'Bäɔ paa‑ lä 'nyu! Nä 'Leyiduu 'kɔɔn 'nö bhlä 'wlʋ 'nɩ Laagɔ ŋʋʋ‑ lä ‑lɔɔ nynä anyɩa' ‑za nä, a plʋ yɩ 'mnö! 35‑Ɔnöza bhää? 'Tänyɩɩ' ‑gbugbe bhlä'ä bhlä nä, a nyɛɛ'ɛ lülülʋʋ 'nɩ n lü. 'Tänyɩɩ 'mnätʋ bhlä'ä bhlä nä, a nyɛɛ'ɛ 'nyuu 'nɩ n mnää‑. N plöö‑ bhä lowuyu 'nɩ, a ‑klä'ä 'nää. 36N döö‑ bhä wlu, 'nɩ a yluë'ë. Nn' bhɔɔ ‑yä, 'nɩ a ‑wloo'o 'kʋ. N ‑kʋ bhä ‑jɩɩ', 'nɩ a yi'i bhään ‑kää. 37Ɔ kä yɩ sɔɔ cii‑ nä, nyɩkpaa ‑wa ‑nʋ lä 'nää nä, wa yio 'ylä nynä ‑mä Käänyɔ‑, 'tänyɩ ‑saa' ‑gbugbe bhlä‑ä bhɛ 'nɩ ‑a nyɛɛ‑ɛ bhä lülülɩɩ? 'Nɩ 'mnätʋ bhlä‑ä bhɛ, 'nɩ ‑a nyɛɛ‑ɛ bhä 'nyuu? 38'Tänyɩ ‑saa' ‑n plöö‑ bhɛ lowuyu, 'nɩ ‑a ‑klä‑ä bhɛɛ? 'Nɩ ‑n döö‑ bhɛ wlu 'nɩ ‑a yluë bhɛɛ? 39'Tänyɩ ‑saa' ‑nn bhɛ ‑yä, 'nɩ ‑a ‑wloo‑o bhɛ 'kʋʋ? 40‑Mä 'loyoo yiwa soo nynä ‑mä ‑nʋawlɛɛ 'mnö, n sonö'anyɩ nynä 'tänyɩɩ 'fɩɩn 'mnö a ‑wloo lä 'naa bhelienä lɔɔ ‑bhlo kʋ nä, ɔ yi bhä waa' nëëdëë' ‑lɛ 'tɩkɩɩlɛɛ 'plö ‑o, ‑amʋ a ‑klä lä.

41'Nɩ nyɩkpaa ‑wa ‑kʋʋ bhlä mëëcë 'kʋ nä, 'loyoo yiwa soo, ɔ lä anyɩ, a ‑glö 'kplünyʋä ‑mä a ‑bhä'ä 'yikʋ! A mʋ Laagɔɔ' gbʋgblɛɛ' ‑kosu ‑düdëa 'mnö! ‑Kosu ‑düdëyɩ nä, amä Laagɔ ‑zla lä 'Dëvlo ‑yä ʋʋ' ‑zizinyenyii 'sɔɔ ‑za. Aa' ‑lä 'kɔɔn 'nɩ kɔɔn ŋomo. 42‑Ɔnöza bhää? 'Tänyɩɩ' ‑gbugbe bhlä'ä bhlä nä, a nö'ö ‑wʋ lülülʋʋ nyɛɛ‑. 'Mnätʋ bhlä'ä bhä ‑mä a nö'ö ‑wʋ 'nyu nyɛɛ‑. 43N plöö‑ bhlä lowuyu 'nɩ n ‑yi'anyɩ nëëdë, ‑mä a nö'ö ‑wʋ 'nää ‑klä. N döö‑ bhä wlu, ‑mä a nö'ö ‑wʋ ylua. Nn' bhɔɔ ‑yä, 'nɩ n ‑kʋ bhä 'sɩɩ ‑jɩɩ', ‑mä a nö'ö ‑wʋ bhään ‑kää ‑yi. 44'Nɩ mëëcë 'kʋʋ ‑lʋa yio 'ylä wlä ‑mä, Kwlienyɔ‑, 'tänyɩ ‑sa 'mnö a nii‑ bhɛ 'yi 'nɩ ‑gbugbe bhlä‑ä bhɛɛ, 'nɩ 'mnätʋ bhlä‑ä bhɛɛ? 'Tänyɩ ‑sa 'mnö ‑n plöö‑ bhɛ lowuyuu? 'Tänyɩ ‑sa 'mnö ‑n döö‑ bhɛ wluu? 'Tänyɩ ‑sa 'mnö ‑nn bhɛ ‑yää? 'Tänyɩ ‑sa 'mnö ‑n ‑kʋ bhɛ ‑jɩɩ'? 'Tänyɩ ‑saa' ‑nɩnɩ 'fɩɩn plöö‑ bhɛ 'kʋ, 'nɩ ‑a 'nö‑ö bhä 'mänyɩɩ? 45‑Mä wa kä yɩ sɔɔ ylää‑ nä, 'loyoo yiwa soo nynä ‑mä n sonö'anyɩ ‑nʋawlɛɛ' nynä 'tänyɩɩ 'fɩɩn 'mnö aa' ‑wʋ lä ‑nänʋä nëëdëë' ‑lɛ 'tɩkɩɩlɛɛ 'mänyɩ‑ nä, ‑amʋ aa' ‑wʋ lä sɩɩ 'mänyɩ‑. 46'Loyoo kä yɩ sɔɔ cii‑ nä, nyäkälɩɩ' lɩɩ‑ ‑wʋ lä bhɩäsä ‑kä nä, ɔɔ' mëëcë 'kʋ nyɩkpaa yii 'mnö plä. Wa yii kʋ 'nɩ wa yi nyɛnɩä 'kɔɔkɔɔ ‑za. ‑Mä ‑wa nämnö‑ lä Laagɔɔ' ‑blɔɔ 'kʋ nä, 'pʋpʋɛɛ‑ ‑kʋ lä 'kɔɔkɔɔ ‑za nä, wa yie 'ni.

Currently Selected:

Matie 25: god

Highlight

Copy