Matie 23

Zozii bhoo Falizɩɛnyʋa ‑yä ‑Jlamöcɩanyʋa ‑kɔkwɩ

(Makö 12.37‑40; Lukö 11.39‑52; 20.45‑47)

1'Nɩ Zozii yi ɔɔ' 'kʋgënyʋa ‑yä ‑jlëa 'sɔ soo, ɔ lä 2‑Jlämöcɩanyʋa ‑yä Falizɩɛnyʋa 'sɔ wamää‑ ‑kʋ lä Moyizöö' bhlëë', 'nɩ ‑wa sä lä ‑Jlämaa ‑zɔɔ. 3Nä, a puwa 'nyukwli ‑yä sää 'fɩɩn wa 'ylänö'anyɩ lä nä, a nʋ sɔɔ. ‑Mä aa' nʋ ‑lä wamä 'bhisäkʋ. Kä wa cii 'flɛ nëë', ‑mä sä wa ci lä nä, waa' nʋ ‑wʋ sɔɔ. 4Bedii' ‑lɩɩ ‑ɩ 'ŋɔɔ lä 'kʋ 'nɩ, ‑ɩ kään lä bhɛɛ‑yëku nä, ɩmɩ wa kpäsö 'nɩ wa sluë wa ‑liesɩ. ‑Mä wamä 'titi, waa' 'kʋʋ nyɩkpɔɔ' mii ‑wʋ 'nɩ ɔ 'kä nyɩkpɔ bhɛnö. 5Sä nyɩkpa 'kwa lä wloo nä, sɔɔ 'nämʋ 'mʋ wa nää. Waa 'kʋ wloowloogbɩɩ 'mnö nä, wa tlʋmä waa' ‑bänöö' ‑vavɩɩ 'kʋ. 'Nɩ ‑Jlämaa' 'bɔɔgʋʋ' mnɛku‑flʋbhaa 'tɩkɩɩlɩɔ wa ‑liesɩ gʋä lä 'kʋtakpää' nä, wamä nä, waa' ‑laa' ‑lɛkäda.#23.5 ‑Jlämaa' 'bɔɔgʋʋ' zɛnödöö' ‑nɩnɩ ‑kʋ ‑lɔɔ 'nɩ 'Zufʋnyʋa ŋʋɩ ‑flʋbhaa 'tɩkɩɩlɛɛ' 'nɩ wa gʋänʋa wa yëku 'klʋ ‑yä sëmnë 'kʋ ‑yä wa 'kä 'kɔɔkɔ Laagɔwälɩɩ' dä 'kʋ luë. 6‑Lɛɛ ‑lüdää' ‑jlüü 'mnö, wa ‑waa 'klʋkpää kʋdaa' këkpüü 'mnö kʋlɩ. Bʋkʋ 'nɩ Laagɔ‑bhitii 'mnö, wa ‑waa 'yikʋʋ' këkpüü 'mnö kʋlɩ. 7Wa ‑waa 'sɩɩ nynä nyɩkpa bhänönʋwa ‑jlëë'. Wa ‑waa nynä nyɩkpaa kwa laa nä, wa ci nynä Cɩanyɔ‑! 8‑Mä anyɩ nä, aa' gbä ‑lä 'nɩ nyɩkpa 'kanyɩ laa nynä Cɩanyɔ‑, ‑mä anyɩa' Cɩanyɔɔ ‑bhlü ‑bhlo. 'Nɩ anyɩ 'fɩɩn a ‑glö 'sɩɩ bhelie. 9‑Mää 'ylʋzɔɔ', aa' laa ‑lä nyɩkpɔ a 'Bä, ‑mä a 'Bä ‑bhlü ‑bhlo. Ɔmɔɔ‑ plöö‑ lä 'Bäɔ ‑ɔ ‑kʋ lä ‑mɔɔ ‑Laagɔɔ' nä. 10Aa' gbä lä 'sɩɩ 'nɩ nyɩkpa 'kanyɩ laa nynä ‑mä 'Tienyɔ‑! Anyɩa' 'Tienyɔɔ ‑bhlü ‑bhlo. Ɔmɔɔ‑ plöö‑ lä Klisö. 11Anyɩa pää' ‑lɛ 'kädɔ nä, ɔmɔɔ‑ ‑lä 'plö anyɩa' ‑gänʋnyɔ. 12Nyɩkpɔ kä ɔ yëku 'kʋ bhɛlɩä nä, Laagɔ yio ‑dʋdʋkʋ ‑lä. ‑Mä nyɩkpɔ kä ɔ yëku ‑dʋdʋkʋ ‑lä nä, Laagɔ yio 'kʋ bhɛlɩä.

Zozii sä ‑Jlämöcɩanyʋa ‑yä Falizɩɛnyʋa 'sɔ ‑zɔɔ

13'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! A ‑mʋ 'nɩ a ‑gbaa a ‑liesɩ Laagɔɔ' 'Leyiduu' ‑blɔɔ 'yii. ‑Wa tään lä nynä wa 'kä Laagɔɔ' 'Leyiduu 'mnö plä nä, aa ŋoo ‑wʋ nynä wa plä ‑mɔɔ. 'Nɩ anyɩ 'titi, aa' mii ‑wʋ 'sɩɩ ‑mɔɔ' plälɩ.

[14'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! ‑Ɔnöza bhää? Kä a sä 'kuzëlü‑ŋwnɩaa' kääkäälɩɩ 'fɩɩn. 'Nɩ a kä 'sɩɩ bhibhie nä, a tlʋmä 'kpokposä 'mʋ ‑yä nyɩkpa 'kanyɩ 'yikʋ 'ŋʋʋ. Anyɩa' nʋnʋgbɩnɩ ‑kä 'ŋnö nä, 'titee Laagɔ 'kanyɩ lä 'ŋʋ nä, ɛ yi anyɩa' ‑za 'tɛmä.]

15'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! A ghlää jie 'klʋ, 'nɩ a ghlää ‑dʋdʋkʋ, 'nɩ a tään nyɩkpa anyɩa' Laagɔɔ' ‑za. A nʋ saa 'fɩɩn 'nɩ a ni ‑bhlo. ‑Mä a kɔ yɩ nii‑ nä, ka plüënöɔ 'Dëvloo' ‑kosu ‑düdëa 'mnö nyɩkpɔɔ'. 'Nɩ ‑lɔɔ' nyɩkpɔɔ nyumä 'sɩɩ 'nɩ ɔ zi'anyɩ 'kʋ 'ci 'sɔɔ.

16'Kplë ya'anyɩ slää! A ‑kʋ 'yikpüü 'nɩ a 'tie a ‑liesɩ. A kä ci nä, a lä Laagɔ‑bhutu 'kädʋʋ' 'ŋnöö 'mnö, nyɩkpɔ kä ‑zlügo nä, ɔɔ' zlügolɩɩ' ‑wʋ gba ‑kä. ‑Mä Laagɔ‑bhutuu 'kädʋʋ 'mnö moniee 'mɛ ɔ kä 'mʋ ‑zlügo nä, sä ɔ cii‑ lä nä, ɔ nʋ sɔɔ. 17Dëbënyʋa a plöö‑ lä, 'nɩ a ‑kʋ lä 'sɩɩ 'yikpüü'! Laagɔ‑bhutuu, ɩyä Laagɔ‑bhutuu' 'mnöö ‑sikaa 'sɔ nä, ‑ɔ kään bhä gbʋʋ? Laagɔ‑bhutuu 'mʋʋ‑ gbä lä 'nɩ ‑sikaa ‑kä lä gbaa 'nɩ a 'ŋɔmä lä 'kʋ Laagɔ dëlü.

18A ci 'sɩɩ nynä ‑ma, nyɩkpɔ kä 'cibhisädää' 'ŋnöö 'mnö ‑zlügo nä, ɔɔ' ciciwälɩɩ' ‑wʋ gba ‑kä. ‑Mä ɔ kä 'cibhisä‑mnɛɛ 'mʋ ‑zlügo nä, sɔ cii‑ lä nä, ɔ nʋ sɔɔ. 19'Yikpüü' kʋnyʋä ‑nyɩ! Laagɔɔ' 'cibhisäda 'mää‑ gbä lä 'nɩ ‑lɔɔ' mnɛɛ plöö‑ lä Laagɔɔ' lɛɛ 'nɩ ɛ ‑kä lä gbaa. 'Cibhisädaa ‑yä 'cibhisä‑mnɛɛ 'sɔ nä, ‑ɔ kään bhä gbʋʋ? 20Nyɩkpɔ kä Laagɔɔ' 'cibhisäda 'mʋ ‑zlügo nä, 'ŋʋʋ 'cibhisäda ‑yä 'cibhisä‑mnɛɛ, ɩmɩ 'sɔ ‑lɔɔ' nyɩkpɔɔ ‑zlügo lä 'mʋ. 21Nyɩkpɔ kä Laagɔ‑bhutu 'kädʋʋ 'ŋnöö 'mʋ ‑zlügo nä, Kwlienyɔ Laagɔ ‑ɔ kʋ lä ‑bhutuu 'mnö nä, ɔ ‑yä Laagɔ‑bhutuu 'sɔ, ɩmɩ ɔ ‑zlügo lä 'mʋ. 22'Nyukpɔ ‑laagɔnʋ ‑glö Laagɔɔ' 'leyi‑këkpë nä, nyɩkpɔ kʋ 'mʋ ‑zlügoo nä, Laagɔɔ' 'leyi‑këkpëa 'mʋ ɔ ‑zlügo lä 'mʋ. 'Nɩ ‑lɔɔ' nyɩkpɔɔ ‑zlügo lä 'sɩɩ 'leyi‑këkpëa' 'kʋ kʋnyɔɔ Laagɔ 'mʋ.

23'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! ‑Mayikɔɔ, ɩyä ‑kpäänjɛɛ, ɩyä 'yɛɛkpɩä ‑yä sɔɔ' ‑lɛɛ pɩtaa, a 'pɛɛ aa 'tigiti. ‑Mä ‑Jlämaa 'mnö wälɩklüü‑ ‑ŋwa lä 'kʋ nynä ‑mä ɩ nʋɔ 'nɩ kään lä gbʋ nä, aa' nʋɩ ‑wʋ. Aa' nʋ ‑wʋ 'yigëgbɩ. Aa' ‑wʋ plɛkʋmɛnɔ ‑kä, 'nɩ aa' ‑wʋ Laagɔɔ' pɔlötɛtɛ ‑kä. ‑Mänɩ ‑nɩnɩ 'mɩ a 'kä bhlä tɛɛ nʋ, ‑yä ‑lɩɩ a nʋ lä nä, a 'kɩ bhɛ ‑lɔɔ gbɛɛ. 24A 'tie nyɩkpa ‑mä aa' 'ni ‑wʋ sä anyɩ 'titi! Zɔkpɔye kä anyɩa' 'mʋ 'mnää‑kɔpʋʋ' ‑bhlüü nä, a nie 'yi wɩaa, 'nɩ a sɛɛ ‑mɔɔ. ‑Mä mnɛgwli bhlüü anyɩa' 'kɔpʋʋ 'nɩ aa' 'nie ‑wʋ 'yi 'nɩ a mnɛɛ ‑blɩɩ!

25'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! Anyɩa' 'kɔpɩɩ ‑yä anyɩa' ‑dɔkwɩɩ yëku a wɔɔ. ‑Bhlɛ ɩɩ' 'mnö yie anyɩa 'ghüghülɩɩ 'kʋ, 'nɩ ɩ yie‑ anyɩa ‑abhlɛlɩɩ 'kʋ. 26Falizɩɛyu‑! 'Yikpüü' kʋnyɔ‑! ‑Naa 'kɔpʋ ‑o, ‑naa ‑dɔkɔ ‑o, ‑n wɔnʋ 'fɩa 'mnö ‑nä! ‑N gä yɩ ‑mɔɔ ‑wɔɔ nä, ‑lɔɔ ʋʋ' yëku yi lä 'sɩɩ kplɔɔ.

27'Kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! A ‑kʋ nynä lësüü' lɩɩ wa ‑maa, 'nɩ wa ‑bʋä lä 'taa 'päpä nä. 'Taa‑ gbä lä 'nɩ ‑lɔɔ' lesüü ‑kplɔɔ lä. ‑Mä ‑mɔɔ ɩɩ' 'mnö nä, ‑gäzöö' 'fɔɔ ‑bhobhlo ‑kʋ lä ‑mɔɔ, ɩyä sɔɔ ‑lɛɛzɩɩ' 'yigädalɩɩ. 28Anyɩ ‑mä 'sɩɩ, sɔɔ a ‑kʋ lä. Nyɩkpa 'yikʋ nä, ka ‑kʋ lä nynä 'yigëgbɩɩ' nʋnyʋä. ‑Bhlɛ anyɩa 'mnö, ‑mɔɔ yie‑ ‑kpläkplä ‑yä gbenyenyi 'sɔ 'kʋ.

29‑Ɛɛɛ, 'kplë ya'anyɩ slää, anyɩ ‑Jlämöcɩanyʋä ‑yä Falizɩɛnyʋä! 'Kʋ wloo wloogbɩɩ' nʋnyʋänyɩ‑! Anyɩ‑ maa lä 'plɔfɛtɩnyʋa' lesi‑kpakpüü. Nyɩkpaa ‑wanö gbɩɩ gëë‑ lä Laagɔ dëlü 'yi nä, anyɩ‑ dido lä waa' lësi‑kpakpüü 30'nɩ a ci lä nynä ‑anyɩ nä, ‑a gä bhä ‑a tɩtɩä' 'bhlɛsʋʋ 'mnö ‑kʋmʋ nä, ‑a ‑yʋwa 'sɔ ‑lä bhɔɔ 'jɛnyɩ 'nɩ ‑a 'gä 'plɔfɛtɩnyʋa 'bhlä. 31A kä sɔɔ ci nä, kɩ sä lä ‑zɔɔ nynä ‑mä, 'plɔfɛtɩnyʋa, ‑wa bhlʋwa‑ lä nä, anyɩ‑ plöö‑ lä waa' 'yua. 32A nʋ ‑mä, sä a 'bäsɩ cie‑ bhlä 'kʋ nä, sɔɔ a ‑yi lä ‑zɔɔ bhɩä ‑kää! 33Anyɩa' 'mnö ‑nyunɔ ‑kʋ lä nynä ‑bhoomnɛ 'mnö ‑nyunɔ nä, säsä a yii bhä 'Dëvloo' ‑kosu ‑düdëa 'mnö nyɛnɩälɩɩ nëë' ‑bhaa? 34A poo'o yɩ 'nyukwli! A ni, n yi'anyɩ 'plɔfɛtɩnyʋä ‑lä. N yi'anyɩ ‑dɔɔpänyʋä ‑lä, 'nɩ n yi'anyɩ ‑jlämöcɩanyʋä ‑lä. A yi ‑nänʋä 'bhlä, a yi ‑nänʋä 'kusu 'yi bhoo, 'nɩ a yi ‑nänʋä bhütë. Gbenyenyinɩ, a yii Laagɔ‑bhitii 'mnö nʋʋ, 'nɩ a ‑yɩ 'sɔ yi 'sɩɩ 'di bhlü. 35‑Ɛɛɛ, ɩ yi sɔɔ kʋ ‑yä, nyɩkpaa ‑wanö doluu‑ ‑jɛɛ lä 'flɛ sä nä, a 'kä waa' 'kwiee dluu plʋʋ. Abɛlö, ‑ɔ plöö‑ bhlä 'yigëënyɔɔ nä, 'bhää yɩ ɔɔ' 'kwie 'tänyɩɩ ‑aaa ‑yä ŋëë yɩ Balasii ‑yowli Zakalii‑ wa 'bhlää‑ lä Laagɔ‑bhutu 'kädʋʋ ‑yä 'cibhisädaa 'sɔ pää' nä, ɔɔ' 'kwiee 'tänyɩɩ nä, nyɩkpaa 'fɩɩn ‑wa kuu‑ lä ‑lɔɔ nä, a yi waa' 'kwiee dluu plʋʋ. 36N sonö'anyɩ ‑nʋawlɛɛ 'mnö nynä wälɩnɩ n ci lä nä, 'bhlɛsʋnʋ 'mnö ɩ 'kä lä glää.

Zozii bhʋtʋ Zolizalɛmʋ‑duu' ‑za

(Lukö 13.34‑35)

37'Nɩ Zozii yi bhʋtʋlɩ 'kʋ cie, ɔ lä 'wee! Zolizalɛmʋ‑! Zolizalɛmʋ‑, ‑mɔɔ bhlä lä Laagɔɔ' 'plɔfɛtɩnyʋa! Nyɩkpaa Laagɔ ‑lobho‑o lä yëku nä, kä n pʋwa këkpü! Sä ‑kɔkɔɔgä 'wlää lä aa' yuë 'wlu 'nɩ a gbiwa lä 'kʋ nä, n ‑tään bhɛ 'flɛ nynä ‑mä n 'kä sɔɔ ‑naa 'yua 'wlu 'wlää ‑mä Zolizalɛmʋ‑dunyʋää' yɩɔ ŋoo‑! 38Nä, anyɩa 'gbëa 'mää‑ ‑kʋ ylä ‑lɔɔ oo! Aa' ‑lɛɛ kɔfʋʋ ‑ka! A yɩɔ nyɩkpɔɔ' ‑kʋ! 39'Nɩ n sonö'anyɩ 'sɩɩ nynä a nö'ö ‑läyɩɔ 'ni. A nö'ö ‑lä 'ni ‑aaa, 'nɩ ɩ yi 'tänyɩ nʋ! 'Tänyɩɩ a kä'ä ylä bʋkʋ 'ni nä, ka 'kä yɩ ci nynä ‑mä, ‑mɔɔ mɔ ‑ɔ yii lä Kwlienyɔ Laagɔɔ' 'ŋnöö 'mnö nä, 'nyupälɩ ŋënö‑ö 'kʋ!#23.39 Ɩ bha Lɔlɔ 118.26.

Currently Selected:

Matie 23: god

Highlight

Copy