Lukö 8

'Ŋwnɩä gëë‑ a Zozii 'kʋ

1‑Nɩnɩ 'fɩɩn plöö‑ ylä nä, kä Zozii ‑mʋ 'dii 'mnö, ɩyä ‑bhlüdüü 'kʋ, 'nɩ ‑mɔɔ' nyɩkpaa, ɔ sänʋwa bhä Laagɔɔ' 'Leyiduu' 'Nägädöö. Ɔɔ' 'kʋgënyʋa 'kʋgbä 'sɔ, ɔ ‑yʋwa 'sɔ nää bhä, 2‑mä 'ŋwnɩä zio ‑kʋmʋwa bhä 'pää. 'Ŋwnɩänä nä, kä Zozii ‑sʋwa bhä ‑zizinyenyii kätää', 'nɩ ɔ ‑yamänʋwa bhä 'sɩɩ. Waa pää' ‑bhlo plöö‑ bhä Malii, 'nɩ wa ‑zienöɔ bhä Madlɛɛ. Ɔmɔ Zozii ‑sä bhlä ‑zizinyenyii ‑ngbɔɔsɔ kätää'. 3'Loyo Elodöö' kääkäälɩɩ' 'kʋwlonyɔɔ wa laa bhlä Kuza nä, ɔ 'ŋnɔ 'Zanö ‑kʋmʋ bha. 'Ŋnɔɔ wa laa bhlä Suzanö nä, ɔ ‑kʋmʋ bhä 'sɩɩ. Sɔɔ 'ŋwnɩää' 'yigädalʋä ‑kʋmʋ bhä 'nɩ wa gëë‑ bhlä Zozii 'kʋ. 'Ŋwnɩa nä, wa bhlü bhä waa' kääkäälɩɩ 'kʋ, 'nɩ wa klää bhä Zozii ‑yä ɔɔ' 'kʋgënyʋa 'sɔ.

‑Lɛɛgonyɔɔ' gogolɩɩ' ‑nyädlaa

(Matie 13.1‑9; Makö 4.1‑9)

4'Ylʋʋ ‑bhlo ‑kʋ ‑lɔɔ 'nɩ, nyɩkpa ‑bhutukpä ‑bha 'dii nü nü nü 'kʋ, 'nɩ wa ‑yi 'nɩ wa 'wlää‑ Zozii yëku 'wlu. ‑Mä Zozii ‑sonʋwa ‑nyädlä, 5ɔ laa a ni ‑lɛɛgonyɔ ‑bhlo 'mɔɔ‑ ‑mʋ lä ‑lɛɛgoo ‑kää. Ɔ ‑kʋ lä goodä nä, ‑lɛɛyʋʋ' 'klë ‑bhlüü ‑blɔkʋ. ‑Mä 'plöplönyʋä ‑nämnönʋ 'kʋ, 'nɩ nümnü yiu lü. 6'Yigädalʋʋ ‑bhlüü cɛkwɩ‑dʋdʋ 'mnö 'nɩ ʋ wlʋʋ‑, ‑mä ʋʋ' ‑wʋ 'nyu nii‑ 'nɩ ʋ yi 'kʋ ‑si. 7‑Nʋnʋ ‑bhlüü nünëë' 'nɩ ʋ yä nünëa 'sɔ 'wlʋʋ‑ yëkuu, 'nɩ nünëa ‑yi 'nɩ a yiu 'wlu 'gbi. 8‑Nʋnʋ ‑bhlüü 'nägä‑dʋdʋʋ 'mnö. Ʋ wlʋʋ‑ lä nä, 'vä 'vä ‑tlʋ 'yʋyii' gwlɩ ‑ngbü. 'Nɩ Zozii yi ci, ɔ lä ‑ɔ gä 'nyukwli ‑kä nynä ɔ 'kä 'nu nä, ɔ 'nu!

Zozii ‑sä ‑lɛɛgonyɔɔ' ‑nyädlaa ‑zɔɔ

(Matie 13.10‑17; Makö 4.10‑12)

9'Nɩ ɔɔ' 'kʋgënyʋa yio soo nynä ɔ ‑sʋwa ‑nyädla ‑zɔɔ. 10'Nɩ ɔ yiwa soo, ɔ lä ɩ ‑ŋwa 'kʋ nynä ‑mä anyɩ, Laagɔ panö'anyɩ ʋʋ' 'Leyiduu' 'yiziziogbɩɩ' ‑zɔɔ. ‑Mä ‑mɔɔ' ‑lʋa nä, ‑nyädlöö' wa sonönʋwa.

Wa yi wloo,

'Nɩ waa' ‑lä sä 'ni.

Wa yi 'nyukwli poo

'Nɩ waa' ‑lä 'nu. # 8.10 Ɩ bha Eza 6.9.

11A ni ‑nyädlaa' ‑zɔɔ! Gogolɩɩ nä, ɩmɩɩ‑ plöö‑ lä Laagɔwälɩɩ. 12Gogolɩɩ ‑ɩ ‑bhlüü lä ‑blɔ ‑gbäkö nä, kɩ pana lä nynä nyɩkpaa' ‑nänʋä ‑kʋ ‑lɔɔ 'nɩ, wa nu Laagɔwälɩɩ, ‑mä 'Dëvlo yi 'nɩ ʋ sʋwanyɩ pleyii. Kä 'Dëvlo nʋ lä sɔɔ ‑yä, lɔɔ' nyɩkpaa' kä ‑kä pɔlötɛtɛ kää, ɩyä waa' kä ‑kä ‑lɔɔ nëë ‑bha. 13Gogolɩɩ ‑ɩ ‑bhlüü lä cɛkwɩ‑dʋdʋʋ 'mnö nä, kɩ pana lä nynä nyɩkpaa' ‑nänʋä ‑kʋ ‑lɔɔ 'nɩ wa nu Laagɔwälɩɩ, 'nɩ wa 'bhlünɩ ‑pʋpɛɛ' 'kʋ. ‑Mä ‑lɔɔ' nyɩkpaa nä, waa' Laagɔwälɩɩ' 'ŋʋ ‑wʋ sikplii. Wa ‑kä pɔlötɛtɛ 'föö, ‑mä ‑zɔɔpälɩɩ kä ‑yi nä, kwa sä Laagɔ gwë. 14Gogolɩɩ ‑ɩ ‑bhlüü lä nünëa 'mnö nä, kɩ pana lä nynä nyɩkpaa' ‑nänʋä ‑kʋ ‑lɔɔ 'nɩ, wa nu Laagɔwälɩɩ. ‑Mä 'ylʋzɔɔ' bhobholɩɩ, ‑yä ‑mɔɔ' leylüü, ɩyä ‑mɔɔ' 'yii mɛnɔɔ, ɩ gbi Laagɔwälɩɩ 'wlu. Ɩ gbä nä, Laagɔwälɩɩ' tlʋ ‑wʋ 'bhü, 'nɩ ɩ 'kä zää. 15Gogolɩɩ ‑ɩ ‑bhlüü lä 'nägä‑dʋdʋʋ 'mnö nä, kɩ pana lä nynä nyɩkpaa' ‑nänʋä ‑kʋ ‑lɔɔ 'nɩ, wa nu Laagɔwälɩɩ, 'nɩ wa 'bhlünɩ 'titi pɔlö 'nänɛ 'mnö 'kʋ, 'nɩ wa bhɛnönɩ plɛkʋmɛnɔɔ 'mnö pleyi. Nä, wa ‑kä 'kɔɔkɔ Laagɔɔ' pɔlötɛtɛ, 'nɩ wa tlʋ 'bhü.

'Näpɛɛ ‑nyädlaa

(Makö 4.21‑25)

16Nyɩkpɔ kä 'näpɛ 'yi döö nä, ɔɔ' ŋwɛnɩɛ ‑wʋ 'kʋ. Ɔɔ' tlʋnɩɛ ‑wʋ 'sɩɩ ‑bɔɔgɩ ‑zɔɔ, ‑mä zëkpë 'kʋ ɔ ŋʋɛ ‑yä, nyɩkpaa ‑wa plä lä gbëë' nä, ɛ 'kwa 'kʋ ŋänɩä. 17Nä, ‑lɩɩ 'fɩɩn ‑ɩ ‑zizio bhlä 'kʋ nä, ɩ yi 'yi nio. 'Nɩ ‑lɩɩ 'fɩɩn ‑ɩ nʋɔ bhlä ‑kotu 'kʋ nä, ɩ yi zëkpë 'kʋ ghlä. 18Nä, sä a poo lä 'nyukwli nä, a fä sɔɔ plɛkʋ! Nyɩkpɔɔ' lɔɔ‑ ‑kä lä nä, wa yio bʋkʋ 'nyɛ. ‑Mä ‑ɔɔ ‑wʋ lä ‑kä nä, sä ɔ bhobho lä nynä ɔ ‑kä nä, wa yio sɔɔ ‑sä.

Zozii' nyʋä

(Matie 12.46‑50; Makö 3.31‑35)

19‑Lɔɔ' 'tänyɩɛ 'mnö Zozii, ɔ ‑nɔɔ ‑yä ɔ bhelie 'sɔ ‑yio 'yi 'ni kää, ‑mä nyɩkpaa ‑zu bhlä kpänyɩ nä, waa' ‑wʋ mii‑ 'nɩ wa 'kɔ yëku ‑ŋëë. 20'Nɩ nyɩkpa yio 'dö ‑lä, wlä ‑n ‑nɔɔ ‑yä ‑n bhelie 'sɔ, wa ‑kʋ ‑mɔɔ jlukʋ, wlä wa 'kä‑ä 'yi 'ni. 21‑Mä Zozii ‑sonʋwa, ɔ lä ‑wa poo lä Laagɔɔ' wälɩɩ 'nyukwli, 'nɩ ‑wa nʋ lä sɩ ylä lä nä, wamää‑ plöö‑ lä n 'nɔ, 'nɩ ‑wa plöö‑ lä 'sɩɩ n bhelie.

Zozii ‑gbä 'nɩ 'nyie 'klʋ ‑vʋvɔlʋ doo‑

(Matie 8.23‑27; Makö 4.35‑41)

22Ylʋʋ ‑bhlo ‑kʋ ‑lɔɔ 'nɩ Zozii ‑plä 'gokpë, ɔ ‑yä ɔɔ' 'kʋgënyʋa 'sɔ. Ɔ ‑sonʋwa, ɔ lä a ‑ya mʋ ‑mɔɔ 'nyie klëë' 'nyigbëa 'kʋ! 'Nɩ wa yi yɩ ‑mɔɔ mʋlɩ 'kʋ cie. 23‑Mä wa ‑kʋ lä mʋdä na, Zozii ŋɔɔ‑ 'nɩ dide 'kädɛ cie‑ yilɩ 'kʋ 'nɩ 'gokpëa yie bhä 'nyuu 'kʋ. Wa yä bhɛ mie! 24'Nɩ 'kʋgënyʋa yio gälɩä wlä Cɩanyɔ‑! Cɩanyɔ‑! Kä ‑a ku lä! ‑Mä Zozii ‑glɔɔ lä nä, kɔ 'ŋʋʋ didee ‑vʋvɔlʋʋ 'yizlɛ 'kʋ nynä ʋ doo yɩ. 'Nɩ 'nyilakwɩɩ yi ‑dʋdʋkʋ yi, 'nɩ ‑dʋdʋkʋ yi 'plö ‑siin! 25'Nɩ ɔ yi ɔɔ' 'kʋgënyʋa 'ylä, ɔ lä anyɩa' pɔlötɛtɛɛ, ‑a sɛ bhä? ‑Mä ‑ŋänö ‑plʋwa, 'nɩ plɛkʋ 'niniwa‑ 'sɩɩ nä wa sonö sonö bhɛ, wlä ‑maa, nyɩkpɔɔ' 'cësa bhä 'titi 'nɩ ɔ soo bhä ‑vʋvɔlʋ ‑yä 'nyie 'sɔ 'nɩ ɩ ŋʋɔ bhä 'klʋkpää?

Zozii ‑sä nyɩkpɔ ‑zizinyenyi ‑bhutukpä kätää'

(Matie 8.28‑34; Makö 5.1‑20)

26Wa tɔɔ‑, 'nɩ wa yi Zɛlazɛnɩɛ‑nyʋaa' 'bhlɩɛ 'mnö ŋëë. Zelazɛnɩɛ‑nyʋaa'#8.26 Zelazɛnɩɛ‑nyʋaa: Waa' 'duu 'mʋ wa laa Zelaza. 'Glɛkönyʋaa' ‑gɔgɔbhlää' 'bɔɔgwɩɩ ci 'sɩɩ nynä 'nɩ wa yi Gadalɛnö‑nyʋaa' 'bhlɩɛ 'mnö ŋëë. 'bhlɩɛ nä, kɛ ‑yä Galilee‑bhlɩɛ 'sɔ 'tënö‑ ‑mä 'nyiee‑ säsänɩ bhä. 27'Gokpëa pɛɛ‑ lä gää, 'nɩ Zozii kwlii‑ lä nä, kä 'duu 'mnö nyɩkpɔ ‑bhlo ‑yio ‑blɔkʋ. ‑Mä nyɩkpɔɔ nä, ‑zizinyenyi bhutukpä ‑kʋɔ bhä kätää'. Ɔɔ' plä bhɔɔ lä 'kotu nä, ɩ yä bhɛ 'mʋ gwlɛɛ. Ɔɔ' goo bhɔɔ 'sɩɩ ‑bhutuu', ‑mä lesigwlëë' ɔ goo bhä. 28Ɔ nii‑ lä Zozii 'yi nä, kɔ gaa‑ 'mʋ, 'nɩ ɔ yio dëlü bhlüü‑. 'Nɩ ɔ yi woo, ɔ lä Zozii‑, 'Kʋzi Laagɔ ‑Yowli! Wälɩ‑ ‑sä ‑n 'ylänö'ö bhää? Bheeje, n ‑slä‑ä 'wlu, ‑naa ŋʋ'ʋ lä ‑jämɩɩ'! 29Kä Zozii soo bhlä ‑zuzunyënyuu nynä ʋ ‑bha nyɩkpɔɔ kätää' nä, 'ɩɩ ‑zä ʋ ci bhlä sɔɔ. ‑Zuzunyënyuu ‑kʋɔ lä kätää' nä, ‑lɔɔ yä bhɛ 'mʋ gwlɛɛ. Nyɩkpɔɔ nä, wa bhlü bhä 'wäyä 'kʋ 'nɩ wa gʋɔ, 'nɩ wa ŋʋɔ bhä 'sɩɩ kpü bhɩɩ'. ‑Mä ɔ dö 'wäyöö, 'nɩ ‑zizinyenyii fɔɔ 'popie 'mnö.

30'Nɩ Zozii yio 'ylä, ɔ lä ‑naa 'ŋnö bhää? Nyɩkpɔɔ lä 'naa 'ŋnöö‑ plöö‑ lä, ‑Aa ‑Wʋ 'Bɛ. ‑Zizinyenyi ‑bhutukpä ‑kʋɔ bhlä kätää' nä, ɩɩ' ‑zä ɔ ci bhlä sɔɔ. 31'Nɩ ‑zizinyenyi yi Zozii 'wlu slä nynä ɔɔ' 'tlünɩɩ ‑lä ‑mɔɔ nyäkälɩɩ' ‑gbazlʋʋ 'mnö. 32Bholuzakpö 'kädä ‑kʋ bhä ‑lɔɔ 'kükë 'wlu, 'nɩ ɩ lü bhä. 'Nɩ ‑zizinyenyi yi Zozii 'wlu slä nynä ɔ gbä ‑yä ɩ 'kä bholuzälöö 'mnö plä. 'Nɩ ɔ yii ‑blɔ 'nyɛ nynä ɩ mʋ ‑mɔɔ. 33Ɩ ‑kä 'ŋnö 'nɩ ɩ ‑bha nyɩkpɔɔ kätää' 'nɩ ɩ yi bholuzakpaa 'mnö plä. Ɩ ‑plaa lä 'mnö nä, 'kükëa' ‑kpʋkpʋʋ, bholuzälönö kwlinʋ‑ sämɩɩ' 'nɩ ɩ ‑jɛɛ 'nyibhlëa 'mnö 'nɩ 'nyie yii 'bhlä.

34‑Mä nyɩkpaa ‑wa ‑lä bhlä bholuzälöö 'kʋ lü ‑kää nä, wa nii‑ lä wälɩɩ ‑ɩ plöö‑ lä 'kʋ nä 'yi nä, kä wa guu‑, 'nɩ wa yi duu' ‑yä ‑bhlüdüü 'kʋ 'dö fä. 35Ɩ ‑kä bhä 'ŋnö 'nɩ nyɩkpa ‑bha ‑mɔɔ 'nɩ wa yi wloo ‑kää. Wa ‑yi lä nä, wa lä wa wloo nä, nyɩkpɔɔ ‑zizinyenyii ‑bha lä kätää' nä, ɔ ‑kʋ bhɛ Zozii yëku sä. Ɔ yä bhɛ yamä nä, ɔ ‑plä bhɛ 'kotuu'. Ɩ ‑gbä 'nɩ ‑ŋänö yiwa plä. 36‑Wa 'nii‑ bhlä ‑lɔɔ nä, sɩ plöö‑ lä 'kʋ 'nɩ ‑zizinyenyii ‑bha lä nyɩkpɔɔ kätää' nä, wa sää bhä ‑lɔɔ 'döö. 37Ɩ ‑kä 'ŋnö nä, Gadalɛnö‑bhlɩɛ 'mnö nyɩkpaa 'fɩɩn, ‑ŋänö ‑plʋwa kpänyɩ. 'Nɩ wa yi Zozii 'wlu slä nynä ɔ ‑bha waa' 'bhlɩɛ 'mnö. Ɩ ‑gbä yɩ 'nɩ ɔ ‑plä 'gokpëa 'nɩ ɔ yi 'ylɩbhɔ. 38‑Mä ɔ 'kä lä 'ylɩbhɔ nä, nyɩkpɔɔ ‑zizinyenyii ‑bha bhlä kätää' nä, kɔ ‑yi 'nɩ ɔ ‑slä Zozii 'wlu nynä ɔ ‑yɔsɔ 'kä nää. ‑Mä Zozii' ‑wʋ ŋoo‑. Kɔ ‑sonöɔ, ɔ lä 39‑n 'ylɩbhɔ ‑yä, ‑n mʋ ‑naa nyʋä nëëdë, ɩyä sä Laagɔ ‑nʋ lä ‑naa ‑zaa nä, ‑n ‑sänʋwa sɔɔ! Ɔ cii‑ lä sɔɔ nä, kä nyɩkpɔɔ ‑mʋ yɩ. Ɔ ‑mʋ 'nɩ ɔ ‑bhlü 'duu 'nɩ ɔ ‑soo ‑mɔɔ' nyɩkpaa sä Zozii ‑nʋ lä ɔɔ' ‑za nä.

Zayilusö ‑yɔŋnɔ ‑glɔɔ 'kuëë 'nɩ 'ŋnɔ taa‑ Zozii 'nɩ ɔ ‑yamä

(Matie 9.18‑26; Makö 5.21‑43)

40Zozii 'ylɩbhɔ‑ ylä nä, nyɩkpaa ‑bhutukpä ‑bɛnöɔ bhä, 'nɩ wa yio 'kʋ gboo ‑kää yi. 41‑Mä nyɩkpɔ ‑bhlo ‑yio yëku. Ɔmɔ wa laa bhä Zayilusö. Ɔ ‑glö bhä Laagɔ‑bhutuu' 'kämänyɔ. 'Nɩ ɔ yi Zozii dëlü ‑kokoowli glu 'pä, 'nɩ ɔ yio 'wlu slä nynä ɔ yi ɔɔ' ‑gbäsɩɩ. 42Zayilusö ‑kä bhä 'ylʋbɔ 'kʋgbä 'sɔɔ 'yuŋnʋgbänyɔ. Ɔmɔ ‑bhlo 'coo ɔ ‑kä bhä. 'Yunɔ nä, ɔ ‑kʋ bhä 'kwie numnu 'kʋ. ‑Ɔ ‑too bhɛ 'pɛpɛ ‑yä ɔ 'kä bhɛ nyämʋ sä pää.

Nä, Zozii ‑kʋ bhɛ lä ‑mɔɔ mʋdä nä, nyɩkpa ‑bhutukpä 'mɩmɩänöɔ‑ bhä 'kʋ 'nɩ wa sɩɔsɩɔnöɔ bhä. 43‑Mä 'ŋnɔ ‑bhlo ‑kʋ a ‑lɔɔ, ɩ nʋ bhɛ 'ylʋbɔ 'kʋgbä 'sɔ 'nɩ dolu kwlinöɔ bhlä. Ɔɔ' kääkäälɩɩ 'fɩɩn ɔ yɩ bhɛ ‑dɔtönyʋä 'nyɛ nynä wa 'kɔ ‑kä yamä. ‑Mä nyɩkpɔɔ' ‑wʋ mii‑ 'nɩ ɔ 'kɔ ‑yamä. 44'Ŋnɔnɔ ‑ghlää Zozii 'wuklë, 'nɩ ‑ɔ yi ɔɔ' ‑bänaa' numnuu 'taa. ‑Mä sä ɔ 'tanʋ lä 'gää nä, doluu ‑ʋ kwlinöɔ bhlä nä, kʋ doo‑ 'kʋ. 45Zozii lä ‑ɔ 'tanö'ö bhää? ‑Mä ɔ cii‑ lä sɔɔ nä, nyɩkpɔ nyɩkpɔ sä bhɛ ɔ yëku gbʋʋ'. Pɩɛlö lä Cɩanyɔ‑, 'nɩ nyɩkpaa ‑zu 'nɩ wa sɩɔsɩɔnö‑ö lä ‑nä! 46Zozii lä n nä nyɩkpɔ yä'ä 'taa. 'Naa 'yɛkɛɛ 'mnö 'tɛtɩ ‑bhaa ‑mɔɔ. 47‑Mä 'ŋnɔɔ ‑yibhë lä sɔɔ nynä Zozii yä sɔɔ yibhë nynä wa 'tanöɔ nä, ɔɔ' ‑lɔɔ yëku tɩtɛ bhɛ nä, kɔ ‑yi 'nɩ ɔ yi Zozii dëlüü bhlüü. 'Nɩ wälɩɩ ‑ɩnö ‑zä ɔ 'tanöɔ‑ lä nä, 'nɩ sɩ plöö‑ lä 'kʋ 'nɩ ɔ ‑yamä lä 'kpobhuu ‑bhlo 'kʋ nä, 'ŋnɔɔ yi sɔɔ 'mʋ ‑säsä nyɩkpa 'fɩɩn 'klʋ. 48Ɔ cii‑ lä sɔɔ nä, 'nɩ Zozii yio soo, ɔ lä 'naa 'yunɔ, ‑naa pɔlötɛtɛɛ yä‑ä puë ‑mä ‑n mʋʋ 'kʋ wɔtɔlɩɩ!

49‑Mä wälɩɩ ‑kʋ ‑bhlɛ Zozii nëë' 'nɩ nyɩkpɔ ‑bhlo yi Laagɔ‑bhutuu' nëkʋ kʋnyɔɔ' ‑gbäsɩɩ ‑bha, 'nɩ ɔ yi yi. Ɔ ‑yi lä nä, kɔ ‑soo Zayilusö, ɔ lä Zayilusö ‑naa bhɩä ‑läyɩɔ 'flɛ Cɩanyɔɔ 'kwlɩ ‑mä ‑n ‑yɔŋnɔ yä 'ku! 50Zozii nuu‑ lä wälɩɩ nä, kɔ ‑soo Zayilusö, ɔ lä ‑n 'ŋʋ ‑mɔɔ plɛ ‑yä ‑n 'tɛnö'ö dë, ‑mä ‑naa 'yuo yi ‑lɔɔ nëë' ‑bha.

51Zozii ‑ŋëë ylä Zayilusöö' ‑gbäsɩɩ nä, kɔ laa‑ ɔɔ' 'kʋgënyɔ Pɩɛlö, ‑yä Zään, ‑yä Zakö. Ɔ laa‑ 'sɩɩ 'yuo ɔ 'bä ‑yä ɔ 'nɔ. 'Nɩ ɔ ‑yʋwa 'sɔ yi ‑mɔɔ ‑bhutuu' plä. 52‑Mä nyɩkpa 'fɩɩn‑ kʋ bhlä ‑lɔɔ nä, wa tu bhä, 'nɩ wa bhʋtʋ bhä 'yuoo' 'kwiee ‑za. 'Nɩ Zozii yiwa soo, ɔ lä aa' 'tu ‑lä ‑mä, ɔɔ' ‑wʋ kuu‑! Kɔ ŋɔɔ lä! 53‑Mä Zozii cii‑ lä sɔɔ nä, ‑wa ‑yi bhlä 'sɔɔ nynä 'yuo yä 'ku nä, wa nyɩänöɔ bhɛ.

54'Nɩ Zozii yi nyɩkpaa 'fɩɩn ‑zɔɔ wlʋa. 'Nɩ ɔ yi 'yuo sɔ klä, 'nɩ ɔ yi ci 'fɩ 'tɛtɩɩ', ɔ lä n ‑yɔŋnɔ, ‑n ‑bha yɩ 'kʋ! 55‑Mä ɔ cii‑ lä gää sɔɔ nä, kä 'yuoo' nyämʋʋ ‑yi. 'Nɩ ɔ yi 'kʋ ‑bha. 'Nɩ Zozii yi ɔ 'nɔ ‑yä ɔ 'bä 'sɔ soo nynä wa 'nyɛ 'yuo lülülɩɩ ‑yä ɔ 'kä lü. 56‑Mä 'yuo ɔ 'nɔ ‑yä ɔ 'bä 'sɔ nëë' ‑yɩwa. 'Nɩ Zozii yiwa ‑kɔkwɩ bhoo nynä 'klüü‑ plöö‑ lä 'kʋ nä waa' ‑sänɩ ‑lä nyɩkpɔ.

Currently Selected:

Lukö 8: god

Highlight

Copy