Lukö 3

Zään Badisö soo nyɩkpa nynä wa 'cɩcɩ nʋnʋgbɩ

(Matie 3.1‑12; Makö 1.1‑8; Zään 1.6‑8,19‑28)

1Lɔɔ' 'tänyɩɛ 'mnö nä, 'loyo 'kädɔɔ Tibɛɛ, ɩ nʋ bhɛ 'ylʋbɔ 'kʋgbä ‑ngbü, 'nɩ ɔ 'kämää bhlä 'bhlɩɛ 'fɩɩn. ‑Gɔmnä 'Pɔsö Pilatö 'kämä bhä Zudee‑lëkpëa. ‑Gɔmnä Elodö 'kämä bhä Galilee ‑lëkpëa. Ɔ bheli‑ wa laa bhlä Filipʋ nä, ɔmɔɔ‑ plöö‑ bhlä Yitulee‑lëkpëa ‑yä Tlakonitö‑lëkpëa' ‑gɔmnä. 'Nɩ ‑gɔmnɔɔ wa laa bhlä Lizanɩasö nä, ɔ 'kämä bhlä Abilɛnö‑lëkpëa. 2Anö ‑yä Kayifʋ 'sɔ, wamää‑ plöö‑ bhlä ‑lɔɔ' 'tänyɩɛ 'mnö 'Cibhisänyʋä 'kädʋä. 'Nɩ Zakalii ‑yowli Zään Laagɔ yio lä ‑mɔɔ 'popie 'mnö soo. 3'Nɩ Zludɛɛ‑nyie yëkuu' 'bhlɩɛ 'fɩɩn, Zään yie lä bhlülɩ 'kʋ cie. Ɔ pä bhä wälɩ 'nɩ ɔ ci bhä, ɔ lä a 'cɩcɩ anyɩa' nʋnʋgbɩɩ ‑yä a ŋʋɔ 'nyu 'wluɩyä Laagɔ 'kanyɩ nyenyi cie. 4Sää ɩ ‑jɩjlɔ lä ‑mɔɔ 'plɔfɛtɩ Ezayii' 'bɔɔgʋʋ 'mnö nynä ‑mä

Nyɩkpɔ woo ‑mɔɔ 'popie 'mnö,

'Nɩ ɔ ci, ɔ lä

A göglä Kwlienyɔɔ' ‑dʋdʋkʋ!

Ɩyä a gëë ɔɔ' ‑blɔɔ 'yii!

5 A ni ‑gbazlɩɩ 'fɩɩn yi sʋɔ.

'Küküü ‑yä 'kpakpüü 'fɩɩn yi tɛnöɔ

'Nɩ ɩ yi ‑dʋdʋkʋ ‑lɔɔ.

‑Bɔlɩɩ ‑ɩ ‑cɩcɩɔ bhlä 'kʋ nä,

Ɩ yi 'yi gëë.

'Nɩ ‑bɔlɩɩ ‑ɩ ‑nyu bhlä 'kʋ nä,

Ɩ yi 'kʋ göglɔ

6 ‑Yä sä Laagɔ ylä lä nynä

Ʋ 'kä 'ylʋzɔkʋnyʋä ‑lɔɔ nëë ‑sä nä,

Nyɩkpaa 'fɩɩn 'kä sɔɔ 'yi 'ni. # 3.4‑6 Zɛɛ 'sɩɩ Eza 40.3‑5.

7‑Lɔɔ' tänyɩɛ 'mnö nä, nyɩkpa ‑bhutukpä yi bhä Zään yëku ‑yä ɔ 'kwa 'nyu 'wlu 'ŋʋ. 'Nɩ Zään sonʋwa bhä, ɔ lä ‑bhoomnä‑nyɩkpanyɩ‑! ‑Ɔ ‑sonö'anyɩ bhä ‑pɛɛ nynä ‑mä, Laagɔɔ' gbʋgblɛylʋʋ ‑ʋ yi lä nä, a ‑guu nʋʋ? 8A pana anyɩa' nʋnʋgbɩɩ 'mnö nynä ‑mä a yä 'cɩcɩ! A 'nä kʋ lä 'flɛ ‑lɔɔ 'nɩ a 'kä ci nynä ‑anyɩ, ‑a tötɔ‑ plöö‑ lä Ablaamʋ! Kä n mʋ'anyɩ yɩ soo ‑kää nynä ‑mä, Laagɔ kä ‑waa nä, ʋ yi cɛkʋbhünö 'kʋ 'bhlü 'nɩ ʋ yi Ablaamʋʋ' 'yuë wlʋa. 9A ni ‑dobhɛɛ yä wɛzä suu 'mnö 'ŋʋ. Kɛ 'kʋ ylä yiosä sikplii 'kʋ ‑sä! Suu' lʋʋ‑ tlʋ ‑wʋ lä 'bhü 'nänö nä, wa yiu 'kʋ ‑döö, 'nɩ wa yiu ‑kosuu' 'ŋʋ.

10Zään cii‑ lä sɔɔ nä, nyɩkpaa lä nä, sä ‑a yi bhä ‑pɛɛ nʋʋ? 11Ɔ lä ‑ɔ gä 'kwëti 'sɔ ‑kä nä, ɔ ‑liee' lɔɔ ‑ɔɔ ‑wʋ lä ‑kä nä, ɔ 'nyɩɔ lʋʋ ‑bhlo! 'Nɩ nyɩkpɔɔ' lɔɔ ‑ɔ ‑kä lä lülülʋʋ nä, ɔ ‑lie lɔɔ ‑ɔɔ ‑lä ‑kä nä, ɔ 'nyɛmʋɔ!

12Naa, lapoo‑ylänyʋä ‑yimʋ bhä 'sɩɩ ‑lɔɔ, ‑yä wa 'kä 'nyu 'wlu 'ŋʋmʋ. 'Nɩ wa yi Zään 'ylä, wlä 'nɩ ‑anyɩ, Cɩanyɔ‑, säsä ‑a yi bhä nʋʋ? 13'Nɩ ɔ yiwa soo, ɔ lä lapoo' ‑lʋʋ wa lobhu'anyɩ lä 'kʋ nä, ʋmʋ a la 'ylää nyɩkpa ‑mä aa' 'pänʋ ‑lä 'kʋ!

14'Sʋjä ‑kʋ bhä 'sɩɩ ‑lɔɔ, 'nɩ wa yio 'ylä, wlä 'nɩ ‑anyɩ, säsä ‑a ‑la nʋ bhää? Zään lä a 'nä 'nyɛɛ lä nyɩkpɔ 'flɛ ‑flɛ gbʋ! A 'nä fä lä nyɩkpɔ 'fɩ 'kʋ ‑yä, a 'kä ɔɔ' kääkäälʋʋ ‑sä! Sä wa 'pɛɛnö'anyɩ lä nä, sɔɔ ‑bhlo ‑lä 'plö anyɩa dä.

15Nyɩkpaa‑ ‑bɛɛ bhlä Klisöɔɔ' yi‑tänyɩɛ nä, wa ylä bhɛ wa yëku, wlä ‑maa, Klisöɔ, Zään‑ 'nöɔ bhä plöö ‑a? 16Ɩ ‑kä 'ŋnö 'nɩ Zään ‑sonʋwa, ɔ lä ‑amʋ nä, 'nyu 'wlu n ŋʋ'anyɩ lä. ‑Mä nyɩkpɔɔ ‑ɔ yi'i lä klë nä, ɔ ‑kä 'tɛtɩ 'nɩ ɔ ‑zi'i. Nn' ‑wʋ sää 'titi 'kʋ ‑ŋwa nynä ‑mä n 'tɔsɔ ɔɔ' 'süü' 'bhliye. Ɔmɔ nä, Kplɔɔkplɔɔ‑wugɔ ‑yä ‑kosu 'sɔ ɔ 'kanyɩ lä 'wlu 'ŋʋ. 17Ɔ bhɛɛ‑ ɔɔ' bɩtɛɛ ‑yä ɔ 'kä 'mʋ poo, ɩyä flɩɩ ‑yä 'yʋʋ 'sɔ, ɔ 'kɩ ‑säsä. 'Yʋʋ nä, ɔ 'kʋ wëlüklüü' 'ŋʋ, ɩyä flɩɩ, ɔ 'kɩ ‑kosuu' 'pä ‑yä ɩ 'kä si. 'Nɩ ‑lɔɔ' ‑kosuu nä, ʋʋ' ‑lä 'kɔɔn ŋomo.

18Laagɔɔ' 'Nägädöö nä, sää Zään sänɩ bhlä 'nɩ ɔ soo bhlä nyɩkpa.

Elodö ŋʋʋ‑ Zään Badisö ‑jɩɩ'

(Matie 14.3‑4; Makö 6.17‑18)

19‑Mä 'tänyɩ ‑kʋ ‑lɔɔ 'nɩ Galilee‑bhlɩɛɛ' 'loyoo, Elodö, ɔ ‑sä ɔ bhelii' 'ŋnɔɔ, Elodɩadö, 'nɩ ɔ nönöɔ‑. Elodönɔ ‑nʋ bʋkʋ 'sɔɔ wälɩ‑nyenyi ‑bhutukpä. Nä, ɩ ‑kä 'ŋnö 'nɩ Zään ‑bhuo ‑kɔkwɩ. 20Wälɩklü‑nyënyëa Elodö ‑gbɛɛ ylä bʋkʋ ‑lɔɔ nä, amää‑ plöö‑ lä nynä ‑mä, ɔ ‑klä Zään 'nɩ ɔ ŋʋɔ‑ ‑jɩɩ'.

Zään ŋʋʋ‑ Zozii 'nyu 'wlu

(Matie 3.13‑17; Makö 1.9‑11; Zään 1.32‑34)

21Dä Zään ŋʋ bhlä nyɩkpaa 'nyu 'wlu nä, Zozii ‑yimʋ 'sɩɩ ‑lɔɔ, 'nɩ Zään yio 'nyu 'wlu 'ŋʋ. Nä, Zozii bhibhie bhɛ 'nɩ ‑laagɔɔ' ‑känöɔ 'klʋ, 22'nɩ Kplɔɔkplɔɔ‑wugɔɔ yio 'kʋ kwlii nynä 'kpaakpu. 'Nɩ nuwälɩ yi ‑laagɔɔ' ghlää, ɩ lä ‑n ‑glö 'naa ‑Wawayu! Kä ‑naa plɛkʋ mɛnö'ö kpänyɩ.

A ni Zozii' 'lɔlʋnyʋaa' 'ŋnöö

(Matie 1.1‑17)

23Zozii ‑kä bhä yiosä 'ylʋbɔɔ' glʋ 'nɩ 'kʋgbä, 'nɩ ɔ cie‑ lä ɔɔ' lebhee 'kʋ. Kä nyɩkpa bhobho bhä nynä ‑mä Zozii ‑glö Zozɛfʋʋ' 'yu. Zozɛfʋ nä, ɔ ‑glö bhä Elii' 'yu. 24Elii ‑glö bhä Matatöö' 'yu, 'nɩ Matatö ‑glö bhä Levii' 'yu. Levii ‑glö bhä Mɛlɩkii' 'yu, 'nɩ Mɛlɩkii ‑glö bhä Yanayii' 'yu. Yanayii ‑glö bhä Zozɛfʋʋ' 'yu, 25'nɩ Zozɛfʋ ‑glö bhä Matatiasöö' 'yu. Matatɩasö ‑glö bhä Amɔsʋʋ' 'yu, 'nɩ Amɔsʋ ‑glö bhä Nayumöö' 'yu. Nayumö ‑glö bhä Yeslii' 'yu, 'nɩ Yeslii ‑glö bhä Nagayii' 'yu. 26Nagayii ‑glö bhä Matöö' 'yu, 'nɩ Matö ‑glö bhä Matatiasöö' 'yu. Matatɩasö ‑glö bhä Sɛmɛyii' 'yu, 'nɩ Sɛmɛyii ‑glö bhä Zosɛsö 'yu. Zosɛsöö' ‑glö bhä Zodaa' 'yu, 27'nɩ Zodaa ‑glö bhä Yowanaa' 'yu. Yowana ‑glö bhä Lesaa' 'yu, 'nɩ Lesaa ‑glö bhä Zolobabɛɛ' 'yu. Zolobabɛɛ ‑glö bhä Salatɩyɛɛ' 'yu, 'nɩ Salatiyɛɛ ‑glö bhä Nelii' 'yu. 28Nelii ‑glö bhä Mɛlɩkii' 'yu, 'nɩ Mɛlɩkii ‑glö bhä Adii' 'yu. Adii ‑glö bhä Kosamʋʋ' 'yu, 'nɩ Kosamʋ ‑glö bhä Ɛmadamʋʋ' 'yu. Ɛmadamʋ ‑glö bhä Ɛlʋʋ' 'yu 29'nɩ Ɛlʋ ‑glö bhä Zozii' 'yu. Zozii ‑glö bhä Eliezɛɛ' 'yu, 'nɩ Eliezɛɛ ‑glö bhä Zolimʋʋ' 'yu. Zolimʋ ‑glö bhä Matatöö' 'yu, 'nɩ Matatö ‑glö bhä Levii' 'yu. 30Levii ‑glö bhä Simeyɔɔ' 'yu, 'nɩ Simeyɔɔ ‑glö bhä Zudaa' 'yu. Zudaa ‑glö bhä Zozɛfʋʋ' 'yu, 'nɩ Zozɛfʋ ‑glö bhä Zonamʋʋ' 'yu. Zonamʋ ‑glö bhä Eliakimʋʋ' 'yu, 31'nɩ Eliakimö ‑glö bhä Meleyaa' 'yu. Meleya ‑glö bhä Menaa' 'yu, 'nɩ Menaa ‑glö bhä Matataa' 'yu. Matataa ‑glö bhä Natään' 'yu, 'nɩ Natään ‑glö bhä Davidöö' 'yu. 32Davidö ‑glö bhä Yizayii' 'yu, 'nɩ Yizayii ‑glö bhä Obɛdöö' 'yu. Obɛdö ‑glö bhä Bowazöö' 'yu, 'nɩ Bowazö ‑glö bhä Salaa' 'yu. Sala ‑glö bhä Nasɔɔ' 'yu, 33'nɩ Nasɔɔ ‑glö bhä Aminadabʋʋ' 'yu. Aminadabʋ ‑glö bhä Adiminöö' 'yu, 'nɩ Adiminö ‑glö bhä Anii' 'yu. Anii ‑glö bhä Yɛslɔmʋʋ' 'yu, 'nɩ Yɛslɔmʋ ‑glö bhä Pelɛsöö' 'yu. Pelɛsö ‑glö bhä Zudaa' 'yu, 34'nɩ Zudaa ‑glö bhä Zakɔpʋʋ' 'yu. Zakɔpʋ ‑glö bhä Yizaköö' 'yu, 'nɩ Yizakö ‑glö bhä Ablaamʋʋ' 'yu. Ablaamʋ ‑glö bhä Telaa' 'yu, 'nɩ Telaa ‑glö bhä Nayɔɔ' 'yu. 35Nayɔɔ ‑glö bhä Selugöö' 'yu, Selugö ‑glö bhä Lewuu' 'yu. Lewu ‑glö bhä Pelɛgöö' 'yu, 'nɩ Pelɛgö ‑glö bhä Ebɛɛ' 'yu. Ebɛɛ ‑glö bhä Selaa' 'yu, 36'nɩ Selaa ‑glö bhä Kenää' 'yu. Kenää ‑glö bhä Apasadöö' 'yu, 'nɩ Apasadö ‑glö bhä Sɛmʋʋ' 'yu. Sɛmʋ ‑glö bhä Nowee' 'yu, 'nɩ Nowee ‑glö bhä Lemɛköö' 'yu. 37Lemɛkö ‑glö bhä Matuzalɛmöö' 'yu, 'nɩ Matuzalɛmö ‑glö bhä Enɔköö' 'yu. Enɔkö ‑glö bhä Yelɛdöö' 'yu, 'nɩ Yelɛdö ‑glö bhä Malaleyɛɛ' 'yu. Malaleyɛɛ ‑glö bhä Kenää' 'yu, 38'nɩ Kenää ‑glö bhä Enɔsöö' 'yu. Enɔsö ‑glö bhä Sɛtöö' 'yu, 'nɩ Sɛtö ‑glö bhä Adää' 'yu. 'Nɩ Adää ‑glö bhä Laagɔɔ' 'yu.

Currently Selected:

Lukö 3: god

Highlight

Copy