Lukö 2

Zozii' gänö‑tänyɩ

(Matie 1.18‑25; Misee 5.1‑2; Eza 7.14; 9.5)

1‑Lɔɔ' 'tänyɩyɩ 'mnö nä, 'loyo 'kädɔɔ, Sezaa Ogusö#2.1 Sezaa Ogusö: Zozii' ‑lä bhä tee ‑gänöɔ 'nɩ ɔ plöö‑ bhlä Wlomɛɛnyʋa' 'loyua' 'loyoo. ɔ ‑jɩjlä 'bɔɔgʋ, 'nɩ ɔ ‑fʋʋ 'bhlɩɛɛ dä 'fɩɩn nynä wa 'ŋʋ nyɩkpaa 'fɩɩn 'ŋnö 'bɔɔgʋʋ'. 2Wa ŋʋ lä nyɩkpa 'bɔɔgʋʋ' nä, ɩɩ' tɛɛtɛɛdä bhlä. Lɔɔ' 'tänyɩɛ 'mnö, ‑lɔɔ ‑gɔmnä Klinusö 'kämä bhlä Silii‑lëkpëa. 3Nyɩkpaa 'fɩɩn mʋ bhä waa' 'bhlɩ 'nɩ wa ŋʋ bhä waa' 'ŋnö 'bɔɔgʋʋ'. 4Ɩ ‑kä bhɛ 'ŋnö nä, Zozɛfʋ ‑mä 'sɩɩ, ɔ ‑bha Galilee' 'duu wa laa lä Nazalɛtö nä 'mnö, 'nɩ ɔ ‑mʋ Zudeebhlɩ 'kʋʋ 'duu wa laa lä Bɛtlɛmʋ nä 'mnö. Zozɛfʋ nä, ɔ ‑glö bhä 'loyo Davidöö' 'lɔlʋnyɔ ‑yä ɔɔ' gbünyɔ. Bɛtlɛmʋ‑duu' ‑glö bhä 'sɩɩ 'loyo Davidö ɔ 'bhlɩ. 5Nä ‑mɔɔ Zozɛfʋ ‑yä Malii 'sɔ ‑mʋ bhlä ‑yä wa 'kä waa' 'ŋnö 'bɔɔgʋʋ' 'ŋʋ. ‑Lɔɔ' 'tänyɩɛ 'mnö nä, Malii ‑kä bhä 'gʋ. 6‑Mɔɔ wa ‑kʋ, 'nɩ Malii gää‑tänyɩ yi ŋëë. 7Ɔ ‑gään 'yuŋwadi. Ɔmɔɔ‑ plöö‑ bhä ɔɔ' tɛɛtɛɛyu. ‑Mä duu 'mnö lowiaa' 'kʋpläda, waa' bhɔɔ ‑mɔɔ sëpudä nii‑. Ɩ ‑kä ŋnö 'nɩ Malii ‑kpäpɩä 'yuo lokwi, 'nɩ kʋkɔgbaa‑ ‑kʋ bhlä ‑lɔɔ 'nɩ mnaa lüü bhlä 'mnö nä, ɔ bhlüü‑ 'yuo 'kʋ 'nɩ ɔ puo‑ ‑mɔɔ.

‑Laagɔzizi ‑sää mnäkpänyʋa Zozii' gänödö

8‑Lɔɔ' 'lëkpëyɩ 'mnö nä, kä mnäkpänyʋä goo bhä 'kälöö 'mnö, 'nɩ wa bɛɛ bhä waa' mnaa 'klʋ. 9'Nɩ ‑Laagɔzuzu yiwa 'yi ghlä, 'nɩ Laagɔɔ' 'klʋagbaa' zëlüü yiwa 'kʋ bii. Ɩ ‑gbä 'nɩ ‑ŋänö ‑plʋwa. 10'Nɩ ‑Laagɔzuzuu yiwa soo, ʋ lä a 'nä ‑guu lä ‑mä, n bhɛɛ‑ 'nägädö! Ɩ yi nyɩkpaa 'fɩɩn ‑jäkaa' ‑lɛkädä pleyi 'ŋʋ. 11‑Zɩkää' 'ylʋʋnʋ 'mnö nä, anyɩa' Puënyɔɔ wa yɔ gään. 'Loyo Davidö 'duu 'mnö, ‑mɔɔ wa ‑gänönöɔ lä. Ɔmɔɔ‑ plöö‑ lä Klisö ‑yä Kwlienyɔ! 12A ni panalɩɩ ‑ɩ 'gä lä gbä ‑yä a 'kɔ lä yibhë nä. A ‑kä ‑mʋ nä a yi 'yu ‑dɔdɔ 'ni. Wa ‑kpäpɩänöɔ lokwi 'nɩ wa puo‑ kʋkɔgbää' laa mna lüü lä 'mnö nä.

13‑Laagɔzuzunʋ ‑kʋ ‑bhlɛ cidä, 'nɩ ‑Laagɔzizii' ‑tütë yi 'kʋ ghlä. Ɩ bhlɩ bhä, 'nɩ ɩ fään bhä Laagɔ 'ŋnu. Ɩ bhlɩ bhä nynä

14'Ooo, Laagɔ‑!

‑Mɔɔ mɔɔ‑ ‑kʋ lä ‑mɔɔ Laagɔduu' fɛɛn fɛɛn nä,

'Klʋagba ŋënö‑ö 'kʋ!

Ɩyä ‑mää ‑dʋdʋkʋ nyɩkpaa' ‑lʋa ‑n ‑waa lä nä,

'Kʋwɔtɔlɩ ‑kʋwa yëku!

15‑Laagɔzizii ‑bhʋwa lä yëku, 'nɩ ɩ gblää‑ ylä ‑Laagɔɔ' nä, kä mnäkpänyʋa ‑sonö ‑sonö, wlä naa, a yi ‑a 'gä yɩ Bɛtlɛmʋduu' mʋ ‑yä 'klüü‑ plö lä 'kʋ 'nɩ Kwlienyɔɔ panö‑anyɩ lä nä, ‑a 'gɩ 'yi 'ni.

16'Nɩ wa yi 'kʋ ‑bha, 'nɩ wa yi ‑mɔɔ mʋ 'fäfä. Wa ‑ŋëë ‑lɔɔ Malii ‑yä Zozɛfʋ, ɩyä 'yu ‑dɔdɔɔ. 'Nɩ 'yu ‑dɔdɔɔ puu‑ bhä mnaa' kʋkɔgbaa 'mnö sä. 17Mnäkpänyʋa nii‑ ylä 'yu ‑dɔdɔɔ 'yi nä, ɔɔ' yëkuu' wälɩɩ ‑Laagɔzuzuu ‑sonʋwa bhlä nä, kä wa ‑sänɩɩ yɩ 'dö 'kʋ. 18‑Mä nyɩkpaa 'fɩɩn‑ ‑poo bhlä mnäkpänyʋa 'nyukwli nä, kä plɛkʋ 'niniwa‑. 19‑Mä Malii bhobho bhä wälɩnɩ 'fɩɩn 'nɩ ɔ fänɩ bhä plɛ yëku. 20'Nɩ mnäkpänyʋa yi 'ylɩbhɔ. ‑Mä wälɩɩ 'fɩɩn wa nuu‑ bhlä, 'nɩ wa nii‑ lä 'sɩɩ 'yi nä, ɩɩ' ‑za, wa bhlɩ bhä 'nɩ wa fään bhä Laagɔ 'ŋnu.

Wa ‑fä Zozii' ‑lɛɛ ‑dɔdɔɔ Laagɔ‑bhutu 'kädʋʋ 'mnö

21'Yuo ‑kä bhɛ lä ylɩɩ ‑ngbaatä nä, kä wa ‑döɔ 'kʋ. 'Nɩ wa yio 'ŋnö 'pä, wlä ɔmɔ plöö‑ Zozii. 'Tänyɩɛ 'mnö Malii 'kä bhlä ɔɔ' 'gʋʋ plä nä, Zozii‑ŋnöö 'mɩ ‑Laagɔzuzu panöɔ‑ bhlä. 22‑Nɩnɩ plöö‑ ylä nä, 'nɩ 'yuoo' wlɩ‑wɔɔtänyɩɛ yi ŋëë. Wa kä 'yu ‑gään nä, ɩɩ' sä Moyizöö' ‑Jläma ci bhlä nynä ‑mä wa nʋ nä, 'nɩ wa yi sɔɔ nʋ. Wa ‑fä yɩ 'yuo Zolizalɛmʋduu ‑yä, wa 'kɔ Kwlienyɔ Laagɔ wlɩɩ 'nyɛ. 23Kɩ ‑jɩjlɔ lä Laagɔɔ' ‑Jlämaa 'mnö nynä ‑mä nyɩkpɔɔ' tɛɛtɛɛ‑ŋwadiyu nä, ɩ ‑ŋwa 'kʋ nynä ‑mä ɔ 'nyɩɔ Laagɔ wlɩɩ'.#2.23 Ɩ bha 'Nämʋ 13.2. 24Laagɔɔ' ‑Jlämaa ylä bhä 'sɩɩ nynä ‑mä wa ‑sä 'cibhi. 'Dablüü 'sɔ wa kä nii‑ ‑o, 'kpaakpiyuë 'sɔ wa kä nii‑ ‑o, wa ‑lɩɩ 'cibhiee' ‑za.#2.24 Ɩ bha Levi 12.8.

Simeyɔɔ bhään Laagɔ 'yu ‑dɔdɔɔ' ‑za

25‑Mä ‑mɔɔ Zolizalɛmʋduu' nä, nyɩkpɔ ‑bhlo ‑kʋ bhä ‑mɔɔ 'nɩ wa lɔɔ bhä Simeyɔɔ. Ɔ plöö‑ bhä ‑laagɔnyɔɔ' lɔɔ ‑ɔnö nʋnʋgbɩ gëë‑ bhlä 'yii nä. Laagɔɔ' Kplɔɔkplɔɔ‑wugɔɔ ‑kʋɔ bhä yëku. 'Tänyɩɛ 'gä bhlä ŋëë ‑yä Laagɔ 'kä 'Yizlɛnyʋä 'yii sɩɔ nä, ɔ ‑bɛnɩɛ bhä 'sɩɩ. 26'Nɩ Kplɔɔkplɔɔ‑wugɔɔ ‑sonöɔ bhä 'sɩɩ nynä Klisöɔ Laagɔ 'kä lä lobho nä, ɔ yio bhä 'fɩa 'yi 'ni 'nɩ 'kwie yio bhä fään.

27‑Mä, 'tänyɩɩ Zozɛfʋ ‑yä Malii 'sɔ bhɛɛ‑ lä Zozii' ‑lɛɛ ‑dɔdɔɔ, 'nɩ wa ‑yɔsɔ ‑yi lä Laagɔ‑bhutuu 'kädʋʋ 'mnö ‑yä wa 'kä ‑Jlämaa' 'cibhie ‑sä nä, kä Kplɔɔkplɔɔ‑wugɔɔ 'tie‑ Simeyɔɔ 'nɩ ʋ ‑fɔɔ ‑mɔɔ Laagɔ‑bhutuu'. 28'Nɩ ɔ yi 'yuo 'kʋ 'bhlü 'nɩ ɔ yi Laagɔ bhään, ɔ lä

29Kwlienyɔ‑,

Sä ‑n ‑sonö'ö bhlä nä,

N yä yɩ sɔɔ 'yi 'ni.

Nä ‑pɛpɛɛ nä,

‑Amʋ, ‑naa ‑gänʋnyɔɔ,

‑N ‑tanö'ö yɩ 'yi ‑yä

N 'kä 'kʋ wɔtɔlɩɩ' 'kudukʋ mʋʋ!

30'Naa 'yinɩ 'sɔ yä ‑anyɩa puënyɔɔ 'yi 'ni.

31Ɔmɔ ‑n ‑lä lä nyɩkpa 'fɩɩn puëlɩɩ' ‑za.

32'Nɩ 'ylʋzɔkʋnyʋa 'fɩɩn 'kä ylä ‑naa kʋkʋsa 'yi 'ni nä,

Ɔmɔɔ‑ plöö‑ lä ‑naa zëlüü ‑ɩ ŋänɩä lä nä.

'Nɩ ‑Naa 'yua, 'Yizlɛnyʋä nä,

‑Lɔɔ' zëlü 'mɩɩ‑ 'gä lä waa' 'klʋagba 'plö.

33‑Mä wälɩɩ 'fɩɩn Simeyɔɔ ci bhlä 'yu ‑dɔdɔɔ' ‑za nä, ɩ 'ninie‑ Zozɛfʋ ‑yä Malii 'sɔ plɛkʋ. 34'Nɩ Simeyɔɔ yiwa 'nyu 'pä, 'nɩ ɔ yi yuo ɔ 'nɔ Malii soo, ɔ lä 'yunɔ nä, kɔ ‑yi lä ‑yä 'Yizlɛ‑bhlɩnɛ 'mnö bhutukpä 'kä ‑zɔɔ bhlü, ɩyä bhutukpä 'kä 'sɩɩ 'kʋ ‑bha. Ɔ ‑glö Laagɔɔ' panalɩ ‑mä, nyɩkpaa 'nɩɩ ‑lä 'kʋ ŋoo. 35Ɔ yi gbä 'nɩ sä bhutukpä bhobho lä pleyi nä, nyɩkpa yi sɔɔ yibhë wɩa. 'Nɩ ‑mɔɔ Malii‑, nyäkälɩɩ ‑n 'gä lä 'mnö blüë nä, ɩ yi ‑naa 'wugɔɔ ‑jlɛ 'pä.

Anö bhään Laagɔ 'yu ‑dɔdɔɔ' ‑za

36'Plɔfɛtɩŋnɔ ‑bhlo, wa lɔɔ bhä Anö. 'Lɔlʋkpaa wa laa lä Asɛɛ nä aa' 'kʋʋ nyɩkpɔɔ wa laa bhlä Panʋwɛ nä, ɔɔ' 'yuu‑ plöö‑ bhlä Anö. ‑Mä Anö yä bhɛ kpänyɩ 'kɔgwlɛ plä. 'Tänyɩɩ ɔ plöö‑ bhlä ‑lätee ŋnʋdägbä nä, ɩɩ' 'wlio ɔ nöö‑ bhlä nä, ɔ ‑yɔsɔ ‑kʋʋ 'kʋ 'ylʋbɔ ‑ngbɔɔsɔ. 37‑Mä 'wlio kuu‑ lä nä Anöö' yɩɔ bʋkʋ 'wli nöö‑. Ɔ ‑kä bhɛ 'ylʋbɔɔ' gwlɩ ‑mɔɔnä 'nɩ ‑mɔɔnä.#2.37 ‑Nänʋä nu wälɩklënä 'mʋ nynä ‑mä, Anö bhlä bhlä 'kuzëlü nä, ɩ nʋ bhɛ 'ylʋbɔ gwlɩ ‑mɔɔnä 'nɩ ‑mɔɔnä. ‑Mä Anö nä, ɔɔ' ‑bha ‑wʋʋ bhɔɔ 'kɔɔkɔ Laagɔ‑bhutu 'kädʋʋ 'mnö. ‑Mɔɔ ɔ ‑kʋ 'nɩ ‑gägäzëlü ‑yä 'sabo, ɔ bʋbɔ Laagɔ. Ɔ goo bhä ‑gbugbe, 'nɩ ɔ bhibhie bhä.

38Simeyɔɔ paa‑ ylä 'yuo 'nyu, 'nɩ ɔ paa‑ lä 'sɩɩ ɔ 'nɔ ‑yä ɔ 'bä 'sɔ 'nyu nä, ‑lɔɔ' 'tänyɩɛ ‑bhlobhlo 'mnö, 'nɩ 'Anö yi 'kʋ ghlä. 'Nɩ ɔ yi Laagɔ 'ŋnu fään. 'Nɩ nyɩkpa 'fɩɩn‑ ‑bɛɛ bhlä Zolizalɛmʋ‑duu' ‑lɔɔ nëësä‑tänyɩɛ nä, Anö yiwa 'yuoo yëkuu' wälɩɩ soo.

Malii ‑yä Zozɛfʋ 'sɔ yä Nazalɛtöduu' 'ylɩbhɔ

39Malii ‑yä Zozɛfʋ 'sɔ ‑bhɩä lä sä ‑Jlämaa 'ylänʋwa bhlä nä ‑zɔɔ nä, kä wa 'ylɩbhɔ‑ yɩ waa' kʋdä. Wa ‑mʋ yɩ Galilee ‑lëkpëa 'mnö, ‑mɔɔ Nazalɛtöduu'. 40‑Mä 'yuo nä, ɔ bhʋä bhä, 'nɩ ɔɔ' 'wugɔɔ 'mnö 'tɛtɩɩ 'ŋʋnöɔ bhä 'kʋ. Ɔ ‑kä bhä Laagɔɔ' 'fikee, 'nɩ Laagɔɔ' 'nyupälɩɩ ‑kʋɔ bhä kpänyɩ yëku.

Zozii ‑kä 'ylʋbɔ 'kʋgbä 'sɔ 'nɩ ɔ ‑plä Laagɔ‑bhutu 'mnö

41'Ylʋbɔɔ 'fɩɩn 'mnö nä, kä Malii ‑yä Zozɛfʋ 'sɔ mʋ bhä Zolizalɛmʋduu', 'Zufʋnyʋaa' 'Pakö ‑glɩsɩɩsɩɛ' ‑za. 42Nä, Zozii ‑kä 'ylʋbɔ 'kʋgbä 'sɔ 'nɩ, wa ‑yɔsɔ ‑mʋ ‑mɔɔ ‑glɩsɩɩsɩɛɛ' ‑za. 'Sɔɔ wa nʋ bhä 'kɔɔkɔ. 43Wa ‑kʋ ‑mɔɔ ‑aaa, 'nɩ ‑glɩsɩɩsɩɛɛ' ylɩɩ yi bhɩä, 'nɩ wa yi 'ylɩbhɔ. ‑Mä Zozii ‑too Zolizalɛmʋduu' 'nɩ ɔ 'nɔ ‑yä ɔ 'bä 'sɔɔ ‑wʋ sɔɔ ‑yibhë. 44Kwa ‑bhobho bhä nynä ɔ ‑kʋ nyɩkpaa wa ‑yʋwa 'sɔ nää‑ bhlä nä nëëdë. Wa nää‑ yɩ ‑aaa, wa ‑sä 'fɩa 'ylʋʋbhë ‑ylʋbhë ‑blɔkʋ, 'nɩ wa yio täälɩ 'kʋ cie. Wa ‑mʋɔ waa' nyʋa ‑yä waa' yibhënyʋa yëku tänö ‑kää. 45‑Mä wa 'nöɔ ‑wʋ nii‑. 'Nɩ wa 'ylɩbhɔ‑, 'nɩ wa yio Zolizalɛmʋduu' tänö ‑kää mʋ.

46Wa ‑tänöɔ 'fɩa ylɩɩ taa, 'nɩ wa yio Laagɔ‑bhutu 'kädʋʋ 'mnö 'nii. Ɔ ‑kʋ bhä ‑Jlämöcɩanyʋa nëëdë sä. Ɔ ‑puwa bhä 'nyukwli, 'nɩ ɔ ylʋwa bhä 'sɩɩ 'kwäslö 'kʋ. 47Ɔɔ' 'fikee ‑yä dɩgälɩɩ 'fɩɩn ɔ ‑kä 'nɩ ɔ ŋoo bhlä waa' 'kwäslɛɛ 'kʋ nä, ɩ ‑gbä 'nɩ nyɩkpa 'fɩɩn‑ puo bhlä 'nyukwli nä, nükpëë' ‑slʋwa. 48Ɔ 'nɔ ‑yä ɔ 'bä 'sɔ nio‑ lä 'yi nä, kä plɛkʋ 'niniwa‑. 'Nɩ ɔ 'nɔ yio soo, ɔ lä 'nɩ 'naa 'yunɔ, ‑ɔnözä 'nɩ ‑n ‑klanyɩ bhä 'sɔɔyɩ? Wloo, n ‑yä ‑n 'bä 'sɔ, ‑mɔɔ ‑a 'nö bhlä tään nä, ‑mɔɔ ‑a tään lä. ‑Naa plɛɛ‑ belio‑anyɩ lä 'mʋ! 49Ɔ cii‑ lä sɔɔ nä, Zozii lä ‑ɔnözä 'nɩ a tänö'ö bhää? Aa' ‑wʋ sɔɔ ‑yi nynä ‑mä, ɩ ‑ŋwa 'kʋ nynä n kʋ ‑a 'Bää ‑bhutuu 'mnö ‑a?#2.49 'Glɛkönyʋaa' ‑gɔgɔbhlää' 'bɔɔgwɩ ci 'sɩɩ nynä ɩ ‑ŋwa 'kʋ nynä n nʋ n 'Bä ‑gä. 50‑Mä Zozii cii‑ lä sɔɔ nä, wa 'nöɔ ‑wʋ 'mʋ nuu.

51'Nɩ wa ‑yɔsɔ yi Nazalɛtöduu' 'ylɩbhɔ. Zozii nä kɔ ŋʋ bhä ɔ 'nɔ ‑yä ɔ 'bä 'sɔ kpänyɩ. ‑Mä wälɩnɩ 'fɩɩn‑ plöö bhlä 'kʋ nä, ɔ 'nɔ fänɩ bhä plɛ yëku. 52Sä 'tänyɩɛ plö bhɛ lä nä, sɔɔ Zozii bhʋä, 'nɩ ɔ 'fikamä bhä, 'nɩ ɔ ‑kä bhä 'sɩɩ Laagɔ ‑yä 'ylʋzɔkʋnyʋä 'sɔ ‑pʋpɛ 'kʋ.

Currently Selected:

Lukö 2: god

Highlight

Copy