Lukö 11

Zozii cɩa 'kʋgënyʋa bhibhielɩ

(Matie 6.9‑13; 7.7‑11)

1'Tänyɩ ‑bhloo' Zozii ‑kʋ bhä dä ‑bhlo, 'nɩ ɔ bhibhie bhä. Ɔ ‑bhɩä lä bhibhielɩ nä, kä ɔɔ' 'kʋgënyʋaa' lɔɔ ‑bhlo ‑sonöɔ, ɔ lä Kwlienyɔ‑, sä Zään cɩa‑ lä ɔɔ' 'kʋgënyʋa bhibhielɩ nä, ‑mɔɔ ‑mä ‑n cɩa‑anyɩ sɔɔ bhibhielɩ! 2Zozii lä a kä bhibhie nä, a ci nynä ‑mä,

'Bä!

‑Naa 'ŋnöö kplɔɔ!

‑Naa 'tɛtɩɩ kwli!

3‑N 'nyɩ‑anyɩ ‑zɩkää' ylʋʋ' lülülʋʋ!

4‑N cienö‑anyɩ nyenyi,

Sä ‑anyɩ ‑mä 'sɩɩ ‑a cie lä ‑a lünyɩkpa nä!

‑Naa ‑tanö‑anyɩ ‑lä 'yi

'Nɩ ‑a 'gä ‑zɔɔpälɩɩ' bhlüü!

‑N gä Laagɔ lʋʋ 'ylää‑ nä kʋ nyɛ‑ɛ mʋ

(Matie 7.7‑11; 15.22‑28; Zakö 1.5‑7; 1 Zään 5.14‑15)

5'Nɩ Zozii yiwa bʋkʋ soo, ɔ lä a ni, anyɩa pää nyɩkpɔ ‑bhlo ‑kä 'nagɔ, 'nɩ ‑lɔɔ' 'nagɔɔ ‑yio dodoogää' 'gbë 'kʋ bhütë ‑kää. Ɔ yi lä nä, ɔ lä 'Nɔɔ‑! Bheeje, ‑n gblä'ä 'flɔɔbhü taa ‑mä, 6n 'nagɔ ‑bhlo bha lowluu' 'nɩ ɔ yä'ä ‑zɔɔ 'vu, 'nɩ nn' yɩɔ ‑lɔɔ lülülʋʋ ‑kä ‑yä n 'kɔ 'nyɛ. 7Ɔ cii‑ lä sɔɔ nä, ɔ 'nagɔ ‑kʋ ‑mɔɔ ‑bhutuu', 'nɩ ɔ yio soo, ɔ lä ‑ɔɔɔ! ‑Naa bhɩä'ä ‑lä 'kwlɩ! N yä wɛzä ‑gbaa, 'nɩ n ‑yä 'naa 'yuë 'sɔ ‑a yä sä pu nä, nn' ‑läyɩɔ 'kʋ ‑bha ‑yä n 'kä‑ä 'flɔɔ 'nyɛ. 8'Nɩ Zozii yi ci, ɔ lä n sonö'anyɩ nynä 'nagɔɔ wa ‑bhütë lä 'gbëa 'kʋ nä, ɔ yi bhä ‑zi ci nynä ɔɔ' bha ‑wʋ 'kʋ ‑o, ‑mä ɔ yi 'kʋ ‑bha! Waa 'nagwɩɩ' ‑za ɔɔ' ‑bha ‑wʋ kʋ ‑ɛɛn! ‑Mä sä, ɔ 'nagɔ ‑kʋɔ lä nëkʋ 'nɩ ɔ bhütë lä 'kɔɔkɔ#11.8 ‑Nänʋä ci 'sɩɩ nynä ‑mä, 'nagɔɔ‑ ‑kʋ lä ‑mɔɔ ‑bhutuu' nä, ɔ 'ŋʋʋ‑ zoo 'gëë, 'nɩ ɔ yi lä 'kʋ ‑bha 'nɩ ɔ yi lä ɔ 'nagɔ ‑lɩɩ 'nyɛ ‑yä ɔɔ' lowuyuo 'kä lü. nä, 'ɩzä. Ɔ yi kʋ ‑bha 'nɩ, sää 'fɩɩn ɔ 'nagɔ ylä lä nä, ɔ yio sɔɔ 'nyɛ.

9Nä, ‑amʋ, kä n sonö'anyɩ yɩ nynä ‑mä, a zlaa ‑mä, wa yi'anyɩ 'nyɛ. A tää ‑mä, a yi 'ni. A bhütë ‑mä, wa yi'anyɩ 'gbë kää. 10Nyɩkpɔ kä zlaa nä, kwa nyɩɔ. Nyɩkpɔ kä tään nä, kɔ ni. 'Nɩ nyɩkpɔ kä bhütë nä, kwa känöɔ 'gbë.

11'Yu kä ɔ 'bä zliiye 'ylää‑ nä, ɔ 'bä yio bhä ‑leebolu lüdä 'nyɛ ‑a? 12'Nɩ 'yu kä 'sɩɩ ɔ 'bä ‑kɔkɔɔgie ‑zlaa nä, ɔ 'bä yio bhä ‑ŋnëŋnënëgbë lüdä 'nyɛ ‑a? 13Anyɩmɔ, ‑ɔ ‑nyu lä ‑käkäkä nä, anyɩa 'yua, a yi waa' 'nägälɩɩ 'nyɛsä. Nä, sɩ ‑kʋ bhä 'nɩ 'Bäɔ ‑ɔ ‑kʋ lä ‑mɔɔ ‑Laagɔɔ' nä, nyɩkpaa‑ 'ylänöɔ lä Kplɔɔkplɔɔ‑wugɔɔ nä, ɔɔ' ‑lä bhä mii ‑yä ɔ 'kwa nyʋ 'nyɛɛ?

Zozii' 'päwaa Laagɔ‑ nyɩɔ 'nya

(Matie 12.22‑30; Makö 3.22‑27)

14‑Zuzunyënyu ‑kʋ bhä nyɩkpɔ ‑bhlo kätää', 'nɩ ʋ gbä 'nɩ ɔɔ' ‑sää bhɔɔ 'mʋ. ‑Mä Zozii ‑yi 'nɩ, ɔ tlüü‑ ‑zuzunyënyuu. 'Nɩ nyɩkpɔɔ yi 'mʋ säälɩ 'kʋ cie. ‑Mä nyɩkpaa ‑wa ‑kʋ bhlä ‑lɔɔ nä, kä plɛkʋ 'niniwa‑. 15Bhloobhlolʋä ‑kʋ bhä ‑lɔɔ 'nɩ, wa ci bhä wlä, ‑zuzunyënyuu, ‑ʋ 'kämä lä ‑zizinyenyii 'fɩɩn, 'nɩ wa laa lä Bɛzebuu nä, ʋmʋʋ‑ nyɩɔ lä 'päwä 'nɩ ɔ tlü lä ‑zizinyenyii. 16'Nɩ ‑nänʋä ‑kʋ bhä ‑lɔɔ 'nɩ wa tää bhä nynä wa 'kɔ ‑zɔɔ 'pä. Nä, wa sonöɔ bhä nynä ɔ nʋ 'yiziziogbɩɩ' lɩɩ ‑ɩ pana lä nynä Laagɔ yëku ɔɔ' 'päwaa bha nä. 17‑Mä Zozii ‑yi bhlä waa' bhobhowluu nä, kɔ ‑sonʋwa, ɔ lä 'leyidu ‑bhlobhlo 'mnö nyɩkpa kä 'mʋ doo 'nɩ, wa kä vë nä, kä ‑lɔɔ' 'leyiduu nuë. 'Gbë ‑bhlobhlo 'mnö nyɩkpa 'kä 'mʋ doo nä, kä ‑lɔɔ gbëa nuë.

18Nä, a ci lä nynä Bɛzebuu 'mɔɔ ‑ɔ nyɛɛ'ɛ 'päwä 'nɩ n tlü ‑zizinyenyi nä, kɩ ‑kʋ lä nynä kä 'Dëvlo fä lä ʋ yëku tʋ. Nä, säsä ʋʋ' 'leyiduu yi bhä ‑pɛɛ dä ŋëë? 19'Nɩ 'Dëvlo‑zuzuu Bɛzebuu 'mʋʋ‑ gä'ä 'päwä 'nyɛ 'nɩ n kä 'Dëvloo' ‑zizii 'tlü nä, anyɩ, anyɩa' 'kʋgënyʋa, ‑ɔ nyɩwa‑ bhä 'päwä 'nɩ wa tlii bhää? Kä waa' nʋnʋgbɩɩ pana nynä ‑mä anyɩ 'titi a yä mnɔ 20‑Mä ‑amʋ nä, Laagɔɔ' 'päwaa 'mää‑ gä yɩ gbä 'nɩ n kä ‑zizinyenyii 'tlü nä, kä ʋʋ' 'Leyiduu' 'päwaa ya'anyɩ lä yëku ŋëë.

21'Tɛtɩ‑käänyɔɔ' lɔɔ‑ ‑kä lä 'päpälɩɩ nä, ɔ kä ɔɔ' 'gbë 'klʋ ‑bɛɛ nä, nyɩkpɔɔ' ‑lä mii‑ 'nɩ ɔ 'kɔ ɔɔ' kääkäälɩɩ ‑sä. 22‑Mä nyɩkpɔɔ' 'yigädalɔɔ, ‑ɔ ‑kä lä 'tɛtɩ 'nɩ ‑ɔ zio lä 'kʋ nä, ɔ kä ‑yi nä, ɔmɔɔ‑ sɩɔ. Ɔɔ' 'päpälɩɩ 'fɩɩn ɔ 'tɛɛ‑ bhlä dë nä, kɔ sɔɔnyɩ. 'Nɩ ɔɔ' kääkäälɩɩ 'fɩɩn, ɔ sɔɔnyɩ 'sɩɩ, 'nɩ ɔ dënɩ nyɩkpa.

23Nyɩkpɔ ‑yä ‑amʋ 'sɔ 'nö 'pɛlʋ ‑bhloo' ‑kʋʋ nä, ‑lɔɔ' nyɩkpɔɔ kɔ ‑yä ‑amʋ 'sɔ doo‑ lä 'mʋ. 'Nɩ nyɩkpɔ ‑yä ‑amʋ 'sɔ 'nö 'kʋ 'wlää nä, kɔ dlüa lä.

‑Zuzunyënyu yi 'kʋ dɩdɛ ‑kää

(Matie 12.43‑45)

24A ni ‑zuzunyënyu kä nyɩkpɔ kätää' ‑bha nä, zëkpëa' ‑gbäsɩɩ‑ ‑yɛɛ lä 'mʋ suëkë suëkë nä, ‑mɔɔ ʋ mʋ jlä ‑kää. Ʋ tää 'kʋ wɔtɔdä, ‑mä ʋʋ' 'nii ‑wʋ ‑mɔɔ 'kʋ wɔtɔdä. Ɩ ‑kä 'ŋnö nä kʋ soo ʋ yëku, ʋ lä n 'kä 'ylɩbhɔ ‑yä 'naa ‑bhutuu n ‑bha lä 'mnö nä, n 'kʋ bʋkʋ 'mnö mʋ. 25Ʋ kä 'ylɩbhɔ‑ 'nɩ, ʋ kä ‑bhutuu 'mnö ‑yi nä, ʋ lʋ wloo nä, ‑mɔɔ ‑nynipüo 'fɩɩn, 'nɩ ‑mɔɔ ‑göglɔɔ 'nägäsä. 26Ɩ ‑kʋ lä sɔɔ nä, kʋ 'ylɩbhɔ bʋkʋ, 'nɩ ʋ mʋ ‑zizinyenyii' 'yigädalɩɩ soo ‑kää. ‑Zizinyenyii' lɩɩ‑ ‑nyu lä kpänyɩ 'mnö 'nɩ ‑ɩ ziu lä 'kʋ nä, ɩɩ' lɩɩ ‑ngbɔɔsɔ, ʋ sonɩ. 'Nɩ ʋ ‑yɩ 'sɔ yi ‑bhutuu 'mnö, 'nɩ ɩ kʋ ‑mɔɔ. Bhɩädä 'mää‑ plöö‑ lä nynä ‑mä, nyɩkpɔɔ ‑zizii ‑kʋ ylä kätää' nä, kä ɔɔ' zëkpëa nyimo yɩ 'nɩ a 'tɔtɔɔ nëkʋ.

Laagɔwälɩɩ' 'nyukwli poolɩ ‑kʋ 'nää 'mnö

27Zozii ‑kʋ cidä 'nɩ, ‑mɔɔ ‑jlëa nëëdë, 'ŋnɔ ‑bhlo cii‑, ɔ lä 'ŋnɔɔ' ‑lɔɔ ‑ɔ bhɛnönö‑ö lä 'mnö, 'nɩ ‑ɔ nyɩä‑ä lä 'sɩɩ nä, ɔ yä 'pʋ! 28'Ŋnɔɔ cii‑ lä sɔɔ nä, Zozii lä 'nn! Nyɩkpaa' ‑lʋa ‑wa poo lä Laagɔwälɩɩ 'nyukwli nä, 'nɩ ‑wa ŋʋɩ lä 'klʋkpää nä, wamää‑ pʋʋ‑ lä.

Nyɩkpa 'ylää‑ Zozii 'yiziziogbɩ

(Matie 12.38‑42)

29‑Mä nyɩkpaa zumë bhɛ lä kpänyɩ nä, kä Zozii cii‑, ɔ lä 'bhlɛsʋnʋ 'mnö nyɩkpaa, wa ‑nyu 'nɩ wamää‑ tänö Laagɔ yëku 'yiziziogbɩɩ' panalɩ. 'Nɩ ‑ɔnö yɩ 'plɔfɛtɩ Zonasöö' 'tänyɩɛ 'yiziziogbɩɩ‑ nä, waa' ‑lä 'yiziziogbɩ ‑bhlo 'coo 'yi 'ni. 30Nä sä Zonasö ‑plöö bhlä 'Ninivönyʋää' panalɩ nä, sɔɔ Nyɩkpɔɔ ‑Yowlii' 'kä lä 'sɩɩ 'bhlɛsʋnʋ 'mnö nyɩkpaa' panalɩ 'plö. 31Laagɔɔ' 'tite 'kädɛɛ' pläylʋʋ 'kʋ nä, 'leyi‑ŋnɔɔ ‑ɔ ‑bha bhlä jiee' ‑zɔɔ fɛɛn fɛɛn, 'nɩ ‑ɔ yi lä 'loyo Salomɔɔ' ‑dɔɔ 'nyukwli poo ‑kää nä, ɔ yi 'bhlɛsʋnʋ 'mnö nyɩkpaa 'yikʋ 'nynigo 'nɩ ɔ yiwa gbʋ klaa Laagɔ dëlü. ‑Ɔnöza bhää? 'Ŋnɔyɩ nä, kɔ ‑bha ɔ 'bhlɩ, ‑mɔɔ fɛɛn, 'nɩ ‑ɔ ‑yi 'loyo Salomɔɔ' ‑dɔɔ 'nyukwli poo ‑kää. 'Nɩ nyɩkpɔ ‑kʋ ‑länʋmʋ anyɩ nëëdë 'nɩ ɔ 'ghlü 'nɩ ɔ ‑zi 'loyo Salomɔɔ! 32Laagɔɔ' 'tite 'kädɛɛ' pläylʋʋ 'kʋ nä, 'Ninivö‑duu' nyɩkpaa yi yi 'nɩ wa yi 'bhlɛsʋnʋ 'mnö nyɩkpaa Laagɔ dëlüü gbʋ klaa. ‑Ɔnöza bhää? Ninivönyʋä nä, 'tänyɩɩ wa nuu‑ lä 'plɔfɛtɩ Zonasöö' ciciwälɩɩ nä, kwa 'cɩcɩ‑ 'nɩ wa ‑taa waa' gbenyenyii 'yi. ‑Mä kä n mʋ'anyɩ yɩ 'sɩɩ soo ‑kää nynä ‑lää anyɩ nëëdë nä, nyɩkpɔ ‑kʋ ‑lää 'nɩ, ɔ ‑zi 'plɔfɛtɩ Zonasö 'kʋ.

'Näpɛɛ' ‑nyädlaa

(Matie 5.15‑22‑23)

33Nyɩkpɔɔ' döö ‑wʋ 'näpɛ 'yi 'nɩ ɔ 'kɛ zizie. Ɔɔ' ‑dɩɛ ‑wʋ 'sɩɩ 'yii 'nɩ ɔ 'kɛ ‑takwë 'wlu 'gbi. ‑Mä zëkpë 'kʋ ɔ ŋʋɛ ‑yä, nyɩkpaa 'fɩɩn‑ plä lä nä, ɛ 'kwa 'kʋ ŋänɩä. 34‑Naa 'yi, ɛmɛɛ‑ plöö‑ lä ‑naa 'yɛkɛɛ' 'näpɛ. Nä, ‑naa 'yi kä 'nää sä 'ni nä, kɛ ŋänɩä ‑naa 'yɛkɛɛ 'fɩɩn 'kʋ. 'Ɩzä, ‑naa 'yi 'nö 'nää sä 'ni nä, ‑naa 'yɛkɛɛ ‑mä 'sɩɩ, kɛ kʋ 'cucukpää'. 35Nä, ‑n gblɩmä ‑yä zëlüü‑ ‑kʋ lä ‑naa 'mnö nä, ɩɩ' kä ‑kä 'cucuu' jɩjlää. 36‑Naa 'yɛkɛɛ 'fɩɩn kä zëlüü' ‑kʋ 'nɩ ɛɛ' 'pɛpɛlɩä 'nö 'sää 'cucuu' ‑kʋ nä, kä ɛɛ' ‑lefɩɩn 'kä lä ŋänɩä wɩa nynä 'näpɛɛ' zëlü.

Zozii ‑bhoo Falizɩɛnyʋa ‑yä ‑Jlämöcɩanyʋa 'sɔ ‑kɔkwɩ

(Matie 23.1‑36)

37Zozii ‑bhɩä lä 'gää cilɩ nä, kä Falizɩɛyu ‑bhlo lɔɔ‑ nynä ɔ mʋ ɔɔ' ‑gbäsɩɩ ‑yä wa 'kä lü. 'Nɩ Zozii yi ‑mɔɔ mʋ 'nɩ, ɔ yi lüdaa sä kʋ. 38‑Mä sä ‑Jlämaa ylä bhlä nynä nyɩkpɔ wɔɔ 'fɩa wlɩ ‑yä ɔ 'kä lü nä, Zozii' ‑wʋ sɔɔ ‑nʋ, 'nɩ ɔ cie‑ lülɩ 'kʋ. Ɩ ‑kä 'ŋnö 'nɩ Falizɩɛyuo plɛkʋ 'ninio‑. 39'Nɩ Kwlienyɔ Zozii yio soo, ɔ lä anyɩ Falizɩɛnyʋä nä, anyɩa 'kɔpɩɩ, ɩyä anyɩa ‑dɔkwɩɩ' yëku a wɔɔ ‑mä, aa' wɔɔ ‑wʋ ɩɩ 'mnö. 'Nɩ anyɩa' 'mnö 'ghüghë ‑yä ‑abhlɛ 'sɔ ‑kʋ ‑mɔɔ. 40Anyɩa' dëbë ‑zu kpänyɩ! Laagɔɔ ‑ʋ ‑nʋ lä yëku nä, ʋʋ' bhä 'sɩɩ 'mnö ‑nʋmʋ ‑a? 41A kä ‑nʋ nä, a 'nyɛmʋ ŋäzönyʋa anyɩa' ‑dɔkwɩɩ ‑yä 'kɔpɩɩ 'mnö ‑lɩɩ! A kä sɔɔ nʋ nä, ‑lɩɩ 'fɩɩn yi kplɔɔ anyɩa' ‑za.

42‑Mä 'kplë ya'anyɩ slää, anyɩ Falizɩɛnyʋä! ‑Tüklüütü ‑yä ‑gämnɩ, ɩyä sɔɔ' ‑lɛɛ pɩtaa, a pɛɛ ɩɩ' 'tigiti. Mä Laagɔɔ' 'yigëëlɩɩ, ɩyä ʋʋ' ‑wawʋʋ 'mnö kʋlɩ, ka plänɩ yɔlʋ 'kʋ! Ɩmɩ a 'kä bhlä 'fɩa nʋ ‑yä lʋʋ‑ gä bhɛ ‑mɔɔ ‑too nä, a 'kʋ ‑lɔɔ kätää' gbɛɛ.

43'Kplë ya'anyɩ slää, anyɩ Falizɩɛnyʋä! A kä Laagɔ‑bhutuu' ‑yi nä, 'yikʋʋ këkpüü 'mnö, ‑mɔɔ a ‑waa kʋlɩ. A ‑waa 'sɩɩ bʋkʋ, nynä wa bhänönö'anyɩ ‑jlünëëdü.

44'Kplë ya'anyɩ slää, anyɩ Falizɩɛnyʋä! Lësüü' lɩɩ waa' ‑wʋ lä ‑gblifɛlɩ 'kʋ slüü‑ nä, ɩmɩ 'bhisäkʋ a ‑kʋ lä. Nyɩkpa 'nɩɩ ‑wʋ ‑lɔɔ ‑luë, 'nɩ wa nämnönɩ 'kʋ.

45Ɔ cii‑ lä sɔɔ nä, 'nɩ ‑Jlämöcɩanyɔ ‑bhlo yio soo, ɔ lä Cɩanyɔ‑, ‑n gä sɔɔyɩ ci nä, ‑anyɩ ‑mä 'sɩɩ, kä ‑n 'luglumʋ‑anyɩ lä! 46Zozii lä anyɩ ‑Jlämöcɩanyʋa ‑mä 'sɩɩ, 'kplë ya'anyɩ slää! Bedii' ‑lɩɩ ‑ɩ 'ŋɔɔ lä 'kʋ 'nɩ, ‑ɩ kään lä bhɛɛ‑yëku nä, anyɩ‑ slui lä a ‑liesɩ. 'Nɩ anyɩ 'titi aa tlaa ‑wʋ 'sää bodu ‑bhlo 'coo wlɩ nynä a 'kä nyɩkpɔ bhɛnö.

47‑Ɛɛɛ, 'kplë ya'anyɩ slää! Anyɩ‑ maa lä 'plɔfɛtɩnyʋa lesi‑kpakpüü, ‑bhlɛ a 'bäsɩ‑ bhlʋwa‑ lä. 48‑Lɔɔ' gbenyenyii a 'bäsɩ ‑nʋ lä nä, kɩ plöö‑ lä nynä a 'nii‑ ɩɩ' dä, 'nɩ sä wa ‑nʋ lä nä, a ‑waa sɔɔ. A 'bäsɩ bhlʋwa‑ 'nɩ anyɩ‑ a maa lä waa' lesi‑kpakpüü. 49Ɩmɩɩ‑ ‑kä 'ŋnö 'nɩ, Laagɔ nä, ʋʋ' dɩgälɩɩ 'mnö, ʋ cii‑ lä nynä

N yiwa 'naa 'plɔfɛtɩnyʋä ‑yä 'naa lobho lobhonyʋä yëku fä.

‑Mä wa yi ‑nänʋä 'bhlä

'Nɩ wa yi ‑nänʋä nyäkälɩɩ' 'kädɩɩ 'ŋʋ.

50‑Nɩnɩ 'fɩɩn ‑kä 'ŋnö nä, dä 'kɔɔn 'nö bhlä 'wlʋ nä, ɩɩ' 'plɔfɛtɩnyʋa ‑wa kuu‑ lä nä, ‑mɔɔ Laagɔ dëlü, 'bhlɛsʋnʋ 'mnö nyɩkpaa yi waa' 'kwiee dluu plʋʋ.

51‑Ɛɛɛ, kä n sonö'anyɩ yɩ nynä ‑a cie Abɛlöö' 'kwie 'kʋ ‑aaa, ɩyä ‑a ŋëë yɩ Zakalii‑ wa 'bhlää‑ lä Laagɔ‑bhutuu' 'kädʋʋ ‑yä 'cibhisädaa 'sɔ pää' 'kwiee 'kʋ nä, nyɩkpaa 'fɩɩn‑ kuu‑ lä nä, 'bhlɛsʋnʋ 'mnö nyɩkpaa yi Laagɔ dëlüü waa' 'kwiee dluu plʋʋ.

52'Nɩ anyɩ ‑Jlämöcɩanyʋä 'kplë ya'anyɩ slää! ‑Ɔnöza bhä? Laagɔɔ' yibhëlɩɩ' ‑bhutuu ka ‑tʋʋ 'nɩ, a ‑sʋʋ 'sɛfɛ nëë'. Ɩ ‑kä 'ŋnö nä, anyɩ 'titi aa' yɩɔ ‑mɔɔ ‑plä. 'Nɩ nyɩkpaa' ‑lʋa ‑wa tää bhlä nynä wa 'kä ‑mɔɔ plä nä, aa ‑wʋ 'sɩɩ ŋoo‑ nynä wa plä ‑mɔɔ.

53Zozii ‑bha ylä ‑mɔɔ ‑bhutuu' nä, ‑Jlämöcɩanyʋa ‑yä Falizɩɛnyʋa 'sɔ, wa fɔɔ bhɛ 'fɩ 'kʋ. 'Nɩ wa ylɔɔ bhɛ 'kwäslöö' nü nü nü 'kʋ. 54Wa pɔɔ bhä 'sɩɩ ‑mɔɔ, 'nɩ wa nʋ bhä saa 'fɩɩn ‑yä, ɔ 'kä wälɩ nëë' pää.

Currently Selected:

Lukö 11: god

Highlight

Copy