Zään 7

Zozii cii‑ nynä ɔɔ' mʋ ‑wʋ 'Zufʋnyʋa ‑glɩsɩɩsɩɛ 'kʋ

1‑Nɩnɩ 'fɩɩn plöö‑ ylä nä, Zozii bhlü bhɛ Galilee‑bhlɩɛ. 'Zufʋnyʋaa' 'cifinyʋa tään bhlä nynä wa 'kɔ 'bhlä nä, ɔɔ' 'ylä bhɔɔ nynä ɔ 'kä Zudee‑bhlɩɛ bhlü. 2‑Lɔɔ' 'tänyɩɛɛ' nä, 'Zufʋnyʋaa' ‑papöslä‑glɩsɩɩsɩɛ#7.2 ‑Papöslä‑glɩsɩɩsɩɛ: Ɛ ‑glö ‑glɩsɩɩsɩɩ' lɛɛ 'Yizlɛnyʋä wlaa lä ‑yä 'tänyɩɩ wa ‑kʋ bhlä ‑mɔɔ 'popie 'mnö wa 'kä lɔɔ' dä 'kʋ luë. Wa 'ninɩɛ 'sɔlɩcëë'. Kä ɛ ‑yä ‑kɔkɔylʋʋ' lülülɩɩ' ‑glɩsɩɩsɩɛ 'sɔ ninöɔ bhä däbhloo'. Sɔlöcëyɩ 'mnö nä, kä 'lɔlʋkpä 'lɔlʋkpä ‑kä aa' ‑glɩsɩɩsɩ‑papä 'nɩ a kʋa lä ‑zɔɔ ‑aaa 'nɩ ‑glɩsɩɩsɩɛ 'sɔlɩcëa glä lä 'klʋ. Zɛɛ 'sɩɩ Levi 23.34‑36; Detlo 16.13. yä bhɛ 'mɛmɛ. 3'Nɩ Zozii ɔ bhelie yio soo, wlä ‑n ‑bha ‑mää ‑yä mʋ Zudee' ɩyä nyɩkpaa ‑wa gë‑ë lä 'kʋ nä, ‑wa 'kä ‑naa nʋnʋ‑lebhee 'yi 'ni. 4Nyɩkpɔ kä cii‑ nynä wa 'kɔ nʋnʋ‑lebhe 'yikʋ 'ŋʋʋ nä, ɔɔ' nʋnɩɛ ‑wʋ ziziodä. Nä ‑n gbä ‑yä nyɩkpa 'kä‑ä 'yi 'ni. 5Sɩ ‑kʋ bhlä naa, ɔ bheliee' bhɔɔ ɔɔ' pɔlötɛtɛ ‑kä nä, 'ɩzä wa ci bhlä sɔɔ. 6'Nɩ Zozii yiwa soo, ɔ lä 'naa 'tänyɩɛɛ' ‑lätee ‑ŋëë, ‑mä anyɩ nä, kä 'tänyɩɩ 'fɩɩn nää‑ anyɩa ‑za. 7Nyɩkpaa' ‑lä mii 'nɩ wa 'kanyɩ zɔbhlɛmä, ‑mä ‑amʋ, kä wa ‑kä 'naa ‑zɔbhlɛzʋ. Kä n sonʋwa nynä waa' nʋnʋgbɩɩ kɩ ‑nyu nä, kɩ ‑gbä 'nɩ wa ‑zɔɔ'ɔ. 8Nä anyɩ, a mʋ ‑glɩsɩɩsɩɛ 'kʋ ‑mä, ‑amʋ 'naa 'tänyɩɛɛ' ‑lätee ‑ŋëë, nä nn' ‑lätee ‑mʋ. 9Ɔ ‑sonʋwa lä sɔɔ nä, kɔ ‑too Galilee'.

'Zufʋnyʋaa' ‑Papöslä‑glɩsɩɩsɩɛ 'kʋ Zozii cɩa‑ nyɩkpa

10Maa, ɔ bhelie ‑mʋ ylä ‑glɩsɩɩsɩɛ 'kʋ nä, ɔmɔ ‑mä 'sɩɩ kɔ ‑bha 'kʋ 'nɩ ɔ yi ‑mɔɔ mʋ. Ɔɔ' ‑wʋ ‑jlë 'yi ‑ghlä ‑mä ziziolɩɩ' ɔ ‑mʋʋ ‑mɔɔ yiosä.

11‑Glɩsɩɩsɩɛ 'kʋ nä, 'Zufʋnyʋaa' 'cifinyʋa tänöɔ bhä, 'nɩ wa ci bhä, wlä 'nɩ ‑a sɔɔ bhä? 12'Nɩ ‑jlëa 'mnö nyɩkpa bhlää bhä kpänyɩ ɔɔ' wälɩɩ 'kʋ. ‑Nänʋä ci bhä wlä, ɔ ‑glö 'nägä‑nyɩkpɔ. 'Nɩ ‑nänʋä ci bhä nynä yio, ‑mä kɔ gbä 'nɩ nyɩkpaa mnɔ lä. 13‑Mä, sä wa ‑guu bhlä 'Zufʋnyʋaa' 'cifinyʋa nä, waa' wla bhɔɔ sää 'titiclö ɔɔ' wälɩ në.

14Wa yä bhɛ ‑glɩsɩɩsɩɛɛ' nëëdë ‑nëëdë ŋëë. 'Nɩ Zozii yi ‑mɔɔ Laagɔ‑bhutu 'kädʋʋ 'mnö plä, 'nɩ ɔ yi cɩalɩ 'kʋ cie. 15‑Mä 'Zufʋnyʋa kä plɛkʋ 'niniwa‑, 'nɩ wa ci bhä, wlä sɩ ‑kʋ bhä 'nɩ ɔ ‑yi bhä Laagɔ‑bɔɔgʋʋ 'mnö wälɩ ‑bhutukpää? ‑Bhlɛ ɔɔ' ‑kä ‑Jlämaa' ‑sukluu' ‑mʋ!#7.15 Zɛɛ 'sɩɩ Matie 13.54; Lukö 2.47. 16'Nɩ Zozii yiwa soo, ɔ lä 'naa cɩalɩɩ n cɩa lä nä, 'naa 'wluu ɩɩ' ‑bha ‑wʋ, ‑mä ‑ɔ ‑lobho'o lä nä, ɔmɔɔ‑ panö'ö lä. 17Nyɩkpɔ kä cii‑ nynä ɔ yi Laagɔɔ' pɔlösaa nää nä, wälɩɩ n cɩa lä nä, ɔ yi ɩɩ' nyaasäsä yibhë. Laagɔ‑ gä'ä ‑lobho nä, ɔ yi sɔɔ yibhë, 'ɩzä ‑amʋ 'titi, 'naa 'wlu n kä ‑sä 'nɩ n kä ci nä, ɔ yi 'sɩɩ sɔɔ yibhë. 18Nyɩkpɔ kä ɔ yëku 'wluu ‑sä 'nɩ ɔ kä ci nä, ɔ yëkuu' 'ŋnu fäälɩ ɔ tään. 'Ɩzä nyɩkpɔ kä ‑ɔ ‑lobhuo lä nä ɔɔ' 'ŋnumʋlɩ tään nä, ɔ ‑glö ‑nʋawlɛɛ‑cinyɔ. Ɔɔ' ‑wʋ ‑kpläkplä ‑kä. 19Moyizö ‑tü'anyɩ ‑kä ‑Jlämaa 'nɩ anyɩa' 'kʋʋ nyɩkpɔɔ' 'ŋʋa ‑wʋ 'klʋkpää'. Nä, ‑ɔnözä 'nɩ a tänö'ö bhä nynä a kä'ä 'bhlä? 20‑Jlëa 'mnö nyɩkpaa lä ‑mä, lɔɔ ‑sä tänö‑ö bhä nynä ‑ɔ 'gä‑ä 'bhlä? ‑Zuzunyënyu ‑kʋ‑ʋ lä kätää'!

21Zozii lä wälɩklülɩɔ ‑bhlo n ‑nʋ lä nä, ɔmɔɔ‑ 'ninie'anyɩ lä plɛkʋ! 22Kä Moyizö cii‑ nynä ‑ɔ gä 'yuŋwadi ‑gään nä, ɔ ‑döɔ 'kʋ. 'Nɩ ɩ ‑kʋ 'flɛ sɔɔ ‑mä, Moyizö‑ 'nɩɩ ‑wʋ wlaa‑, ‑mä a tɩtɩä ‑tɩtɩä wamää‑ wlɩɩ‑.#7.22 Zɛɛ 'sɩɩ Levi 12.3; Ciedä 17.10‑13. 'Nɩ anyɩ, Sabaa‑gwlɛylʋ 'kʋ a dö ŋwadie 'kʋ. 23A kä sɔɔ nʋ nä, aa ‑sä ‑wʋ Moyizöö' ‑Jläma 'klʋkpää'. Nä, sɩ ‑kʋ bhä 'nɩ Sabaa‑gwlɛylʋ 'kʋ, n ‑yamä bhä nyɩkpɔ wɩa, 'nɩ a lä'ä bhä zɔgblöö? 24A plä anyɩa 'tite ‑nʋawlɛɛsä, ‑mä a 'nä wloo ‑lä 'flɛ sää nyɩkpɔ 'nɩ a 'kɔ gbʋ 'nyɛɛ!#7.24 Zɛɛ 'sɩɩ Levi 19.15; Eza 11.4.

‑Ɔ ‑lobho lä Zozii nä

25Zolizalɛmʋduu' nyɩkpaa' ‑nänʋä ci bhä, wlä ‑mä, nyɩkpɔnɔ 'mɔ waa' tään ‑wʋ nynä wa 'kä 'bhlä ‑a? 26Ɔmɔɔ‑ ‑kʋ lä ‑lää 'nɩ, nyɩkpaa 'fɩɩn 'klʋ ɔ sää lä 'mʋ, 'nɩ waa' slɔ ‑wʋ në! Kä 'cifinyʋa ‑yibhë bhä ‑pɛɛ sɔɔ nynä ‑mä ɔmɔɔ‑ plöö‑ Klisöɔ ‑a? 27‑Nɔnɔ, ‑a ‑yi dä ɔ bha lä nä, ‑ma Klisöɔ kä ‑yi nä, nyɩkpɔɔ' ‑lä ɔɔ' bhäädä yibhë. 28Ɩ ‑kä 'ŋnö nä, Zozii ‑kʋ cɩadä 'nɩ ɔ bhɛlɩä‑ nuwälɩ 'kʋ, 'nɩ ɔ cii‑, ɔ lä ‑ɛɛ! A ‑yi'i, 'nɩ a ‑yi 'sɩɩ dä n bha lä nä, ‑mä ‑amʋ 'titii‑ ‑wʋ n yëku ‑lobho. ‑Ɔ ‑lobho'o lä nä, ɔ ‑kä dë 'tɛɛ sä ‑mä, a 'nöɔ ‑wʋ ‑yi. 29‑Amʋ, ɔmɔ yëku n bha lä nä, n ‑yio, 'nɩ ɔmɔɔ‑ ‑lobho'o lä 'sɩɩ.

30Zozii cii‑ lä sɔɔ nä, wa tää bhɛ nynä wa 'kɔ 'kʋ bhlü, ‑mä ɔɔ' 'tänyɩɛɛ' ‑lä bhlä tee ‑ŋëë nä, waa' ‑wʋ mii‑. 31‑Mä ‑jlëa 'mnö nyɩkpa ‑bhutukpä ‑kä bhä ɔɔ' pɔlötɛtɛ, 'nɩ wa ci bhä nynä Klisöɔ 'kä ‑yi nä, kɔ 'kä bhä kpänyɩ 'yiziziogbɩ nʋ ‑yä ɔ 'kä ‑nɔnɔ zi ‑a? 32Falizɩɛnyʋa ‑wa ‑kʋ bhlä ‑lɔɔ nä, wälɩɩ ‑jlëa 'ŋuŋuë bhlä nä, wa nui‑. 'Nɩ wa ‑yä 'Cibhisänyʋaa' 'cifinyʋa 'sɔ yi waa' 'sʋjaa lobho nynä wa yi ‑yä wa klä Zozii.

Zozii lä kɔ 'kä ylä mʋ

33'Nɩ Zozii yi ci, ɔ lä n ‑yä anyɩ 'sɔ yi ‑lätee 'pɛpɛlɩä ‑lää kʋ ‑yä 'tänyɩɛ kä ‑ŋëë nä, ‑ɔ ‑lobho'o lä nä, n 'kɔ yëku mʋ. 34A yi'i tään 'nɩ a nö'ö ‑läyɩɔ 'ni. 'Nɩ ‑gbäsɩɩ n 'kä lä mʋ nä, aa ‑lä 'sɩɩ mii 'nɩ a 'kä ‑mɔɔ yi.#7.34 Zɛɛ 'sɩɩ 13.33. 35Ɔ cii‑ lä sɔɔ nä, 'Zufʋnyʋa 'ylä ylä bhɛ, wlä 'nɩ dä ‑sä ɔ 'kä bhä mʋ ‑yä ‑a 'nöɔ ‑lä bhä 'nii? 'Glɛköbhlɩ 'kʋʋ 'Zufʋnyʋa nëëdë‑ ɔ 'kä bhä mʋ ‑a? ‑Mɔɔ ɔ 'kä bhä mʋ ‑yä ɔ 'kä bhä 'sɩɩ 'Glɛkönyʋa cɩa ‑a? 36Ɔ lä ‑a yio tään 'nɩ ‑a nöɔ ‑lä 'ni. 'Nɩ ‑gbäsɩɩ ɔ mʋ lä nä, ‑aa ‑lä 'sɩɩ mii 'nɩ ‑a 'gä ‑mɔɔ mʋ. Nä, wälɩ‑ ‑saa 'titi ɔ ylä bhä nynä ɔ 'kä cii?

Lɔɔ 'mnätʋ kä 'bhlä nä, ɔ yi Zozii yëku

37‑Glɩsɩɩsɩɛɛ' gbäbhɩäylʋʋ, ‑ʋ plöö bhlä ylʋʋ 'kädʋʋ#7.37 Zɛɛ 'sɩɩ Levi 23.36. nä, ʋmʋ 'kʋ, Zozii ‑bha 'kʋ 'nɩ ɔ bhɛlɩä‑ nuwälɩ 'kʋ 'nɩ ɔ cii‑, ɔ lä nyɩkpɔɔ' lɔɔ 'mnätʋ kä 'bhlä nä, ɔ yi'i yëku ‑yä ɔ 'kä 'mnä! 38‑Ɔ gä'ä plɛkʋ 'tɛɛ nä, sɩɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, 'nyiee' lɛɛ ‑ɛ zelio lä nä, ɛ yio 'mnö 'plö.#7.38 Zɛɛ 'sɩɩ Eze 47.1; Zaka 14.8. 39Zozii ci bhlä sɔɔ nä, nyɩkpaa' ‑lʋa ‑wa ‑kä lä ɔɔ' pɔlötɛtɛ nä, Kplɔɔkplɔɔ‑wugɔɔ wa kä bhlä ‑zee 'ni nä, ʋmʋ ɔ sä bhlä. Ɔɔ' ‑lä bhlä tee ɔɔ' 'klʋagbaa 'mnö ‑plä nä, Kplɔɔkplɔɔ‑wugɔɔ' ‑lä bhä tee ‑yi.

Nyɩkpaa doo‑ 'mʋ 'nɩ wa bhlää Zozii' ‑za 'kʋ

40‑Mä nyɩkpa ‑wa ‑kʋ bhlä ‑jlëa 'mnö nä, wa nuu‑ lä ɔɔ' ciciwälɩɩ nä, wa ci bhä, wlä nyɩkpɔnɔ 'mɔɔ‑ plöö‑ lä 'zaazɩ 'Plɔfɛtɩɔ! 41‑Nänʋä lä ɔmɔɔ‑ plöö‑ lä Klisöɔ. ‑Mä 'yigädalʋä ci bhä, wlä nä, Klisöɔ Galileeyu ɔ 'kä bhä 'plö ‑a?#7.41 Zɛɛ 'sɩɩ 1.46; 7.52. 42‑Mɔɔ Laagɔ‑bɔɔgʋʋ 'mnö, kɩ ‑wʋ ‑jɩjlɔ nynä ‑mä Klisöɔ, ‑a tötɔ Davidöö' 'lɔlʋʋ 'mnö ɔ 'kä ghlää ‑a? ‑Mɔɔ Bɛtlɛmʋduu', ‑mɔɔ Davidö ɔ 'bhlɩɩ, ‑mɔɔ Klisöɔ 'kä lä ghlää.#7.42 Zɛɛ 'sɩɩ 2 Samɩɛ 7.12; Misee 5.1; Matie 2.5. Yio ‑a?

43‑Mä ‑nɩnɩ ‑gbä nä, kä ‑jlëa 'mnö nyɩkpaa doo‑ 'mʋ Zozii' ‑za. 44Bhloobhlolʋä ‑kʋ ‑mɔɔ 'nɩ wa ylä bhä nynä wa 'kɔ 'kʋ bhlü, ‑mä waa' ‑wʋ mii‑.

'Zufʋnyʋaa' 'cifinyʋa 'tɛ 'nyukwli kpänyɩ

45'Nɩ 'sʋjaa wa ‑lobho bhlä nä, wa yi 'ylɩbhɔ. Wa ‑yi lä 'nɩ 'Cibhisänyʋaa' 'cifinyʋa ‑yä Falizɩɛnyʋa 'sɔ yiwa 'ylä nynä ‑mä, ‑ɔnözä 'nɩ waa' bhä Zozii ‑lää? 46'Sʋjaa lä ‑aa ‑läzä sää nyɩkpɔ 'ni! Ciciwälɩ‑ ɔ ‑yi ‑lä nä, ɔmɔ 'bhisäkʋʋ' nyɩkpɔɔ' ‑wʋ ‑kʋ! 47Falizɩɛnyʋa lä anyɩ ‑mä 'sɩɩ ɔ ya'anyɩ yɩ 'nyigë ‑a? 48Nä, a yä bhä tɛɛ 'cifinyʋa ‑yä Falizɩɛnyʋa 'sɔ 'yi 'ni, 'nɩ waa' nëëdëë' nyɩkpɔ yä bhä ɔɔ' wälɩɩ nyaasäsä laa ‑a? 49Nyɩkpayɩ 'fɩɩn ‑wa ‑kä lä ɔɔ' pɔlötɛtɛ nä, waa' ‑wʋ Laagɔɔ' ‑Jlämaa ‑yi. Wa ‑glö 'kplünyʋä!

50‑Mä 'tänyɩɩ' wa ci bhlä sɔɔ nä, nyɩkpɔɔ ‑ɔ yi bhlä 'tänyɩ ‑bhloo' Zozii yëku 'nɩ wa laa bhlä Nikodɛmʋ nä,#7.50 Zɛɛ 'sɩɩ 3.1‑2. ɔ ‑kʋmʋ bhä ‑lɔɔ wamä nëëdë. 51'Nɩ ɔ yiwa 'ylä, ɔ lä nä, ‑a 'bhunyʋänyɩ‑, ‑anyɩa ‑Jlämaa 'mnö, gbʋ kä cii‑ ʋ 'kä nyɩkpɔ klä nä, waa' 'nu bhä 'fɩa ɔɔ' nëë' ‑a? Wälɩklëa' ‑laa ɔ ‑nʋ lä nä, waa' 'nia bhä 'yi 'nɩ gbʋ klɔ bhä ‑a?#7.51 Zɛɛ 'sɩɩ Detlo 1.16. 52'Nɩ wa yio soo, wlä Nikodɛmʋ‑, ‑mɔɔ ‑mä 'sɩɩ Galileeyu ‑n plöö‑ yɩ ‑a? ‑N tään 'nägäsä ‑mɔɔ ‑Jlämaa' 'bɔɔgʋʋ 'mnö, ‑mä ‑n yi 'ni nynä 'plɔfɛtɩɩ' ‑lä 'kɔɔn Galilee' 'wlʋ!#7.52 Zɛɛ 'sɩɩ 1.46; 7.41.

Wa 'kä wluyläŋnɔ cɛkwɩɩ' 'bhlä

[53‑Nɩnɩ 'fɩɩn ‑bhɩä ylä 'nɩ nyɩkpɔ nyɩkpɔ yi ɔɔ' ‑bhäändä mʋ.

Currently Selected:

Zään 7: god

Highlight

Copy