Zään 6

Zozii ‑bhibhie 'nɩ 'flɔɔ ‑zumë

(Matie 14.13‑21; Makö 6.30‑44; Lukö 9.10‑17)

1‑Nɩnɩ 'fɩɩn plöö‑ ylä nä, Zozii tɔɔ‑ Galilee' 'nyi 'kädɛɛ wa laa lä 'sɩɩ Tibeliadö‑duu' 'nyiee nä, 'nɩ ɔ 'plöö‑ ɛɛ klëë' ‑kpʋkpʋʋ 'kʋ. 2‑Mä 'yiziziogbɩɩ ɔ nʋ bhlä 'nɩ ɔ yamä bhlä gupanyʋa nä, nyɩkpa ‑bhutukpä nii‑ bhlä 'yi nä, wa güo‑ bhä 'kʋ dää 'fɩɩn. 3'Nɩ ɔ yi 'kükë 'wluu mʋ ɔ ‑yä ɔɔ' 'kʋgënyʋa 'sɔ, 'nɩ wa yi ‑mɔɔ sä kʋ. 4'Zufʋnyʋaa' Pakö‑glɩsɩɩsɩɛ' 'tänyɩɛ yä bhɛ 'mɛmɛ.

5‑Mä Zozii bhɛlɩä‑ lä 'wlu 'kʋ nä, ɔ lɔ wloo nä nyɩkpa, waa' 'kpö 'käda yinöɔ. 'Nɩ ɔ yi Filipʋ 'ylä, ɔ lä Filipʋ‑, dä ‑sä ‑a yi bhä 'flɔɔ zɔmʋ 'nɩ ‑a yi bhä nyɩkpanä 'nyɛ 'nɩ wa yi bhä lüü? 6‑Bhlɛ Zozii ‑yi wɛzä sä ɔ 'kä bhlä nʋ nä ‑mä, kɔ yla bhlä Filipʋ lɩɩ'.

7Filipʋ lä yeeke! Cɩanyɔ‑, ‑flëëgüyii' gwlɩ ‑ngbüü' 'ci 'sɔ 'titii, ɩɩ' ‑lä mii 'nɩ ɩ 'kä nyɩkpanä 'flɔɔ ‑gä zɔɔ 'nɩ, nyɩkpɔ nyɩkpɔ 'kä sää 'klülɛɛ 'ni. 8Zozii' 'kʋgënyɔ ‑bhlo, Simɔɔ Pɩɛlö ɔ bheli Adlee, ɔ lä 9Cɩanyɔ‑, nyëblulɛɛ ‑kʋ ‑lää 'nɩ ɔ ‑kä 'flɔɔbhü ‑ngbü ‑yä zliiyi 'sɔ, ‑mä nyɩkpa‑gbʋnʋ, däsä ɩ 'kwa bhä ŋëë?

10'Nɩ Zozii yiwa soo, ɔ lä a gbä ‑yä nyɩkpaa kʋ sä! ‑Piti ‑kʋ bhä sää ‑lɔɔ ‑tɛɛ. 'Nɩ wa yi gbä 'nɩ wa yi ‑lɔɔ sä kʋ. Wa yi bhä nyɩkpaa' ‑bhɛgö ‑ngbü (5.000) ŋëë.#6.10 'Ŋwnɩa ‑yä 'yua 'sɔɔ bhɔɔ ‑zɛnöɔ. 11Zozii bhlüü‑ 'flɔɔ 'kʋ 'nɩ ɔ yi bhibhie, 'nɩ ɔ yiu nyɩkpaa dëë. Ɔ bhlüü‑ 'sɩɩ zlüü 'kʋ 'nɩ sä wa ylä bhlä nä, ɔ yiwa sɔɔ dëë. 12‑Mä wa ‑lü 'nɩ wa ‑loo. 'Nɩ Zozii yi ɔɔ' 'kʋgënyʋa soo, ɔ lä a mʋ a tëpë 'klüü ‑ɩ ‑too lä 'kʋ nä ‑yä lʋʋ' kä mnɔ! 13'Nɩ wa yi mʋ 'nɩ wa yi 'klüü tëpë. ‑Mä 'flɔɔbhünö ‑ngbü Zozii ‑dënʋwa 'nɩ wa ‑lü bhlä nä, ɩɩ' 'klüü ‑ɩ ‑ji lä 'kʋ nä, ɩ ‑nʋ ‑takwü 'kʋgbä 'sɔ.

14Nyɩkpaa nii‑ lä 'yiziziogbɩnɩ 'yi nä, wlä 'zaazɩ, 'plɔfɛtɩɔ ‑ɔ 'gä bhlä yi nä, ɔmɔɔ‑ ‑kʋ lä ‑lää! 15Zozii ‑yibhë lä sɔɔ nynä mä kwa 'kɔ lä kutu kutu klä ‑yä wa 'kɔ 'Zufʋnyʋaa' 'leyi‑këkpëa 'kʋ 'ŋʋ nä, kɔ ‑bhʋwa nëëdë 'nɩ ɔ yi bʋkʋ 'kükë 'wlu mʋ ɔmɔ ‑bhlo.

Zozii nämnö‑ 'nyie 'klʋ

(Matie 14.22‑34; Makö 6.45‑53)

16‑Kugbë‑tänyɩɩ', Zozii' 'kʋgënyʋa ‑yi 'nyie yëku 17'nɩ wa yi 'gokpë plä ‑yä wa 'kä 'tɔɔ, wa 'kä bhɛ Kapɛnayumöduu' mʋ. ‑Mä 'ylʋ yä bhɛ bhlü 'nɩ Zozii' ‑lä bhä tee ‑yi. 18'Nɩ dide ‑vʋvɔlʋ cie‑ yilɩ 'kʋ, 'nɩ ʋ bhɛlɩä bhä 'nyinakwɩɩ 'kʋ. 19'Kʋgënyʋa luu‑ 'nɩ wa ‑mʋ 'fɩa 'sää kilooyuë ‑ngbü ‑yä ‑ngboploo' ‑gbäsɩ, 'nɩ waa' 'yi ‑bhlüü Zozii 'kʋ. Ɔ nämnö bhä 'nyiee 'klʋ 'nɩ ɔ yii bhä 'gokpëa. ‑Mä kä ‑ŋänö ‑plʋwa. 20'Nɩ Zozii yiwa soo, ɔ lä ‑ŋänö 'nä 'bhlä'anyɩ ‑lä ‑mä ‑amʋ lä! 21Ɔ cii‑ bhɛ la sɔɔ nä, ɔɔ' 'kʋgënyʋa tään bhɛ nynä wa 'kä gbä ‑yä ɔ 'kä plä, ‑mä wa yä bhɛ ŋëë. 'Nɩ 'gokpëa yi 'nyi‑kpʋkpʋʋ 'kʋ 'pɛɛ.

Nyɩkpa tään Zozii

(Zään 3.14‑16; 1 Zään 5.10‑13; 1 Kolɛ 11.23‑26)

22Zeli ‑ze ylä nä, nyɩkpaa ‑wa ‑too bhlä ‑mɔɔ 'nyie klë nä, wa ‑bɩä nynä 'gokpëa ‑bhlo 'coo‑ ‑kʋ bhlä ‑lɔɔ 'nyie yëku nä, amä Zozii' 'kʋgënyʋa ‑plä 'nɩ wa ‑mʋ, ‑mä Zozii 'titii' bhɔɔ 'muu‑. 23'Gokpüü' 'yigädalɩɩ ‑bha Tibeliadö‑duu' 'nɩ, dä Kwlienyɔ ‑bhibhie 'nɩ wa ‑lüü bhlä 'flɔɔ nä, ɩ yi ‑lɔɔ yi. 24‑Mä nyɩkpaa nii‑ lä 'yi nynä ‑mä Zozii' bhɔɔ ‑lɔɔ ‑kʋ nä, 'nɩ ɔɔ' 'kʋgënyʋa ‑mä 'sɩɩ waa' bhɔɔ ‑lɔɔ ‑kʋ nä, kä wa ‑plä 'gokpüü 'nɩ wa yio Kapɛnayumöduu' tään ‑kää mʋ.

Zozii‑ plöö‑ 'pʋpʋɛɛ 'flɔɔbhëa

25Wa ‑ŋëë Zozii ‑mɔɔ 'nyie klë 'nɩ wa yio 'ylä, wlä Cɩanyɔ‑, 'tänyɩ ‑sa 'mnö ‑n ‑yii bhä ‑mää? 26Zozii lä ‑nʋawlɛɛ, n sonö'anyɩ nynä ‑mä, n ‑nʋ lä 'flɔɔ 'nɩ a ‑lü 'nɩ a ‑loo lä nä, ɩɩ' ‑zä a tänö'ö lä. 'Yiziogbɩɩ ‑ɩ ‑nʋɔ lä nä, ɩmɩ aa' ‑wʋ 'mʋ nuu‑. 27Lülülɩɩ ‑ɩ zɛ lä nä, aa' nʋ lä ɩɩ' lebhe ‑mä, 'pʋpʋɛɛ‑ ‑kʋ lä 'kɔɔkɔɔ ‑za 'nɩ Nyɩkpɔɔ Yowli nyɛ lä nä, ɛɛ' lebhe a la nʋ! 'Nɩ sä Nyɩkpɔɔ ‑Yowli 'mɔ Laagɔ 'titi ŋʋʋ‑ lä 'päwä 'kʋ nä, ɔ yi'anyɩmɛ 'nyɛ. 28Ɔ cii‑ lä sɔɔ 'nɩ wa yio 'ylä, wlä sä ‑a yi bhä nʋ 'nɩ ‑a yi bhä Laagɔɔ' lebhee nʋʋ? 29Zozii lä lebhee Laagɔ 'ylänö'anyɩ lä nä, ɛmɛɛ‑ plöö‑ lä nynä ‑mä nyɩkpɔɔ ʋ ‑lobho lä nä, a kään ɔɔ' pɔlötɛtɛ.

30Nyɩkpaa lä nä panalɩ‑ ‑sä ‑n yi‑anyɩ bhä 'nyɛ 'nɩ ‑a yi bhä ‑naa pɔlötɛtɛ kään? Nʋnʋgbɩɩ' 'cësä ‑n yi‑anyɩ bhä pana? 31'Tänyɩɩ ‑a 'bäsɩ ‑kʋ bhlä ‑mɔɔ 'popie 'mnö nä, 'flɔɔ wa laa lä 'manö nä, ʋ ‑bha ‑laagɔɔ' 'nɩ wa ‑luu. 'Nɩ ɩ ‑jɩjlɔ 'sɔɔ ‑mɔɔ Laagɔ‑bɔɔgʋʋ 'mnö nynä ‑mä, ɔ nyɩwa‑ 'flɔɔ lʋʋ‑ bha lä ‑laagɔɔ' nä, 'nɩ wa ‑luu.#6.31 Ɩ bha Lɔlɔ 78.24. 'Tänyɩɩ' 'Yizlɛnyʋä ‑kʋ lä ‑mɔɔ ‑gɔgö‑popie 'mnö nä, 'flɔɔ ‑bha ‑laagɔɔ 'nɩ ʋ ‑bhlü. Ʋmʋ wa laa lä 'manö. Zɛɛ 'sɩɩ 'Nämʋ 16.4,15.

32Zozii lä ‑nʋawlɛɛ 'mnö, n sonö'anyɩ nynä ‑mä, 'flɔɔ ‑ʋ bha lä ‑laagɔɔ' nä, Moyizö 'mɔɔ‑ nö'anyɩ mʋʋ ‑wʋ nyɛɛ‑. ‑Mä 'flɔɔ 'titi, ‑ʋ bha lä Laagɔɔ' nä, n 'Bä 'mɔɔ‑ nyɩ'anyɩmʋ lä. 33Laagɔɔ' 'flɔɔbhëa ‑a ‑bha lä Laagɔɔ' 'nɩ a kwlii‑ lä nä, amää‑ nyɛ lä 'ylʋzɔkʋnyʋä 'pʋpʋɛ. 34Ɔ cii‑ lä sɔɔ nä, nyɩkpaa lä Cɩanyɔ‑, 'flɔɔbhëyɩ, ‑n 'nyɩ‑anyɩma!

35Zozii lä 'flɔɔbhëa' ‑laa ‑a nyɛ lä 'pʋpʋɛɛ nä, ‑amʋʋ‑ plöa‑ lä. Nyɩkpɔ kä'ä yii nä, ‑gbugbe 'nöɔ ‑lä 'kɔɔn 'bhlä. 'Nɩ ‑ɔ ‑kä lä 'sɩɩ 'naa pɔlötɛtɛ nä, 'mnätʋ 'nöɔ ‑lä 'kɔɔn 'bhlä. 36N ya'anyɩ wɛzä soo nynä a yä'ä 'yi 'ni ‑mä, aa ‑wʋ 'naa pɔlötɛtɛ ‑kä. 37Nyɩkpaa 'fɩɩn 'Bäɔ nyɛɛ'ɛ lä nä, kä wa la kä'ä yii. 'Nɩ nyɩkpɔ kä'ä yii nä, n 'nöɔ lä 'kɔɔn cɛɛ. 38N ‑bha Laagɔɔ' 'nɩ n kwlii‑ lä nä, nn' ‑wʋ 'naa pɔlösä nʋ ‑kää ‑yi, ‑mä ‑ɔ ‑lobho'o lä nä, ɔɔ' pɔlösaa 'mö n ‑yi lä nʋ ‑kää. 39‑Ɔ ‑lobho'o lä nä, kɔ ylä nynä nyɩkpaa ɔ nyɛɛ'ɛ lä nä, nn' të ‑lä waa' 'kʋʋ lɔɔ ‑bhlo, ‑mä n gbä ‑yä bhɩäylʋʋ 'kʋ wa ‑bha 'kwiee nëë'. 40'Bäɔɔ pɔlösaa, sɔɔ‑ plöö‑ lä nynä ‑mä, nyɩkpɔ kä Laagɔ ‑Yowli 'yi nii‑, 'nɩ ‑ɔ ‑kä ɔɔ' pɔlötɛtɛ ‑kä nä, 'pʋpʋɛɛ‑ ‑kʋ lä 'kɔɔkɔɔ ‑za nä, ‑lɔɔ' nyɩkpɔɔ yie 'ni, 'nɩ bhɩäylʋʋ 'kʋ nä, n yio 'kuëë gälɩä.

41‑Mä Zozii cii‑ lä nynä ɔmɔɔ‑ plöö‑ 'flɔɔbhëa ‑a bha lä Laagɔɔ' 'nɩ ‑a kwlii‑ lä nä, 'Zufʋnyʋa 'ŋuŋuë bhɛ. 42Wa ci bhä wlä ‑mä Zozɛfʋ ‑yowli Zozii 'mɔɔ‑ ‑wʋ ‑lɔyɩ ‑kʋ ‑a? ‑A ‑yi ‑kä ɔ 'bä, 'nɩ ‑a ‑yi ‑kä ɔ 'nɔ.#6.42 Zɛɛ 'sɩɩ Makö 6.3; Matie 13.55; Lukö 4.22. 'Nɩ sɩ ‑kʋ bhä 'nɩ ɔ sonö‑anyɩ bhä nynä ‑mä ‑laagɔɔ' ɔ bha 'nɩ ɔ kwlii? 43'Nɩ Zozii yiwa soo, ɔ lä a 'nä 'ŋuŋuë ‑lä anyɩ ‑bhlobhlo pää! 44A ni 'Bäɔ ‑ɔ ‑lobho'o lä nä, ɔ 'nö nyɩkpɔ ‑jlü nä, nyɩkpɔ 'titi, ɔɔ' 'yɛkɛ 'yɛkɛɛ' ‑lä mii 'nɩ ɔ kä'ä yii. ‑Mä nyɩkpɔ kä'ä ‑yii nä, bhɩäylʋʋ 'kʋ n yio 'kuëë gälɩä.

45 'Plɔfɛtɩnyʋa ‑jɩjlä wälɩklë, wlä Laagɔ yi nyɩkpaa' 'fɩɩn cɩa.#6.45 Ɩ bha Eza 54.13. Nä, ‑ɔ ‑poo lä 'Bäɔ 'nyukwli 'nɩ ‑ɔ ŋoo‑ lä ɔɔ' cɩalɩɩ 'kʋ nä, ɔmɔɔ‑ yinö'ö lä. 46Ɩɩ' ‑wʋ plöö‑ nynä ‑mä kä nyɩkpɔ nii‑ 'Bäɔ 'yi, ‑mä ‑lɔɔ ‑ɔ bha lä Laagɔɔ' 'mnö nä, ɔmɔ ‑bhlo 'coo nii‑ lä 'Bäɔ 'yi.#6.46 Zɛɛ 'sɩɩ 1.18. 47N sonö'anyɩ ‑nʋawlɛɛ' nynä ‑mä, nyɩkpɔ kä 'naa pɔlötɛtɛ ‑kä nä, 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yɛ 'ni.

48‑Amʋʋ‑ plöö‑ lä 'flɔɔbhëa ‑a nyɛ lä 'pʋpʋɛ nä. 49A 'bäsɩ ‑kʋ bhlä ‑mɔɔ 'popie 'mnö nä, wa ‑lü 'flɔɔ wa laa bhlä 'manö nä, ‑mä sɔɔ ɩ ‑kʋ 'nɩ wa kuu‑. 50‑Mä 'flɔɔbhëa ‑a bha lä ‑laagɔɔ' 'nɩ ‑a kwlii‑ lä nä, nyɩkpɔɔ' lɔɔ ‑ɔ ga ‑lü nä, ɔɔ' ‑lä 'ku. 51‑Amʋ nä, 'flɔɔbhëa ‑laa ‑a bha lä ‑laagɔɔ' 'nɩ ‑a kwlii‑ lä nä, ‑amʋʋ‑ plöa lä. ‑Lɔɔ 'flɔɔbhëa nä, ka nyɛ 'pʋpʋɛ. Nyɩkpɔ ka ‑lü nä, ɔ yi 'pʋpʋɛɛ 'ni 'kɔɔkɔ ‑za. 'Nɩ 'flɔɔbhëa n 'kä lä 'nyɛ nä, 'naa 'yɛkɛɛ lä. Ɛmɛ n 'kä lä 'nyɛ ‑yä 'ylʋzɔkʋnyʋä 'kä 'pʋpʋɛ 'ni.

52Ɔ cii‑ lä sɔɔ nä, 'nɩ 'Zufʋnyʋa ‑bhlobhlo, wa yi yɔɔlɩ 'kʋ cie. Wlä säsä ɔmɔ, ɔ yi bhä mii 'nɩ ɔ yi‑anyɩ bhä ɔɔ' 'yɛkɛɛ lüdä 'nyɛɛ? 53'Nɩ Zozii yiwa soo, ɔ lä ‑nʋawlɛɛ 'mnö, n sonö'anyɩ nynä ‑mä, a 'nö Nyɩkpɔɔ ‑Yowlii' 'yɛkɛɛ lü, 'nɩ a 'nö ɔɔ' doluu 'mnä nä, aa' ‑lä 'pʋpʋɛ 'ni. 54‑Ɔ gä 'naa 'yɛkɛɛ lü 'nɩ ‑ɔ gä 'naa doluu 'mnä nä, 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yie 'ni. 'Nɩ bhɩäylʋʋ 'kʋ, n yio 'sɩɩ 'kuëë gälɩä. 55Nä, 'naa 'yɛkɛɛ ‑glö lülülʋʋ 'titi, 'nɩ 'naa doluu ‑glö 'mnä 'mnälʋʋ 'titi. 56‑Ɔ gä 'naa 'yɛkɛɛ ‑lü, 'nɩ ‑ɔ gä 'naa doluu mnää‑ nä, kɔ ‑yä ‑amʋ 'sɔ yä lä 'jɛnyɩ, 'nɩ ‑amʋ ‑mä 'sɩɩ, n ‑yɔsɔ yä lä 'jɛnyɩ. 57'Bäɔ ‑ɔ ‑lobho'o lä nä, kɔ ‑kä 'pʋpʋɛ nä, ɔmɔɔ‑ gbä 'nɩ n ‑kä lä 'sɩɩ 'pʋpʋɛ. Nä nyɩkpɔ kä'ä lü nä, n yi 'sɩɩ gbä 'nɩ ɔ yi 'pʋpʋɛ kään. 58'Flɔɔbhëa ‑a bha lä ‑laagɔɔ' nä, sɔɔ a ‑kʋ lä. Aa' ‑wʋ ‑kʋ nynä a tɩtɩää' 'flɔɔ wa ‑lü lä nä. Wa ‑luu 'nɩ wa yä lä 'ku. ‑Mä ‑lää' 'flɔɔbhënä, ‑ɔ ga ‑lü nä, ɔ yi 'pʋpʋɛɛ kään 'kɔɔkɔ ‑za. 59Wälɩnɩ 'fɩɩn, Zozii ‑kʋ bhä ‑mɔɔ Kapɛnayumöduu' Laagɔ‑bhutuu 'mnö cɩadä 'nɩ ɔ cii‑ bhlä.

Zozii' 'kʋgënyʋä ‑bhutukpä ‑sɔɔ gwë

60Ɔɔ' 'kʋgënyʋa nuu‑ lä wälɩɩ nä, waa' nëëdë' bhutukpä cii‑ wlä wälɩɩ ɔ ci lä nä, ɩ 'tɛ kpänyɩ! ‑Ɔ yi bhä mii 'nɩ ‑ɔ yii bhä 'kʋ ŋoo? 61‑Mä Zozii ‑yibhë 'sɔɔ nynä kä wa 'ŋuŋuë bhä 'mnö 'nɩ ɔ yiwa soo, ɔ lä ‑mä, kɩ 'kpɔsʋ'anyɩ plɛ ‑a? 62'Nɩ 'tänyɩɛ 'mnö a 'kä lä 'ni ‑yä Nyɩkpɔɔ ‑Yowli 'kä lä gblää, ‑yä ɔ kä lä ɔɔ' bhäädä mʋ nä, säsä a 'kä ‑kä bhä cii?#6.62 Zɛɛ 'sɩɩ Nʋnʋ 1.9‑11. 63Laagɔ‑Wugɔɔ, ʋmʋʋ‑ nyɛ lä nyɩkpɔ 'pʋpʋɛ. 'Yɛkɛɛ' 'tɛtɩɩ, ɩɩ' fä ‑wʋ nyɩkpɔ dä. Wälɩɩ n ‑sonö'anyɩ lä nä, ɩ ‑glö 'wugɔ 'nɩ ɩ ‑glö 'sɩɩ 'pʋpʋɛ. 64‑Mä sɔɔ ɩ ‑kʋ 'nɩ ‑nänʋä ‑kʋ'anyɩ nëëdë 'nɩ waa' lɩɩ ‑wʋ nyaasäsä. Sɩ ‑kʋ bhlä naa, nyɩkpaa ‑waa bhɔɔ lä Zozii' pɔlötɛtɛ ‑kä nä, kɔ ‑yiwa bhä 'kɔɔkɔ. 'Nɩ nyɩkpɔɔ' ‑lɔɔ ‑ɔ 'gɔ bhlä pëë nä, ɔ ‑yio bhä 'sɩɩ. 65'Nɩ ɔ yi ci, ɔ lä wälɩnɩ, ɩmɩɩ‑ ‑kä 'ŋnö 'nɩ n sonö'anyɩ bhlä nynä 'Bäɔ 'nö nyɩkpɔ ‑jlü nä, ‑lɔɔ' nyɩkpɔɔ' ‑lä mii 'nɩ ɔ kä'ä yii.

66'Bhää bhɛ ‑lɔɔ 'kʋ nä, kä Zozii' 'kʋgënyʋaa' bhutukpä ‑sɔ bhɛ gwë. Wa nyɔkɔ bhɛ ɔɔ' 'kʋgëlɩɩ' gbʋ. 67'Nɩ 'kʋgënyʋa 'kʋgbä 'sɔ ‑wa ‑too bhlä ‑lɔɔ nä, Zozii yiwa 'ylä, ɔ lä ‑mänɩ anyɩ! Aa' 'muu bhä ‑a? 68Simɔɔ Pɩɛlö lä Kwlienyɔ‑, 'nɩ ‑a 'gä bhä bʋkʋ yëku mʋʋ? Zëkpëa ‑aa ‑wʋ lä bhɩädä ‑kä nä, ‑naa ciciwälɩɩ 'mɩɩ‑ nyɩa lä. 69‑Anyɩ nä, ɩmɩ ‑a laa lä nyaasäsä, 'nɩ ‑a ‑yi 'sɩɩ sɔɔ nynä Laagɔɔ' Kplɔɔkplɔɔnyɔɔ ʋ ‑lobho lä nä, ‑mɔɔ plöɔ‑!#6.69 Zɛɛ 'sɩɩ Matie 16.16; Makö 8.29; Lukö 9.20. 70'Nɩ Zozii yiwa soo, ɔ lä anyɩ 'kʋgbä 'sɔ, ‑amʋʋ‑ nö'anyɩ ‑wʋ laa ‑a? ‑Mä ɩ ‑kʋ sɔɔ 'nɩ anyɩa nëëdë ‑bhlo plöö‑ 'dëvlo‑nyɩkpɔ. 71Zudaa, Simɔɔ Sikalɩɔtö ‑yowli, ɔmɔ Zozii sä bhlä. Zudaa nä, ɔ plöö‑ bhä 'flɛ Zozii' 'kʋgënyʋa 'kʋgbä 'sɔ nëëdëë' nyɩkpɔ, ‑mä ɔmɔɔ‑ 'gɔ bhlä pëë.#6.71 Zɛɛ 'sɩɩ 13.2,21; 18.5.

Currently Selected:

Zään 6: god

Highlight

Copy