Zään 13

Zozii ‑wɔɔ ɔɔ' 'kʋgënyʋa ‑kokokpü

(Matie 26.19‑20; Makö 10.35‑45; Lukö 22.14‑18,24‑27)

1Zeli 'kä bhɛ ze ‑yä 'Zufʋnyʋaa' Pakö‑glɩsɩɩsɩɛ 'kä ŋëë. ‑Mä Zozii nä, ɔ ‑yia sɔɔ nynä ‑mä 'tänyɩɛ yä bhɛ ŋëë ‑yä ɔ 'kä 'ylʋzɔɔ ‑bha ‑yä, ɔ 'kä 'Bäɔ yëku mʋ. Nyɩkpaa‑ plöö‑ bhlä ɔɔ' lʋä nä, kɔ panʋwa‑ ɔɔ' ‑wawʋʋ.

2‑Kugbë‑tänyɩɩ', ɔ ‑yä ɔɔ' 'kʋgënyʋa 'sɔ lü bhä. Lɔɔ' 'tänyɩɛɛ' nä, Zudaa, Simɔɔ Sikalɩɔtö ‑yowli, 'Dëvlo yɔ wɛzä 'wlu nyima ‑yä ɔ 'kä Zozii pëë. 3Zozii ‑yi a sɔɔ nynä kɔ 'Bä Laagɔ nyɩɔ‑ bhä ‑lɩɩ 'fɩɩn 'päwä 'kʋ. Ɔ ‑yi a 'sɩɩ sɔɔ nynä Laagɔ yëku ɔ bha nä, ɔ yi bhä ‑mɔɔ 'ylɩbhɔɔ. 4Nä, wa ‑kʋ bhɛ lüdä, 'nɩ ɔ ‑bha 'kʋ. Ɔ ‑sä ‑mɔɔ ɔɔ' 'wlukʋʋ 'kotuu, 'nɩ ɔ bhlüü‑ lokwiklë 'kʋ, 'nɩ ɔ yi 'mnö nɛɛ. 5'Nɩ ɔ yi 'nyuu 'boo jɛɛ, 'nɩ ɔ yi ɔɔ' 'kʋgënyʋa bhɩ yëku wɔɔlɩ 'kʋ cie. Ɔ wɔɔ nä, ɔ bhlü lokwiklëa 'kʋ, 'nɩ ɔ sɩɔ. 6Ɔ ‑nʋ sɔɔ ‑aaa, 'nɩ ɔ yi Simɔɔ Pɩɛlö 'kʋ ŋëë. Pɩɛlö lä Kwlienyɔ‑, ‑mɔɔ gä'ä bhɩ yëku wɔɔ ‑a? 7Zozii lä wälɩɩ n nʋ lä ‑lää nä, ‑n 'nɩɩ ‑lä ‑pɛpɛɛ' 'mʋ 'nu, ‑mä ‑zee nä, ‑n yi ɩɩ' gba yibhë. 8Pɩɛlö lä nn' ‑lä 'kɔɔkɔ ŋoo nynä ‑mɔɔ ‑n wɔnö'ö ‑kokokpü! Zozii lä n 'nö‑ö ‑kokokpü ‑wɔɔ nä, nn' ‑lä 'kɔɔn 'naa wlɩɩ' lʋʋ 'ni. 9Simɔɔ Pɩɛlö lä sɔɔ ɩ kä ‑kʋ nä, Cɩanyɔ‑, ‑naa wɔnö'ö ‑lä ‑kokokpü ‑bhlo ‑mä, ‑n wɔnö'ö 'sɩɩ wlɩ ‑yä 'wlu! 10Zozii lä nyɩkpɔ kä ‑budo nä, ɔɔ' tää yɩɔ bʋkʋ budolɩ. Sä ɔ ‑kplɔɔ lä nä, ‑kokokpü ‑bhlo ɔ wɔɔ. Anyɩ nä, a ‑kplɔɔ ‑mä, anyɩ 'fɩɩn‑ ‑wʋ ‑kplɔɔ. 11Zozii ‑yi bhä nyɩkpɔɔ' ‑lɔɔ ‑ɔ 'gɔ bhlä pëë nä, 'ɩzä ɔ ci bhlä nynä anyɩa ‑lefɩɩn‑ ‑wʋ ‑kplɔɔ.

12Ɔ ‑wɔnʋwa ylä ‑kokokpü nä, 'nɩ ɔ yi ɔɔ' 'kotuu 'mʋ plä, 'nɩ ɔ yi lü ‑kää yi. 'Nɩ ɔ yiwa 'ylä, ɔ lä sä n ‑nʋ'anyɩ lä nä, a nuu‑ sɔɔ 'mʋ ‑a? 13A lä'ä Cɩanyɔ‑, 'nɩ a lä'ä Kwlienyɔ‑. 'Nɩ n plöö‑ 'zaazɩ Cɩanyɔ ‑yä Kwlienyɔ. 14Nä, ‑amʋ ‑lɔɔ ‑ɔ plöö‑ lä Kwlienyɔɔ ‑yä Cɩanyɔɔ nä, n ka'anyɩ ‑kokokpü ‑wɔɔ nä, anyɩ ‑mä 'sɩɩ, ɩ ‑ŋwa 'kʋ nynä a wɔnö ‑wɔnö ‑kokokpü. 15Panalɩɩ n nyɩ'anyɩ lä nä, a 'gii 'kʋ ‑yä, sä n ‑nʋ'anyɩ lä nä, anyɩ ‑mä 'sɩɩ, a 'kä sɔɔ nʋ. 16N sonö'anyɩ ‑nʋawlɛɛ 'mnö nynä ‑mä, ‑gänʋnyɔɔ' ‑wʋ 'ghlü 'nɩ ɔ 'kä ɔɔ' käänyɔ ‑zi. 'Nɩ lobho lobhonyɔ, ɔɔ' ‑wʋ 'sɩɩ 'ghlü 'nɩ ɔ 'kä ‑ɔ ‑lobhuo lä nä ‑zi. 17A ‑yi ylä ‑nɩnɩ 'fɩɩn nä, a kä ɩɩ' saa nʋ nä, ɩ yi anyɩa' ‑jäkä nʋ.

Zozii lä Zudaa yio pëë

(Matie 26.20‑25; Makö 14.18‑21; Lukö 22.21‑23)

18Anyɩ 'fɩɩn nn' sä ‑wʋ. ‑Lʋa n laa‑ lä nä, n ‑yiwa. ‑Mä ɩ ‑ŋwa 'kʋ nynä sɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, ɩ 'plö sɔɔ 'kʋ. Kɩ ‑jɩjlɔ lä nynä ‑Ɔ ‑yä ‑amʋ 'sɔ lüü lä ‑dɔkɔɔ ‑bhloo' nä, ɔ yä 'naa ‑zɔbhlɛgbänyɔɔ' jɩjlää.#13.18 Ɩ bha Lɔlɔ 41.10.

19Nä, kä n sonö'anyɩ lä ‑bhlɛ, ɩyä 'tänyɩɛ 'mnö ɩ 'kä lä ŋënö nä, a 'kä 'naa pɔlötɛtɛ kää ‑yä, a 'kä sɔɔ yibhë nynä ‑amʋ nä, n ‑kʋ.

20Kä n sonö'anyɩ lä ‑nʋawlɛɛ 'mnö nynä nyɩkpɔɔ' lɔɔ n ‑lobho lä nä, ‑ɔ gɔ 'nägäsä ‑klä nä, ‑amʋ ɔ ‑klä lä 'nägäsä. 'Nɩ ‑ɔ gä'ä 'sɩɩ 'nägäsä ‑klä nä, ‑ɔ ‑lobho'o lä nä, ɔmɔ ‑lɔɔ' nyɩkpɔɔ ‑klä lä 'nägäsä.

21Zozii cii‑ ylä sɔɔ nä, kä wälɩɩ ‑kamänöɔ yëkuu, 'nɩ ɔ yi ci, ɔ lä n sonö'anyɩ ‑nʋawlɛɛ 'mnö nynä anyɩa' nëëdëë' nyɩkpɔ yi'i pëë. 22‑Mä ‑lɔɔ ɔ sä bhlä nä, ɔɔ' 'kʋgënyʋa 'nöɔ bhɔɔ ‑yi nä, wa wloo wloo bhɛ. 23Waa nëëdëë' lɔɔ ‑bhlo, ‑lɔɔ Zozii ‑waa bhlä kpänyɩ nä, ɔ ‑kʋ bhä ‑lɔɔ lüdaa 'nɩ ɔ mɛɛ‑ bhä Zozii yëku. 24'Nɩ Simɔɔ Pɩɛlö yio 'kʋ pɩä nynä ɔ 'ylä Zozii nynä lɔɔ ‑sä ɔ sä bhää? 25'Nɩ ‑lɔɔ 'kʋgënyɔɔ yi Zozii 'wlu yëku fä, 'nɩ ɔ yio 'ylä nyna ‑mä, Kwlienyɔ‑, lɔɔ ‑sa bhä? 26Zozii lä n kä 'flɔɔklënä ŋwaa‑ nä, ‑lɔɔ n 'ka lä 'nyɛ nä, ɔmɔ lä. Ɔ ŋwaa‑ ylä 'flɔɔklëa nä, Simɔɔ Sikalɩɔtö ‑yowli Zudaa, ɔmɔ ɔ nyɩa‑. 27‑Mä Zudaa bhlüa‑ lä 'gää 'kʋ nä, kä 'Dëvlo sluo‑ kätää'. 'Nɩ Zozii yio soo, ɔ lä ‑lʋʋ ‑n ‑yi lä nʋ ‑kää nä, ‑n nʋʋ 'fäfä! 28‑Mä ‑lʋa 'fɩɩn ‑wa ‑kʋ bhlä ‑lɔɔ lüdaa nä, ‑lʋʋ ‑ʋnözä Zozii cii‑ lä sɔɔ nä, wa 'nʋ bhɔɔ ‑yi. 29Sɩ ‑kʋ bhlä naa, Zudaa nä, Zozii ‑yä ɔɔ' 'kʋgënyʋa 'sɔɔ moniee' 'bhɔklɔɔ, ɔmɔɔ‑ klʋ bhlä 'nää. Ɩ ‑kä 'ŋnö nä, ‑nanʋä ‑bhobho bhä nynä kä Zozii ‑sonöɔ nynä ɔ mʋ ‑yä ɔ 'kä ‑glɩsɩɩsɩɛɛ' lɩɩ zɔɔ. ‑Nänʋä ‑bhobho bhä 'sɩɩ nynä kɔ ‑sonöɔ nynä ɔ mʋ ‑yä ɔ 'nyɛ ŋäzönyʋa lʋʋ. 30Zudaa bhlüü‑ lä 'gää 'flɔɔklëa 'kʋ nä, kɔ wlʋʋ‑ ‑zɔɔ. 'Ylʋ yä bhɛ bhlü.

Zozii lä ɔɔ' 'kʋgënyʋa wamä ‑wamä

31Zudaa wlʋʋ‑ ylä ‑zɔɔ nä, kä Zozii cii‑, ɔ lä ‑pɛpɛɛ nä, kä Nyɩkpɔɔ ‑Yowlii' 'klʋagba 'kä ylä 'yi nio. Ɩyä ɔmɔ 'mnö Laagɔɔ' 'klʋagbaa 'kä 'sɩɩ 'yi nio. [32Ɔ kä ‑gbä 'nɩ wa kä Laagɔɔ' 'klʋagbaa 'yi nii‑ nä,] Laagɔ ‑mä 'sɩɩ, ʋ yi gbä 'nɩ wa yi ʋ ‑Yowlii' 'klʋagbaa 'yi ni. 'Nɩ ‑ɔ ‑too yɩ 'sɩɩ ‑mɔɔ 'pɛpɛ ‑yä wa 'ka 'yi 'ni. 33Nä, 'naa 'yuënyɩ‑, n ‑kʋ'anyɩ ‑lätee 'pɛpɛlɩä nëëdë. Sä n ‑soo lä ‑mɔɔ 'Zufʋnyʋa nä, sɔɔ n sonö'anyɩ lä 'sɩɩ nynä ‑gbäsɩɩ n mʋ lä nä, aa' ‑lä ‑mɔɔ' yilɩ mii.#13.33 Zɛɛ 'sɩɩ 7.34. 34Kä n nyɩ'anyɩ ylä ‑jlämä lëlë. Amää‑ plöö‑ lä nynä ‑mä a wamä ‑wamä! Sä n ‑wamänö'anyɩ lä nä, ɩ ‑ŋwa 'kʋ nynä ‑mä a wamä ‑wamä 'sɔɔ. 35A kä yɩ ‑wäwää nä, ‑lɔɔ nyɩkpaa 'fɩɩn yi lä sɔɔ yibhë nynä a ‑glö 'naa 'kʋgënyʋä.

Zozii lä Pɩɛlö yio cɛɛ

(Matie 26.31‑35; Makö 14.27‑31; Lukö 22.31‑34)

36'Nɩ Simɔɔ Pɩɛlö yio 'ylä nynä Kwlienyɔ‑, dä ‑n mʋ bhää? Zozii lä ‑gbäsɩɩ n mʋ lä nä, ‑n nö'ö ‑lä ‑mɔɔ' 'kʋgëlɩ mii ‑pɛpɛɛ. ‑Mä ‑zee, ‑n yi ‑mɔɔ yi. 37Ɔ cii‑ lä sɔɔ nä, Pɩɛlö lä Kwlienyɔ‑, ‑ɔnözä 'nɩ nn' ‑lä bhä ‑pɛpɛɛ ‑naa 'kʋgëlɩ mii? N ‑ghlɩlɩ 'nɩ, 'naa zëkpëa, n yia 'nyɛ ‑naa ‑zaa! 38'Nɩ Zozii yio soo, ɔ lä Pɩɛlö‑, ‑n yi bhä 'zaazɩ ‑naa zëkpëa 'nyɛ 'naa ‑zaa? ‑Nʋawlɛɛ 'mnö, kä n sonö‑ö ylä nynä ‑mä zözädö‑kɔkwɛɛ ‑lä tɛɛtɛɛdä wälɩ 'pä, 'nɩ ‑n yi'i 'ci taa cɛnö nynä ‑n nö'ö ‑wʋ ‑yi.

Currently Selected:

Zään 13: god

Highlight

Copy