Zään 1

Zozi Klisö 'mɔɔ‑ plöö‑ lä Ciciwälɩ

1‑Bhɔɔdää, 'fɩa ‑yä 'kɔɔn kä 'wlʋ nä, ‑ɔ plöö‑ lä Ciciwälɩɩ nä, ɔ ‑kʋ bhä. Kä Ciciwälɩ ‑yä Laagɔ 'sɔ ‑kʋʋ bhä 'kʋ, 'nɩ Ciciwälɩ plöö‑ bhä Laagɔ. 2Kɔ ‑yä Laagɔ 'sɔ ‑kʋʋ bhä 'kʋ ciedää.#1.1‑2 Zɛɛ 'sɩɩ ‑Jlibɔ 8.22‑26. 3Ɔmɔ 'kʋ Laagɔ ‑ghlää 'nɩ ʋ ‑nʋ ‑lɩɩ 'fɩɩn. 'Nɩ ‑lɩɩ 'fɩɩn‑ ‑kʋ lä 'ylʋzɔɔ nä, lʋʋ' ‑lʋʋ Ciciwälɩɩ' ‑wʋ lä ‑nʋ nä, ʋʋ' ‑wʋ ‑kʋ.#1.3 Zɛɛ 'sɩɩ Ciedä 1.3; Lɔlɔ 33.6,9; 1 Kolɛ 8.6; Kolɔ 1.16‑17. 4Ciciwälɩ 'mnö ‑mɔɔ 'pʋpʋɛ ‑kʋ, 'nɩ 'pʋpʋɛ ‑yi 'nɩ a plöö‑ 'ylʋzɔkʋnyʋää' zëlü. 5Zëlüü ‑ŋänɩä 'cucuu 'mnö ‑mä, 'cucuu 'nɩɩ ‑wʋ 'casɩ nyɛɛ‑.#1.5 ‑Nänʋä nui 'sɩɩ 'mʋ nynä 'cucuu' ‑wʋ zëlüü ‑sɩä.

6Nyɩkpɔ ‑bhlo Laagɔ ‑lobhuo. Ɔmɔ wa laa bhä Zään#1.6 Zään: Zään Badisö 'mɔ wa sä lä. Zɛɛ 'sɩɩ Zään 1.19‑36.. 7Zään nä, kɔ ‑yi bhä ‑yä ɔ 'kä ‑dläfʋɛ lü. Ɔɔ' ‑dläfʋɛɛ ɔ lü bhlä nä, zëlüü' ‑dläfʋɛɛ bhlä nä, kɔ ci bhlä ‑yä nyɩkpaa' 'fɩɩn 'kä zëlüü' wälɩɩ nyaasäsä laa. 8Ɔmɔɔ‑ bhɔɔ zëlüü plöö‑ ‑mä, kɔ ‑yi bhä ‑yä ɔ 'kä zëlüü' ‑dläfʋɛ lü. 9Zëlüyɩ nä, ɩmɩɩ‑ plöö‑ bhlä zëlüü 'titi. Kɩ ‑yi ‑mää 'ylʋzɔɔ 'nɩ ɩ ŋänɩä lä nyɩkpaa 'fɩɩn 'kʋ.

10‑Ɔ plöö‑ lä Ciciwälɩɩ nä, kɔ ‑kʋ 'kɔɔkɔ 'ylʋzɔɔ. Ɔmɔ 'kʋ Laagɔ ‑ghlää 'nɩ ʋ ‑nʋ 'kɔɔn, ‑mä 'ylʋzɔkʋnyʋä nä, wa 'nöɔ ‑wʋ ‑yibhë. 11Ɔ ‑yi ɔmɔ 'titii' dää 'nɩ ‑lɔɔ' nyɩkpaa 'nöɔ ‑wʋ 'mänyɩ‑. 12‑Maa, ‑nänʋä ‑wa 'mänyɩnöɔ‑ lä nä, 'nɩ ‑wa ‑kä lä ɔɔ' pɔlötɛtɛ nä, ɔ ‑gbä 'nɩ wa 'plöö‑ Laagɔɔ' 'yuëë'.#1.12 Zɛɛ 'sɩɩ Gala 3.26; 1 Zään 3.1‑2. 13'Yuënä nä, 'yɛkɛ ‑yä dolu 'sɔɔ‑ ‑wʋ ‑gbä 'nɩ wa 'kä ‑gänʋɔ. Nyɩkpɔ‑ 'nʋwa ‑wʋ ‑gään ‑mä Laagɔ‑ ‑gänʋwa.

14Ciciwälɩ ‑jɩjlää nyɩkpɔɔ', 'nɩ ɔ ‑yi 'nɩ ɔ ‑kʋ‑anyɩ nëëdë 'nɩ ‑a nii‑ ɔɔ' 'klʋagbaa 'yi.#1.14 Zɛɛ 'sɩɩ Eza 60.1‑2. Laagɔ ‑Yowlio ‑bhlo 'coo ‑ɔ ‑bha lä 'Bäɔ yëku nä, ɔɔ' 'klʋagbaa, ‑a nia‑ 'yi. Ɔ ‑glö bhä 'zaazɩ plɛkʋmɛnɔnyɔ ‑yä ‑nʋawlɛɛcinyɔ. 15Zään lü bhlä ɔɔ' ‑dläfʋɛ nä, ɔ paa‑ wälɩ, ɔ lä nyɩkpɔnɔ 'mɔ n sä bhlä. Kä n cii‑ bhlä nynä nyɩkpɔ yi'i klë ‑mä, ɔmɔɔ‑ ‑kʋ 'yikʋ. Kɔ ‑kʋ 'fɩa 'nɩ n wlʋʋ‑.

16Ɔɔ' 'nyupälɩɩ 'mɩɩ‑ ‑ŋënö‑anyɩ lä 'kʋ, 'nɩ ɔɔ' plɛkʋmɛnɔɔ 'mnö ɔ nyɩ‑anyɩ 'nɩ ɔ 'tɔtɔ lä nëkʋ. 17‑Jlämaa nä, Moyizö 'kʋ Laagɔ ghlää‑ 'nɩ ʋ ‑laa,#1.17 Zɛɛ 'sɩɩ 'Nämʋ 31.18; 34.28. ‑mä plɛkʋmɛnɔ ‑yä ‑nʋawlɛ nä, Zozi Klisö 'kʋ Laagɔ ghlää‑ 'nɩ ʋ panö‑anyɩmɩ. 18Nyɩkpɔɔ' ‑läzä Laagɔ 'yi 'ni,#1.18 Zɛɛ 'sɩɩ 'Nämʋ 33.20. ‑mä Laagɔ ‑Yowlio ‑bhlo 'coo, ‑ɔ ‑bha lä 'Bäɔ yëku nä, ɔmɔɔ‑ ‑gbä 'nɩ nyɩkpaa ‑yibhë Laagɔ.

Zään Badisö ‑lü Zozii' ‑dläfʋɛ

(Matie 3.1‑12; Makö 1.2‑8; Lukö 3.1‑6,15‑18)

19'Tänyɩ ‑bhloo', 'Zufʋnyʋaa' 'cifinyʋa, wa ‑lobho 'Cibhisänyʋä ‑yä 'Cibhisänyʋaa' kläänyʋä Zään yëku. Wa ‑bha Zolizalɛmʋduu' 'nɩ wa ‑yio 'ylä kää. Wlä ‑mä ‑mɔɔ, ‑n plöö‑ bhä 'titii? 20Zään ‑wʋ 'wlu ‑bi ‑mä kɔ cii‑ 'kpätaa, ɔ lä Klisöɔ, ‑amʋʋ‑ 'nöɔ ‑wʋ plöö‑. 21'Nɩ wa yio 'ylä, wlä 'nɩ ‑n plöö‑ bhää? ‑Mɔɔ plöö‑ bhä 'plɔfɛtɩ Elii ‑a? Ɔ lä nn' ‑wʋ Elii plöö‑. Wlä ‑aa, nä ‑mɔɔ plöö‑ 'Plɔfɛtɩɔ ‑ɔ 'gä bhlä yi nä ‑a? Ɔ lä ‑ɔ! ‑Amʋʋ‑ 'nöɔ ‑kä plöö‑!#1.21 Zɛɛ 'sɩɩ Detlo 18.15,18; Mala 3.23. 22Wlä ‑mänɩ ‑n plöö‑ bhä 'titii? Sä ‑n laa bhä ‑n yëkuu, ‑mä ‑wa ‑lobhu‑anyɩ lä nä ‑a 'gwa 'dö fä. 23Zään lä n ‑glö nuwälɩɩ' ‑lɩɩ ‑ɩ ghlää lä 'popie 'mnö 'nɩ ‑ɩ woo lä nä. Ɩ ci nynä ‑mä, a gëë Kwlienyɔɔ' ‑blɔɔ 'yii!#1.23 Ɩ bha Eza 40.3. ‑mä sɔɔ 'plɔfɛtɩ Ezayii cii‑ bhlä.

24Nyɩkpanä wa ‑lobho 'nɩ ‑wa ‑yi bhlä Zään yëku nä, Falizɩɛnyʋaa' ‑jɛnyɩɛ 'mnöö nyɩkpa ‑kʋmʋwa bhä pää'. 25'Nɩ wa yio 'ylä, wlä nä ‑n 'nö yɩ Klisöɔ plöö‑, 'nɩ ‑n 'nö yɩ Elii plöö‑, 'nɩ ‑n 'nö 'sɩɩ 'Plɔfɛtɩɔ plöö‑ nä, ‑ɔnözä 'nɩ ‑n ŋʋ bhä nyɩkpa 'nyu 'wluu? 26Zään lä ‑amʋ nä, n ŋʋ'anyɩ 'nyu 'wlu, ‑mä anyɩ nëëdë, nyɩkpɔ ‑kʋ ‑mɔɔ 'nɩ a 'nöɔ ‑wʋ ‑yi. Ɔ ‑kʋ klë ‑mä kɔ yi. 27Nn' ‑wʋ 'kʋ ‑ŋwa nynä n 'tɔsɔ 'sää 'titi ɔɔ' 'süü ‑kokokpëë' 'bhliye.

28‑Gbäsɩɩ Zään ŋʋ bhlä nyɩkpaa 'nyuu 'wlu ‑mɔɔ Betanii‑duu' Zludɛɛ‑nyie klë nä, ‑mɔɔ ‑nɩnɩ 'fɩɩn 'plöö‑ lä 'kʋ.

Zozii 'mɔɔ‑ plöö‑ lä Laagɔɔ' 'bhabhlö‑yuo

29Zeli ‑ze ylä nä, Zään nii‑ Zozii 'yi 'nɩ ɔ yinöɔ bhä. 'Nɩ Zään yi ci, ɔ lä a ni Laagɔɔ' 'bhabhlö‑yuo! Ɔmɔɔ‑ sä lä 'ylʋzɔkʋnyʋää' nyenyii yëku.#1.29 Zɛɛ 'sɩɩ Eza 53.6‑7. 30Ɔmɔ n sä bhlä nynä ‑mä nyɩkpɔ yi'i klë. ‑Mä kɔ ‑kʋ 'fɩa 'nɩ n wlʋʋ‑ nä, ɔmɔɔ‑ ‑kʋ 'yikʋ. 31N 'nöɔ bhɔɔ ‑yi ‑mä, 'Yizlɛnyʋä 'kɔ yibhë nä, 'ɩzä n ‑yi lä 'nɩ n ŋʋ lä nyɩkpa 'nyu 'wlu.

32 Zään ‑lü bʋkʋ ‑dläfʋɛ, ɔ lä n nii‑ Laagɔɔ' 'Wugɔɔ 'yi 'nɩ ʋ kwlinöɔ‑ 'kʋ nynä 'kpaakpu, 'nɩ ʋ yio 'kʋ gɔɔ.#1.32 Zɛɛ 'sɩɩ Eza 11.2. 33‑Amʋ nä, n 'nöɔ bhɔɔ ‑yi, ‑mä ‑ɔ ‑lobho'o lä nynä n 'ŋʋ nyɩkpa 'nyu 'wlu nä, ɔmɔɔ‑ ‑sonö'ö, ɔ lä nyɩkpɔɔ ‑n 'gä lä 'yi 'ni ‑yä Kplɔɔkplɔɔ‑wugɔɔ 'kä lä 'kʋ kwlii ‑yä ʋ 'kä lä yëku kʋ nä, ɔmɔɔ‑ ŋʋ lä nyɩkpa Kplɔɔkplɔɔ‑wugɔɔ 'wlu. 34‑Amʋ nä, kä n nio‑ 'yi, 'nɩ n ‑lü ylä ‑dläfʋɛ nynä ‑mä ɔmɔɔ‑ plöö‑ Laagɔ ‑Yowli.

Zozii laa‑ ɔɔ' tɛɛtɛɛ‑kʋgënyʋä

(Matie 4.18‑22; Makö 1.16‑20; Lukö 5.1‑11)

35Zeli ‑ze ylä nä, Zään ‑yä ɔɔ' 'kʋgënyʋaa' nëëdëë' lʋä 'sɔ ‑yi bʋkʋ ‑lɔɔ 36'nɩ ɔ nii‑ Zozii 'plödä. Ɔ lä a ni Laagɔɔ' 'bhabhlö‑yuo! 37Ɔɔ' 'kʋgënyʋa 'sɔ nuu‑ lä wälɩɩ nä, kä wa gëë‑ Zozii 'kʋ. 38Zozii lä ɔ wloo klë nä, wa güo‑ 'kʋ. 'Nɩ ɔ yiwa 'ylä, ɔ lä a tään bhää? Wlä Labii‑! ‑a sä bhä ‑naa ‑gbäsɩɩ? Labii‑ŋnöö nä, kɩ sä lä ‑zɔɔ nynä ‑mä Cɩanyɔ‑. 39'Nɩ ɔ yiwa soo‑, ɔ lä a yi a 'kä ‑lɔɔ 'yi 'ni! 'Nɩ wa yi mʋ 'nɩ wa yi ɔɔ' kʋdaa 'yi 'ni. Wälɩnɩ nä, ‑kugbë‑gliyi ‑mɔɔnää' 'tänyɩɩ' ɩ plöö‑ lä 'kʋ. ‑Lɔɔ' ylʋʋyɩ 'kʋ wa ‑kʋ Zozii yëku ‑aaa 'nɩ 'ylʋ ‑bhlü.

40Nyɩkpaa 'sɔ ‑wa nuu‑ lä Zään' ciciwälɩɩ 'nɩ ‑wa gëë‑ bhlä Zozii 'kʋ nä, waa' lɔɔ ‑bhlo plöö‑ bhä Adlee. Adlee nä, ɔ ‑glö bhä Simɔɔ Pɩɛlö ɔ bheli. 41Adlee ‑mʋ lä nä, ɔ bheli Simɔɔ 'mɔ ɔ nii‑ tɛɛ, 'nɩ ɔ yio soo, ɔ lä ‑a yä Mesio 'ni! Mesii‑ŋnöö, kɩ sä lä ‑zɔɔ nynä ‑mä Puënyɔnɔ 'mɔ Laagɔ ‑lobho lä 'nɩ ‑ɔ plöö‑ lä Klisöɔ. 42'Nɩ Adlee yi ɔ bheli Zozii yëku ‑lä. ‑Mä Zozii ‑wluo ‑plɩɩ, ɔ lä ‑mɔɔ‑ plöö‑ lä Zonasö ‑yowli Simɔɔ, ‑mä ‑mɔɔ wa 'kä ylä Sefasö laa. Sefasö‑ŋnöö 'mɩɩ‑ plöö‑ lä 'sɩɩ Pɩɛlö. Kɩ sä lä ‑zɔɔ nynä ‑mä cɛkʋ‑.

Filipʋ ‑yä Natanayɛɛ

43Zeli ‑ze ylä nä, Zozii ylä bhɛ nynä ɔ 'kä Galilee' mʋ, 'nɩ ɔ ‑yä Filipʋ 'sɔ yi sloo. 'Nɩ ɔ yio soo, ɔ lä Filipʋ‑, ‑n gë'ë 'kʋ! 44Filipʋ nä, ɔ ‑glö bhä Bɛsayidaduu' nyɩkpɔ, Adlee ‑yä Pɩɛlö 'bhisäkʋ. 45Filipʋ ‑mä 'sɩɩ ɔ nii‑ Natanayɛɛ 'nɩ ɔ yio soo, ɔ lä nyɩkpɔɔ ‑ɔnö wälɩɩ‑ ‑kʋ lä Moyizöö' ‑Jlämaa 'mnö, 'nɩ ‑ɔnö yëkuu' wälɩ 'Plɔfɛtɩnyʋaa' 'bɔɔgwɩɩ ci lä nä,#1.45 Zɛɛ 'sɩɩ Detlo 18.18; Eza 9.5‑6; Eze 34.23. ‑a yɔ 'ni. Ɔ ‑glö Zozɛfʋʋ' 'yu, ‑mɔɔ Nazalɛtöduu' ‑mä ɔmɔ wa laa Zozii. 46'Nɩ Natanayɛɛ yio 'ylä, ɔ lä ‑mä ‑lɛ 'nänʋ yi bhä Nazalɛtöö' ghlää ‑a? 47Filipʋ lä ‑n yi ‑yä ‑n 'gä 'ni. 'Tänyɩɩ Natanayɛɛ ‑kʋ lä yidä 'nɩ Zozii nio‑ lä 'yi nä, Zozii lä a ni 'Yizlɛ‑bhlɩnɛ 'mnö nyɩkpɔ 'titii‑ ‑kʋ lä ‑lää! ‑Kpläkplä 'nöɔ ‑wʋ pleyii ‑kʋ. 48Natanayɛɛ lä ‑maa, dä ‑n 'ninö'ö bhɛ tɛɛ 'nɩ ‑n yi'i bhää? Zozii lä dä ‑n ‑kʋ bhlä 'fige‑suu ‑zɔɔ nä, n nii‑i 'fɩa 'yi 'nɩ Filipʋ lä‑ä lä. 49Natanayɛɛ lä Labii‑, ‑mɔɔ plöö‑ lä 'zaazɩ Laagɔ ‑Yowli! 'Yizlɛnyʋää' 'loyoo, ‑mɔɔ plöɔ lä!#1.49 Zɛɛ 'sɩɩ Lɔlɔ 2.7; Sofo 3.15. 50Zozii lä nä n cii‑ lä nynä ‑mä, 'tänyɩ ‑n ‑kʋ bhlä 'fige‑suu ‑zɔɔ nä, n nii‑ bhä 'yi nä, ɩmɩɩ‑ ‑gbä 'nɩ ‑n ‑kä lä 'naa pɔlötɛtɛ ‑a? ‑N kʋ ‑lɔɔ ‑mä nʋnʋgbɩ 'kädɩɩ lɩɩ‑ zi lä ‑nɩnɩ 'kʋ nä, ‑n yii 'yi 'ni. 51N sonö'anyɩ ‑nʋawlɛɛ' nynä ‑mä, 'tänyɩ yi ŋëë 'nɩ a yi ‑laagɔɔ' 'yi 'ni, 'nɩ ‑mɔɔ yi 'klʋ känöɔ 'nɩ ‑Laagɔzizii yi Nyɩkpɔɔ ‑Yowli 'kʋ kwlii, 'nɩ ɩ yi bʋkʋ ‑laagɔɔ' ‑gblää.#1.51 Zɛɛ 'sɩɩ Ciedä 28.12.

Currently Selected:

Zään 1: god

Highlight

Copy