ZEKHARIAH 8
8
Jerusalem Thluachuah Peknak
1Ralkapbu Bawipa bia cu ka sinah a phan. Ralkapbu Bawipa bia cu hihi a si: 2“Zion cu ka ham ngaingai i ṭihnung tiangin ka ham,” tiah a ti. 3Cun Bawipa nih, “Atu cu Zion ah khan ka ra kir ṭhan cang i Jerusalem ah khan ka um lai. Jerusalem cu Zumhtlak Khualipi ti a si lai i ralkapbu Bawipa tlang cu Tlang Thiang ti a si lai.” tiah a ti. 4Mah hihi ralkapbu Bawipa bia cu a si: “Jerusalem khua chung lam hna ah cun nutar le patar hna kha an ṭhu ṭhan lai, an kum a upat caah ṭhiangṭhunh kha an i hngauhchan cio lai; 5cun khuapi chung lam cu ngakchia an khat lai i lam ah cun lente an i celh dulmal hna lai,” tiah a ti. 6Mah hihi ralkapbu Bawipa bia cu a si: “Hi miphun chungin a tangmi hna caah, cucu cu ni ah cun a si kho lomi thil lo hmanh seh law, ka caah tah a si kho lomi thil a lo ve hnga maw?” ti hi ralkapbu Bawipa bia hrimhrim a si. 7Hihi ralkapbu Bawipa bia a si: 8“Zohhmanh, ka mi hna cu nichuahlei ram le nitlaklei ram in ka chuah hna lai i Jerusalem khua chung i um awkah ka kirpi hna lai. Annih cu ka mi an si lai i biatak le dinnak in kei cu an Pathian ka si lai,” tiah a ti.
9Mah hihi ralkapbu Bawipa bia a si: Biakinn cu sak a si ṭhan lai, tiin profet hna nih, ralkapbu Bawipa inn kha a hram dirh a si lio in atu tiang an chim lengmangmi biakamnak, atu chan ah a theimi nannih nih lung ṭhawng in um tuah u. 10Zeicahtiah cu caan tiangah cun mi kha an ṭuan man an pe hna lo i saram man zong kha pek an si fawn lo, ral an um caah ahohmanh an rian ṭuan awkah khan him tein an um kho lo, keimah nih pakhat le pakhat kha ka dohter hna. 11Sihmanhsehlaw hi mi hna chung hin a tangmi hna cungah hin cun hlan lio i ka rak si bang khan cun atu cu ka si ti lo, tiah ralkapbu Bawipa nih a ti. 12Hnangam tein thlaici kha an thlak cang lai; mitsur ruang nih a thei kha a tlai lai i vawlei nih theipar a chuahter lai, van nih dap cu an surter lai; hi thil vialte hi hi miphun chungin a tangmi hna cu ka pek hna lai. 13Judah innchungkhar le Israel innchungkhar hna, nannih cu miphun vialte hna sinah chiatserhnak hmelchunhnak kha nan rak si; sihmanhsehlaw atu cu kan khamh hna lai i thluachuahnak hmelchunhnak nan si cang lai. Lung ṭhawng in um u, nan thin phang hlah u!
14Mah hihi ralkapbu Bawipa bia a si: Nan pupa hna nih ka thin an ka phawh i nannih cu hrawh awkah ka ruah tikah khan ka thin ka ṭhumh lo bantukin, 15atu zongah hin Jerusalem cung le Judah innchungkhar cungah ṭhatnak tuah awkah khan ka ruah ṭhan; nan thinphang hlah u.
16Mah hihi nan tuah awk hnga cu a si: pakhat le pakhat biatak i chim u, khuapi hauka, biaceihnak hmun ah khan ahmaanmi le a ṭhami biading kha biaceihnak ah hmang u. #Efe 4.25 17Pakhat le pakhat cungah ṭhat lonak i tuah kha duh hlah u, lih in tehte khang hlah u, zeicahtiah hi vialte hi ka huatmi thil an si, ti hi Bawipa bia hrimhrim a si.
18Ralkapbu Bawipa bia cu ka sinah a ra. Hihi ralkapbu Bawipa bia cu a si. 19“Thla linak thla, thla nganak thla, thla sarihnak thla le thla hranak thla i rawl ulhnak hna cu Judah innchungkhar caah lawmhnak le nuamhnak puai ah an cang lai. Biatak le daihnak cu duh ko u,” a ti.
20Ralkapbu Bawipa bia cu hihi a si. Miphun dangdang hna le khuapi chung i a ummi hna kha an ra lai; 21Khuapi pakhat i a ummi hna kha a dang khuapi pakhat ah an kal lai i, “Kal u si law Bawipa kha va nawl u sih, ralkapbu Bawipa kha va fuh u sih; kei zong ka ra ve lai,” an i ti lai. 22Cuticun miphun nganngan hna mi ṭhawngṭhawng hna nih khan ralkapbu Bawipa cu Jerusalem ah an fuh lai i a zaangfahnak kha an hal lai. 23Mah hihi ralkapbu Bawipa bia cu a si: Khi caan ah cun holh phun kip a hmangmi miphun kip chungin mi pahra nih Judah mi pakhat kha a puan in an i tlaih lai i, “Pathian cu na sinah a um ti kha kan theih caah na sinah kan kal ko lai,” tiah an ti lai.
Currently Selected:
ZEKHARIAH 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006