ZEKHARIAH 10
10
Judah le Israel An Ṭha Ṭhan Lai
1 Bawipa cu fur caan ah ruah
hal u law
ṭhal caan ah ruah hal tuah u,
Ṭotho khuadawm a sertu Bawipa nih
nannih cu ruah kha an pek hna lai i
Nan lo cio ah ramhring kha
an pek hna lai;
2Innchungkhar khuazing hna nih cun
pakpalawng biakamnak kha
an chim i,
Litinthiam hna nih cun ahmaan
lomi hmelchunhnak kha an hmuh,
Mangihthiam minu hna nih khan
hlennak mang an manh i
pakpalawng bia kha an chim.
Mi cu tuu bantukin an vak, tuukhal
a um lo caah harnak kha an in.
3Tuukhal hna cungah cun ka thin
a hung, tuurun a hruitu hna cungah
cun ka dantatnak kha ka tlunter lai;
Sihmanhsehlaw ralkapbu Bawipa nih
a tuurun,
Judah innchungkhar kha
a len hna lai i raltuknak rangtum ah
a ser hna lai.
4Annih cu innkil lung le thlam
hrennak khenhfial an si lai,
Annih cu raltuk awk i timh cia in
a ummi likuk an si lai,
Haotu paohpaoh cu anmah chungin
a chuakmi an si lai.
5Annih cu ralkap bantuk an si lai i
raltuk hmun lam cet lak i
aa nang lenmi bantuk an si lai;
Bawipa cu an sinah a um caah an ral
kha an tuk hna lai i
Rangcung ralkap hna kha ningzak in
an hloh hna lai.
6Judah innchungkhar cu ṭhawnnak
ka pek hna lai i
Josef innchungkhar cu teinak
ka pek hna lai;
Annih cu ka zaangfah hna caah
ka kirpi ṭhan hna lai i,
Rak hlonh bal hna hlah ning law,
cu bantuk cu an si lai;
Zeicahtiah keimah cu
Bawipa an Pathian ka si i
an ka halnak cu ka leh hna lai.
7Cucaah Efraim mi cu ralkap bantuk
an si lai,
Mitsur hang a ding i aa lawmmi
bantuk an si lai,
An fapa hna nih cun an hmuh lai i
an i lawm lai;
Cucaah an lung cu Bawipa ah i lawm ko seh.
8Annih cu ka tlanh cang hna caah
fifik in ka kawh hna lai i,
Hlan lio i an rak tam bantuk khan
an tam ṭhan lai.
9Miphun dangdang hna sinah
ka ṭhek hna,
Asinain ram hlapi ah cun
an ka hngalh ṭhiamṭhiam ko lai i
An fale kha an cawm hna lai i
an ra kir lai.
10Khi tikah Izipt ram in ka lak hna lai i
Assiria ram in ka pumh hna lai;
Gilead ram le Lebanon ah ka luhpi
hna lai,
an ca i hmun a um ti lo tiangin.
11Zufrates tiva cungah a fakmi harnak
a tlung lai i
a ṭhawngmi a ti kha a tuk hna lai;
Nail tiva a thuknak vialte cu
an kao dih lai.
Assiria ruamkainak cu ṭhumh a si lai i
Izipt bawifung cu a lo lai;
12Sihmanhsehlaw Israel ṭhawnnak cu
Bawipa chungah a si lai i
A min in sunglawi ngaiin an kal lai.
Mah hihi Bawipa bia hrimhrim a si.
Currently Selected:
ZEKHARIAH 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
