ROM 9
9
Pathian Thimmi Miphun Israel
1Ka chimmi hi ahmaanmi bia a si: Khrih ta ka si i ka lih ka chim lo. Thiang Thlarau nih a ukmi ka chiaṭha thleidannak zong nih lih ka chim lo kha a hngalh. 2Ka miphun, ka thi le ka sa a simi hna caah ka ngaih a chia hringhran ko i ka lung chung fahnak cu a dong lo. 3Anmah ca i a ṭha ding a si ahcun keimah hi Pathian chiatserhnak in i Khrih he i ṭhen hmanh kha ka duh deuh. 4Annih cu Pathian thimmi an si: a fa ah a ser hna i sunparnak kha a hrawmh hna. Anmah sinah a biakamnak kha a tuah hna i Nawlbia kha a pek hna, biaknak taktak cu anmah nih khan an ngeih, Pathian biakamnak kha an hmuh, #Exo 9.4 5Hebru mi a kan hringsortu hna tefa kha an si, cun Khrih zong kha minung lei cun anmah phun a si. Zeizong vialte a uktu Pathian cu zungzal in thangṭhat si ko seh! Amen.
6Israel mi kha an dihlak in Pathian thimmi an si dih lem lo caah Pathian biakamnak cu pakpalawng ah a cang ka ti duhnak a si lo. Zeicahtiah Israel mi vialte kha Israel tefa an si lem lo, 7Abraham fale hna zong an dihlak in Abraham tefa an si dih lem lo. Pathian nih Abraham cu a thawh i, “Isak tefa hna cu nangmah tefa ah rel an si lai,” a ti. #Gen 21.12 8Cu a sullam cu, minung sining phung sawhsawh in hrinmi cu Pathian fa an si lem lo, Pathian biakamning in hrinmi lawng tefa taktak i ruahmi cu an si, tinak a si. 9Zeicahtiah Pathian biakam cu hitihin, “A caan a cut tikah ka ra kir ṭhan lai i Sarah nih fapa a hrin lai,” ti kha a si. #Gen 18.10
10Cun cu lawng cu a si lo. Rebekka fapa pahnih hna zong nih khan pa pakhat lawng an ngei ko; a hringtu hna Isak kha an pa cu a si ko. 11-12Sihmanhsehlaw pakhat u a thim kha Pathian tinhning lawnglawng in a si nakhnga caah Pathian nih Rebekka cu, “A u nih a nau kha a rianh lai,” tiah a chimh. Hi bia a chim hi an chuah hlanah a si, a ṭha siseh, a ṭhalo siseh, zeihmanh an tuah hlan ah a si; cucaah Pathian nih pakhat a thim cu anmah an tuahmi ruangah khan a si lo, amah nih a kawh ruang tu ah khan a si ko. #Gen 25.23 13Cathiang nih, “Jakob cu ka dawt i Esau cu ka huat,” a ti bang khan a si. #Mal 1.2-3
14A si ahcun Pathian cu a ding lo kan ti kho lai maw? Ti kho hlah. 15Zeicahtiah Moses sinah pei, “Zaangfah ka duhmi cu ka zaangfah ko hna lai i zawnruah ka duhmi cu ka zawnruah ko hna lai,” a ti kha. #Exo 33.19 16Cucaah mi nih an duhmi thawng le an tuahmi thawngin si loin Pathian zaangfahnak thawng lawngin a si ko. 17Cathiang nih Faro kong ah a thawh i, “ ‘Ka ṭhawnnak langhnak caah le ka min cu vawlei cung dihlak i thanternak caah, hi ca hrimhrim ah hin, nangmah cu siangpahrang ah kan ser,’ tiah Pathian nih a ti,” tiah a ti. #Exo 9.16 18Cucaah Pathian nih cun zaangfah a duhmi kha a zaangfah ko hna i an lung ṭhawnter a duhmi kha an lung cu a ṭhawnter ko hna.
Pathian Thinhunnak le Zaangfahnak
19Nan lak i pakhatkhat nih nan ka thawh lai i, “Hi bantukin thil a si kun ahcun, zeitindah Pathian nih minung cu sual a phawt khawh kun? Pathian duhnak cu aho nih dah a donh khawh?” nan ti lai. 20Sihmanhsehlaw ka kawi, nangmah cu Pathian bia a let lakmaktu dingah ahodah na si? Tlak um nih a sertu cu, “Zeicahdah hi bantuk hin na rak ka ser,” tiah a hal lo. #Isa 29.16; 45.9 21A ngaingai ti ahcun um a sertu nih khan tlak cu a duhduh in hmannak nawl a ngei ko, tlak hlum hlum khat chung khan um pahnih a ser khawh ko hna, pakhat cu sawhsawh men i hman lo dingah a ser i pakhat cu sawhsawh men i hman awkah a ser ko.
22Cu bantuk ṭhiamṭhiam in Pathian tuahmi zong cu a si ko. A thinhunnak le a ṭhawnnak kha langhter a duh. Sihmanhsehlaw a thin a huntertu hna, hrawh awk a simi hna cungah khan lungsaunak a ngei. 23Cun a sunglawimi a sunparnak zong kha langhter a duh i a kan zaangfahmi kannih cungah khan cu a sunparnak cu a kan toih, kannih cu a sunparnak hmu dingin a kan timhmi cu kan si. 24-25Cucu Hosea cauk chung i rak chimmi kha a si. Zeitindah a ti tiah:
“Ka mi a rak si lomi kha,
‘Ka mi,’ ka ti hna lai.
Ka rak dawt lomi miphun kha,
‘Ka dawtmi,’ ka ti hna lai. #Hos 2.23
26‘Nannih cu ka mi nan si lo,’ tiah an
rak tinak hna hmun thengte ah khan
Annih cu a nungmi Pathian fa,
ti an si lai.” #Hos 1.10
27Cun Isaiah nih Israel kong ah, “Israel mi cu rili kam thetse zat in tam hmanh hna seh law tlawmte lawnglawng khamh an si lai, #Isa 10.22-23 28zeicahtiah Bawipa nih vawlei cu a dihlak in bia a ceih lai,” a rak ti. 29Isaiah ṭhiamṭhiam nih, “Bawipa, a Lianngan Bik Pathian nih tefa tlawmpal kan nganh hlah seh law cu, Sodom bantuk kan si diam cang hnga i Gomorrah bantukin kan um diam cang hnga,” a rak ti bantuk khan a si. #Isa 1.9
Israel le Thawngṭha
30A si ahcun zeitindah kan chim kun lai? Hitihin kan ti lai: Pathian he rem a rak i zuam lomi Jentail mi kha an zumhnak thawngin Pathian he an i rem cang; 31sihmanhsehlaw thimmi miphun, Pathian he remnak ding caah phung a kawlmi hna nih khan cucu an hmu lo. 32Zeicahdah an hmuh lo? Zumhnak kha i bochan loin tuahnak tu kha an i bochan caah a si. Cucaah “rilhnak lung” ah khan a ril i 33Cathiang nih,
“Zohhmanh, Zion ah mi a tluktertu
ding lung pakhat ka chiah,
Cu lung nih cun a rilhter hna lai.
Sihmanhsehlaw amah a zummi cu
ningzahnak an phan lai lo,”
tiah a rak chimmi bang khan a si. #Hos 1.10
Currently Selected:
ROM 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
