ROM 11
11
Pathian Nih Israel Mi A Zaangfah Hna
1A si kun ahcun, Pathian nih a mi cu a hlawt hna a si maw? Si hrimhrim hlah. Keimah zong hi Israel mi, Abraham tefa, Benjamin phun chungmi ka si. #Fili 3.5 2Pathian nih cun a hramthawk tein a rak thimmi a mi cu a hlaw hna lo. Cathiang chungah a ummi, Israel kong ah Elijah nih Pathian sinah, 3“Bawipa, na profet kha an thah hna i na biakṭheng kha an hrawh hna; keimah lawnglawng hi ka tang i cu hmanh cu thah an ka zalh,” tiah a timi kha nan hngalh a si lo mei? #1Sia 19.10,14 4Pathian nih zeitindah a leh kha? “Keimah caah mi thong sarih, Pathian deu Baal a bia lomi kaa chiah ko hna,” tiah a ti a si lo mei? #1Sia 19.18 5Cu bantuk ṭhiamṭhiam cun atu zongah hin a si: Pathian nih a zaangfah hna ruang i a thimmi tlawmte cu an um ve ko. 6A thim hna cu a zaangfah hna ruangah a si ko, anmah tuahmi ruangah a si lo. Zeicahtiah Pathian nih a thimmi hna cu anmah tuahmi ruangah a si ahcun a zaangfahnak cu zaangfahnak taktak a tling lomi pei a si hnga cu.
7Cun tah zeitin? Israel mi nih an kawlmi kha an hmu lo, sihmanhsehlaw Pathian thimmi mi tlawmte tu nih khan an hmuh; a dang nih khan cun Pathian auhnak kha an hna an i cheh i 8Cathiang nih, “Pathian nih an lung a pinter hna; nihin ni tiang hrimhrim hin an mit in an hmu kho lo i an hna in an thei kho lo,”
a ti bang khan a si taktak. #Deu 29.10
9Cun David zong nih:
“An puai ah rap ah i foih hna seh law
tlu hna seh law
dantatnak ing hna seh. #Slm 69.22-23
10Khua an hmuh khawh nakhnga lo
an mit cu caw seh law
Harnak an inmi thilrit tangah
kun thluangthluan ko hna seh,”
a ti fawn.
11Judah mi cu an rilh tikah an rawk taktak maw? Rawk taktak hlah. An sual caah cun pei khamhnak cu Jentail mi sin a phak cu, Judah mi nahchuahter awkah cun. 12Judah mi sualnak nih hin vawlei cungah thluachuahnak tampi a tlunter i thlarau lei in mipam an sinak nih Jentail mi cu thluachuahnak tampi a phorh hna ahcun Judah mi cu tling tein an i tel ve tikah cun thluachuahnak cu zeitluk in dik a ngan chinchin lai!
Jentail Mi Khamhnak
13Atu cu nannih Jentail mi kha kan chimh hna: Jentail mi sin lamkaltu ka si chung paoh cu ka rian cu kaa chor ko lai. 14Ka phun hawimi kha an nahchuahter kaa zuam i cuticun tlawmpal tal ka khamh kho phum hna hnga maw ka ti. 15Zeicahtiah annih cu hlawt an si hmanh ah pei vawlei cu Pathian hawikom i ser a si cu. Cucaah cun annih cu cohlan an si tikah cun zeidah a si chinchin lai? Mithi hna caah nunnak a si lai.
16Changreu hlum chung i a dar hmasa bik cu Pathian sinah pek a si ahcun, changreu cu a hlum ningin amah ta a si; cun thingkung a hram hna cu Pathian sinah pek an si ahcun a nge zong amah ta an si. 17Cinmi oliv kung a nge cheukhat cu tan an si i ramlak oliv kung a nge kha cinmi kung ah cun peh a si. Cu bantuk cu nannih Jentail mi hi nan si; atu cu oliv kung a hrampi kha nan i hrawm ve cang. 18Cucaah khiahmi nge bantuk a simi kha porhlawthnawh hna hlah u. Zeitindah nan lung a puam ngam? A nge pei nan si ko cu; a hram cu nanmah nih nan cawm ṭung lo, a hram nih pei an cawm hna cu.
19Sihmanhsehlaw nan i thawh hnga i, “Kanmah umnak serpiak awkah pei a nge cu khiah an si fom cu,” nan ti hnga. 20Cucu ahmaan ko. Annih cu an zumh lo ruangah khiah an si, nannih cu nan zumh ruangah nan umnak hmun ah nan um. Sihmanhsehlaw cu kong ah nan lung puam sual hlah u; a ṭih in ṭih lehlam u. 21Thingkung nge taktak bantuk a simi Judah mi cu Pathian nih a zuah hna lo ahcun nannih tah a kan zuah hlei hnga tiah nan i ruat maw? 22Hika ah hin zeitluk in dah Pathian nih mi a zaangfah hna ti le zeitluk in dah Pathian cu ṭih a nun ti kha kan hmuh. A tlumi hna caah cun ṭih a nung ngaingai ko, sihmanhsehlaw nannih cungah cun zaangfahnak a ngei — a zaangfahnak chung i nan um paoh ahcun an zaangfah ko hna lai, sihmanhsehlaw nan um lo ahcun nannih zong khiah nan si ve ko lai. 23Cun Judah mi hna cu, an zumh lonak kha an chuahtak ahcun hmasa i an rak umnak hmun ah khan a chiah ṭhan ko hna lai, zeicahtiah Pathian nih cun a chiah ṭhan khawh ko hna. 24Nannih Jentail mi cu ramlak oliv kung, a nge khiah i cu nge cu a phung a si lo nain cinmi oliv kung i pehmi bantuk cu nan si ahcun a kungpi nge taktak a rak simi peh ṭhan kha cu Pathian caah a fawi deuh ngaingai lai.
Pathian Nih Mi Vialte A Zaangfah Hna
25Ka u le ka nau hna, biathli pakhat nan hngalh awk i ka duhmi a um. Cu nih cun ka fim tiah i ruat loin an umter hna lai. Cu biathli cu hihi a si: Israel mi lung khohkhal i an um hi zungzal ca in a si lo, Jentail mi an dihlak in Pathian sin i an rat caan tiang ca lawng a si lai. 26Cun Israel mi vialte khamh an si lai cu hitihin a si lai: Cathiang nih,
“Zion in Khamhtu cu a ra lai i
Jakob tefa hna chungin ṭhat lonak
vialte kha a hloh lai.
27An sualnak kha ka lakpiak hna tikah
Hi biakamnak hi anmah he ka tuah lai,” tiah a ti bang khan a si lai. #Jer 31.33-34 28Thawngṭha kong in ti ahcun, annih cu Pathian ral an si; Thawngṭha an cohlan duh lo caah — cucu nanmah Jentail mi ṭhatnak caah a si. Sihmanhsehlaw thimnak lei in ti ahcun annih cu an pupa hna ruangah khan Pathian hawikom an si, 29zeicahtiah Pathian nih cun a auhnak hna le laksawng a pekmi hna kongah a lung a let ṭhan bal lo. 30Nannih Jentail mi nih a hlanah cun Pathian kha a nawl nan rak zul lo; sihmanhsehlaw atu ah cun Judah mi nih khan a nawl kha an zulh lo caah nannih nih a zaangfahnak kha nan hmuh. 31Cu bantuk ṭhiamṭhiam in nannih nih nan hmuhmi a zaangfahnak kha annih zong nih an hmuh ve nakhnga atu ahcun a nawl kha zul loin an um. 32Pathian nih mi vialte kha nawlngaih lonak chung thongtla i a ser hna cu an dihlak in zaangfah a duh hna caah a si.
Pathian Thangṭhat U
33Pathian hi a va rum hringhran dah! A fimnak le a hngalhnak hi an va thuk hringhran dah! Biakhiahnak a tuahmi hi aho nih dah a sullam an purh khawh lai? A thil tining hi aho nih dah an hngalh khawh lai? #Isa 55.8 34Cathiang nih,
“Bawipa cu aho nih dah a lungthin
an hngalh?
Aho nih khin dah ruahnak
an cheuh khawh? #Isa 40.13
35Cham ṭhan dingin aho nih dah zeital an pek bal?” tiah a ti bang khan a si. #Job 41.11 36Zeicahtiah zeizong vialte hi amah nih a sermi an si i zeizong vialte hi amah thawngin a ummi an si, amah caah an si dih. Pathian cungah sunparnak cu zungzal in um ko seh! Amen. #1Kor 8.6
Currently Selected:
ROM 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
