MARKA 3

A Kut A Zengmipa

(Mat 12.9-14; Luk 6.6-11)

1Jesuh cu pumhnak inn ah khan a va kal ṭhan i cuka ah cun a kut a zengmipa pakhat a rak um. 2Jesuh cu zeitindah sual kan phawt khawh lai ti a bawhmi kha an rak um i cu hna nih cun sabbath ni ah hin aho tal a damter hna lai maw ti kha ṭha tein an rak ngiat. 3A kut a zengmipa cu Jesuh nih cun a thawh i, “Hmailei ah hin ra chuak tuah,” tiah a ti. 4Cun mizapi cu a thawh hna i, “Kan Phung nih sabbath ni ah zeidah tuah a kan onh? Ṭhatnak nan tuah lai, a ti maw ṭhat lonak nan tuah lai, a ti dah?” tiah a ti hna. Sihmanhsehlaw bia kaa khat hmanh an chim lo. 5Cu tlukin an lung a hah le an palh kha a hmuh hna tikah a thin a hung a ngaih a chia i mipa cu a thawh i, “Na kut kha samh,” a ti. A samh i a dam ai! 6Cucaah Farasi mi hna cu pumhnak inn khan an chuak i Herod minung hna he khan zeitindah Jesuh hi kan thah khawh lai, tiah khua an khang.

Rili Kamah A Cawnpiak Hna

7Jesuh le a zultu hna cu Galilee Rili ah khan an va kal i mi tampi nih an zulh hna. Cu hna cu Galilee ram in, Judea ram in, 8Jerusalem khua in, Idumea peng in, Jordan tiva ral ram in, le Tair le Sidon khua pawngkam i a ummi khua hna in a rami an si. Hi hna nih hin Jesuh nih a tuahmi thil kha an theih caah amah an fuhnak cu a si. 9Mi cu an tam tuk hringhran i an ka naan sual lai ti kha a phan caah Jesuh nih cun a zultu hna kha lawng pakhat in ka timhpiak tuah u tiah a ti hna. 10Mi tampi kha a damter hna i a zawmi paoh nih cun amah an tongh khawh nakhnga heh tiah an i zuam. #Mar 4.1; Luk 5.1-3 11Cun khuavang a ngeimi paoh nih amah an hmuh tikah khan a hmaiah cun an tlu, “Pathian Fapa na si,” tiah fak piin an au. 12Jesuh nih thlarau ṭhalo hna cu, aho a si kha, ahohmanh nan chim hna lai lo, tiah fek tein a ti hna.

Lamkal Hleihnih A Thim Hna

(Mat 10.1-4; Luk 6.12-16)

13Cun Jesuh cu tlang cungah a kai i a duhmi kha a kawh hna. A sinah khan an ra i 14hleihnih kha a rak thim hna i annih cu lamkaltu tiah min a rak sak hna. A thawh hna i, “Ka sin i um awkah kan thim hna. Cun phung chim awkah kan thlah hna lai i 15khuavang ṭhawl khawhnak ṭhawnnak nan ngei lai,” tiah a ti hna. 16A thimmi hleihnih cu hi hna hi an si: Simon, (Jesuh nih a min ah Peter a sakmi); 17Zebedi fapa Jeim le Johan, (Jesuh nih hi hna hi Boanerges tiah min a sak hna, a sullam cu Khuari Fa tinak a si); 18Andru, Filip, Bartholomew, Matthai, Thomas, Alfeas fapa Jeim, Thaddaius le phunṭanh Simon le 19Bawi Jesuh leitu Judas Iskariot kha an si.

Jesuh le Beelzebul

(Mat 12.22-32; Luk 11.14-23; 12.10)

20Cun Jesuh cu inn ah a tlung. Mi nih khan a zual in an zual ṭhan hoi caah Jesuh le a zultu hna cu rawl einak caan hmanh an ngei lo. 21Cucu le mi nih, “A hrut cang,” an ti kha a chungle nih an theih tikah, kan va hnuh lai, tiah an i thawh.

22Phungbia cawnpiaktu saya cheu khat Jerusalem in a rami hna nih khan, “A chungah Beelzebul aa hrolh, Khuavang ṭhawl khawhnak a petu hi khuachia bawi cu a si,” an ti. #Mat 9.34; 10.25 23Cucaah Jesuh nih mi kha, ka sinah ra u, tiah a ti hna i tahchunhnak bia a chimh hna. A thawh hna i, “Zeitindah Satan nih Satan cu a ṭhawl khawh lai? 24Ram pakhatkhat cu a bubu in aa ṭhen i anmah le anmah kha an i doh ahcun, zeitindah cu ram cu a dir khawh lai? 25Innchungkhar khar khat cu a bubu in an i ṭhen i an i doh ahcun a dir kho lai lo. 26Cu bantukin Satan pennak zong cu a bubu in aa ṭhen i an i doh ahcun a hmun kho ve lai lo, a dong ko lai.

27“A ṭhawngmi pa kha a kut le a ke ṭem hmasat lo ahcun ahohmanh nih an luhhnawh kho in a thil an chut kho lai lo; cu ti ṭem hnu lawnglawng ah a inn cu an ramh khawh lai.

28“Hihi va philh hlah u. Minung hi an sualnak vialte le thil ṭhalo an chimmi vialte ngaihthiam khawh an si ko lai, 29sihmanhsehlaw Thiang Thlarau ralchanh in bia ṭha lo a chimmi cu zeitikhmanh ah ngaihthiam khawh an si lai lo, zeicahtiah zungzal in a hmunmi sualnak kha an tuah cang,” tiah a ti. #Luk 12.10 30(Jesuh kha, “Thlarau ṭhalo a chungah aa hrolh,” tiah an ti caah khan Jesuh nih hi bia a chimnak cu a si).

Jesuh Nu le A Unau Hna

(Mat 12.46-50; Luk 8.19-21)

31Cun Jesuh a nu le a naule kha an ra. Inn lengah khan an dir i innchung ah cun bia an vun cah. 32Jesuh cu mizapi nih khan an dum i, “Na nu le na naule kha inn lengah an um i ton an in duh,” tiah an chimh. 33Jesuh nih cun a leh hna i, “Ahodah ka nu cu a si? Ahodah ka naule cu an si?” tiah a ti hna. 34A pawng i a ṭhumi kha a zoh hna i, “Zohhmanh u, hika ah hin ka nu le ka naule hna cu an um. 35Zeicahtiah Pathian nih tuah hna seh, tiah, a duhmi thil a tuahmi paoh cu ka nau, ka far le ka nu an si,” tiah a ti.

Currently Selected:

MARKA 3: HCL06

Highlight

Copy