GENESIS 43

Benjamin He Izipt Ah An Kal

1Kanaan ram chung mangṭam cu a zual chin, 2Jakob innchungkhar nih Izipt in an rak phorhmi rawl kha an ei dih tikah Jakob nih khan a fapale cu, “Vung kal ṭhan u law rawl cu tlawmpal tal kan cawkpiak ko kun u,” a ti hna. 3Judah nih a thawh i, “Kan naupa kan i ṭhit lo ahcun, mipa nih khan nan ka tong kho hrimhrim lai lo tiah fek tein a kan ti. 4Kan naupa kha kan sin i kalter na sian ahcun kan kal lai i rawl cu kan vung in cawkpiak hna lai. 5Na sian lo ahcun, kan kal lai lo, zeicahtiah mipa nih khan, ‘Nan naupa nan run i ratpi lo ahcun nan ka tong kho lai lo,’ tiah a kan ti,” a ti. 6Israel nih cun, “Zeicahdah mipa cu nau dang pakhat kan ngei tiah nan va chimh? Nan chimhnak thawngin ka caah nan harter tuk,” a ti. 7Annih nih, “Mipa nih cun kanmah kong le kan innchungkhar kong kha a kan hal lengmang i, ‘Nan pa a nung rih maw? Nau nan ngei maw?’ ti hoi hna in a kan ti i a kan halmi cu leh lo awk a ṭha lo. Nan nau nan i ratpi lai a kan ti lai ti kha a ruah awk hrimhrim kan rak hngal lo,” tiah an leh. 8Judah nih khan a pa Israel cu, “Ngakchiapa cu keimah sinah kalter ko, cun kan i tim lai i kan kal ko lai. Cu ti lawnglawng cun kan dihlak in, nangmah he kan fale he, kanmah he rawl loin kan thi lai lo. 9Ka nunnak hin amah caah bia kaa kam; amah kong ah hin keimah cungah ṭuanvo na chiah khawh. Na sinah himte le dam tein ka kirpi ṭhan lo ahcun na hmaiah ka nun chung vialte mawhchiatnak cu ka in lai. 10Rak kal u si law cu, atu hi voi hnih kan i let manh cang hnga,” a ti.

11An pa Israel nih cun, “Cu ti bantukin a si awk a si ahcun, hitihin tuah u: hi ram chung thil chuak ṭha bikbik kha i phorh hna u, mitsur thei car tlawmpal, khuaihliti tlawmpal, hangṭamh, hru thei le almon thei, hi hna hi nan sawngkhoi chungah i sanh hna u law mipa cu laksawng ah vung phorh u. 12Cun phaisa kha a let hnih in i phorh u, zeicahtiah nan sawngkhoi kaa i an chiah ṭhanmi tangka kha nan khirh ṭhan hna awk a si lai. An palh sual caah a si lai. 13Nan nau cu i kalpi u, i tim u law mipa sinah cun vung kal ṭhan u. 14Lianngan Bik Pathian nih nannih cu in zaangfah hna seh law mipa nih cun nan unaupa kha le Benjamin cu ka sinah rak kirter hna seh. Ka fale nih nan ka thihtak a si ahcun thih tak pei dik a si ko lai,” a ti.

15Cucaah laksawng kha an i phorh i tangka zong kha a let hnih in an i phorh; Benjamin zong kha an i kalpi. An i tim i Izipt ah cun an vung kal i Josef hmaiah cun an vung chuak. 16Josef nih Benjamin kha an sin i a hmuh tikah, a inn a zohtu kha a thawh i, “Hi mi hna hi inn ah khan hei kalpi hna; sa pakhat in va that law va chuang, chun ah ka sinah rawl an ei lai,” a ti. 17A inn zohtu nih khan Josef nih a chim bantuk khan a tuah i Josef inn ah khan a kalpi hna.

18A inn i an kalpi hna caah cun an thin a phang i, “Kan hnulei tan i kan phaisa kan sawngkhoi chung i an kan khirhmi ruangah khan a si ko lai. An kan zuanhnawh lai i sal ah an kan tlaih lai i kan laa hi an i lak hna lai,” tiah an ruah. 19Cucaah Josef inn zohtu cu an va fuh i innka hram ah khan an va chawnh i, 20“Bawipa, zaangfahnak in chawnh kan in duh. Hmasa ah hika ah rawl cawk awkah kan ra cang. 21Riah hmun kan phak i kan sawngkhoi kan kau cio tikah kan sawngkhoi kaa ah khan kan tangka kha kan hmuh cio — kan tangka a dihlak tling tein, a rih ning zong a sining tein. Cucu atu ah hin kan rak i phorh ṭhan hna. 22Cun rawl dang cawknak dingah phaisa zong a dang kan i phorh fawn. Aho nih dik kan phaisa cu kan sawngkhoi chungah a rak sanh kan hngal lo,” an ti. 23Cun inn zohtu nih cun, “Nan thin phang hlah u. Nan lungre thei hlah u. Nan Pathian, nan pa Pathian nih hi tangka cu nan sawngkhoi chungah khan an chiahpiak hna. Hmasa i nan ka cawknak phaisa cu ka hmuh ko,” a ti. Cun Simeon kha an sinah a ratpi.

24Josef inn chungah khan annih cu a luhpi hna. An ke ṭawlnak ah ti a pek hna i an laa kha rawl a pek hna. 25Josef chun i a rat tik caah cun an laksawng cu an rak timh hna; cuka ah rawl kan ei lai ti kha an theih. 26Josef cu inn i a ra ṭin tikah inn chungah cun an laksawng kha an va pek i a hmaiah khan an kun. 27An dam dam lo kha a hal hna i, “A kong nan ka chimhmi nan pa patar kha zeitindah a um? A nung rih maw? A dam ko maw?” a ti. 28Annih nih, “Kan pa na salpa cu a nung ko rih i a dam ko,” tiah an leh. Cun an khuk an i bil i a hmaiah cun an lu an khun.

29A chuahpi a nau Benjamin kha Josef nih a hmuh tikah, “Hi pa hi nan ka chimhmi nan nau hniang bik cu a si ṭheo lai. Ka fapa, Pathian nih thluachuahnak in pe ko seh,” a ti. 30A nau a hmuh tikah Josef cu a hnarno a ṭam i cucaah cun khulrang in a kal. A ṭah dengmang caah a khaan chungah khan a lut zokzok i a va ṭap. 31A hmai aa phiah dih in a ra chuak i zei poi lo bantuk tein i umter in, rawl cu kan pe u, tiah a ti hna. 32Josef cu amah dang tein an pek, cun a unau pawl cu cabuai a dang pakhat ah an pek hna i Josef sinah rawl a eimi Izipt mi cu anmah dang tein an pek ve hna, zeicahtiah Izipt mi nih cun Hebru mi he rawl ei ṭi cu ningzak ah an rel. 33Josef unau pawl cu Josef hmaiah khan an kum aa channing tein aa chang diahmah in an ṭhutter hna, upa bik in ngakchia bik tiang cuticun an ṭhutter hna; cu bantukin an ṭhutter hna kha an hmuh tikah pakhat le pakhat khuaruahhar in an i zoh. 34Josef cabuai cung rawl cu an pek hna i Benjamin kha hawi nak let nga tam in an pek. Cuticun an ei an ding i an i nuam.

Currently Selected:

GENESIS 43: HCL06

Highlight

Copy