GENESIS 35

Jakob Thluachuah A Pek

1Pathian nih Jakob cu a thawh i, “I tim law Bethel ah kal law cuka ah cun va um. Cun na u Esau sinin na zam lio i na sin i a langmi Pathian caah khan cuka ah cun biakṭheng pakhat in va ser,” a ti. #Gen 28.11-17 2Cucaah Jakob nih cun a innchungkhar le a sin i a ummi kha an dihlak in, “Nan i chiahmi ramdang pathian kha hlonh dih hna u; i thianh u law thil thiang i hruk u. 3Hika hmun hi kan chuahtak lai i Bethel ah kan kal lai, cuka ah cun harnak ka in caan le khuazeika ka kalnak hmanh i a ka umpitu Pathian caah khan biakṭheng pakhat ka ser lai,” a ti hna. 4Cucaah an i chiahmi ramdang pathian vialte le an i tonhmi hnatonh vialte kha Jakob cu an pek i Shekhem pawng i a ummi kuhthing toiah khan a thuh hna.

5Jakob le a fapa hna cu kal awk i an i thawh tikah khan, an pawngkam khuami hna cungah cun ṭihnak nganpi a tlung i cucaah an dawi ngam hna lo. 6Jakob cu a mi vialte hna he Kanaan ram khua Luz cu an phan (Luz cu Bethel a si). 7Cuka ah cun biakṭheng pakhat a ser i cuka hmun cu a min ah Bethel a sak; zeicahtiah a u sinin a zam lioah khan khaka hmun ah khan a sinah Pathian a lang. 8Rebekah umtu Deborah kha a thi i Bethel khua thlang i kuhthing tangah cun an vui. Cucaah “Ṭahnak kuhthing” tiah min an sak.

9Jakob cu Mesopotamia ram in a hung kir ṭhan tikah khan Pathian cu a sinah a lang ṭhan i thluachuah a pek. 10Pathian nih cun a thawh i, “Na min cu Jakob a si, sihmanhsehlaw atu ri hin cun na min cu Israel a si cang lai,” a ti. Cucaah Israel ti a si. #Gen 32.28 11Cun Pathian nih amah cu, “Keimah cu Lianngan Bik Pathian ka si. Fa tam piin ngei hna. Tefa tampi na ngei lai i a cheu cu siangpahrang an si lai. Na tefa cu an tam tuk lai caah miphun tampi ah an cang lai. #Gen 17.4-8 12Abraham le Isak ka pekmi hna ram kha nangmah kan pek lai i cu ram cu na hnu i a ummi na tefa hna zong cu ka pek hna lai,” a ti. 13Cun Pathian nih an i chawnhnak hmun ah khan Jakob cu a kaltak i vancung ah a kir ṭhan. 14Cuka ah cun Jakob nih rolung pakhat a bunh i a cungah cun din awk thawinak a toih i chiti zong a toih. #Gen 28.18-19 15Cuka hmun cu a min ah Bethel a sak.

Rachel A Thi

16Bethel khua cun an i thawh i Efrath khua in hla nawn an si rih lioah khin, Rachel cu a nau ngan a fak i a zualhma ngaingai. 17Cu ti i a ngan a fah lioah cun, nau hlawmtu nu nih khan, “Na thinphang hlah, fapa na ngei ṭhan,” a ti. 18Cun a thaw hmanung bik sinah cun, a cahpah khin, “Ben-oni#35.18 BEN-ONI ti cu ka vanchiatnak fapa ti a si. run ti u,” a ti, asinain a pa nih cun, Benjamin#35.18 BENJAMIN ti cu vanṭhatnak fapa ti maw asiloah orhlei kut fapa tinak a si. tiah a min cu a sak.

19Rachel cu a thi i Efrath lei kalnak lam ah khan an vui. Efrath cu Bethlehem ti a si cang. 20Jakob nih a thlan ah cun philh lonak lung pakhat a phun i cu “Rachel Lungphun” cu atu tiang hin cuka ah cun a um. 21Israel cu a va lan i Eder innsang ralchan ah khan a riahnak hmun cu a ser.

Jakob Fapa Hna

(1Cha 2.1-2)

22Israel kha cu ram i a um lioah cun Reuben nih khan a pa nupi pakhat Bilhah cu a ihpi. Cu kong cu Israel nih khan a theih i a thin a hung ngaingai. #Gen 49.4

Jakob fapa cu hleihnih an si: 23Leah fa ah Reuben, Jakob fapa upa bik, Simeon, Levi, Judah, Isakhar le Zebulun an si. 24Rachel fa ah Josef le Benjamin an si. 25Rachel salnu Bilhah fa ah, Dan le Naftali an si. 26Leah salnu Zilpah fa ah, Gad le Asher an si. Hi hna hi Jakob nih Mesopotamia ram ah a hrinmi an si.

Isak Thihnak

27Jakob cu a pa Isak sin kha a phan, Isak cu Mamre ah khan a rak um i Mamre cu Abraham le Isak an rak umnak khua a si, (Mamre cu Kiriath-arba ti zongah ti a si, Hebron ti zongah ti a si). #Gen 13.18 28Isak cu a thih ah kum za le sawm riat a si, 29Tar tlung nung in a mi hna cu thihnak ah khan a fonh hna i a fapa Esau le Jakob nih khan an vui.

Currently Selected:

GENESIS 35: HCL06

Highlight

Copy