GENESIS 26

Gerar le Beersheba Ah Isak

1Mangṭam a dang a tlung ṭhan, Abraham chan i hlan deuh i a tlungmi hleiah khan. Cucaah cun Isak cu Filistin mi Siangpahrang Abihmalek sin Gerar khua ah a va kal. 2Bawipa cu Isak sinah khan a lang i, “Izipt ram ah cun vung kal hlah, um kan tinak ram tu ah um ko. 3Hika ah hin tlawmpal in um ko law na sinah ka um lai i thluachuah kan pek lai i hi ram vialte hi nangmah le na tefa kha kan pek hna lai. Na pa Abraham sin i ka sermi biakamnak kha ka let lai lo. #Gen 22.16-18 4Van i arfi zat khin tefa kan pek lai i hi ram vialte hi annih cu ka pek hna lai. Na tefa thluachuah ka pek hna bantuk hin thluachuah kan pe ve tiah vawlei cung miphun vialte nih an ka hal lai. 5Abraham nih khan ka nawl a ngaih i ka nawlbia vialte kha a zulh hna caah nangmah cu thluachuahnak kan pek lai,” a ti.

6Cucaah Isak cu Gerar ah khan a um. 7Cuka mi hna nih a nupi kong kha an hal tikah, ka nupi a si, a ti ngam lo caah, ka far a si, a ti. Rebekah cu aa dawh ngaingai i cucaah amah an duh ruangah keimah kha cuka mi hna nih cun an ka thah lai, tiah a thin a phan caah cuticun a ti. #Gen 12.13; 20.2 8Cuka i Isak cu sau nawn a um hnuah khin, Filistin mi Siangpahrang Abimelek nih cun a thlalangawng in khua a hei cuan i Isak nih Rebekah a pom kha a hmuh. 9Abimelek nih Isak cu ra seh tiah mi a hei thlah i, “Zohhmanh, na nupi a si hrimhrim lai. Zeicahdah ka far a si na ti kun?” a ti. Cun Isak nih cun, “Ka nupi a si ka ti ahcun an ka thah lai ti ka phan caah a si,” ti in a leh. 10Abimelek nih cun, “Kan cung i na tuahmi hi zeidah a si ruat hmanh. Ka mi pakhatkhat nih na nupi cu an ihpi sual ko hnga i kan cung i sualnak a tluntertu cu nangmah na si hnga,” a ti. 11Cun Abimelek nih khan mi cu an dihlak in nawl a pek hna i, “Hi mipa siseh, a nupi siseh, an cungah ṭhat lonak a tuah mi cu thah nan si lai,” a ti hna.

12Cu ram ah cun Isak nih thlaici a tuh i cu kum ah cun a tuhmi thlaici a let za khat in a zun; cucu Bawipa nih thluachuah a pek caah a si. 13A ṭhangcho chin lengmang i mirum ngaingai ah a cang. 14Tuurun tampi le cawrun tampi le sal tampi a ngeih hna caah Filistin mi nih khan an nahchuah. 15Cucaah cun a pa Abraham a nun lio i Abraham salle nih an cawhmi tikhor vialte kha an chilh dih hna.

16Cun Abimelek nih Isak cu a thawh i, “Kan kaltak cang. Kanmah nakin na ṭhawng tuk cang,” a ti. 17Cucaah Isak cu a kal i Gerar nelrawn ah khan khua a sa. 18A pa Abraham a nun lio i Abraham salle pawl nih an rak cawhmi tikhor, Filistin mi nih an chilh dihmi kha a cawh ṭhan hna. Isak nih cun a pa nih min a rak bunhmi ṭhiamṭhiam kha a bunh hna.

19Nelrawn chungah cun Isak salle nih cun tikhor pakhat an cawh i cerh pakhat an hmuh. 20Gerar khua saṭil khal hna le Isak saṭil khal hna cu an i si i bu khat nih, “Hi ti hi kanmah ta a si,” an ti, a dang bu khat ve nih, “Kanmah ta a si,” an ti ve. Cucaah cu tikhor cu a min ah Isak nih Esek a sak; amah he an i sik ruangah cun. 21Isak salle pawl nih cun tikhor a dang pakhat an cawh ṭhan i cu kongah cun siknak a um ṭhiamṭhiam, cucaah a min ah, Sitnah a sak. 22Cuka hmun cun aa ṭhial i tikhor a dang pakhat a cawh ṭhan. Cu kong ah cun siknak a um lo, cucaah a min ah Rehoboth a sak. Aa thawh i, “Atu cu hi ram chungah hin Bawipa nih luatnak a kan pek cang i hika hmun ah hin kan ṭhangcho cang lai,” a ti.

23Mah ka hmun cu Isak nih a chuahtak i Beersheba ah a kal. 24Cu zan ah cun Bawipa kha a sinah a lang i,

“Kei cu na pa Abraham Pathian kha ka si.

Na thinphang hlah,

keimah nih kan umpi ko.

Ka sal Abraham ruangah

thluachuahnak kan pek lai i

tefa tampi kan pek lai,” a ti.

25Cuka ah cun Isak nih biakṭheng pakhat a ser i Bawipa cu a biak. Cun cuka ah cun a thlam kha a bunh i a salle nih khan tikhor pakhat an cawh.

Isak le Abimelek Biakamnak

26Abimelek cu a fimchimtu Ahuzzath le a ralbawi Fikol he tiah Isak ton awkah Gerar khua in an ra. #Gen 21.22 27Isak nih cun a rak thawh i, “Hlan vial ah na ka rem lo i na ram in na ka dawi, zeicahdah atu ah keimah ton awkah na rat?” a rak ti. 28Annih nih cun, “Atu cu Pathian nih an umpi kha kan hngalh i nangmah le kanmah karlak ah biakamnak a fekmi a um awk a herh tiah kan ruah. 29Na cungah harnak zeihmanh kan tuah lo bantukin nang zong nih kan cungah na tuah nakhnga lo bia i kam ti kan in duh. Na cungah zaangfahnak kan rak ngei i dai tein kan in kalter. Atu cu Bawipa nih thluachuah an pek cang,” an ti. 30Isak nih puai a tuahpiak hna i an ei i an ding. 31A thaizing cu zingka tein an tho i chiatser in biakamnak cu an tuah veve. Isak nih, dam tein va kal cang u, a ti hna i a sinin dai tein an i ṭhen.

32Cu ni ah cun Isak cu a salle nih tikhor an cawhmi kong cu an ra chimh. “Ti kan hmuh cang,” tiah an ti i 33cucaah cu tikhor cu a min ah Shibah a sak. Cucaah cun pei cu khua cu Beer-sheba#26.33 BEER-SHEBA ti cu biakamnak tikhor, asiloah tikhor pasarih, ti a si. tiah ti a si rih cu.

34Esau cu Hit mi Beeri fanu Judith a ṭhit ah kum sawm li a si. Cun Hit mi Elon fanu Basemath zong kha a ṭhit fawn. 35Isak le Rebekah cu an lung an lawmh loter ngaite hna.

Currently Selected:

GENESIS 26: HCL06

Highlight

Copy