GENESIS 25

Abraham Tefa Dang

(1Cha 1.32-33)

1Abraham nih midang pakhat a ṭhit ṭhan i a min ah Keturah a si. 2Keturah nih cun Zimran, Jokshan, Medan, Midian, Ishbak le Shuah a hrinpiak. 3Jokshan cu Sheba le Dedan pa a si, cun Dedan fapa hna cu Asshurim, Letushim, le Leummim an si. 4Midian fapa hna cu Efah, Efer, Hanok, Abida le Eldaah an si. Hi hna hi an dihlak in Keturah tefa an si.

5Abraham nih a ngeihmi thil vialte cu Isak kha a pek ta dih. 6Sihmanhsehlaw a thih hlanah a nupi dang hna fapa hna zong kha laksawng a pek hna i nichuahlei ah a kalter hna; a fapa Isak sinin aa hlatmi ram Nichuahlei ram ah a kalter hna.

Abraham Thihnak le Vuinak

7Abraham cu kum za sawm sarih le kum nga a nung. 8Chan tling cikcek in a nun hnuah a thi i a phunhawi hna sinah khan pumh a si ve. 9A fapa Isak le Ishmael nih khan Makpelah lungkua ah khan an vui, cu lungkua cu Mamre nichuahlei i a ummi lo, Hit mi Zohar fapa Efron ta a simi i a ummi kha a si. 10Cu lo cu Abraham nih khan Hit mi hna sin cun a cawk i Abraham le a nupi Sarah cu an pahnih tein cuka ah cun vui an si. #Gen 23.3-16 11Abraham thih hnuah a fapa Isak cu Pathian nih thluachuah a pek. Isak cu Beer-lahai-roi ah khan khua a sa.

12Hi hna hi Ishmael tefa kha an si, Ishmael cu Sarah salnu Izipt mi Hagar nih Abraham a hrinpiakmi fapa kha a si. 13Ishmael fapa hna an min cu, an chuah ningin, aa chang lengmang in hi ning hin a si: Ishmael fapa upa bik cu Nebaioth a si, cun Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish, le Kedemah an si. 16Hi hi Ishmael fapa hna cu an min cio le an khua cio le an umnak hmun cio he tiah an si — phuntungtu hleihnih le an phun cio an si. 17(Ishmael cu a thih i a miphun hna sin i fonh a si ah khan kum za sawm thum le kum sarih a si.) 18Ishmael tefa cu Havilah le Shur karlak ram ah khan an um, cu ram cu Izipt ram in nichuahlei, Assiria lei lam ah khan a si. An rualchan hna he a dang in an um.

Esau le Jakob Hrinnak

(Rom 9.10-12)

19Abraham fapa Isak tefa cu hihi an si: Isak pa cu Abraham a si. 20Isak cu Rebekah a ṭhit ah kum sawm li a si, Rebekah cu Mesopotamia ram i a ummi Aramean miphun Bethuel fanu a si i a ṭa cu Aramean miphun Laban kha a si. 21Isak nupi cu fa a ngeih lo caah Isak nih cun Bawipa sinah thla a campiak. A thlacamnak cu Bawipa nih a leh i Rebekah cu fa a pawi. 22A chung i a ummi faphir pa veve a simi cu pakhat le pakhat an i nam len tikah cun aa thawh i, “Hi bantukin a si ding a si ahcun, zeicahdah ka thih ko lo?” a ti. Cun Bawipa sinah a sullam hal awkah a kal i, 23Bawipa nih cun a rak thawh i,

“Na chungah hin miphun pahnih

an um.

Aa ralmi miphun phun hnih

na hrin hna lai,

pakhat cu a ṭhawng deuh lai i

a upa deuh nih a ngakchia deuh kha

a rianh lai,” a ti. #Rom 9.12

24A nithla a tlin tikah fa cu a hrin hna i faphir an si. 25A chuak hmasamipa cu a sen i a cuar cu a hmulmi puan bantuk a si, cucaah a min ah Esau an sak. 26Cun a nau kha a hung chuah tikah a u kedil kha fek tein aa tlaih, cucaah a min ah Jakob an sak. An chuah ah Isak cu kum sawm ruk a si.

Esau Nih Upa Sinak A Zuar

27Ngakchia cu an pahnih in an hung ṭhang, Esau cu sakah thiammi a si, ramvaih a duh ngaimi a si, sihmanhsehlaw Jakob cu midai, miholhlo, inn lawng i a ummi a si. 28Isak nih Esau cu a dawt deuh, zeicahtiah a sa kahmi sa kha a ei lengmang, sihmanhsehlaw Rebekah nih Jakob kha a dawt deuh ve.

29Ni khat cu Jakob kha pehang a rak chuang i cu lioah cun Esau kha ram vaihnak in a ra tlung. 30A rawl cu a ṭam i Jakob cu, “Ka rawl a ṭam tuk, kha thil sen kha ka khat in ka pe tuah,” tiah a ti. (Cu ruangah cun Esau cu Edom ti i min sak a sinak cu a si.)#25.30 Edom ti cu Hebru holh i a ‘sen’ ti he a awchuah aa lo. 31Sihmanhsehlaw Jakob nih aa thawh i, “Fater na sinak kha na ka pek ahcun kan pek lai,” a ti. 32Esau nih cun, “A ṭha ko, ka thih cang leh lai hi ta! Cu fater sinak ko cu a!” a ti. 33Cun Jakob nih cun, “Na fater sinak cu kan pek hrimhrim lai tiah bia i kam hmasa,” a ti. Esau nih cun biakamnak cu a ser i a fater sinak cu Jakob sinah cun a zuar. #Heb 12.16 34Cun Jakob nih changreu le pehang a pek i a ei a din hnuah a tho i a kal. Fater a sinak kha Esau nih cun zei ah a rel lo.

Currently Selected:

GENESIS 25: HCL06

Highlight

Copy