GENESIS 16
16
Hagar le Ishmael
1Abram cu a nupi Sarai nih fa zeihmanh a hrinpiak lo. Sarai nih cun Izipt mi salnu pakhat a ngei i a min ah Hagar a si. 2Sarai nih cun Abram cu a thawh, i, “Zohhmanh, kei cu Bawipa nih fa ngeih a ka sianh lo. Cucaah cun zeicahdah ka salnu hi na ihpi ko lo? Fa a hei ka hrinpiak ko hnga dah kaw,” tiah a ti. 3Cuticun Sarai nih Izipt mi a salnu Hagar cu Abram kha nupi caah a pek. (Cu thil cu bantukin a hung um cu Abram kha Kanaan ram chung i kum hra a um hnuah a si). 4Abram nih Hagar cu a ihpi i fa a pawi. Hagar nih cun fa ka pawi ti kha a hun i hngalh tikah porhlawt in aa la i Sarai kha zeihmanh ah a rel lo. 5Khi tikah Sarai nih Abram cu a thawh i, “Hagar nih zeihmanh i a ka rel lo hi nangmah palh a si. Keimah hrimhrim nih ka sal cu kan pek i fa ka pawi ti aa hngalh cangka keimah kha a ka serhsat. Cucaah kannih pahnih lakah hin ahodah a ding ti kha Bawipa nih kan ceih seh,” tiah a ti. 6Cun Abram nih a leh i, “A ṭha ko, amah cu na sal a si i na kut tangah pei a um ko cu; na duhning paoh in a cungah tuah ko,” a ti. Cucaah Sarai nih cun a vun hrem ve i Hagar cu a tli.
7 Bawipa vancungmi nih Hagar cu Shur lei kalnak lam i a ummi cerhti, thetse rawn cerhti ah khan a ton i, 8“Sarai salnu Hagar, khuazei in dah na rat i khuazei ah dah na kal lai?” a ti. Hagar nih cun, “Sarai sinin ka zaam,” tiah a leh. 9Cun vancungmi nih cun, “Sarai sinah cun va kir ṭhan law a kut tangah ṭha tein va um,” a ti. 10Cun vancungmi nih cun,
“Tefa tam tuk hringhran kan pek lai i
a rel in rel cawk an si lai lo.
11Fapa pakhat na ngei lai i
a min ah Ishmael#16.11 ISHMAEL: sullam cu Pathian nih a theih ti a si. na sak lai,
Zeicahtiah Bawipa nih na harnak kha an theihpiak.
12Sihmanhsehlaw na fapa cu
ramlak laa bantuk a si lai,
a mi kip kha a doh hna lai i
mi kip nih khan an doh ve lai.
A rualchan hna umnak in
lamhlapi ah khua a sa lai,” a ti.
13Hagar nih cun amah le amah kha, “A ka hmutu cu ka hmuh taktak ko maw?” tiah aa hal i cucaah Bawipa cu, “Nang cu mi a hmutu Pathian na si,” ti min in a auh. 14Cucaah cun pei Kadesh le Bered karlak i a ummi tikhor cu, “Beer-la-hai-roi” tiah mi nih an ti cu, (Beer-la-hai-roi a sullam cu, “A ka hmutu Pathian nung tikhor,” ti a si).
15Hagar nih cun Abram cu fapa a hrinpiak i a min ah Ishmael a sak. #Gal 4.22 16Abram cu kum sawm riat le kum ruk a si.
Currently Selected:
GENESIS 16: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
