EXODUS 25

Biakinn Ca Thawhlawm

(Exo 35.4-9)

1 Bawipa nih Moses cu a thawh i, 2“Israel mi cu va chim hna law keimah caah thawhlawm tho hna seh. Ahohmanh an si ah thawhlawm pek a ka duhmi cu an thawhlawm kha na cohlanpiak hna lai. 3Na cohlan awk hnga thawhlawm cu hihi an si lai: sui, ngun, dar, 4tuuhmul a sen, a eng, a dum, la hmangṭhia, meheh hmul in sermi puan, 5tuukawng phaw si sen buhmi, saphaw ṭha phun, anri thing, 6mei inn ca sathau, thuh awk chiti he cawhmi zihmui, khangh awk sa he cawh awk zihmui, 7karnelian lungvar le tlangbawi ngan angki thiang le ṭang benh i hman awk lungvar. 8Biakinn pakhat an ka serpiak lai i cuticun an lakah ka um lai. 9Ka umnak le a chung thilri vialte hna cu kan hmuhsak laimi pungsan ning in na ser hna lai.

Biakamnak Kuang

(Exo 37.1-9)

10“Anri thing in kuang pakhat nan ser lai i a tung lehhmah sawm li le panga, a vang lehhmah kul le pasarih, a san lehhmah kul le pasarih a si lai. 11A chunglei he a lenglei he sui thiang in nan tuam lai i a velchum in sui in a tlangkawm nan ser lai. 12A bing pali sui in nan ser lai i cu a bing cu a ke ah khan nan thlaih hna lai, kap khat ah pahnih lengmang in nan thlaih hna lai. 13Anri thing in zawnhnak lang nan ser hna lai i sui in nan tuam hna lai. 14Cu lang cu a kap veve i a ummi a bing chung khan nan hrolh hna lai i cuticun kuang cu nan zawnh lai. 15Lang cu a bing chungah khan nan hrolh zungzal hna lai, nan phawi hna lai lo. 16Kuang chungah cun kan pek laimi lungtlap pahnih, biakamnak hngalhter ṭhantu, kha na chiah hna lai.

17“A chin kha sui thiang in na ser lai i lehhmah sawm li le panga a sau lai i kul le pasarih a kau lai. #Heb 9.5 18A chin a par veve caah cun a den in denmi sui in cherubim pahnih na ser hna lai i 19khattelei dongh ah pakhat, khattelei dongh ah pakhat na chiah hna lai. A chin he i seng citcet tein na ser hna lai. 20Kuang chin kha an ven khawh nakhnga, cherubim nih khan an cunglei veve ah an thla kha an samh veve lai; hmaitonh in an um lai i kuang chin kha an zoh veve lai. 21A chin cu kuang cungah cun na chiah lai i kuang chungah cun biakamnak hngalhter ṭhantu lungtlap pahnih kan pek laimi kha na chiah hna lai. 22Cuka ah cun kan ton lai; Israel mi hna caah ka timi ka nawlbia vialte cu kuang chin cung le biakamnak kuang cung i a ummi cherubim pahnih hna karlak cun kan pek tawn lai.

Pathian Sin Pekmi Changreu Ca Cabuai

(Exo 37.10-16)

23“Anri thing in cabuai pakhat na ser lai i a sau lehhmah sawm thum le paruk, a kauh lehhmah hleiriat, a san lehhmah kul le pasarih a si lai. 24Sui thiang in na tuam lai i a velchum in a tlangkawm kha sui in na ser lai. 25A velchum in a tlangpang kha lehhmah pali kau in na ser lai i a tlangkawm cu sui in na ser lai. 26A putnak ding a bing pali sui in na ser hna lai i a ke an umnak a kil pali ah khan na thlaih hna lai. 27Cabuai putnak lang hrolhnak ca i na sermi a bing hna cu a tlang pawng ah khan na thlaih hna lai. 28Lang cu anri thing in na ser hna lai i sui in na tuam hna lai. 29Cun dinmi thawinak caah khan pakan le hrai le than-um le kanto kha na ser hna lai. An dihlak in sui thiang in na ser hna lai. 30Cun ka hmaika cabuai ah khan ka sin i pekchanhmi changreu kha hun zungzal a si lai. #Lev 24.5-8

Mei Vannak Tung

(Exo 37.17-24)

31“Mei vannak tung pakhat sui thiang in na ser lai. A ke le a tung kha denmi sui in na ser hna lai; cun a ṭamhnak pangpar hna le pangpar kuhkulul tete hna le pangpar sarh tete hna cu, a tungpi he cun i seng cikcek tein na ser hna lai. 32Kam khat khan nge pathum veve an tho lai. 33A nge paruk nih khan ṭamhnak pangpar par thum cio an ngei lai i almon pangpar bantuk an si lai, a kuhkulul tete hna le a sarh tete hna kha an um lai. 34Meiinn tungpi nih cun ṭamhnak pangpar pali a ngeih hna lai i cu pangpar cu kuhkulul tete le a sarh tete he an si lai. 35A nge khuah thum hna tang cio ah cun kuhkulul pakhat cio an um lai. 36Kuhkulul le nge hna cu mei vannak tungpi he cun i seng cikcek tein an um lai, an dihlak in denmi sui hlum khat an si lai. 37Mei vannak tung caah cun meiinn pasarih na ser hna lai i na chiahning hna cu hmailei ceuh hna seh tiin a si lai. 38A cengceh le a vutcam ruhnak hna cu sui thiang in na ser hna lai. 39Mei vannak tung le a thilthuam sernak caah hin sui thiang pawng za khat na hman lai. 40Tlang cung i kan hmuhsakmi pungsan ningte khan ser naa zuam lai. #Lam 7.44; Heb 8.5

Currently Selected:

EXODUS 25: HCL06

Highlight

Copy