EXODUS 22

Chamnak Nawlbia

1“Mi nih cawtum siseh tuu siseh a fir i a thah ahcun, a zuarh zong a zuarh ahcun, cawtum pakhat caah cawtum panga a liam lai i tuu pakhat caah tuu pali a liam lai. 2-4A liam hrimhrim awk a si lai. Zeihmanh ngeihmi a ngeih lo ahcun, a firmi chamnak ah khan amah cu zuar a si lai. A firmi saṭil kha, cawtum siseh, laa siseh, tuu siseh, a kut chungah a rak nun ko rih ahcun, a let in a liam lai.

“Mifir pakhat nih inn a bauh i a bauhnak ah an thah ahcun a thattu cu lainawng a si lo. Asinain ni chuah hnuah a si ahcun lainawng a si ṭhiamṭhiam.

5“Mi pakhatkhat nih a saṭil kha lo lakah siseh mitsur dum chungah siseh a tlonter hna i a thlah sual hna i midang lo kha an ei ahcun, a lo chung thil chuak a ṭha bik in maw asiloah a mitsur dum chung thil chuak a ṭha bik in maw a cham lai.

6“Mei a tlan sual i ram kha a kangh i ponmi rawl siseh, a dir liomi rawl siseh, thlaici tuhmi lo siseh, a kangh ahcun, mei a thawhtertu nih khan a kangmi man cu a liam lai.

7“Mi pakhatkhat nih a dang pakhat kha tangka siseh, thil man sung siseh, a kenter i cu pa inn cun mifir nih an fir ahcun, a firtu cu hmuh khawh a si ahcun a firtu nih cun a let in a liam lai. 8A firtu kha hmuh khawh a si lo ahcun a hawipa thil kha amah nih a la maw la lo ti hngalhnak ah inn ngeitu pa cu Bawipa sinah chuahpi a si lai.

9“Thilri cuhnak kong ah, an i cuhmi cu cawtum siseh, laa siseh, tuu siseh, hnipuan siseh, zei thil a tlaumi paoh zong a si ah, an bia cu Pathian hmaiah chuahpi a si lai. Pathian nih sual a phawtmi nih khan a dang pa kha a let in a rulh lai.

10Mi pakhatkhat nih laa siseh, cawtum siseh, tuu siseh, saṭil dang pakhatkhat siseh, mi dang pakhat kha rak ka zohkhenhpiak hna tiah a fial i saṭil cu a thih ahcun, asiloah hma a in ahcun, a si lo ah ral nih an tlaih ahcun, tehte a um lo ahcun 11Bawipa hmai i chiatsernak nih cu thilri cu amah nih a fir maw fir lo ti kha a khiah lai. A fir lo a si ahcun, a ngeitupa kha a sung lai i a cham a herh lai lo; 12sihmanhsehlaw amah nih a fir a si ahcun, a ngeitu kha a let in a cham lai. 13Sa nih a seh a si ahcun a ruak kha tehte caah a chuahpi lai; sa sehmi cu a cham awk a si lai lo.

14“Mi pakhatkhat nih mi dang sinin saṭil aa hlan i a ngeitu um lo kar ah hma a ing asiloah a thih ahcun, a hlangtu nih khan saṭil man cu a liam lai. 15Asinain a ngeitu kha a um ve ko ahcun, a hlangtu nih khan a liam a herh lai lo. Man in hlanhmi a si ahcun a man kha hlan man nih cun a hluh cang.”

Ziaza le Biaknak Lei Nawlbia

16“Ham lomi ngaknu kha mi pakhatkhat nih a lem i nu le va an si ahcun, man kha a man lai i a ṭhit lai. #Deu 22.28-29 17Sihmanhsehlaw ngaknu pa a hna a tlak lo ahcun ngaknu man kha a lemtu nih cun a liam ṭhiamṭhiam lai.

18“Hnam ngeimi nu kha nan nunter hna lai lo. #Deu 18.10-11

19“Saram he nu le pa a simi cu thah an si lai. #Lev 18.23; 20.15-16; Deu 27.21

20“Bawipa sinah si loin pathian dang sinah rai a thawimi cu thih awk tlak a si tiah sual phawt a si lai. #Deu 17.2-7

21“Nannih zong kha Izipt ram ah khan ramdang mi nan rak si ve caah, ramdangmi kha nan serhsat hna lai lo i nan hrem fawn hna lai lo. #Exo 23.9; Lev 19.33-34; Deu 24.17-18; 27.19 22Nuhmei le ngakṭah kha zawmtai hna hlah u, 23nan zawmhtaih hna ahcun bawmhnak duh ah ka sin i an au tikah ka rak leh hna lai i 24ka thin a hung lai i raltuknak ah nan thi sual lai. Nan nupile kha nuhmei ah an cang ve ko lai i nan fale kha ngakṭah ah an cang ve ko lai.

25“Nan lakah khua a sami misifak ka mi hna kha ahohmanh tangka nan cawih hna tikah tangka cawihtu nih an tuah tawn bantukin a karh nan la hna lai lo. #Lev 25.35-38; Deu 15.7-11; 23.19-20 26Biakamnak caah tiin a puan kha nan lakpiak ahcun nitlak hlanah nan pek ṭhan lai, #Deu 24.10-13 27zeicahtiah cu lawng cu pei khualumnak ding caah i khuhnak a ngeih cu. Cucu nan lakpiak ahcun zeidah aa vorh ti kun lai? Bawmhnak duh ah a ka auh tikah ka leh lai, zeicahtiah kei cu mi zaangfah hmangmi ka si.

28“Pathian cu nan thangchiat lai lo, nan mi hna hruaitu a simi kha chiat nan serh lai lo. #Lam 23.5

29“Rawl nan hmuhmi chungin siseh, chiti le mitsur hang nan hmuhmi chungin siseh, keimah ca thawhlawm pek kha duh loin um hlah u.

“Nan fapa nan hrin hmasa bikmi hna kha nan ka pek lai. 30Cun nan caw fater hna le nan tuu fater hna zong kha nan ka pek lai; fater a simi cu pa a si ahcun a nu sinah ni sarih tiang a um lai i ni riat ni ah ka sinah nan ka pekchanh lai.

31“Nannih cu keimah sin i pekchanhmi nan si lai caah ramlak ah sa nih a sehmi sa kha nan ei lai lo, uico kha nan pek hna lai. #Lev 17.15

Currently Selected:

EXODUS 22: HCL06

Highlight

Copy