2 SAMUEL 14
14
Absalom Kirnak Joab Khuakhannak
1Zeruiah fapa Joab nih khan siangpahrang lungthin cu Absalom sinah khan a kal ti kha a hngalh. 2Cun Joab nih cun Tekoa ah mi a hei thlah hna i khika in a fimmi nu pakhat an va lak i amah cu, “Mithi ngai bantukin naa umter lai i mithi ngaihnak hnipuan kha naa hruk lai; sathau i thuh hlah; sihmanhsehlaw mithi ni tampi a ngai cangmi bantukin na um lai; 3cun siangpahrang sinah na va kal lai i hi bangin na va chim lai,” tiah a ti. Cuticun Joab nih a kaa chungah bia cu a khaih.
4Tekoa minu cu siangpahrang sinah a rat tikah vawlei lei hoih in a bawk i upatnak kha a tuah i, “Maw siangpahrang ka bawm tuah,” tiah a ti. 5Cun siangpahrang nih, “Zeidah na harnak cu a si?” tiah a ti. Cun anih nih, “Cu ngai tak cu, nuhmei ka si i ka va a thi cang. 6Cun na salnu nih hin fapa pahnih ka ngeih hna i lo ah an i si i a ṭhentu hna an um lo i pakhat nih pakhat cu a tuk i a thah. 7Cun atu cu an innchungkhar ningin na salnu hi an ka thawhhnawh i, ‘A thahmi a unaupa nunnak a lak ruangah khan amah cu kan thah nakhnga, a unaupa a tutu kha hun chuah tuah,’ tiah an ka ti. Cuticun rocotu ding zong kha hrawh an duh. Cu bantukin annih nih ka meiṭil a tangmi cu hmih an duh i ka vapa caah hi vawlei cungah hin min siseh, a tangmi siseh, zeihmanh nganh an duh lo,” tiah a ti.
8Khi tikah siangpahrang nih minu sinah cun, “Na inn ah va kal law nangmah kong ah nawlbia ka chuah lai,” tiah a ti. 9Cun Tekoa minu nih khan siangpahrang sinah cun, “Mawhchiatnak cu keimah le ka pa innchungkhar cungah si ko seh, siangpahrang ka bawipa; siangpahrang le a bawi ṭhutdan cu mawh phor hna hlah seh,” tiah a ti. 10Siangpahrang nih cun a thawh i, “Mi zeihmanh nih na sinah bia zeihmanh an chim ahcun, ka sinah ratpi law, amah nih an tawng ṭhan bal ti lai lo,” tiah a ti. 11Cun anih nih, “Thisen phuhlamtu nih khan a thah ti nakhnga lo le, ka fapa cu hrawh a si nakhnga lo, siangpahrang nih Bawipa na Pathian min chalh in chim tuah, tiah kan nawl,” tiah a ti. Cun anih nih, “Bawipa a nun bangin na fapa cu a samfa fa khat hmanh vawlei ah a tla lai lo,” tiah a ti.
12Cun minu nih khan, “Siangpahrang ka bawipa sinah bia ka khatte in ka chimter rih tuah, tiah kan nawl,” tiah a ti. Cun anih nih, “Chim tuah,” tiah a ti. 13Cun minu nih khan, “A si kun ahcun, zeicahdah cu bantuk thil cu Pathian mi cungah tuah awkah na timh kun? Hi bantuk biakhiahnak siangpahrang nih a pek tikah hin, siangpahrang nih a zammi a fapa kha inn ah a kirter ṭhan lo caah amah le amah sual aa phawt a si. 14Kannih cu kan dihlak in kan thi hrimhrim ko lai, vawlei i thletmi ti ruh ṭhan khawh ti lomi bantuk khi kan si; sihmanhsehlaw hi a zammi fapa hi phung leng chuahmi si lo dingin khua a khangtu cu a nunnak Pathian nih a lakpiak lai lo. 15Mi nih ka thin an ka phanter caah mah hihi siangpahrang ka bawipa sin i chim awkah ka ra; cun na salnu nih hin, ‘Siangpahrang sinah cun ka va chim ko lai, siangpahrang nih cun a salnu i ka halmi hi a hei ka tuahpiak ko hnga dah kaw. 16Zeitintiah siangpahrang nih cun a theih lai i, Pathian ro chungin keimah le ka fapa a ka hrawk hnga dingmi kut chungin a salnu cu a ka luatter lai,’ tiah ka ruah. 17Cun na salnu nih hin, ‘Siangpahrang ka bawipa bia nih cun dinhnak a ka pek lai, tiah ka ruah; zeitintiah siangpahrang ka bawipa hi a chia le a ṭha thleidan khawh leiah Pathian vancungmi bantuk a si. Bawipa na Pathian cu na sinah um ko seh!” tiah a ti. #2Sam 19.27
18Cun siangpahrang nih minu kha a leh i, “Kan halmi paoh ka sinin zeihmanh thup hlah,” tiah a ti. Cun minu nih, “Siangpahrang ka bawipa nih chim ko seh,” tiah a ti. 19Siangpahrang nih a thawh i, “Hi thil kong ah hin na sinah Joab kut aa tel maw?” tiah a ti. Cun minu nih cun a leh i, “Siangpahrang ka bawipa nangmah na nun hrimhrim bantukin, siangpahrang ka bawipa nih a chimmi thil zeihmanh hin aho hmanh kehlei ah siseh, orhlei ah siseh an i mer kho lai lo. A ka fialtu cu na sal Joab kha a si; hi bia vialte na salnu ka kaa chungah a ka khaihtu cu amah kha a si. 20Thil kalning kha thlen awkah na sal Joab nih mah hihi a tuah. Sihmanhsehlaw ka bawipa cu vawlei i a ummi thil vialte hngalh awkah Pathian vancungmi fimnak bantuk fimnak na ngei,” tiah a ti.
21Cun siangpahrang nih khan Joab cu a thawh i, “Zohhmanh, mah hi cu kan pek; va kal law, tlangval Absalom kha va la ṭhan cang,” tiah a ti. 22Cun Joab cu vawlei ah a bawk i upatnak kha a tuah i siangpahrang kha thluachuahnak a pek; cun Joab nih a thawh i, “Siangpahrang ka bawipa, siangpahrang nih a sal nih a halmi a ka pek caah hin, na sal nih na hmaiah mithmai ṭha ka hmuh tiah nihin ah ka hngalh,” tiah a ti. 23Cucaah Joab cu a tho i Geshur ah khan a va kal i Absalom cu Jerusalem ah a ratpi. 24Cun siangpahrang nih, “Amah dang tein amah inn ah khan um seh; ka mui cu ka hmu hlah seh,” tiah a ti. Cucaah Absalom cu a dang tein amah inn ah khan a um i siangpahrang cu a mui a hmu lo.
25Israel mi vialte lakah dawh leiah Absalom tlukin thangṭhat awk aho hmanh an um lo; a kechik in a luthlung tiang soisel awk pakhat hmanh a um lo. 26Cun a sam cu aa meh tikah, a lu cung sam cu a tah tawn i siangpahrang khing tahnak in shekel za hnih a si, (kum fate kum dongh caan paoh ah aa meh tawn, a rih tikah khan.) 27Absalom cu fapa pathum le fanu pakhat a ngei, a fanu min cu Tamar a si i midawh ngai a si.
28Cuticun Absalom cu Jerusalem ah siangpahrang mui hmuh loin kum hnih kheng a um. 29Cu tikah Absalom nih Joab kha siangpahrang sin i kalpi awkah a hei cah, sihmanhsehlaw Joab cu a ra duh lo. Cun a voi hnihnak a hei cah ṭhan i sihmanhsehlaw cu a ra duh ṭhiamṭhiam lo. 30Cu tikah a sinum cu a thawh hna i “Vei mu, liou #14.30 liou “liou” ti cu Laiholh ṭhiamṭhiam ah “hawinau” tinak a si. hna, Joab lo cu keimah lo chang ah khan a si i a chungah barli a ngei hna khah, va kal u law mei in va duah hna uh,” tiah a ti. Cucaah Absalom sinum hna nih khan a lo cu mei in an duah. 31Khi tikah Joab cu a tho i Absalom cu a inn ah a va kalhnawh i, “Zeicahdah na sinum hna nih ka lo kha an duah?” tiah a ti. 32Absalom nih Joab cu a leh i, “Zohhmanh, nangmah cu bia kan cah i, ‘Hika ah hin ra law, “Zeicahdah Geshur in ka rat kun? Khika ah khan rak um ko ning law ka caah a ṭha deuh hnga,” tiin siangpahrang cu va hal awkah kan thlah lai,’ ka ti. Cucaah atu cu siangpahrang kha ka hmuhter tuah; ka cungah mawhchiatnak a um a si le, amah nih rak ka that ko seh,” tiah a ti. 33Cun Joab cu siangpahrang sinah khan a va kal i a va chimh; cun Absalom kha a auh. Cucaah siangpahrang sinah khan a ra i siangpahrang hmaiah cun vawlei lei hoih in a kun i siangpahrang nih Absalom kha a rak hnamh.
Currently Selected:
2 SAMUEL 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
