2 SAMUEL 12
12
Nathan Nih David Kha A Sik
1Cun Bawipa nih Nathan kha David sinah a hei thlah. Amah sinah cun a ra i, “Khua pakhat ah hin mi pahnih an um i pakhat cu a rummi a si i pakhat cu sifakmi a si. #Slm 51 (A tlangpi) 2Mirumpa nih cun tuurun le cawrun tam ngaingai a ngeih hna i 3sihmanhsehlaw misifakpa nih cun a cawkmi tuu a nute pakhat lawng khi a ngeih. Cun amah nih cun a cawm i a fale hna he cun an ṭhang ṭi, a kheng le a hrai kha aa hrawm ve tawn i a ṭang chungah a pom tawn, amah cu a caah fanu bantuk a si ko. 4Voi khat cu, mirumpa cu khualtlung pakhat a ngei i amah tuurun chungin siseh, caw run chungin siseh, sa cu thah duh riangmang loin, misifakpa tuufate tu cu a lak i a khualpa cu a thah,” tiah a ti. 5Cun mipa cungah cun David thinhunnak cu a alh ciammam i Nathan sinah cun, “Bawipa nih a nun bangin, mah thil a tuahtu hi thih awk a tlak; 6hi thil a tuah caah le zaangfahnak a ngeih lo caah a tuufate kha let li in a cham awk a si,” tiah a ti.
7Cun Nathan nih David cu a thawh i, “Mipa cu nangmah hi na si. Hi bangin Bawipa, Israel Pathian nih, ‘Nangmah cu Israel mi siangpahrang ah chiti kan thuh i Saul kut chungin kan chuah; 8cun na bawipa inn cu kan pek i na bawipa nupi hna cu nangmah ṭang chungah kan pek hna, cun Israel mi chungkhar hna le Judah mi chungkhar hna cu kan pek hna; cun mah hihi a tlawm tuk ahcun, cu zat cu kan chap rih lai. 9Zeicahdah ka mithmuh i ṭhat lonak tuah awkah Bawipa ka bia cu na zawmhtaih? Hit mi Uriah cu vainam in na tuk i a nupi cu nupi ah naa lak i amah cu Ammon mi hna vainam in na thah. 10Cun nangmah nih na ka zawmhtaih i Hit mi Uriah nupi kha na nupi ah naa lak caah, cucaah vainam cu na inn in aa ṭhen bal lai lo,’ a ti. 11Hi bangin Bawipa nih, ‘Zohhmanh, nangmah inn chung lila in ṭhat lonak nangmah cungah ka chuahter lai i na mitka hrimhrim ah na nupile hna cu ka lak hna lai i na innpa kha ka pek hna lai i hi ni ka hmuh hngan ah hin na nupile cu a ihpi hna lai. #2Sam 16.22 12Zeitintiah nang nih cun hi thil hi a thli tein na tuah, sihmanhsehlaw kei nih cun hi thil hi Israel mi vialte hna hmai le chun khua ceu ah ka tuah lai,’ a ti,” tiah a ti. 13Cun David nih Nathan sinah cun, “Bawipa sinah ka sual cang,” tiah a ti. Cun Nathan nih David cu, “Bawipa zong nih na sualnak kha an ngaihthiam cang, na thi lai lo. 14Sihmanhsehlaw mah hi thil na tuah thawngin Bawipa kha na zawmhtaih ngaingai cang caah, na hrinmi na fa cu a thi lai,” tiah a ti. Cun Nathan cu a inn ah a ṭin.
15Cun Bawipa nih, Uriah nupi nih David a hrinpiakmi fa cu a tuk i a zaw. 16Cucaah David nih Bawipa kha ngakchia caah cun a nawl; cun David cu rawl a ul i a lut i vawlei ah zan khuadei a ril ko. 17Cun inn chung i upa hna nih khan amah cu vawlei khan thawhter awkah a pawngin an dirhnawh; sihmanhsehlaw a tho duh lo, anmah sinah rawl zong a ei duh lo. 18A ni sarihnak ah ngakchia cu a thi. Cun David cu a sinum hna nih khan ngakchia a thih kha a chimh an ṭih, zeitintiah annih nih, “Zohhmanh, ngakchia a nun lio hmanh ah khan kan chimh i a kan ngai duh lo, cucaah atu cu zeitindah ngakchia kha a thi cang, tiah kan chimh ngam lai? Amah le amah zeimaw tiin aa tuah sual lai,” tiah an ti. 19Sihmanhsehlaw David nih a sinum hna an i ceih sepmap kha a hmuh tikah, ngakchia cu a thi cang, ti kha a hngalh; cun David nih a sinum hna cu, “Ngakchia cu a thi maw?” tiah a ti hna i, annih nih, “A thi,” tiah an ti. 20Khi tikah David cu vawlei khan a tho i aa kholh i sathau aa thuh i a hnipuan aa thleng i Bawipa inn chungah a lut i Pathian kha a biak; cun amah inn ah khan a kal i a hal hna tikah rawl an hunh i a ei. 21Cun a sinum hna nih khan amah cu, “Na tuahmi thil hi zeidah a si? Ngakchia cu a nun lioah rawl na ul i amah cu na ṭah lengmang; sihmanhsehlaw ngakchia cu a thih tikah na tho i rawl na ei,” tiah an ti. 22Cun anih nih, “Ngakchia cu a nun lioah khan rawl ka ul i ka ṭap taktak; zeitintiah, ‘Ngakchia cu a nun nakhnga Bawipa nih a hei ka zaangfah ko hnga dah kaw, aho nih dah an hngalh khawh lai?’ ka ti. 23Sihmanhsehlaw atu cu a thi cang; zeicahdah rawl cu ka ulh ti lai? Ka nunter ṭhan khawh lai maw? Keimah cu a sinah ka kal te lai, sihmanhsehlaw amah cu ka sinah a ra kir ṭhan lai lo,” tiah a ti.
24Cun David nih a nupi Bathsheba kha a hnemh i a sinah a lut i a ihpi i fapa pakhat a hrin, a min ah Solomon a sak. Cun Bawipa nih amah cu a dawt i 25profet Nathan sinin bia a cah; cucaah Bawipa ruangah cun a min ah Jedidiah#12.25 Jedidiah ti cu Bawipa dawtmi ti a si. sak a si.
David Nih Rabbah A Tei
(1Cha 20.1-3)
26Joab nih khan Ammon mi hna khua Rabbah kha a tuk i siangpahrang khua cu a lak. 27Cun Joab nih David sinah zualko a hei thlah hna i, “Rabbah cu ka tuk cang; cuhleiah ti tamnak khua zong kha ka lak cang. 28Cucaah atu cu a tangmi kha hmunkhat ah pum hna law khua kha riahhnawh law la tuah, cu ti a si lo ahcun, keimah nih khua cu ka lak lai i ka min in kawh a si sual lai,” tiah a ti. 29Cucaah David nih mi vialte kha hmunkhat ah a pumh hna i Rabbah ah cun a va kal i a tuk i a va lak. 30Cun an siangpahrang bawi luchin cu a lu cung khan a lak; a rih lei cu sui talen pakhat a si i a chungah lungvar man sung a um; cun cucu David kha an chinh. Cun cu khua hranchaw kha a lak, a tam ngaingai ko. 31Cun a chung i a ummi hna kha a chuah hna i hluah le thir hmuizum le thir hreitlung in rian a ṭuanter hna i tlakrawh rawhnak ah khan rian a ṭuanter hna; cu bangin Ammon mi hna khua vialte cungah khan a tuah dih. Cun David le a mi vialte cu Jerusalem ah an kir ṭhan.
Currently Selected:
2 SAMUEL 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
