2 SIANGPAHRANG 21
21
Manasseh Pennak
(2Cha 33.1-20)
1Manasseh cu bawi hram aa thawk ah kum hleihnih a si i Jerusalem in kum sawm nga le kum nga a bawi. A nu min cu Hefzibah a si. 2Bawipa nih Israel mi hna hmai in a ṭhawlmi hna miphun hna nih an tuahmi fihnung phunglam ning khan, amah nih Bawipa mithmuh ah ṭhat lonak kha a tuah. #Jer 15.4 3Zeitintiah a pa Hezekiah nih a rak hrawhmi khuahrum bo kha a remh ṭhan hna i Israel siangpahrang Ahab nih a tuah bantuk khan Baal le Asherah caah biakṭheng a ser hna i van i a ummi thil vialte khi a biak hna i an rian a ṭuan hna. 4Bawipa nih, “Jerusalem khua ah ka min cu ka chiah lai,” tiin a rak tihnawh chanmi Bawipa inn chungah biakṭheng a ser hna. #2Sam 7.13 5Cun Bawipa inntual pahnih chungah khan van i a ummi thil vialte hna caah biakṭheng a ser hna. 6Cun thawinak caah a fapa kha mei in a khangh i camh le litin kha a hman hna i thitlawn thiam le hnam kha a fuhpanh hna. Bawipa mithmuh ah ṭhat lonak tampi a tuah i a thin a hunter. 7-8Bawipa nih David le a fapa Solomon sinah, “Hi inn chungah le Israel miphun vialte lakin ka thimmi Jerusalem khua chungah ka min ka chiah zungzal lai i ka mi Israel mi hna nih hin nawl ka pekmi vialte hna ning le Moses nih nawl a pekmi vialte hna ning in an tuah ahcun an pupa hna sinah ka rak pekmi ram chung hin an ke cu ka pialter lai lo,” tiah a timi inn chungah khan amah nih a serchommi Asherah siasal cu a chiah. #1Sia 9.3-5; 2Cha 7.12-18 9Sihmanhsehlaw annih nih an ngai duh lo i Israel mi hna hmai in Bawipa nih a hrawhmi miphun hna nih an rak tuahmi nakkhan ṭhat lonak tam deuh Manasseh nih cun a tuahter hna.
10Cun Bawipa nih, a sal profet hna in bia a chim i, 11“Judah siangpahrang Manasseh nih hi thil fihnung hi a tuah hna i amah hlan ah a rak ummi Amor mi nih an tuahmi vialte nakin a ṭhalo deuhmi thil a tuah hna i a siasal hna in Judah mi kha a sualter hna caah, 12cucaah Bawipa, Israel Pathian nih hi bangin a ti: ‘Zohhmanh, a ṭhat lo tuk i a theitu paoh an hna a khenh lai ding ṭhat lonak cu Jerusalem le Judah cungah ka tlunter lai. 13Cun Jerusalem cungah hin Samaria tahnak hri le Ahab innchungkhar suthri thlaimi cu ka zam hna lai i mi nih kheng cu an hnawh i an hnawh dih in a khup in an chiah bang khin Jerusalem cu ka hnawh lai. 14Cun a tangmi ka ro hi ka hlonh lai i an ral hna kut chungah ka chanh hna lai i an ral hna caah ral tlaihmi le hranchaw an si lai, 15zeicahtiah annih nih an pupa hna Izipt ram in an chuah ni in atu tiang ka mithmuh i ṭhat lonak kha an tuah lengmang ko;” tiah a ti.
16Cu hleiah Manasseh nih Judah mi kha a sualter hna caah Bawipa mithmuh i ṭhat lonak kha an tuah i, kha a sualternak hna a sualnak hleiah khan, a sual lomi thisen tampi a chuah fawn, Jerusalem cu khattelei deng in khattelei deng tiang a khat.
17Manasseh tuahsernak a tang rihmi le a tuahmi vialte le sualnak a tuahmi vialte cu, Judah Siangpahrang hna Chanrelnak Cauk chungah an i ṭial lo mei? 18Cun Manasseh cu a pupa hna sinah a it i amah dum chung, Uzza dum chungah an vui; cun a fapa Amon cu amah hmun ah khan a hung bawi.
Amon Pennak
(2Cha 33.21-25)
19Amon cu bawi hram aa thawk ah kum kul le kum hnih a si i Jerusalem in kum hnih a bawi. A nu min cu Meshullemeth a si, i amah cu Jotbah khuami Haruz fanu a si. 20A pa Manasseh nih a rak tuah bangkhan Bawipa mithmuh i thil ṭhalo kha a tuah ve. 21A pa nih a rak zulhmi lam kha a zulh hna i a pa nih an rian a rak ṭuanmi siasal vialte kha an rian a ṭuan hna i a biak hna; 22Bawipa, a pupa hna Pathian cu a hlawt i Bawipa lam kha a zul lo. 23Cun Amon cu a sinum hna nih an rawi i siangpahrang inn chungah khan an thah. 24Sihmanhsehlaw Siangpahrang Amon a rawitu hna kha rammi nih an thah dih hna i rammi nih cun a fapa Josiah kha amah hmun ah khan siangpahrang ah an ser. 25Amon tuahsernak a tang rihmi cu Judah Siangpahrang hna Chanrelnak Cauk chungah an i ṭial lo mei? 26Cun amah cu Uzza dum chung i a thlan ah khan an vui i a fapa Josiah cu amah hmun ah khan a hung bawi.
Currently Selected:
2 SIANGPAHRANG 21: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
