2 SIANGPAHRANG 18
18
Hezekiah Pennak
(2Cha 29.1-2; 31.1)
1Israel siangpahrang Elah fapa Hoshea a bawi kum thumnak ah, Judah siangpahrang Ahaz fapa Hezekiah cu bawi hram aa thawk. 2Amah cu bawi hram aa thawk ah kum kul le kum nga a si i Jerusalem khua in kum kul le kum kua a pen hna. A nu min cu Abi a si, Zekhariah fanu a si. 3Cun amah nih a pu David nih a rak tuah bantuk khan Bawipa mithmuh i a dikmi thil kha a tuah. 4Khuahrum bo kha a hrawh hna i lungphun kha a chimh hna i Asherah kha a hau. Cun Moses nih a rak sermi dar rul kha a den cikcek, zeicaahdah tiah, Israel mi nih cu caan tiang cun zihmui kha an khanghhnawh; Nehushtan tiah an ti. #Nam 21.9 5Amah nih Bawipa, Israel Pathian aa bochan; cucaah Judah siangpahrang vialte hna lakah amah hnuah amah bantuk an um ti lo i amah hlan zongah amah bantuk an rak um lo. 6Zeicahtiah amah nih Bawipa kha fek tein aa tlaih i amah hnu zulhnak kha a kaltak lo i Bawipa nih Moses nawl a pekmi nawlbia kha a zulh hna. 7Cun Bawipa cu amah sinah a um i a kalnak paoh ah khua awng a tong. Assiria siangpahrang kha a doh i a rian a ṭuan duh lo. 8Filistin mi cu Gaza le a peng tiangin, a tuk hna i ralvennak innsang in kulhmi khua tiang, a tei hna.
Samaria Rawhnak
9Hezekiah siangpahrang a bawi kum linak, cucu Israel siangpahrang Elah fapa Hoshea a bawi kum sarihnak a si, cu kum ah cun Assiria siangpahrang Shalmaneser nih Samaria kha a hunhnawh i a kulh i 10kum thum a dihnak ah a lak. Hezekiah a bawi kum ruknak, cucu Israel siangpahrang Hoshea a bawi kum kuanak a si, cu kum ah cun Samaria cu a lak. 11Assiria siangpahrang nih Israel mi cu Assiria ram ah a kalpi hna i Halah le Gozan ram tiva Habor ah le Media mi hna khua hna ah khan a chiah hna, 12zeicahdah a si tiah annih nih Bawipa an Pathian aw kha an ngai lo i a biakamnak kha an buar, Bawipa sal Moses nih nawl a pekmi vialte hna hmanh kha an buar; a ngaih zong an ngai duh lo, a tuah zong an tuah duh lo.
Sennakherib Nih A Chim Hna
(Isa 36.1-22)
13Hezekiah Siangpahrang a bawi kum hleilinak ah Assiria siangpahrang Sennakherib nih khan Judah ram chung i kulh mi khua vialte kha a rathnawh hna i a lak hna. 14Cun Judah siangpahrang Hezekiah nih Lakhish ah Assiria siangpahrang sinah cun mi a hei thlah hna i, “Ka palh cang; ka kirtak ko; ka cung i na ka khinhmi paoh ka in lai,” tiah a ti. Cun Assiria siangpahrang nih Judah siangpahrang Hezekiah cu ngun talen za thum le sui talen sawm thum a cawh. 15Cun Hezekiah nih Bawipa inn chung i a ummi ngun vialte le siangpahrang inn rokuang chung i a ummi ngun vialte cu a pek dih. 16Cu caan ah cun Hezekiah nih Bawipa biakinn innka i a ummi sui le Judah siangpahrang Hezekiah nih innka tung a hutnak hna sui cu a lak i Assiria siangpahrang kha a pek. 17Cun Assiria siangpahrang nih khan ralbawi bik le tilditmi upa bik le ralbawi ngan bik kha ralkapbu nganpi he Lakhish in Jerusalem ah Hezekiah siangpahrang sinah a hei thlah hna. Annih nih an rat tikah Puansutu Lo lei i a kalmi lam pawng i a ummi, cunglei tili tidong pawngah khan an ra i an dir. 18Cun siangpahrang kha an auh tikah inn zohkhenhtu Hilkiah i a fapa Eliakim le caṭialtu Shebnah le cazin tlaitu Joah, Asaf fapa kha an ra chuak.
19Cun ralbawi ngan bik nih cun a thawh hna i, “Hezekiah sinah cun, ‘Hi bangin a liannganmi siangpahrang, Assiria siangpahrang nih: Zei cungah dah na lung hi a hmunh: 20Bia menmen hi raldohnak ca i fimnak le thazang an si tiah na ruah! Ahodah na vaa hngatchan i na hei ka doh? 21Zohhmanh, aa hngauhmi paoh an kut a rak chuntu hluang ṭhiangṭhunh per, Izipt naa bochan ko hih. Cu bantuk cu pei Izipt siangpahrang Faro cu amah aa bochanmi hna caah a si ko cu. 22Sihmanhsehlaw, “Bawipa kan Pathian kan i bochan” nan ka ti ahcun, amah cu Hezekiah nih a khuahrum bo hna le a biakṭheng hna a hrawhpiak i Judah le Jerusalem cu, “Jerusalem i a ummi biakṭheng hmaiah hin nan biak lai,” a timi kha a si lo maw? 23Cucaah cun ra law Assiria siangpahrang ka bawipa he biakamnak ser tuah u: Nangmah nih aa cittu dingmi naa hmuh khawh hna ahcun, rangtum thong hnih kan pek lai. 24A si kun ahcun, rangleng ca le rangcung ralkap ca i Izipt naa bochan tikah hin, zeitindah ka bawipa sal hna lak i a hme bik ralbawi pakhat hmanh hi na khirh khawh kun lai? 25Cu hleiah hi hmun hi hrawh awk i ka hunhnawh tikah hin Bawipa hnatla loin maw a si? Bawipa nih cun pei a ka thawh i, “Hi ram hi hung kalhnawh law hung hrawk,” a ka ti cu, a ti,’ tiah va chim u,” tiah a ti hna.
26Cun Hilkiah fapa Eliakim le Shebnah le Joah nih ralbawi ngan bik cu, “Zaangfahnak tein na sal hna hi Aramaik holh in kan chawn tuah, zeitintiah kan hngalh ko; ralhau cungah a ummi hna theih ah Judah holh in kan chawn hlah,” tiah an ti. 27Sihmanhsehlaw ralbawi ngan bik nih cun a thawh hna i, “Hi bia hi nan bawipa le nanmah lawng sin i chim awkah maw ka bawipa nih a ka thlah? Ralhau cung i a ṭhumi hna, anmah ek lila ei awkah le anmah zun lila din awkah nannih he hrawh awkah ruah cangmi hna kha ka chim ve hna hnga lo maw?” tiah a ti.
28Cun ralbawi ngan bik cu a dir i aw fak piin Judah holh in a au i, “A liannganmi siangpahrang, Assiria siangpahrang bia cu ngai tuah u! 29Hi bangin siangpahrang nih a ti: ‘Hezekiah cu i hlenter hlah u, zeitintiah amah nih ka kut chungin an khamh kho hna lai lo. 30“Bawipa nih a kan chuahter ṭheo lai; hi khuapi cu Assiria siangpahrang kut chungah pek a si lai lo,” ti bia in Hezekiah cu Bawipa kha i hngatchanter hlah u. 31-32Hezekiah bia cu ngai hlah u, zeitintiah hi bangin Assiria siangpahrang nih a ti: ‘Keimah he remnak ser u law keimah sinah ra chuak tuah u; nan nun i nan thih nakhnga lo, nanmah ram bantuk a simi ram, rawl le mitsur hang a tamnak, changreu le mitsur dum a tamnak, oliv thingkung le khuaihliti a tamnak ram i kan kalpi hna hlantiang nannih nih nan dihlak in nanmahle nan mitsur ruang theitlai cio le nanmahle nan theipi kung theitlai cio kha nan ei lai i nanmahle nan tikhor cio ah ti nan din lai. Cun nannih nih Hezekiah nih, Bawipa nih a kan khamh lai, ti bia in a pingah an hruai tik hna ah a bia kha va ngai hlah u. 33Miphun hna pathian hna lakah aho tal nih a ram cu Assiria siangpahrang kut chungin a chanh kho bal maw? 34Hamath le Arpad pathian hna cu khuazei ah dah an um? Sefarvaim, Hena le Ivvah pathian hna cu khuazei ah dah an si? Samaria cu keimah kut chungin an chuahter kho maw? 35Jerusalem cu Bawipa nih ka kut chungin a chuahter nakhnga ding caah, hi ram vialte hna pathian hna lakah hin ka kut chungin an ram a chuahter khotu aho tal an um maw?” a ti,” tiah a ti.
36Sihmanhsehlaw mi cu dai zirziar in an um i bia kaa khat hmanh an let lo, zeicahtiah siangpahrang nawl pekmi cu, “Let hlah u,” ti a si, 37Cun siangpahrang inn zohkhenhtu Eliakim, Hilkiah fapa le caṭialtu Shebnah le cazin tlaitu Joah, Asaf fapa kha an puan tlek he Hezekiah sinah cun an ra i ralbawi ngan bik bia kha an chimh.
Currently Selected:
2 SIANGPAHRANG 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
