2 SIANGPAHRANG 16
16
Ahaz Pennak
(2Cha 28.1-27)
1Remaliah fapa Pekah a bawi kum hleisarihnak ah, Judah siangpahrang Jotham fapa Ahaz cu bawi hram aa thawk. 2Pen hram aa thawk tikah Ahaz cu kum kul a si i Jerusalem in kum hleiruk a pen hna. A pu David nih a rak tuah bangkhan, Bawipa a Pathian mithmuh ah a dikmi thil a tuah lo, 3sihmanhsehlaw Israel siangpahrang hna lam kha a zul ve. Israel mi hna hmai in Bawipa nih a rak dawimi hna miphun nih thil fihnung an rak tuah bantuk khan, amah nih cun a fapa hmanh kha raithawi-nak caah a khangh. #Deu 12.31 4Khuahrumbo ah khan le tlang le a hringmi thingkung kip toiah khan raithawinak a tuah hna i zihmui kha a khangh hna.
5Khi tikah Siria siangpahrang Rezin le Israel siangpahrang Remaliah fapa Pekah nih Jerusalem kha doh awkah an ra, Ahaz cu an dum, sihmanhsehlaw an tei kho lo. #Isa 7.1 6Khi caan ah khan Edom siangpahrang nih Edom caah Elath kha a lak ṭhan i Judah mi kha Elath cun a dawi hna; cun Edom mi cu Elath ah khan an ra i nihin ni tiangin khika ah khan an um. 7Cucaah Ahaz nih Assiria siangpahrang Tiglath-pileser sinah khan lamkal a hei thlah hna i, “Keimah cu na sal le na fapa ka si. A ka tutu siangpahrang le Israel siangpahrang kut chung hin, hung law ra ka chanh tuah,” tiah a ti. 8Bawipa innchung le siangpahrang inn rokuang chung i a ummi sui le ngun zong kha a lak hna i Assiria siangpahrang cu laksawng ah a kuat. 9Cun Assiria siangpahrang nih a bia a rak ngaihpiak; Assiria siangpahrang nih Damaskas kha a hun kalhnawh i a lak i a mi kha Kir ah a kalpi hna i Rezin kha a thah.
10Ahaz siangpahrang cu Assiria siangpahrang Tiglath-pileser kha va ton awkah Damaskas khua i a kal tikah, Damaskas khua i a ummi biakṭheng kha a hmuh. Cun Ahaz Siangpahrang nih tlangbawi Urijah cu biakṭheng pungsan le a tuah ningcang le a cingcuai kha tling tein a kuat. 11Cun tlangbawi Urijah nih biakṭheng kha a ser; Siangpahrang Ahaz nih Damaskas khua in a kuatning te khan, Siangpahrang Ahaz cu Damaskas khua in a ra phak hlanah, Urijah tlangbawi nih a rak ser dih. 12Cun siangpahrang cu Damaskas khua in a ra phanh tikah, siangpahrang nih biakṭheng cu a zoh. Khi tikah siangpahrang nih biakṭheng cu a hei naih i a cungah a kai i, 13biakṭheng cungah cun a khangh thawinak le changvut thawinak kha a khangh hna i a thlet thawinak kha a bungh i a daihnak thawinak thi kha biakṭheng cungah cun a theh. 14Cun Bawipa hmai i a ummi dar biakṭheng kha inn hmailei, amah a biakṭheng le Bawipa inn karlak, khan a ṭhial i a biakṭheng chaklei kamah cun a chiah. #Exo 27.1-2; 2Cha 4.1 15Cun Siangpahrang Ahaz nih tlangbawi Urijah cu nawl a pek i, “Biakṭheng ngan ah hin zinglei khangh thawinak le zanlei changvut thawinak le siangpahrang khangh thawinak le a changvut thawinak cu, hi rammi hna an khangh thawinak le an changvut thawinak le an thlet thawinak vialte he khan na khangh lai; cun a cungah khangh thawinak thisen vialte le raithawinak thisen vialte kha na bungh hna lai; sihmanhsehlaw dar biakṭheng cu keimah nih Pathian ka chawnhnak caah a si lai,” tiah a ti. 16Tlangbawi Urijah nih mah vialte hi Siangpahrang Ahaz nih nawl a pek bangin a tuah dih.
17Cun Siangpahrang Ahaz nih a dirnak a tung hna cu a tan hna i an sin cun i ṭawlnak kheng kha a ṭhial, cun dar cawtum nih an dohmi hmaihumpi kha a ṭhial i lung tianmi cungah a hun. #1Sia 7.23-39; 2Cha 4.2-6 18Cun Assiria siangpahrang ruangah, sabbath ni ca i a cung khuhmi lam siangpahrang inn chung i an sakmi le siangpahrang ca i lenglei in vung luhnak kha Bawipa inn khan a ṭhial hna. 19Ahaz tuahsernak a tang rihmi hna cu, Judah Siangpahrang hna Chanrelnak Cauk chungah an i ṭial lo mei? 20Cun Ahaz cu a pupa hna sinah a it i David khua chungah a pupa hna sinah an vui;cun a fapa Hezekiah cu amah hmun ah khan a hung bawi. #Isa 14.28
Currently Selected:
2 SIANGPAHRANG 16: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006